Një operacion i gjerë policor kundër krimit të organizuar, trafikimit ndërkombëtar të narkotikëve dhe pastrimit të parave është duke u zhvilluar sot në disa lokacione të Kosovës, nën monitorimin e Prokurorisë Speciale dhe me urdhër të Gjykatës Themelore në Prishtinë.

Sipas njoftimit të Policia e Kosovës, aksioni lidhet me dyshimet për përfshirje në aktivitete të trafikimit ndërkombëtar me substanca narkotike, si dhe me veprat penale “pjesëmarrja ose organizimi i grupit kriminal të organizuar”, “blerja, posedimi, shpërndarja dhe shitja e paautorizuar e narkotikëve” dhe “pastrimi i parave”.

“Nën monitorimin e Prokurorisë Speciale, bazuar në urdhëresën e Gjykatës Themelore në Prishtinë, Policia e Kosovës po zhvillon një operacion kundër krimit të organizuar në disa lokacione”, thuhet në njoftimin zyrtar.

Në operacion po marrin pjesë edhe përfaqësues të Europol, si dhe autoritetet ligjzbatuese nga Belgjika, Franca dhe Holanda, duke dëshmuar karakterin ndërkombëtar të hetimit.

“Pas përfundimit të operacionit policor, në të cilin po marrin pjesë edhe përfaqësues të EUROPOL-it, autoriteteve të Belgjikës, Francës e Holandës, Prokuroria Speciale dhe Policia e Kosovës do të njoftojnë publikun përmes një komunikate të përbashkët”, theksohet më tej në komunikatë.

Autoritetet nuk kanë bërë të ditur ende numrin e personave të përfshirë apo rezultatet e aksionit, ndërsa më shumë detaje pritet të publikohen pas përmbylljes së operacionit dhe koordinimit ndërinstitucional.

Fitorja e kryeministrit armen, Nikol Pashinian, në zgjedhjet parlamentare paraqet një shuplakë të fortë ndaj përpjekjeve ruse për të devijuar politikat e tij properëndimore, edhe pse dështimi për të fituar shumicën prej dy të tretave në Parlament do të ndërlikojë procesin e paqes me Azerbajxhanin, që po ndërmjetësohet nga Shtetet e Bashkuara.

Sipas rezultateve paraprake, partia Kontrata Civile e Pashinianit ka fituar 64 vende në Parlamentin me 105 karrige, të mjaftueshme që ai të ketë edhe një mandat në Qeveri. Dy partitë opozitare, që anojnë nga Rusia, fituan ulëset e mbetura, ndërkaq një parti tjetër duket se nuk e ka kaluar pragun zgjedhor prej 5 për qind dhe po pret që të ketë një rinumërim.

“Me rizgjedhjen e Qeverisë armene, këto zgjedhje ofrojnë një mandat të ri për ruajtjen e momentumit pozitiv të angazhimit diplomatik, normalizimin e marrëdhënieve me fqinjët dhe vazhdimin e diversifikimit të partnerëve të sigurisë së Armenisë”, tha për Radion Evropa e Lirë, Richard Giragosian, drejtues i Qendrës për Studime Rajonale në Jerevan, më 8 qershor.

Konfirmohet orientimi properëndimor

Pashiniani tani mund të pritet që të bëjë lëvizje për të forcuar lidhjet me Bashkimin Evropian dhe SHBA-në.

Vitin e kaluar, vendi miratoi një ligj për nisjen e procesit të anëtarësimit në BE, dhe liderët e BE-së e mirëpritën rezultatin e zgjedhjeve.

Presidenti francez, Emmanuel Macron, i cili këndoi një këngë me Pashinianin gjatë një vizite zyrtare në Jerevan muajin e kaluar, e uroi atë për fitore duke u zotuar për “thellim të bashkëpunimit që u shërben interesave të popujve tanë” si dhe u zotua për mbështetjen e “paqes në Armeni dhe sovranitetit, si dhe mbështetjen e procesit për afrimin me Evropën”.

Rizgjedhja e Pashinianit do t’i pëlqejnë edhe presidentit amerikan, Donald Trump, i cili e ka mbështetur atë disa javë para zgjedhjeve të 7 qershorit. “Nikola ndan plotësisht vizionin tim për paqe dhe prosperitet për Armeninë dhe rajonin e Kaukazit Jugor”, shkroi Trump në rrjetet sociale.

Trump ishte mikpritës i Pashinianit dhe presidentit të Azerbajxhanit, Ilham Aliyev, në Shtëpinë e Bardhë vitin e kaluar që në mënyrë simbolike t’i jepej fund konfliktit prej dekadash. Ishte një moment që vuri në pah rënien e ndikimit rus në rajon që nga konflikti i vitit 2023 kur Azerbajxhani rimori kontrollin e rajonit të Nagorno-Karabakut, duke bërë që 100.000 armenë etnikë të largoheshin nga shtëpitë e tyre.

