Kryeprokurori i Prokurorisë Themelore në Prishtinë, Zejnullah Gashi, në konferencën për media ka thënë se presin nga gjykata dënim kapital ndaj të akuzuarve në rastin e vrasjes së Liridona Ademajt.

Gashi tha se kjo vepër penale është “vrasje e rëndë” e kryer nga anëtari i familjes dhe siç tha ai e kryer në mënyrë dinake, prandaj ka kërkuar nga Gjykata një dënim kapital.

“Sa i përket cilësimit të kësaj vepre penale ashtu siç e tha edhe prokurorja, kjo vepër penale është vepër penale “vrasje e rëndë” e kryer nga anëtari i familjes dhe e kryer në mënyrë dinake e cila vepër e bën të cilësuar këtë natyrë të veprës penale andaj si e tillë presim nga Gjykata një dënim kapital sa i përket kryerësve të kësaj vepre penale të cilët ne mendojmë dhe konsiderojmë që kemi arritur në mënyrë profesionale të grumbullojmë të gjitha provat dhe presim epilogun në gjykatë”, tha ai.

Të akuzuar janë Naim Murseli, ish bashkëshorti i Liridonës, Kushtrim Kokalla dhe Granit Plava.

Ish-shefi i misionit vëzhgues të OSBE-së në Kosovë, ambasadori William Walker, që pati cilësuar Masakrën në Reçak si krim kundër njerëzimit, sot 26 vjet pas asaj dite ka bërë homazhe në Kompleksin Memorial në Reçak.

Ambasadori Wiliam Walker në homazhe është shoqëruar nga anëtarët e Listës për familjen.

Walker, i cili vjen për homazhe vjen në pothuajse në cdo përvjetor  ka thënë se dikur ishte kryesisht një shërbim përkujtimor, por tani sipas tij ka njerëz nga e gjithë Kosova, dhe “supozoj se ka edhe nga e gjithë bota”.

“Çdo vit, mbetem i mahnitur nga numri i njerëzve që janë këtu nga i gjithë vendi. Dikur ishte kryesisht një shërbim përkujtimor, por tani ka njerëz nga e gjithë Kosova, dhe supozoj se ka edhe nga e gjithë bota. Pra, ju falënderoj që po e pasqyroni këtë, ju uroj të gjithëve një ditë shumë të lumtur dhe i uroj gjithë popullit të Kosovës një Vit të Ri të lumtur”, ka thënë Walker.

Eman Rrahmani nga Lista për Familjen tha se ishte ambasadori Wiliam Walker, ai që shpërfaqi fytyrën e vërtet të gjenocidit të Serbisë.

“Jemi sot këtu me ambasadori Wiliam Walker figurë e cila i shpërfaqi fytyrën e vërtet të gjenocidit të Serbisë, një ambasador i cili ka bërë shumë për çështjen e Kosovës. Jemi në përkujtim të masakrës dhe gjenocidit që ka kryer Serbia këtu në Reçak në familjet shqiptare. Neve na mbete që të angazhohemi që të jemi çdo herë pranë atyre që kanë ndihmuar dhe kanë vepruar për  mbrojtjen e familjes, mbrojtjen e vendit dhe tokave shqiptare”, tha Rrahmani.

Presidenti i Shqipërisë, Bajram Begaj, në 26-vjetorin e Masakrës së Reçakut, ka theksuar se denoncimi i kësaj tragjedie ndryshoi rrjedhën e historisë së Kosovës dhe ndikoi në qasjen e komunitetit ndërkombëtar ndaj situatës në rajon.

Në një postim në rrjetet sociale, Begaj kujtoi masakrën e rëndë që ndodhi më 15 janar 1999, në fshatin Reçak të Kosovës, ku forcat serbe ekzekutuan dhe masakruan 45 shqiptarë civilë të paarmatosur. Ai theksoi rëndësinë e denoncimit të kësaj krimi, i cili u bë publik nga Ambasadori amerikan në Kosovë, William G. Walker, i cili, sipas Begajt, luajti një rol kyç në ndryshimin e qëndrimeve të komunitetit ndërkombëtar ndaj regjimit serb.

Begaj shprehu gjithashtu mirënjohjen për Ambasadorin Walker, duke e quajtur atë “Kalorës i Urdhrit të Flamurit”, dhe lavdëroi burrat dhe gratë e Kosovës që luftuan për lirinë e vendit të tyre. Ai nënvizoi se Masakra e Reçakut mbetet një ngjarje e përjetshme në kujtesën kolektive të Kosovës dhe botës, si një dëshmi e krimeve të luftës të kryera nga regjimi serb.

Postimi i Begajt përfundoi me një nderim të përjetshëm për viktimat e kësaj masakre, duke u shprehur se denoncimi i saj ka ndihmuar në ndryshimin e historiografisë të Kosovës dhe në forcimin e angazhimit ndërkombëtar për drejtësi.

Kryetari i Partisë Demokratike të Kosovës, Memli Krasniqi tha se institucionet duhet të zotohen për drejtësi.

Pas homazheve në Kompleksin Memorial në Reçak, ai u shpreh se masakra në këtë fshat të Shtimes është ndër më të tmerrshmet në vend.

“Përkujtojmë një ndër masakrat më të tmerrshme të luftës tonë për liri, dhe në këtë ditë përkujtojmë të gjitha viktimat e gjenocidit serb në Kosovë. Ky është një moment për secilin prej nesh e në radhë të parë për institucionet dhe për klasën politike që edhe një herë të zotohen se asnjë prej nesh nuk duhet të ndjehemi rehat derisa të ketë drejtësi për secilën jetë të dhënë per lirinë e Kosovës”, tha ai.

E kryetari i Mitrovicës, Bedri Hamza tha Reçaku është dhimbje por edhe “gur i madh në themelet e lirisë dhe pavarësisë së Kosovës”.

“Është një dhimbje po është edhe nje gur i madh në themelet e lirisë dhe pavarësisë së Kosovës. Ne do të punojmë fort që historia të ruhet të ndërtohet memoriali i gjenocidit, dhe respekt dhe përulësi deri në përjetësi për të rënët e Reçakut”, u shpreh ai.

Në 26-vjetorin e masakrës në këtë fshat të Shtimes, po vendosen lule pranë varreve të 45 civilë e shqiptarë.

Gra, fëmijë e të moshuar u vranë nga forcat policore dhe ushtarake serbe.

I pari që i tha botës që në këtë fshat të Shtimes po kryhet krim kundër njerëzimit, ishte shefi i atëhershëm i Misionit Verifikues të OSBE-së në Kosovë, William Walker.

Të gjitha të dokumentuara, por Serbia ende e mohon masakrën e 15 janarit 1999 e cila shënoi kthesën e madhe për historinë e Kosovës.