Naim Murseli u deklarua i pafajshëm për vrasjen e bashkëshortes së tij, Liridona Ademaj, ndërsa Granit Plava nuk dha një deklaratë lidhur me fajësinë e tij. Kushtrim Kokalla tha se do të vendosë pas konsultimit me mbrojtjen. Nga ana tjetër, i akuzuari Tom Dodaj pranoi fajësinë për vrasjen.

Naim Murseli, Granit Plava, Kushtrim Kokalla dhe Tom Dodaj ngarkohen për vrasjen e Liridona Ademajt, e cila ndodhi më 29 nëntor 2023.

Të akuzuarit dhanë deklaratat e tyre lidhur me fajësinë të premten në Gjykatën Themelore të Prishtinës, pas leximit të aktakuzës nga prokurorja Javorka Perlinçeviq.

Gjatë leximit të aktakuzës, prokurorja bëri një sqarim mbi kualifikimin juridik për të akuzuarit Murseli, Plava dhe Kokalla, duke ndryshuar nenin 34 dhe duke e lënë vetëm nenin 31 (bashkëkryerja) për veprën penale të vrasjes së rëndë. Po ashtu, u bë ndryshimi i kualifikimit për veprën penale “Moslajmërim i veprave apo kryerësve të tyre”, ku u largua neni 34 për të akuzuarin Kokalla.

Në procesin gjyqësor, Murseli u deklarua i pafajshëm, Granit Plava nuk dha deklaratë lidhur me fajësinë, ndërsa Kokalla tha se do të konsultohej me mbrojtësin e tij para se të jepte një përgjigje. Nga ana tjetër, Tom Dodaj pranoi fajësinë.

“Plotësisht i pafajshëm,” tha Murseli.

“Nuk dua të deklarohem pa u konsultuar me avokatin tim,” tha Kokalla.

“Në mënyrë vullnetare, pranoj fajësinë,” shtoi Dodaj.

Prokurorja e pranoi fajësinë e Dodajt, duke theksuar se ajo ishte bërë në mënyrë vullnetare dhe në përputhje me provat materiale. Avokati i Dodajt, Agron Kuqi, gjithashtu kërkoi që pranimi i fajësisë të aprovohej nga gjykata. Nga ana tjetër, avokati i palës së dëmtuar, Leotrim Sylaj, e mirëpriti pranimin e fajësisë dhe kërkoi që ai të aprovohej.

“Pajtohem me fjalët e avokatit tonë të autorizuar, mirëpresim pranimin e fajësisë,” tha Leonard Ademaj.

Gjykatësja Dermaku miratoi pranimin e fajësisë për Tom Dodaj dhe procedura ndaj tij u veçua, me shpalljen e aktgjykimit që pritet të bëhet brenda 10 minutash.

Përpara leximit të aktakuzës, prokurorja Perlinçeviq informoi se mbrojtja e të akuzuarve dhe palët e tjera kishin pranuar shkresat e lëndës, por kishte pasur ankesë për moshapjen e CD-ve.

Ajo shtoi se Prokuroria kishte njoftuar mbrojtësit për këtë çështje, por nuk kishte marrë përgjigje. Gjykatësja Dermaku, nga ana e saj, e konfirmoi që CD-të ishin hapur dhe se ato ishin pjesë e diskut të jashtëm.

Ajo gjithashtu kërkoi që IT i gjykatës të verifikonte nëse CD-të hapeshin.

Presidentja e Kosovës, Vjosa Osmani nuk ka dashur të komentoj deklaratën e ish-bashkëpartiakës së saj dhe kryetares së Listës Guxo, Donika Gërvalla për kreun e Aleancës së Ardhmërisë së Kosovës, Ramush Haradinaj, lidhur me “gjeneral të vetëshpallur”.

“Nuk përcjelli deklarata të tilla”, tha shkurt Osmani kur u pyet  si e vlerëson deklarimin e Gëvallës.

Etiketimi i liderit të AAK-së, Ramush Haradinaj si “gjeneral i vetëshpallur” të cilin ia bëri ministrja e Punëve të Jashtme, Donika Gërvalla, Lëvizjes Vetëvendosje i kushtoi 10 mijë euro. Ky është edhe dënimi më i rëndë që Paneli Zgjedhor për Ankesa dhe Parashtresa ia shqiptoi këtij subjekti politik me vendimet e 29 janarit 2025.

Ajo gjatë fjalimit të saj tha se opozita “nuk dinë dhe nuk duan të qeverisin në Kosovë,” teksa kandidatin për kryeministër nga koalicioni për Kosovën Fituese Ramush Haradinaj e ka quajtur “hero të Çakorrit” dhe “gjeneral të vetëshpallur”.

