Në rubrikën Ditari, kemi përzgjedhur disa nga lajmet më të rëndësishme të kësaj dite, në periudhën 1993-199

17 tetor 1994

Në komunën e Ferizajt gjatë nëntë muajve të fundit u morën në polici 935 qytetarë

Gjatë nëntë muajve të fundit të këtij viti, në komunën e Ferizajt policia serbe në forma të ndryshme mori në pyetje dhe i keqtrajtoi 935 qytetarë shqiptarë, njofton Komisioni për Informim i Degës së LDK-së në Ferizaj.

Në pyetje u morën gjithësej 365 veta, kryesisht aktivistë të LDK-së, me pretekste të ndryshme u arrestuan 298 qytetarë shqiptarë, ndërsa u keqtrajtuan fizikisht 272 sish.

Me pretekst të kërkimit të armëve bastisi 165 shtëpi. Përveç 13 kryetarëve të nëndegëve të LDK-së në Ferizaj, në pyetje u morën edhe rreth 300 aktivistë të LDK-së.

Policia serbe ka ushtruar presion edhe ndaj aktivistëve të Këshillit komunal për financim të Ferizajt, punëtorëve të arsimit etj.

Shkollës së Zaskokut i është hequr emri “Naim Frashëri” dhe është përdhosur busti, janë thyer lokalet e shkollës fillore “Jeronim De Rada”, ndërsa në pyetje janë marrë shumë përgjegjës komunal të arsimit, arsimtarë dhe pronarë të shtëpive që janë shndërruar në shkolla.

Sipas analizës së KI 90 për qind të bastisjeve në komunën e Ferizajt janë bërë me pretekst të kërkimit të armëve. Dëshmitarët dhe viktimat e këtyre bastisjeve tregojnë për veprime brutale e të egra të forcave serbe. Në fshatin Mirash, për shembull, torturës dhe rrahjeve i janë nënshtruar 40 për qind e kryefamiljarëve. Disa prej tyre janë rrahur në postkomandën e Babushit. Aksionet me pretekst të kërkimit të armëve në qytet dhe në fshatrat Nerodime, Mirash, Kosinë, Mirosalë, Tankosiq, Slivovë e Burrnik, ishin të shpeshta veçanërisht gjatë muajve maj e qershor.

Policia serbe gjatë nëntë muajve të fundit, nuk i kurseu as fëmijët. Më 27 korrik të këtij viti, policia serbe vrau pa kurrfarë shkaku edhe fëmijën 6 vjeçar, Fidan Brestovcin nga Prishtina dhe plagosi dy prindërit e tij. Gjatë kësaj periudhe policia plagosi të riun Ajvaz Ferati. I plagosur, ai u torturua në stacionin e policisë në Ferizaj.

Gjatë jë ndërhyrje të policisë serbe në fshatin Zaskok, ku i ishin shkulur një serbi disa fidane, u rrahën dhe u kërcënuan mbi 30 fshatarë, në mesin e të cilëve edhe disa fëmijë të moshës 5 – 8 vjeçare.

Serbët e instaluar në gjykatat e Ferizajt dhe të Prishtinës dënuan disa shqiptarë të komunës së Ferizajt, duke përfshirë funksionarë lokalë të partive politike, veprimtarë të KMDLNJ-së si dhe deputetë.

Bajrush Xhemajli, kryetar i Degës së KMDLNJ-së dhe deputet në Parlamentin e Republikës së Kosovës, u dënua me 5 vjet burg, Adem Salihaj, kryetar i Degës së LDK-së dhe deputet i Parlamentit të Republikës së Kosovës, u dënua me 6 vjet burg; veprimtarët Ismail Mehmeti e Sylejman Hasani u dënuan me nga 5 vjet burg; për vepra penale janë dënuar edhe Sanie Aliu dhe Luan Heta.

