Në kuadër të përkushtimit të vazhdueshëm të UBT-së për të ofruar arsim cilësor, praktik dhe të orientuar drejt tregut të punës, studentët e nivelit Bachelor dhe Master të programit Inxhinieria e Agrikulturës dhe Mjedisit zhvilluan një vizitë studimore në dy nga ndërmarrjet e njohura të sektorit të bletarisë, “API ROI” dhe “APIMODERNA”.

Kjo vizitë praktike u realizua si pjesë e aktiviteteve akademike që synojnë avancimin profesional të studentëve përmes ndërthurjes së dijes teorike me përvojën direkte në industri, duke i ekspozuar ata ndaj proceseve reale të prodhimit, menaxhimit dhe kontrollit të cilësisë në një sektor me rëndësi të veçantë për zhvillimin e qëndrueshëm agrikulturor dhe ekonomik.

Gjatë kësaj eksperience, studentët patën mundësinë të njihen nga afër me teknologjitë moderne të përdorura në industrinë e bletarisë, proceset e përpunimit të produkteve të bletës, standardet e sigurisë ushqimore, si dhe praktikat e kontrollit të cilësisë që garantojnë produkte konkurruese në treg.

Përmes prezantimeve profesionale dhe diskutimeve me ekspertë të fushës, studentët u informuan mbi rëndësinë e inovacionit në agrikulturë, menaxhimin e qëndrueshëm të resurseve natyrore dhe potencialin që sektori i bletarisë ka në zhvillimin ekonomik dhe ambiental.

Vizita në “API ROI” dhe “APIMODERNA” shërbeu si një platformë e rëndësishme për studentët që të kuptojnë më mirë sfidat dhe mundësitë e sektorit, duke zhvilluar kompetenca praktike që janë thelbësore për karrierën e tyre profesionale në fushën e agrikulturës, mjedisit dhe agro-biznesit.

Programi Inxhinieria e Agrikulturës dhe Mjedisit në UBT vazhdon të dëshmojë përkushtimin e tij në përgatitjen e profesionistëve të rinj përmes metodave bashkëkohore të mësimdhënies, bashkëpunimit me industri relevante dhe organizimit të aktiviteteve praktike që i bëjnë studentët më të gatshëm për tregun vendor dhe ndërkombëtar të punës.

Kanë nisur zyrtarisht xhirimet e filmit me metrazh të shkurtër “Run”, me regji nga Florist Bajgora dhe producent Andi Bajgora. Projekti është i subvencionuar nga Qendra Kinematografike e Kosovës.

Filmi sjell një rrëfim intim, ku një kamerë e zhgroposur nis të mbledhë kujtime të reja. Në mes të skenave me fytyra të lumtura, shfaqet personazhi Selvia me një lajm që ndryshon rrjedhën e ngjarjeve, duke sjellë momentin e fundit të regjistrimit përpara një largimi të dytë.

Filmi synon të sjellë një qasje intime dhe emocionale përmes një narrative të veçantë vizuale, duke u bërë pjesë e skenës së filmit të shkurtër vendor.

Sipas raportit 24 orësh të Policisë, një rast i kalimit të paautorizuar të vijës kufitare është regjistruar më 3 maj, rreth orës 15:15, në Han të Elezit.

Policia bën të ditur se një i dyshuar mashkull, shtetas kosovar dhe njëkohësisht shtetas i Maqedonisë së Veriut, është shoqëruar në stacion policor pasi kishte kaluar ilegalisht në territorin e Kosovës nga Maqedonia e Veriut.

Me vendim të prokurorit, pas intervistimit, i dyshuari i është dorëzuar autoriteteve policore kufitare të Maqedonisë së Veriut, ndërsa rasti është trajtuar sipas procedurave ligjore në fuqi.

Në Jerevan të Armenisë ka nisur sot edicioni i tetë i Komunitetit Politik Evropian, ku janë bërë bashkë rreth 50 udhëheqës shtetesh për të adresuar problemet më urgjente të kontinentit. Në këtë forum të rëndësishëm, Kosova përfaqësohet nga kryeministri në detyrë, Albin Kurti, ndërsa Shqipëria nga kryeministri Edi Rama.

Ndonëse agjenda zyrtare përfshin sigurinë ekonomike, mbrojtjen nga kërcënimet hibride dhe qëndrueshmërinë e demokracisë, pritet që bisedimet joformale të dominohen nga gjeopolitika dhe kriza energjetike. Presidenti i Rumanisë, Nicușor Dan, vuri theksin te siguria e energjisë, ndërsa kryeministri polak Donald Tusk rikujtoi se aleanca me SHBA-në mbetet shtylla e pazëvendësueshme e Evropës.

Për shkak të pozicionit të Armenisë pranë Iranit, konflikti në Lindjen e Mesme do të jetë në qendër të vëmendjes. Gjithashtu, liderët do të analizojnë ndikimin e politikave të presidentit amerikan Donald Trump në të ardhmen e marrëdhënieve transatlantike.

Ky samit shënon një precedent historik me pjesëmarrjen e kryeministrit të Kanadasë, Mark Carney, i cili është lideri i parë jashtë Evropës që i bashkohet këtij formati. Punimet po udhëhiqen nga presidenti i Këshillit Evropian, Antonio Costa, dhe kryeministri armen Nikol Pashinyan, të cilët bënë thirrje për unitet global në funksion të paqes dhe stabilitetit.