Mbretëria e Bashkuar ka njoftuar se do të dislokojë avionë luftarakë Typhoon të Forcave Ajrore Mbretërore (RAF) në Arabinë Saudite, në përgjigje të përshkallëzimit të sulmeve me raketa dhe dronë nga rebelët Houthi.

Sipas deklaratës së publikuar të martën, misioni do të ketë karakter mbrojtës dhe synon të mbrojë qytetet dhe infrastrukturën strategjike saudite nga sulmet ajrore të grupit të mbështetur nga Irani.

Vendimi vjen pas një serie sulmesh me dronë dhe raketa balistike ndaj kryeqytetit Riad dhe objekteve energjetike në bregdetin e Arabisë Saudite.

“Këta avionë do të veprojnë në rol mbrojtës dhe nuk do të kryejnë sulme kundër Houthive”, thuhet në deklaratën e autoriteteve britanike.

Përveç avionëve luftarakë, Londra do të dërgojë edhe këshilltarë ushtarakë dhe një avion transportues A400M, si dhe do të ofrojë pajisje mbrojtëse dhe mbështetje për furnizimin me karburant në ajër. Kjo e fundit është zgjatur edhe për 90 ditë.

Në deklaratë theksohet se sulmet ndaj aeroportit të Riadit dëshmojnë përshkallëzimin e tensioneve në rajon dhe nevojën për mbështetje të mëtejshme ushtarake.

Rebelët Houthi, të përfshirë në konfliktin civil në Jemen, kanë ndërmarrë vazhdimisht sulme ndaj aeroporteve, objekteve të naftës dhe gazit, si dhe bazave ushtarake saudite, në kundërpërgjigje ndaj operacioneve ushtarake në territoret që kontrollojnë në Jemenin perëndimor, përfshirë kryeqytetin Sana.

Foto:  Associated Press

D.L

Aeroporti i Cyrihut në Zvicër është vlerësuar sërish me çmimin “Europe’s Leading Airport” për vitin 2026, në kuadër të çmimeve ndërkombëtare World Travel Awards.

Ky është viti i 23-të radhazi që aeroporti merr këtë vlerësim, duke ruajtur pozicionin në të njëjtën kategori për më shumë se dy dekada.

Sipas njoftimit të aeroportit, çmimi është ndarë pas nominimit nga komiteti i World Travel Awards dhe votimit online në nivel global, ku kanë marrë pjesë profesionistë të industrisë së udhëtimeve dhe publiku i gjerë, transmeton Telegrafi.

Në procesin e vlerësimit merren parasysh kënaqësia e udhëtarëve, përmbushja e standardeve të cilësisë dhe përmirësimi i vazhdueshëm i shërbimeve.

Aeroporti i Cyrihut është një nga pikat kryesore të lidhjes së Zvicrës me botën, duke lehtësuar udhëtimet ndërkombëtare dhe duke kontribuar në lidhjen e ekonomisë zvicerane me tregjet globale/A.K/

Presidenti amerikan, Donald Trump, ka urdhëruar nisjen e hetimeve ndaj një prej ish-aleatëve të tij më të afërt, Richard Grenell.

Siç ka shkruar mediumi “Axios”, në Shtëpinë e Bardhë ka shpërthyer një skemë e “pagesave për ndikim” te Trumpi. Në qendër të raportimit është një instruksion i pretenduar nga Grenelli për biznesmenin turk, Turhan Mildon, në maj të vitit të shkuar.

Grenell atë kohë shef i qendrës kulturore “Kennedy Center”, i pati thënë Mildonit të transferojë rreth 17 milionë dollarë te kompania “Texas Armament & Technology” – nga të cilat rreth 6 milionë dollarë do të shkonin për qendrën e arteve.

“Sapo që paratë të vijnë te kompania këtu, do të aranzhoj donacionin te ‘Kennedy Center’, dhe ju do t’iu bashkoheni ngjarjeve VIP dhe të jeni të afërt me administratën, madje edhe me presidentin e Shteteve të Bashkuara të Amerikës”, thuhet në mesazhin e Grenellit, sipas raportimit.

Grenelli ka mohuar pretendimet duke i quajtur të rreme.

E gruaja e Mildonit, avokatja Alina Habba, ka thënë se “Kennedy Center” s’e ka marrë kurrë donacionin.

Ajo raportohet se më herët gjatë muajit ka takuar Trumpin për Grenellin sipas “Axios” dhe “The New York Times”. Presidenti më pas ka urdhëruar Shtëpinë e Bardhë që menjëherë të nisë hetimet.

Richard Grenell ka shërbyer si emisar special i Trumpit për dialogun Kosovë-Serbi, në periudhën 2019-2021.

Qeveria e Italisë ka vendosur të dërgojë 500 trupa ushtarake për të përforcuar sigurinë në Milano, pas dy ditësh përleshjesh të dhunshme mes demonstruesve dhe policisë. Vendimi u konfirmua nga zëvendëskryeministri Matteo Salvini dhe pritet të zyrtarizohet në paketën e re të masave të sigurisë nga kabineti qeveritar.

Trazirat shpërthyen gjatë fundjavës pas një proteste që fillimisht nisi paqësisht kundër rritjes së kostos së jetesës dhe shërbimeve të dobëta publike. Situata eskaloi kur qindra të rinj me kapuçë dëmtuan prona, i dhanë flakë koshave të mbeturinave dhe plaçkitën dyqane në qendër të kryeqendrës financiare.

Si pasojë e pasigurisë, bizneset në zonat më luksoze, përfshirë Via Montenapoleone dhe galerinë Vittorio Emanuele, mbyllën dyert para kohe, zbrazën vitrinat nga produktet me vlerë dhe mbuluan xhamat me dërrasa mbrojtëse.

Kryeministrja Giorgia Meloni dënoi ashpër dhunën dhe zhvilloi takime urgjente me drejtuesit e sigurisë. Qeveria po shqyrton masa të rrepta ligjore, përfshirë zgjatjen e paraburgimit parandalues për të miturit dhe veprime më të ashpra kundër bandave të të rinjve.

Sipas të dhënave zyrtare, policia italiane ka shoqëruar 271 persona gjatë trazirave, prej të cilëve 32 janë arrestuar — ku 23 prej tyre janë të mitur.