Periudha parazgjedhore u përshkua me kërcënime ruse dhe veprime që synonin të dëmtonin mbështetjen e rrugës properëndimore të Pashinianit. Këto përfshin kufizime që kishin për cak eksportet ruse dhe vunë në pah se sa shteti varet nga qasja në tregjet ruse, por edhe kërcënime nga presidenti rus, Vladimir Putin, se do të ndërmarrë masa të tjera “që mund të rezultojnë me humbjen e të paktën 14 për qind të GDP-së së Armenisë”. Putin madje la të kuptohet se mund të ndodhë “skenari ukrainas” për Armeninë.

Por, analistët në Jerevan thonë se përpjekjet ruse për të ndikuar në rezultatin e zgjedhjeve nuk ishin të suksesshme.

“Ky rezultat konfirmon besimin se Armenia është nisur në drejtimin e duhur”, tha Giragosian, duke i përshkruar votimet si “zgjedhje kyç parlamentare”.

Areg Kochinian, kreu i Këshillit Kërkimor Armen, i tha Current Time se përpjekjet ruse kanë prodhuar efektin e kundërt.

“Nëse qëllimi i Rusisë ishte të tentonte të mbështeste aleatët e saj në Armeni duke përdorur instrumente të ndryshme – fushata dezinformimi, luftën tregtare, me fjalë të tjera të gjithë arsenalin hibrid – e gjithë kjo prodhoi rezultatin e kundërt”, tha ai.

“Popullsia armene, në përgjithësi, u mobilizua mirë dhe Pashiniani e arriti këtë fitore mbresëlënëse”, shtoi ai.

Rrugë e vështirë drejt paqes

Këto ishin zgjedhjet e para që nga humbja ushtarake e Armenisë në vitin 2023 dhe një pjesë kyç e platformës së Pashinianit ishte ajo që ai e quante “Armenia e vërtetë”, që nënkupton pranimin e kufijve aktualë të vendit dhe përmirësimin e marrëdhënieve me fqinjët tradicionalisht armiqësorë, kryesisht Azerbajxhanin, por edhe mbështetësin e tij, Turqinë.

Lëvizjet e fundit kanë sjellë hapjen e kufirit me Turqinë dhe Brukseli e ka paraqitur këtë si një rrugë të re për eksportet armene drejt Bashkimit Evropian.

Por, ndonëse paqja me Azerbajxhanin u festua në Shtëpinë e Bardhë, ku Trump priti Pashinianin dhe Alijevin për nënshkrimin e një deklarate të përbashkët gushtin e kaluar, në fakt bëhej fjalë për një marrëveshje për të nënshkruar një marrëveshje të ardhshme, dhe rezultatet e zgjedhjeve mund të sjellin disa pengesa përgjatë rrugës.

Azerbajxhani ka kërkuar që Armenia të miratojë një kushtetutë të re, duke hequr referencat për Nagorno-Karabakun që ai i konsideron provokuese. Kjo do të kërkonte një shumicë prej dy të tretash, të cilën Pashiniani nuk e ka siguruar në këto zgjedhje.

“Çështja më e rëndësishme e re në Armeni pas zgjedhjeve është, ose do të bëhet, tema e miratimit të një kushtetute të re”, tha Kochinian.

“Së pari, ky është një vazhdim i reformave demokratike dhe ndryshimeve në vendin tonë. Dhe së dyti, lidhet me vazhdimin e procesit të paqes me Azerbajxhanin. Meqë asnjëra prej këtyre nuk është në interes të Rusisë… pa mbështetjen e opozitës nuk do të jetë e mundur të nisë procesi i miratimit të një kushtetute të re, sepse nevojiten të paktën dy të tretat e Parlamentit për ta iniciuar atë, gjë që më pas do të çonte në një referendum për miratimin e saj”, shpjegoi ai.

Në Moskë, zëdhënësja e Ministrisë së Jashtme, Maria Zakharova, tha më 8 qershor se zgjedhjet ishin zhvilluar nën “presion të paprecedentë ndaj opozitës dhe ndërhyrje nga Perëndimi”. Ajo shtoi se zgjedhjet treguan se Armenia është thellësisht e polarizuar.

Qëndrimi i saj pasqyroi një deklaratë të bërë gjatë natës nga Samvel Karapetian, kreu i partisë Armenia e Fortë, e cila doli e dyta duke fituar 29 mandate, duke pretenduar për “përndjekje” dhe duke lënë të kuptohet, pa ofruar dëshmi, se numërimi i votave po manipulohej.

Karapetian u arrestua vitin e kaluar nën akuzat për thirrje për marrje të paligjshme të pushtetit dhe aktualisht ndodhet në arrest shtëpiak.

Një mision vëzhgues ndërkombëtar nga Organizata për Siguri dhe Bashkëpunim në Evropë (OSBE) vuri në pah më 8 qershor se kishte pasur “procedime të shumta penale ndaj kandidatëve dhe aktivistëve të opozitës, gjë që ka bërë që shumë mbështetës të opozitës të mos angazhohen aktivisht në fushatë”.

