Rreth 2.100 hektarë tokë janë djegur nga zjarri pyjor që filloi më 26 shkurt në Japoninë verilindore.

Sipas lajmit të transmetuesit publik NHK, zyrtarët në një deklaratë në lidhje me zjarrin në qytetin Ofunato të prefekturës Iwate, thanë se rreth 2.100 hektarë tokë janë djegur nga zjarri pyjor, duke theksuar se operacionet për shuarjen e zjarreve po vazhdojnë me mbi 2.000 zjarrfikës.

Autoritetet thanë se tymi po lëviz drejt zonave të banuara dhe më shumë se 80 ndërtesa janë dëmtuar.

Zyrtarët gjithashtu theksuan se rreth 1.200 banorë të qytetit janë evakuuar për shkak të zjarreve.

Guvernatori i Ofunatos, Fuchigami Kiyoshi, shprehu shqetësimin se flakët mund të përhapen edhe më tej.

Autoritetet raportuan se një trup i djegur është gjetur gjatë operacioneve në zonë më 27 shkurt.

Bilanci i viktimave nga sulmi i ndodhur këtë të hënë në qytetin e Mannheim-it, Gjermani, është rritur. Sipas medias gjermane Bild, përplasja e një automjeti me një turmë njerëzish në tregun e karnavaleve ka shkaktuar dy viktima, ndërsa 25 persona të tjerë kanë mbetur të plagosur.

Policia ka arrestuar një të dyshuar në lidhje me ngjarjen, ndërkohë që hetimet po vazhdojnë për të zbardhur shkaqet dhe rrethanat e incidentit.

“Si pjesë e masave të kërkimit që filluan menjëherë, një i dyshuar u identifikua dhe u arrestua,” deklaroi policia. Megjithatë, autoritetet nuk kanë dhënë ende detaje mbi identitetin e të dyshuarit dhe nuk kanë konfirmuar nëse incidenti po trajtohet si një sulm i qëllimshëm.

Ngjarja ka ndodhur në sheshin qendror të Mannheim-it, ku po zhvillohej një paradë e karnavaleve, një event që mbledh mijëra vizitorë në qytete të ndryshme të Gjermanisë. Policia ka bërë thirrje qytetarëve që të shmangin qendrën e qytetit ndërsa vazhdojnë hetimet.

Mannheim, një qytet me rreth 320,000 banorë, ndodhet në veri të landit Baden-Württemberg, pranë kufirit me Hessen dhe Rheinland-Pfalz.

Një seri sulmesh në Gjermani gjatë muajve të fundit

Incidenti në Mannheim është një ndër disa sulme të ngjashme që kanë ndodhur në Gjermani gjatë muajve të fundit. Më 13 shkurt, një burrë sulmoi me makinë një demonstratë në Mynih, duke shkaktuar disa të plagosur. Në dhjetor, një tjetër sulm me makinë në tregun e Krishtlindjeve në Magdeburg rezultoi me gjashtë viktima dhe rreth 300 të plagosur, shumë prej tyre në gjendje të rëndë. Autori i këtij sulmi ishte një mjek me origjinë nga Arabia Saudite, i cili kishte jetuar në Gjermani që nga viti 2006.

Autoritetet gjermane po shqyrtojnë të gjitha pistat dhe vijojnë hetimet për të zbuluar nëse incidenti në Mannheim lidhet me sulmet e mëparshme apo është një akt i izoluar.

Administrata amerikane ka vendosur të ndërpresë operacionet ofensive kibernetike kundër Rusisë, në një kohë kur përpjekjet diplomatike për t’i dhënë fund luftës në Ukrainë vazhdojnë.

Motivet për këtë vendim nuk janë bërë publike dhe nuk është e qartë sesa ndalimi do të zgjasë. Vetë Departamenti i Mbrojtjes ka refuzuar të bëjë komente.

Direktiva, sipas mediave ndërkombëtare, u dha përpara se Trump të përfundonte përplasjen me homologun ukrainas Volodymyr Zelensky të premten e kaluar në Shtëpinë e Bardhë.

Që nga rimarrja e detyrës, Trump ka zbutur qasjen amerikane ndaj Moskës, në përpjekje për të arritur një marrëveshje për t’i dhënë fund luftës që Rusia e nisi mbi tre vjet më parë.

Madje, ai e ka justifikuar nisjen e luftës nga Rusia dhe ka njoftuar planet e tij për t’u takuar me presidentin rus Vladimir Putin. Pa harruar faktin se Shtetet e Bashkuara u bashkua me Rusinë në votimin e fundit në Kombet e Bashkuara sa i takon luftës.

Ndalimi i operacioneve kibernetike ndaj Rusisë vjen teksa sekretari i Mbrojtjes, Pete Hegseth ka dhënë udhëzime të reja për Komandën Kibernetike të Shteteve të Bashkuara.

Vendimi ngre pyetje mbi fuqinë e Amerikës për të luftuar sulmet informatike ruse, ndërhyrjet e Kremlinit në zgjedhje dhe përpjekjet e tij për të sabotuar unitetin e vendeve perëndimore që janë rreshtuar përkrah Ukrainës.