Në shkurt të këtij viti serbët e instaluar në gjykatën për kundërvajtje të Ferizajt dënuan me nga 30 ditë burg pesë funksionarë e veprimtarë ferizajas: Xhabir Morina, nënkryetar i Degës së LDK-së, Hyrë Emini, kryetare e FR të LDK-së, Sylejman Bytyçi, kryetar i Degës së FISH-it, Elmi Reçica, veprimtar i KMDLNJ-së dhe Rexhep Ismani, kryetar i Klubit të artistëve figurativë “Zef Kolombi” dhe më 5 tetor janë dërguar në vuajtjen e dënimit. Këta veprimtarë u dënuan për shkak se kishin marrë pjesë në manifestimin kulturor “Flaka e janarit ’94”.

Në aksionin e organeve ushtarake e policore serbe për dërgimin me dhunë të të rinjve shqiptarë në ushtrinë serbe katër të rinj shqiptarë janë dërguar në ushtri.

Nga banesat janë dëbuar katër familje shqiptare.

Nga puna janë pezulluar 150 punëtorë shqiptarë.

Sasia e mallit dhe shuma e parave të plaçkitura nga shqiptarët arrin vlerën e disa qindra mijëra markave gjermane, thuhet në informatën e Komisionit për Informim të LDK-së dhe të Degës së KMDLNJ-së në Ferizaj.

17 tetor 1995

Dhuna e përditshme në Kosovë

Malishevë: – Më 11 tetor, policia për të satën herë ishte në shtëpinë e veteranit të arsimit, Abdyl Krasniqit në fshatin Drenoc. Prej tij policët kërkojnë të dorëzojë një pushkë automatike. Me këtë rast, ata i lanë ftesën djalit të tij, Betimit që të paraqitet në polici.

Skënderaj: – Më 5 tetor, një patrullë policore e postkomandës së Runikut mori në shtëpinë e tij Fatmir Sahitin nga Kopiliqi i Ulët dhe me pretekst të kërkimit të armëve e keqtrajtoi atë rëndë fizikisht. Ai u urdhërua që në polici të paraqitet sërish më 14 tetor.

Më 13 tetor, me të njëjtin pretekst, u mor dhe u keqtrajtua në polici Feriz Selimi.

Më 15 tetor, po me pretekst të armës, u mor dhe u keqtrajtua rëndë fizikisht në polici vëllai i Ferizit, Bislimi.

Bëhet me dije se me të njëjtin pretekst policia kërkon edhe Ramiz Selimin (15).

Ditë më parë, në vendkalimin kufitar Hani i Elezit, policia i mori pasaportën Fatmir Gecit nga LLausha e Skënderajt. Ai është anëtar i kryesisë së FR të Degës së LDK-së në Skënderaj.

Policia serbe në Skënderaj, me pretekst të kërkimit të armëve, keqtrajtoi Haxhi Bejtën nga Prekazi i Epërm.

Për shkak të lëndimeve që pësoi nga rrahja në polici, z. Beka u detyrua të kërkonte ndihmë mjekësore.

Për shkak të urdhërit të policisë, Haxhiu u paraqit edhe dje në polici. Policët i thanë atij se duhet gjithsesi të dorëzojë armët që i kërkohen dhe e urdhëruan që në polici të paraqitet sërish sot.

Para pak ditësh, duke u kthyer nga Holanda për në atdhe, në Prishtinë policia serbe arrestoi Shaban Zyhranin nga Llausha e Skënderajit, profesor i gjuhës angleze.

Ai u mbajt në polici tërë natën dhe u keqtrajtua fizikisht.

Zoti Zyhrani u lirua të nesërmen, mirëpo sigurimi serb ka kërkuar prej tij të paraqitet sërish në sigurimin shtetëror në Mitzvicë. Ai iu përgjigj këtij urdhëri. Në sigurimin serb ai u kërcënua dhe u keqtrajtua sërish.

Shaban Zyhrani është pyetur për punën dhe veprimtarinë e shqiptarëve në Holandë.