Koordinuesja speciale e OSBE-së, Farah Karimi, tha në një konferencë për shtyp në Jerevan se “kjo, së bashku me presionin ndaj punonjësve të sektorit publik për të marrë pjesë në ngjarjet e partisë në pushtet dhe masat sociale e ekonomike të prezantuara së fundi, ngriti shqetësime për barazinë e mundësive në fushatë”.

Megjithatë, OSBE-ja gjithashtu denoncoi ndërhyrjet nga Rusia.

“U vërejt presion i drejtpërdrejtë nga jashtë, në formën e kufizimeve tregtare në rritje dhe kërcënimeve të sigurisë gjatë fushatës, që synonin të ndikonin në mënyrë të padrejtë votuesit në favor të forcave opozitare”, tha Karimi. /REL/

Protestat e zhvilluara gjatë javës së fundit në Shqipëri dhe projekti i planifikuar në Zvërnec kanë tërhequr vëmendjen e mediave ndërkombëtare, ndërsa kryeministri Edi Rama ka vijuar të mbrojë publikisht nismën që ka shkaktuar debat të gjerë.

Në një intervistë për Al Jazeera, kreu i qeverisë deklaroi se projekti, me vlerë miliarda dollarë, do të realizohet pavarësisht kundërshtive dhe spekulimeve që qarkullojnë. Sipas tij, investimi përfaqëson një mundësi të rëndësishme për zhvillimin ekonomik të vendit.

Rama hodhi poshtë pretendimet se qeveria po shet ose po transferon pronë publike te investitorët privatë, duke theksuar se bëhet fjalë për një marrëveshje mes palëve private dhe se qeveria shqiptare nuk është palë në proces.

“Sa i përket projektit që ka shkaktuar gjithë këtë reagim dhe polemikë në mbarë botën, bëhet fjalë për pronë private. Nuk bëhet fjalë për tokë publike që qeveria shqiptare po e jep duke e shitur vendin. Është pronë private. Është një shprehje interesi e bazuar në një marrëveshje private mes palëve private, në të cilën qeveria shqiptare nuk ka asnjë rol”, deklaroi kryeministri.

Komentet e Ramës vijnë në një kohë kur projekti në Zvërnec mbetet në qendër të debatit publik, duke nxitur reagime nga aktivistë, banorë dhe organizata të ndryshme brenda dhe jashtë vendit. Diskutimet rreth ndikimit ekonomik, mjedisor dhe social të investimit vazhdojnë të dominojnë hapësirën publike, ndërsa qeveria këmbëngul se projekti do të sjellë përfitime afatgjata për Shqipërinë.

Komisioni Qendror i Zgjedhjeve (KQZ) po vazhdon procesimin e votave në Qendrën e Numërimit dhe Rezultateve (QKN) për zgjedhjet e parakohshme parlamentare. Sipas përditësimit të fundit zyrtar, në orën 08:10, deri më tani janë numëruar 19.46% e votave totale.

Nga këto rezultate të para preliminare, tashmë ka nisur të qartësohet gara e brendshme dhe renditja e kandidatëve më të votuar për deputetë brenda subjekteve kryesore politike.

Në listën e Vetëvendosjes, kryetari i partisë, Albin Kurti, udhëheq bindshëm me numrin më të madh të votave, i ndjekur nga Glauk Konjufca. Pesëshja e parë përbëhet nga: Albin Kurti – 41,629 vota, Glauk Konjufca – 32,690 vota, Albulena Haxhiu – 18,737 vota, Hekuran Murati – 16,254 vota dhe Donika Gërvalla-Schwarz – 15,138 vota.

Në radhët e PDK-së, kryesimin e listës me një distancë të ndjeshme ndaj kandidatëve të tjerë e mban Bedri Hamza. Sipas përditësimit të fundit, ai ka 20,228 vota, i ndjekur nga Përparim Gruda me 12,874 vota, Arian Tahiri me 11,276 vota, Uran Ismaili me 9,923 vota dhe Sala Jashari me 7,166 vota.

Në garën e brendshme të LDK-së, Vjosa Osmani momentalisht prin në listën e më të votuarve, e ndjekur ngushtë nga kryetari i partisë, Lumir Abdixhiku. Pesëshja e parë sipas votave të numëruara deri tani është: Vjosa Osmani Sadriu – 13,537 vota, Lumir Abdixhiku – 12,255 vota, Doarsa Kica-Xhelili – 9,788 vota, Hykmete Bajrami – 7,482 vota dhe Avdullah Hoti – 6,790 vota.

Gara brenda listës së AAK-së po shfaqet mjaft interesante, pasi momentalisht Ardian Gjini ka kaluar përpara Ramush Haradinajt në krye të listës. Kandidatët më të votuar të këtij subjekti janë: Ardian Gjini – 7,506 vota, Ramush Haradinaj – 6,910 vota, Daut Haradinaj – 5,304 vota, Besnik Tahiri – 4,507 vota dhe Bekë Berisha – 3,516 vota.