Parlamenti Evropian miratoi të mërkurën një rezolutë jodetyruese mbi Librin e Bardhë për Mbrojtjen që Komisioni Evropian do të prezantojë më 19 mars dhe që do të përmbajë planin e riarmatimit të Evropës.

Plani është ilustruar nga Presidentja e KE, Ursula von der Leyen, në debatin plenar të martën dhe ditën e sotme u votua me 419 vota pro, 204 vota kundër dhe 46 abstenime.

Eurodeputetët e partisë së kryeministres Giorgia Meloni, Fratelli d’Italia, kishin paraqitur një amendament për të kërkuar ndryshimin e emrit të planit nga “Riarmatosja e Evropës” në “Mbroj Evropën”, por ai nuk kaloi.

Për Parlamentin Evropian ky është një “moment historik për mbrojtjen evropiane“. Eurodeputetët mirëpresin planin e riarmatimit të BE-së dhe mbështesin fuqimisht idenë që vendet anëtare duhet të rrisin fondet e mbrojtjes dhe sigurisë në nivele të reja, në të paktën 3% të PBB-së.

Parlamenti Evropian përsërit gjithashtu mbështetjen e tij për Ukrainën dhe “u bën thirrje vendeve anëtare të BE-së, partnerëve ndërkombëtarë dhe aleatëve të NATO-s që të heqin të gjitha kufizimet në përdorimin e sistemeve të armëve perëndimore të dorëzuara në Ukrainë kundër objektivave ushtarakë në territorin rus”.

Parlamenti Evropian vëren “një ndryshim në politikën e jashtme të SHBA-së, pasi administrata Trump po propozon normalizimin e lidhjeve me Rusinë dhe po bëhet gjithnjë e më e qartë se Evropa duhet të forcojë sigurinë dhe mbrojtjen e saj për të qenë në gjendje të ndihmojë Ukrainën të mbrohet”.

Ndërsa për Parlamentin Evropian, Rusia, e mbështetur nga aleatët e saj Bjellorusia, Kina, Koreja e Veriut dhe Irani, përfaqëson “kërcënimin më të rëndësishëm direkt dhe indirekt për BE-në dhe sigurinë e saj“.

Për eurodeputetët, “Bashkimi Evropian është tani në një pikë kthese në historinë dhe ndërtimin e tij“. Sipas Parlamentit Evropian, “BE-ja tani duhet të miratojë një qasje holistike dhe horizontale që integron një dimension të mbrojtjes dhe sigurisë në shumicën e politikave” dhe kjo qasje duhet “të mbështetet nga instrumentet rregullatore dhe financiare“.

Për më tepër, Parlamenti Evropian thekson “nevojën për të forcuar aftësitë dhe burimet, duke kapërcyer fragmentimin e tregut të mbrojtjes“.

Në këtë kuptim, Parlamenti Evropian është “i bindur fort se preferenca evropiane duhet të jetë gurthemeli i të gjitha politikave të BE-së në lidhje me tregun evropian të mbrojtjes, si një imperativ strategjik për të mbrojtur ekspertizën evropiane, në mënyrë që të forcohen aftësitë evropiane të mbrojtjes në afat të gjatë dhe sepse paratë e taksapaguesve të BE-së duhet të krijojnë vlerë të shtuar në territorin e BE-së”.

Eurodeputetët gjithashtu bëjnë thirrje për “masa të menjëhershme për të përmirësuar sigurinë dhe mbrojtjen e kufirit verilindor të BE-së me Rusinë dhe Bjellorusinë, duke krijuar një linjë mbrojtjeje gjithëpërfshirëse dhe elastike në sektorët tokësorë, ajrorë dhe detarë për të kundërshtuar kërcënimet ushtarake dhe hibride”.

Kanadaja do të shpallë tarifa për mallrat amerikane me vlerë 29.8 miliardë dollarë sot, në përgjigje të tarifave të presidentit amerikan Donald Trump për çelikun dhe aluminin, tha një zyrtar kanadez i paidentifikuar.