Ai është urdhëruar që në polici të paraqitet sërish më 27 tetor.

Viti: – Më 14 tetor, në ora 10:30, një patrullë e stacionit të policisë të Kllokotit, shkojnë në shtëpinë e Hamdush Hysenit nga fshati Ramajan, i cili punon në ambulancën humanitare “Nëna Terze” si teknik medicinal.

Pasi që Hamdushi nuk gjendej në shtëpi, policët ia lënë ftesën që të paraqitet të hënën në orë 8:00 në stacionin e policisë në Kllokot. Hamdushi paraqitet në kohën e caktuar, por pas pritjes mëse dy orë, atij i thonë se nuk ka ardhur inspektori nga Gjilani i cili duhet ta marrë në pyetje dhe e lirojnë duke i thënë se biseda e paraparë shtyhet për më vonë, pa ia caktuar ditën dhe kohën.

Podujevë: Të premtën në mesditë tre policsë serbë shqetësuan disa familje në lagjen Malokajt në fshatin Bradash.

Me pretekst se gjoja po kërkonin Eset Malokun, i cili punon përkohësisht në Zvicër, tre policë serbë hynë në oborrin e shtëpisë së Avni Malokut, kryetar i Nëndegës së LDK-së dhe drejtor i shkollës në Bradash, pastaj në oborrin e Tasim Malokut, anëtar i Kryesisë së Aktivit të LDK-së dhe në oborrin e Bajram Malokut.

Aktivistët e LDK-së në këtë fshat u pyetën për anëtarët e familjeve të tyre.

Me pretekst të kërkimit të armëve, policia serbe ishte në fshatin Kokorovicë, dhe atë në shtëpitë e Hashim Xhemajlit, Hamit Xhemajlit, ku morën një revole dhe në shtëpitë e Enver Shabanit e Shaban Zeqirit.

Enver Shabani e Hamit Xhemajli u urdhëruan që të paraqiten në pilici.

Më 13 tetor, policia kërkoi armë nga Bajram Islami nga Podujeva.

Vushtrri: – Sipas urdhëresës, dje në stacionin e policisë në Vushtrri u paraqit Murat Përçuku nga fshati Ceceli. Policët kërkuan prej tij informata për djalin e tij Bedriun, i cili tash tri vjet ndodhet në Gjermani. Ata i thanë Muratit se djali i tij duhet të paraqitet gjithsesi në polici, pasi ai është “politikisht i papërshtatshëm”.

Më 13 dhe 16 tetor, në stacionin e poicisë në Vushtrri, me pretekst të kërkimit të armëve, u morën Brahim dhe Rrahim Hasani nga fshati Ropicë.

17 tetor 1997

Ndërhyrje e forcave serbe në fshatin Rastavicë të Deçanit

Prishtinë, 17 tetor (QIK)

Forca të mëdha të policisë serbe kanë rrethuar sot herët në mëngjes fshatin Rastavicë të Deçanit, me pretekst se pas mesnatës, është sulmuar vendbanimi i kolonëve me prejardhej sllave të ardhur nga Shqipëria.

Komisioni për Informim i Degës së LDK-së në Deçan njofton për shumë shtëpi të basrisura e shqiptarë të keqtrajtuar e të arrestuar.

U bastis shtëpia e dr. Bajram Kadriajt, kryetar i aktivit të LDK-së, pastaj shtëpitë e Brahim, Mustafë e Xheladin Kadriajt, shtëpia e Isuf Selmanajt, drejtor i shkollës fillore “Minatorët e Trepçës”, familjet e Smajl Selmanajt e Mon Selmanajt, nënkryetar i aktivit të LDK-së.

Me këtë rast në polici u morën Mustafë Kadriaj, bashk me djalin Shkumbinin, pastaj Mustafë Xh. Kadriaj, Isuf Selmanaj, Brahim Kadriaj, Mon dhe Smajl Selmanaj, si dhe 4 mjeshtër që ishin duke punuar në shtëpinë e Xheladin Kadriajt.

