BE-ja u ka ofruar Shteteve të Bashkuara një skemë tarifore “zero për zero”, tha të hënën presidentja e Komisionit Evropian Ursula von der Leyen, duke kërkuar të shmangë një luftë tregtare kokë më kokë.

“Ne kemi ofruar tarifa zero për zero për mallrat industriale siç kemi bërë me sukses me shumë partnerë të tjerë tregtarë. Sepse Evropa është gjithmonë e gatshme për një marrëveshje të mirë. Kështu që ne e mbajmë atë në tryezë,”  tha ajo në një konferencë për shtyp  së bashku me kryeministrin norvegjez Jonas Gahr Store.

SHBA dhe BE iu afruan heqjes së tarifave industriale një dekadë më parë në diskutimet e tyre për TTIP, Partneritetin Transatlantik të Tregtisë dhe Investimeve, që përfundimisht u anulua nga Trump në mandatin e tij të parë.

Heqja e tarifave për produktet industriale si makinat dhe kimikatet nuk shihej si e diskutueshme në atë kohë, produktet bujqësore dhe standardet e sigurisë ishin një patate shumë më e nxehtë.

Oferta e rinovuar e Von der Leyen vjen pasi Trump javën e kaluar  vendosi tarifa 20 për qind ndaj BE-së  dhe një morie partnerësh të tjerë tregtarë, duke i rritur barrierat tregtare të SHBA-së në nivelin më të lartë në më shumë se një shekull.

Lufta tregtare e Trump ka shkaktuar panik investitorët, me tregjet financiare në të gjithë botën duke humbur triliona dollarë ose euro në vlerë . Aksionet evropiane pësuan rëniet e tyre më të mëdha njëditore që nga fillimi i pandemisë Covid të hënën.

Mes trazirave të tregut, von der Leyen u përpoq të krijonte qetësi

BE-ja vendos tarifa mesatare prej vetëm 1.6 për qind për produktet jo-bujqësore të SHBA-së, në bazë të ponderimit të tregtisë. Por ajo vendos një tarifë më të lartë prej 10 për qind për makinat e importuara amerikane – megjithëse SHBA është i vetmi vend i G7 që ende e paguan atë, sepse TTIP nuk ishte përfunduar.

Duke sqaruar, Komisioneri i Tregtisë së BE-së Maros Sefçoviç tha veçmas se marrëveshja zero për zero mund të mbulojë makinat dhe të gjitha mallrat e tjera industriale, të tilla si kimikatet, farmaceutikët, makineritë e gomës dhe plastike.

Von der Leyen gjithashtu  nuk përjashtoi hakmarrjen : “Ne jemi gjithashtu të përgatitur të përgjigjemi përmes kundërmasave dhe të mbrojmë interesat tona,” tha ajo.

27 ministrat e tregtisë të BE-së u takuan në Luksemburg më herët të hënën për të diskutuar masat e SHBA-së dhe përgjigjen e Komisionit.

Ende pritet këtë javë hakmarrja e BE-së kundër tarifave prej 25 për qind të Trump për çelikun dhe aluminin që kanë qenë në fuqi që nga muaji i kaluar. Šefčovich, duke folur me gazetarët pas takimit në Luksemburg, tha se Komisioni kishte përgatitur “një listë të fortë”.

Franca dhe Egjipti nënshkruan sot marrëveshje partneriteti strategjik në fushat që mbulojnë shëndetin, transportin dhe energjinë, për të cilat presidenti francez Emmanuel Macron tha se do të ndihmonte në forcimin e stabilitetit të Egjiptit në rajon.

“Egjipti është një partner strategjik për vendin tonë”, tha Macron, duke folur së bashku me presidentin egjiptian Abdel Fattah al-Sisi në një konferencë shtypi në Kajro.

Ai theksoi se dëshiron të rikonfirmojë angazhimin e Francës për të garantuar stabilitetin e Egjiptit, duke pasur parasysh kontekstin e përkeqësimit të klimës në rajon dhe faktin se ekonomia egjiptiane po përballet me sfida.