Tarifat e rritura të Trump për importet e çelikut dhe aluminit hynë në fuqi më herët sot pas skadimit të përjashtimeve të mëparshme, kuotave pa taksa dhe përjashtimeve të produkteve.

Kanadaja është furnizuesi më i madh i huaj i çelikut dhe aluminit në Shtetet e Bashkuara, sipas Reuters.

Përshkallëzimi i luftës tregtare SHBA-Kanada vjen ndërsa kryeministri në largim Justin Trudeau përgatitet t’ia dorëzojë pushtetin këtë javë kryeministrit të ardhshëm Mark Carney, i cili fitoi garën për udhëheqjen e Liberalëve në pushtet të dielën.

Carney tha të hënën se ai nuk mund të fliste me Trump derisa ai të bënte betimin si kryeministër, ndërsa Trump së fundmi përsëriti se dëshiron që Kanada të bëhet shteti i 51-të i SHBA-së.

Sekretari amerikan i Shtetit Marco Rubio tha sot se ka pasur bisedime me Ukrainën për lëshime territoriale gjatë një takimi në Arabinë Saudite dhe se shpresojnë për një përgjigje pozitive ndaj armëpushimit nga Rusia.

“Nëse Rusia thotë jo, shumë gjëra do të bëhen më të qarta për ne. Nuk ka zgjidhje ushtarake për këtë konflikt. Ukraina ka nevojë për një parandalim të mjaftueshëm kundër sulmeve të ardhshme”, u tha Rubio gazetarëve në aeroportin Shannon në fillim të një vizite në Republikën e Irlandës.

Rubio tha se nuk do ta karakterizonte marrëveshjen e propozuar për mineralet midis Ukrainës dhe SHBA-së si një garanci sigurie.

“SHBA do të ketë kontakte me Rusinë sot, por ne nuk e dimë ende se cili do të jetë reagimi i Moskës ndaj armëpushimit të propozuar. Sanksionet evropiane kundër Rusisë do të jenë në tryezë në çdo marrëveshje armëpushimi”, shtoi Rubio.

Biznesmeni amerikan Elon Musk planifikon të dhurojë 100 milionë dollarë për “operacionet politike” të presidentit të SHBA-së, Donald Trump, për të cilin ai shërben si këshilltar i lartë.

Sipas lajmit të “The New York Times” (NYT), vendimi i dhurimit i biznesmenit që drejton Departamentin e Efikasitetit të Qeverisë (DOGE) erdhi pasi Trump bleu një automjet nga kompania Tesla e Elon Musk.

Burimet e Shtëpisë së Bardhë i thanë NYT-së se Musk dëshiron të bëjë dhurimin prej 100 milionë dollarësh për një organizatë tjetër të jashtme të lidhur me presidentin amerikan, në vend të komitetit të veprimit politik të quajtur “America PAC”, i cili ka mbështetur kandidatin republikan Trump në zgjedhjet presidenciale.

Në anën tjetër, duke dhuruar rreth 288 milionë dollarë për fushatat zgjedhore të Trumpit dhe kandidatëve të tjerë republikanë në zgjedhjet e nëntorit 2024, Musk u bë emri që ka dhënë më shumë donacione politike.

Më 8 mars protestuesit në qytetin New York hynë me forcë në dyqanin e një dege të shitjeve të makinave të kompanisë Tesla të Musk dhe organizuan një protestë duke u ulur.

Demonstruesit e tjerë që vazhduan të protestojnë përpara dyqanit me tabela dhe pankarta, brohoritën me slogane si “Musk nuk është një person i zgjedhur” dhe “Musk duhet të largohet”.

Ndërsa presidenti Trump, nga ana tjetër bleu një Tesla për të treguar mbështetjen e tij për Musk, duke theksuar: “Ky njeri i kushtoi energjinë dhe jetën e tij për ta bërë këtë dhe unë mendoj se ndaj tij është bërë padrejtësi”.