Gjatë këtij aksioni policia ka rrahur nëpër rrugët e fshatit Baballoq Sami Gjocajn e Valdet Matajn.

Dega e LDK-së në Deçan njofton se aksioni i forcave serbe po vazhdon.

Ky është aksioni i tretë ndëshkues i ndërmarrë nga forcat serbe gjatë katër ditëve të fundit në rajonin e Duakgjinit, me pretekst të sulmeve të pasqaruara ndaj dy stacioneve të policisë serbe në Qollopek e në Kliçinë të Pejës.

Gjatë aksioneve ndërshkuese në fshatrat Bardhaniq e Zhabel të Gjakovës dhe në fshatrat Kliçinë, Leshan, Llabjan, Zahaç e Gllaviçicë janë keqtrajtuar në mënyrën më mizore qindra shqiptarë dhe janë bastisur dhjetëra shtëpi.

17 tetor 1998

Katër të vrarë nga minat në zonën kufitare të Kosovës me Shqipërinë

Katër shqiptarë humbën dje jetën në përpjekje për të kaluar kufirin dhe për t’u strehuar në Shqipëri. Grupi i refugjatëve shkeli në një fushë të minur shumë pranë vijës së kufirit në zonën e Hasit. Tre u vranë në vend ndërsa i katërti vdiq nga plagët në territorin e Shqipërisë, njoftoi sot “Zëri i Amerikës”. Në këtë njoftim thuhej se Hamzë Ukaj nga Damjani, para se të ndërronte jetë, kishte treguar se çfarë kishte ndodhur. Ai tha se grupi që po kërkonte të hynte në Shqipëri pas shpërthimit të minës është tërhequr duke u fshehur, ndërsa tre të vrarë mund të jenë marrë nga serbët.

Foto: Ferizaj

Në rubrikën Ditari, kemi përzgjedhur disa nga lajmet më të rëndësishme të kësaj dite, në periudhën 1993-1998.

16 tetor 1993

Ende po mbahen në burgje disa arsimtarë shqiptarë

Eset Sahiti, profesor në shkollën e mesme të Lipjanit, Fazli Maloku, arsimtar në shkollën fillore “Zenel Hajdini” të Prishtinës, Çerkin Peci, profesor në shkollën e mesme të Mitrovicës, Mazllum Kumnova, anëtar i Kryesisë së LASH “Naim Frashëri” të Kosovës dhe Salih Çitaku, këshilltar i Entit Pedagogjik të Kosovës, po mbahen në burg, njoftoi Munish Hyseni, nënkryetar i Lidhjes së Arsimtarëve Shqiptarë “Naim Frashëri”. Për Salih Çitakun, që u arrestua para katër ditësh, nuk dihet asgjë.

Kohëve të fundit shqetëson fakti se regjimi serb në Kosovë, është duke penguar mbarëvajtjen e procesit mësimor edhe në punktet private e kjo po ngjet veçanërisht në shkollat fillore dhe të mesme të Mitrovicës, tha z. Hyseni dhe shtoi se pardje, rreth orës 14, policia serbe ndërpreu mësimin në punktin e gjimnazit “Frang Bardhi” në Mitrovicë.

Ndërsa dje, gjatë rrugës për në shkollë, policia serbe në Mitrovicë, e dërgoi në stacionin e policisë Ibrahim Balën, drejtor i shkollës së mesme ekonomike “Hasan Prishtina” në Mitrovicë, të cilin më vonë e liroi.

16 tetor 1995

Në Prishtinë filluan “Ditët e Gjeçovit”

Në kuadër të manifestimit tradicional kulturor-shkencor e letrar “Takimet e Gjeçovit ’95” (që mbahen në Zym të Hasit më 21 tetor), pardje në Prishtinë filluan “Ditët e Gjeçovit”.