Presidentja e Kosovës, Vjosa Osmani ka bërë homazhe pranë shtatores së heroit Zahir Pajaziti, me rastin e 28 vjetorit të rënies së tij dhe dy heronjve të tjerë Hakif Zejnullahu dhe Edmond Hoxha.

Osmani kujtoi sakrificën, trimërinë dhe guximin e heronjve të Kosovës, Zahir Pajaziti, Hakif Zejnullahu dhe Edmond Hoxha, derisa u shpreh se “ata u bënë lajmëtarët e lirisë dhe inspiruan breza të tëra të UÇK-së t’i bashkohen luftës çlirimtare”.

E para e vendit u shpreh se liria dhe sovraniteti për të cilën sakrifikuan heronjtë, duhet të mbrohen vazhdimisht.

“Sot së bashku me të gjithë qytetarët e Republikës së Kosovës sovrane, të lirë e të pavarur kujtojmë sakrificën e jashtëzakonshme, trimërinë dhe guximin e heroit të Kosovës, Zahir Pajaziti, i cili me bashkëluftëtarët Hakif Zejnullahu, Edmond Hoxha u bënë lajmëtarët e lirisë tonë, të cilët dhanë jetën jo vetëm për lirinë e Kosovës, por në të njëjtën kohë inspiruan dhe breza të tërë të UÇK-së t’i bashkohen luftës tonë çlirimtare. Të luftojnë për Kosovën, për popullin e saj, për lirinë e kësaj toke deri në çlirim përfundimtar i cili erdhi në qershor 1999. Ideali për të cilin luftoi Zahir Pajaziti me shokë duhet të na shërbejë sidomos ne ditët e sotme, sepse liria e sovraniteti nuk janë të mirëqena. Ato vazhdimisht duhet të mbrohen e të mirëmbahen”, tha Osmani.

Homazhe bënë edhe kryeministri i Kosovës, Albin Kurti bashkë me ministra dhe pjesëtarë të tjerë të kabinetit të tij.

Po ashtu, pranë shtatores së Zahir Pajazitit në Prishtinë bënë edhe krerë të partive politike bashkë me kandidatë për deputetë.

Më 31 janar 1997 ndodhi njëra nga betejat e para madhore të pjesëtarëve të Ushtrisë Çlirimtare të Kosovës.

Tre strategët, Zahir Pajaziti, Hakif Zejnullahu dhe Edmond Hoxha ishin duke udhëtuar nga Prishtina në drejtim të Vushtrrisë, derisa grupi i tyre zbulohet nga sigurimi serb, të cilët kishin vënë pritë në fshatin Pestovë, ku të tre bien heroikisht në luftë me ta.

Qeveria e Mbretërisë së Bashkuar ka vendosur ndryshime të reja në rregullat e vizave, duke mundësuar që ukrainasit të sjellin përsëri fëmijët e tyre për t’u bashkuar me ta. Këto ndryshime pasojnë një kufizim të papritur të vendosur në shkurtin e kaluar, i cili pengoi ukrainasit që nuk kishin të drejtë të jetonin përherë në Mbretërinë e Bashkuar të sponsorizonin fëmijët e tyre përmes skemës “Homes for Ukraine”. Ky kufizim kishte lënë shumë familje të ndara, me disa prindër që kërkonin rrugë të paligjshme për të sjellë fëmijët në Mbretërinë e Bashkuar.

Organizatat bamirëse kanë mirëpritur njoftimin e ri si një “lehtësim të madh” për ata prindër që ishin ndarë nga fëmijët e tyre, por ato kanë theksuar se ky hap nuk ndihmon ata që janë të detyruar të largohen nga anëtarë të tjerë të familjes, si vëllezërit, motrat apo prindërit.

Që nga nisja e skemës Homes for Ukraine në mars 2022, mbi 190,000 njerëz kanë arritur në Mbretërinë e Bashkuar për t’u strehuar nga lufta. Megjithatë, pas ndryshimeve të shkurtit të kaluar, vetëm ata që janë shtetas britanikë ose irlandezë, ose ata që kanë të drejtën për të jetuar përherë në Mbretërinë e Bashkuar, mund të vepronin si sponsorë për të strehuar ukrainas. Ky kufizim kishte bërë të pamundur për shumë ukrainas të paqëndrueshëm të sjellin anëtarët e familjes.

Tani, një prind ose kujdestar ligjor që jeton në Mbretërinë e Bashkuar sipas skemave të vizave për ukrainasit mund të aplikojë për të sponsorizuar fëmijën e tij për t’u bashkuar në MB. Dora-Olivia Vicol, shefe ekzekutive e Qendrës për të Drejtat e Punës, e ka quajtur këtë hap një “lehtësim të madh”, por ka paralajmëruar se kjo nuk është një zgjidhje për ata që janë të detyruar të largohen nga anëtarë të tjerë të familjes.