Macron tha se ai vazhdon të mbështesë bisedimet midis Egjiptit dhe Fondit Monetar Ndërkombëtar dhe Komisionit Evropian.

FMN muajin e kaluar miratoi një disbursim prej 1.2 miliardë dollarësh për Egjiptin, i cili po lufton me inflacionin e lartë dhe mungesën e valutës së huaj.

Macron shtoi se agjencia e zhvillimit të ndihmës së huaj të Francës do të nënshkruajë kredi dhe grante me vlerë 260 milionë euro për Egjiptin në fusha të tilla si transporti, shëndetësia, uji dhe energjia.

Macron dhe Sisi bënë thirrje gjithashtu për një armëpushim dhe luftime në Gaza dhe për lirimin e pengjeve izraelitë.

Kryeministri izraelit Benjamin Netanyahu ndodhet në një vizitë zyrtare në Uashington për një takim me Presidentin amerikan Donald Trump, vizita e dytë që nga marrja e detyrës nga Trump në janar. Takimi pritet të fokusohet në disa çështje kyçe, përfshirë situatën në Gaza, programin bërthamor të Iranit, tarifat tregtare, marrëdhëniet me Turqinë, kthimin e pengjeve izraelite dhe qëndrimin ndaj Gjykatës Penale Ndërkombëtare.

NPR dhe Axios raportojnë se takimi u vendos në mënyrë të papritur, duke befasuar jo vetëm zyrtarët izraelitë por edhe disa përfaqësues të administratës amerikane.

Ky takim e bën Netanyahun liderin e parë të huaj që kërkon rinegocimin e marrëveshjeve tregtare pas vendimit të administratës Trump për të vendosur tarifa globale që kanë tronditur tregjet financiare. Vetëm gjatë javës së kaluar, këto zhvillime kanë shkaktuar humbje me vlerë 5 trilionë dollarë në indeksin S&P, përmes një rënieje rekord të aksioneve.

Pavarësisht përpjekjeve të Izraelit për të parandaluar ndikimin e tarifave, përfshirë heqjen paraprake të detyrimeve për pjesën e mbetur të mallrave amerikane, administrata Trump vijoi me masën e re, duke sjell në vëmendje deficitin tregtar me Izraelin. Aktualisht, SHBA është partneri më i madh tregtar i Izraelit dhe aleati më i ngushtë strategjik, me 98% të mallrave amerikane që importohen pa taksa në bazë të një marrëveshjeje të tregtisë së lirë të nënshkruar rreth katër dekada më parë.

Një zyrtar nga Ministria izraelite e Financave ka shprehur shqetësimin se tarifat e reja mund të ndikojnë veçanërisht në sektorët e eksportit të makinerive dhe pajisjeve mjekësore.

Ministri gjerman i Ekonomisë në largim, Robert Habeck tha sot se mendimi që qëndron pas politikës së tarifave të presidentit amerikan, Donald Trump është “i pakuptimtë”.

“Supozimi se një suficit ose deficit tregtar ishte një problem është “i gabuar”, tha Habeck, ndërsa mbërriti në një takim urgjent të ministrave të Tregtisë të Bashkimit Evropian, në Luksemburg.

Importet nga vendet e BE-së në SHBA përballen me tarifa të reja prej 20% duke filluar nga e mërkura.

“Në fund të fundit, globalizimi u shërben të gjitha ekonomive”, tha ai, duke shtuar se ekonomia amerikane ishte rritur më shpejt se ekonomitë evropiane në 20 vitet e fundit.

Habeck u bëri thirrje homologëve të tij të BE-së – të veprojnë së bashku dhe të mos përpiqen të sigurojnë kushte të favorshme, individualisht.

Ministri gjerman paralajmëroi gjithashtu për rrezikun ndaj reagimeve të nxituara, duke thënë se BE-ja nuk kishte presion nga koha për të reaguar ndaj raundit të fundit të njoftimeve të tarifave./ATSH/