Në kuadër të këtij manifestimi u mbajt tribuna kushtuar veprës së Atë Shtjefën Gjeçovit dhe u promovua vepra postume “Shpërblesi i botës ase jeta e Jezu Krishtit”, njofton “Bujku”.

Manifestimi i sivjetshëm ka filluar me pjesën e parë – ditët e Gjeçovit, që kanë filluar në Prishtinë me këtë manifestim, pastaj në Zllakuqan, në Janjevë, në Pejë, kurse ditëve të tjera manifestime të ngjashme do të mbahen edhe në Gjakovë, Prizren, Zym, Bishtazhin e qendra të tjera të Kosovës.

Në vazhdim të këtij manifestimi u bë promovimi i veprës postume të Atë Shtjefën Gjeçovit, që e botoi redaksia e botimeve “Drita” e Ipeshkvisë së Kosovës në vitin 1993. Për këtë vepër foli dr. Don Lush Gjergji, famullitar i Binçës. Ai në mes tjerash tha se veprën e përmendur të Gjeçovit e gjeti Imzot Nikë Prela në famullinë e Pejës.

Në vazhdim dr. Dom Lush Gjergji shtoi se kjo vepër, që është një lloj historie e shëlbimit, gërshetohet në mënyrë të qëlluar me Besëlidhjen e Vjetër dhe Besëlidhjen e Re, me përqendrim në jetën e Jezu Krishtit si fytyrë qendrore – Zotit – Njeri, i cili na ka shëlbuar me dashuri. Të them edhe këtë, tha Don Lushi, kjo vepër ka edhe qëllim gjuhësor, përkatësisht të pastrimit të gjuhës sonë nga ndikimet e huaja. Në këtë vepër gjejmë mjaft fjalë, shprehje, tentim të krijimit të fjalëve të reja me bazë shqipe në mënyrë që të zëvendësohen shprehjet e huazuara. Vepra e Gjeçovit “Shpërblesi…” mbeti e papërfunduar për arsye të vrasjes mizore të françeskanit zelltar dhe të guximshëm – Atë Shtjefën Gjeçovit. Në Prishtinë, manifestimi “Ditët e Gjeçovit” vazhdon edhe me një orë letrare, që mbahet ditën e enjte, më 19 tetor, në Shoqatën e Shkrimtarëve të Kosovës.

Kjo orë letrare dhe i tërë manifestimi (Ditët e Gjeçovit dhe Takimet e Gjeçovit ’95) organizohen nga Shoqata e Shkrimtarëve të Kosovës, klubi letrar “Shtjefën Gjeçovi” i Zymit të Hasit dhe Ordinariati i Ipeshkvisë së Kosovës me seli në Prizren, thuhet mes tjerash në njoftimin e “Bujkut”.

16 tetor 1997

Aksion i forcave në pesë fshatra të Pejës

Prishtinë, 16 tetor (QIK)

Forcat serbe organizuan sot një aksion të gjerë represiv kundër popullsisë shqiptare në fshatrat Zahaq, Llabian, Gllaviçicë, Leshan dhe Kliçinë të rrethinës së Pejës. Në Kliçinë gjendet një stacion i policisë serbe. Në bazë të deklaratave të personave të keqtrajtuar nga policia mirret vesh se aksioni u ndërmor pas një incidenti të pasqaruar në stacionin e policisë në Kliçinë. Nuk dihet asgjë për rethanat dhe epilogun e incidentit. Deri në orën 9,30 rruga Pejë-Prishtinë, në vendin Kliçinë mbahej e bllokuar nga forcat të mëdha serbe të shoqëruara edhe me autoblinda.

Një anëtar i Kryesisë së Degës së LDK-së në Pejë i tha QIK-ut me telefon se nga fshatrat ku kanë ndërhyrë forcat serbe po arrinin njoftime të vazhdueshme për numrin e madh të njerëzve e familjeve të keqtrajtuara dhe të personave të arrestuar.