Organizatat bamirëse kanë raportuar se shumë ukrainas kanë kërkuar rrugë të paligjshme për të sjellë fëmijët e tyre për t’u bashkuar me ta në Mbretërinë e Bashkuar. Yuliia Ismail, këshilltare për imigracionin, ka kërkuar që Home Office të veprojë shpejt për të zgjidhur aplikimet e pazgjidhura dhe të sigurojë që fëmijët e mbetur në zonat e konfliktit të Ukrainës të kenë mundësinë të bashkohen me familjet e tyre./UBTNews/

Kryeqyteti, në bashkëpunim me shoqatat e dala nga lufta e UÇK-së dhe degët e tyre në Prishtinë, me rastin e 28-vjetorit të ditës së rënies së heroit Zahir Pajaziti dhe bashkëluftëtarëve të tij Hakif Zejnullahu dhe Edmond Hoxha ka ndarë mirënjohje për familjet Pajaziti, Zejnullahu dhe Hoxha për kontributin e dhënë në çlirimin e vendit, po ashtu kanë bërë edhe nderime pran shtatores së heroit Pajaziti në Prishtinë.

Në odën e Komunës së Prishtinës, kryetari Perparim Rama derisa ka ndarë mirënjohje për familjet Pajaziti, Zejnullahu dhe Hoxha për kontributin e dhënë në çlirimin e vendit, ka theksuar se kanë krijuar edhe një zyrë që merret pikërisht me çështjet e UÇK. Me ç’rast, Rama ka vlerësuar lartë figurat e tyre, duke theksuar se falë tyre populli shqiptar e gëzon lirinë sot.

Me këto mirënjohje siç tha Rama “modeste”, janë për të treguar që institucionalisht ata që kanë sakrifikuar për liri e paqe nuk do të harrohen asnjëherë.

“Sado pak në këtë përvjetor t’i nderojmë, t’i japim mirënjohje familjeve të heronjve tanë kombëtare, heronjve të mëdhenj të cilët kanë dhënë çdo gjë, edhe jetën e tyre që ne sot me pas vendin e lirë, në paqe dhe të mund të planifikojmë për të ardhmen tonë të lirë dhe jo të na planifikojë dikush tjetër. E kemi krijuar edhe një zyrë që merret pikërisht me çështjet e UÇK-së, me veprimet e tyre dhe mos me na lënë të harrojmë ndonjëherë diçka. Po mundohemi si institucion të nderojmë secilin që ka dhënë gjithçka, e posaçërisht si heronjtë tanë si Zahiri, Edmondi, Hakifi të cilët edhe janë vet UÇK. Familjet prej të cilave janë ardhur, ende është ajo dhimbja e madhe, mungesa e tyre, por ne tash si vend, shtet kemi të mundur përveç të planifikojmë një të ardhëm për fëmijët tanë, vendin tonë po ashtu e kemi një ndjenjë të lirisë si rezultat i sakrificës së tyre, dhe u jemi gjithmonë mirënjohës për lirinë, paqen qe e kemi sot në vend”, ka thënë Rama.

Bajram Pajaziti vëllai i heroit Zahiri Pajaziti ka falënderuar komunën për vlerësimin sa i përket atyre që sakrifikuan çdo gjë për lirinë e vendit.

“Dua të ju falënderoj juve që keni krijuar një zyre për Shoqatën e të dalave nga lufta. Faleminderit që keni konsideratë për këto kategori. Edhe kjo është një mirënjohje jashtëzakonisht e madhe për neve familjarëve. Por, respekt të madh edhe ndaj gjithë atyre që kanë derdhur gjak, për gjithë dëshmorët e kombit”, tha ai.

28 vjet më parë ranë heroikisht tre ushtarët emblematikë të Ushtrisë Çlirimtare të Kosovës, Zahir Pajaziti, Hakif Zejnullahu dhe Edmond Hoxha.

Më 31 janar 1997 ndodhi njëra nga betejat e para madhore të pjesëtarëve të Ushtrisë Çlirimtare të Kosovës.

Tre strategët, Zahir Pajaziti, Hakif Zejnullahu dhe Edmond Hoxha ishin duke udhëtuar nga Prishtina në drejtim të Vushtrrisë, derisa grupi i tyre zbulohet nga sigurimi serb, të cilët kishin vënë pritë në fshatin Pestovë, ku të tre bien heroikisht në luftë me ta.