Këngëtari britanik Harry Styles ka anuluar koncertin e planifikuar në stadiumin MorumBIS në São Paulo të Brazilit, vetëm pak orë para nisjes së tij, për shkak të një problemi shëndetësor.

Lajmi është konfirmuar nga organizatori Live Nation Brasil, i cili bëri të ditur se të gjitha biletat do t’u rimbursohen fansave, ndërsa koncerti i radhës në Brazil pritet të mbahet sipas planit.

Ky nuk është incidenti i parë gjatë turneut të tij “Together, Together”. Muajin e kaluar, Styles u rrëzua në skenë gjatë një koncerti në stadiumin Wembley në Londër, ku qëndroi për disa sekonda i shtrirë duke u përpjekur të rimerrte frymën, përpara se të largohej nga skena.

Pavarësisht këtyre vështirësive, artisti 32-vjeçar ka vazhduar turneun, ndërsa së fundmi emocionoi publikun në Londër duke falënderuar ish-anëtarët e grupit “One Direction” – Niall Horan, Louis Tomlinson, Zayn Malik dhe të ndjerin Liam Payne – për ndikimin e tyre në karrierën e tij.

Pak ditë më vonë, Styles u bë sërish viral në rrjetet sociale për një moment humoristik gjatë një performance, kur vuri re se zinxhiri i pantallonave i kishte mbetur hapur dhe e mbylli mes brohoritjeve dhe të qeshurave të publikut./A.K/

Aktorja australiane Rebel Wilson është liruar nga akuzat për shpifje, pasi një gjykatë në Sidnei hodhi poshtë padinë e ngritur nga aktorja e re Charlotte MacInnes.

MacInnes, e cila luajti në filmin The Deb, pretendonte se Wilson i kishte dëmtuar reputacionin përmes disa postimeve në Instagram gjatë viteve 2024 dhe 2025. Në to, Wilson kishte pohuar se MacInnes kishte tërhequr ankesën e saj për ngacmim seksual ndaj një producenti filmi për të avancuar karrierën, pretendim që aktorja e re e mohoi.

Gjykatësja Elizabeth Raper vendosi se pretendimi se MacInnes kishte ndryshuar versionin e saj të ngjarjes nuk përbënte shpifje sipas ligjit. Ajo gjithashtu konstatoi se paditësja nuk kishte arritur të provonte se postimet i kishin shkaktuar ose mund t’i shkaktonin dëm serioz reputacionit të saj.

Si rezultat, gjykata hodhi poshtë padinë dhe urdhëroi Charlotte MacInnes të mbulojë shpenzimet gjyqësore të Rebel Wilson.

Çështja lidhej me një incident të ndodhur në shtator të vitit 2023, kur MacInnes kishte shkuar në plazhin Bondi me producenten Amanda Ghost. Pas një reaksioni alergjik të Ghost ndaj ujit të ftohtë, të dyja u kthyen në apartamentin e saj, ku ndodhi episodi që më vonë u bë pjesë e mosmarrëveshjes ligjore.

Pas vendimit, Rebel Wilson reagoi në rrjetet sociale duke thënë se procesi gjyqësor e kishte vënë në provë, por edhe i kishte forcuar bindjen për të mbrojtur atë që e konsideron të drejtë.

“Ky proces më ka mësuar shumë. Më ka sfiduar, por edhe ma ka përforcuar bindjen se dua të jetoj duke mbrojtur atë që besoj se është e drejtë, ndërsa vazhdoj të krijoj projekte që u sjellin gëzim njerëzve”, shkroi Wilson, duke falënderuar mbështetësit e saj dhe sistemin australian të drejtësisë./BBC//A.K/

Aktorja amerikane Kaylee Hottle, e njohur për rolin e saj si Jia në filmat “Godzilla vs. Kong”, ka ndërruar jetë në moshën 18-vjeçare, pas një aksidenti me veturë në shtetin amerikan të Marylandit.

Lajmin e ka konfirmuar babai i saj, Joshua Hottle, përmes një videoje të publikuar në Facebook në gjuhën amerikane të shenjave. Edhe Shkolla e Teksasit për Personat e Shurdhër, ku Hottle kishte studiuar, shprehu ngushëllimet për humbjen e saj.

Sipas autoriteteve në Frederick County, aksidenti ndodhi në orët e para të mëngjesit të së martës në zonën e Ijamsville. Policia bëri të ditur se dyshohet se shpejtësia e tepërt ishte një nga faktorët që çoi në aksidentin me një automjet.

Shoferi 19-vjeçar u dërgua në spital me lëndime që nuk rrezikojnë jetën, ndërsa një pasagjer tjetër refuzoi trajtimin mjekësor. Autoritetet kanë kërkuar që të mos ketë spekulime rreth rrethanave të aksidentit.

Hottle, e cila ishte e shurdhër, fitoi vlerësime për interpretimin e personazhit Jia, një vajzë jetime, në filmin “Godzilla vs. Kong” të vitit 2021, rol të cilin e ripërsëriti edhe në vazhdimin “Godzilla x Kong: The New Empire” në vitin 2024.

Për interpretimin e saj në filmin e fundit, ajo ishte nominuar për çmimin Saturn Award në kategorinë e aktores së re më të mirë. Pas lajmit për vdekjen e saj, edhe Warner Bros. i bëri homazhe aktores përmes një postimi në rrjetet sociale./A.K/