Në orën 3 pas mesnate policia bastisi në Llabian shtëpinë e Zenel H. Kelmendit, në të cilën nuk ndodhej askush, pasi kjo familje jeton në Prishtinë. Policia shkoi pastaj në shtëpitë e afërme të Shaban (Cenë) Kelmendit e Ahmet (Deli) Kelmendit dhe i rrahu rënd kryefamiljarët. Ahmeti ka pësuar lëndime të rënda dhe është dërguar në spital. Janë rrahur edhe nëna e Shabanit, Hata (90) dhe bashkëshortja Ganimetja.

Në Zahaq policia bastisi shtëpinë e Ramiz Zeqirit, sekretar i shkollës fillore “N. Veqilharxhi” dhe e rrahu atë.

Në Gllaviçicë u bastisën shtëpitë e vëllezërve Gjon e Marash M. Vataj. Të dy vëllezërit u keqtrajtuan fizikisht para anëtarëve të familjes dhe pastaj u morën në polici bashk me djemtë Leonin e Viktorin. Pas disa orëve këta u liruan.

Në Kliçinë u bastis shtëpia e Hasan Berishës, drejtor i shkollës fillore “N. Veqilharxhi” dhe kryetar i nëndegës së LDK-së.

Hasan Berisha u keqtrajtua para anëtarëve të familjes. U keqtrajtuan edhe vëllezërit e tij Zeneli e Aliu e djemtë e tij Samiu (22), Shkumbini (16) dhe Dardani (14) dhe Naimi(20), i cili u mor në arrest. Në polici është marrë edhe Zekë (M. ) Berisha. Pas pesë orë mbajtjeje e rrahjeje janë liruar Zeka, Aliu dhe Naimi.

Po sot policia ka ndaluar punën e ndërrimit të paradites në shkollën e Kliçinës.

Në rrugën afër stacionit të policisë në Kliçinë, rreth orës 6 të mëngjesit, pasi u ndaluan dhe u nxorën nga vetura e tyre, u rrahën në rrugë Njazi Goga (37) dhe Ramiz Nikçi nga Peja.

Në Leshan u bastisën dhe u rrahën Skender (Lush) Berisha, Maxhun (L. ) Berisha, Xhevdet (M. ) Berisha (20), si dhe Milaim Seniku (18) nga Jabllanica, që ndodhej mysafir. Skenderi, Maxhuni e Milaimi u morën në arrest.

Në Kliçinë u ndaluan nga policia serbe anëtarët e familjes Bruqi (Shala) nga Isniqi i Deçanit, me ç’rast u rrahën brutalisht dhe u fyen në baza nacionale. Me këtë rast u rrahën Hajrullah Bruqi (Shala) – plak, Samir Bruqi (33) dhe Nisret Bruqi (Shala) – 30-vjeçar, të gjithë nga Isniqi i komunës së Deçanit.

Ata u rrahën në prani të fëmijës pesëvjeçar të tyre, të cilin ishin nisur për ta dërguar në spitalin e Shkupit për shërim.

Përkujtojmë se një aksion të ngjajshëm forcat serbe ndërmorën pardje në fshatrat Bardhaniq dhe Zhabel të Gjakovës, me pretekst të gjurmimit të gjoja sulmuesve në stacionin e policisë serbe në Qollopek.

16 tetor 1998

Skënderaj: Pardje, forcat serbe vranë një e plagosën një shqiptar

Forcat serbe të stacionuara në postbllokun policor në Makërmal vranë të enjten Zymer Goxhulin (33) dhe plagosën Isuf Goxhulin (28), për fatin e të cilit nuk dihet, pasi nuk ka mundësi të depërtohet në vendin e ngjarjes. Dyshohet se atë e ka marrë policia.

Nënkëshilli i KMDLNJ-së në Skënderaj njofton ata u qëlluan në momentin kur po mblidhnin bagëtinë e shpërndarë fushave.

Vushtrri: U gjet turpi i pajetë i Selim Aliut nga Pantina

Sot u gjet trupi i Selim Aliut (58) nga Pantina, i vrarë para disa ditësh nga forcat serbe.

Në njoftim thuhet se trupin e tij forcat serbe i kanë hedhur në lumin Sitnica, ndërsa uji e ka bartur deri afër Mitrovicës.

Foto: Shtjefën Gjeçovi

Kryetarja e Dhomate të Specializuara të Kosovës në Hagë, Ekaterina Trendafilova, ka reaguar përmes një video-mesazhi publik ndaj kritikave dhe dezinformatave lidhur me pavarësinë dhe funksionimin e këtij institucioni gjyqësor. Reagimi i saj vjen pas vendimeve të fundit gjyqësore, reagimeve publike dhe ndryshimeve ligjore në Kuvendin e Kosovës.

Trendafilova nënvizoi se Gjykata e Hagës ushtron mandatin e saj në mënyrë plotësisht të pavarur dhe pa asnjë ndërhyrje apo presion politik, duke garantuar procedura të drejta, të paanshme si dhe mbrojtje të fuqishme për dëshmitarët dhe viktimat.

Sipas kryetares së Dhomave të Specializuara, kritikat ndaj vendimeve gjyqësore janë legjitime në një shoqëri demokratike, mirëpo sundimi i ligjit kërkon që askush të mos mund t’u diktojë gjyqtarëve se si ta interpretojnë apo zbatojnë ligjin. Ajo shtoi se të gjithë gjyqtarët janë profesionistë me integritet të lartë nga shtetet e BE-së dhe vendet kontribuuese, të cilët zbatojnë konventat ndërkombëtare dhe Konventën Evropiane për të Drejtat e Njeriut.

Duke iu përgjigjur shqetësimeve për të drejtat e të akuzuarve, Trendafilova rikujtoi se mbrojtja juridike dhe mbikëqyrja e vendimeve garantohen përmes shkallëve të ankesave në Apel, Gjykatën Supreme, si dhe në Dhomën e Specializuar të Gjykatës Kushtetuese — mjete këto që, sipas saj, janë shfrytëzuar me sukses nga të pandehurit në disa aktgjykime. /E.A/

Presidenti amerikan, Donald Trump, ka urdhëruar nisjen e hetimeve ndaj një prej ish-aleatëve të tij më të afërt, Richard Grenell.

Siç ka shkruar mediumi “Axios”, në Shtëpinë e Bardhë ka shpërthyer një skemë e “pagesave për ndikim” te Trumpi. Në qendër të raportimit është një instruksion i pretenduar nga Grenelli për biznesmenin turk, Turhan Mildon, në maj të vitit të shkuar.

Grenell atë kohë shef i qendrës kulturore “Kennedy Center”, i pati thënë Mildonit të transferojë rreth 17 milionë dollarë te kompania “Texas Armament & Technology” – nga të cilat rreth 6 milionë dollarë do të shkonin për qendrën e arteve.

“Sapo që paratë të vijnë te kompania këtu, do të aranzhoj donacionin te ‘Kennedy Center’, dhe ju do t’iu bashkoheni ngjarjeve VIP dhe të jeni të afërt me administratën, madje edhe me presidentin e Shteteve të Bashkuara të Amerikës”, thuhet në mesazhin e Grenellit, sipas raportimit.

Grenelli ka mohuar pretendimet duke i quajtur të rreme.

E gruaja e Mildonit, avokatja Alina Habba, ka thënë se “Kennedy Center” s’e ka marrë kurrë donacionin.

Ajo raportohet se më herët gjatë muajit ka takuar Trumpin për Grenellin sipas “Axios” dhe “The New York Times”. Presidenti më pas ka urdhëruar Shtëpinë e Bardhë që menjëherë të nisë hetimet.

Richard Grenell ka shërbyer si emisar special i Trumpit për dialogun Kosovë-Serbi, në periudhën 2019-2021.