Sistemet e njoftimeve të emergjencës në Ukrainë dhe Rusi janë përballur me kibersulme gjatë ditës së djeshme (e diel, 1 nëntor 2026), duke shpërndarë alarme të rreme për sulme bërthamore, kimike dhe luftime rrugore.
Në Ukrainë, aplikacioni i alarmit ajror lëshoi disa njoftime të njëpasnjëshme për banorët e Kievit gjatë mbrëmjes së të diellës.
Në orën 22:47 u dërgua mesazhi > “Kërcënim nga rrezatimi. Është shpallur kërcënim nga rrezatimi në Kiev”, ndërsa një minutë më vonë u dërgua një mesazh në gjuhën ruse ku shkruhej > “Përshëndetje! Do të ketë alarm bërthamor në të gjithë Ukrainën. Mos u shqetësoni, po fluturon Oreshnik”.
Më pas vijuan paralajmërime për kërcënim kimik dhe luftime rrugore me udhëzimin për të mos dalë jashtë. Rreth një orë më vonë, në orën 23:53, autoritetet ukrainase anuluan të gjitha alarmet. Forcat Ajrore konfirmuan se aplikacioni u hakua nga ndërhyrja ruse, ndërsa zyrtarët deklaruan se përdorimi i gjuhës ruse nuk nxiti panik pasi zgjoi menjëherë dyshime te qytetarët.
Disa orë më vonë, edhe Ministria e Emergjencave e Rusisë njoftoi se ra pre e një sulmi kibernetik, ku përdoruesit morën email-e me informacione të rreme për sulme bërthamore brenda territorit rus.
Krahas luftimeve kibernetike, të dyja palët vazhduan sulmet mbi objektet energjetike. Sulmet me dronë ukrainas dëmtuan rafinerinë e naftës në Kstovo në rajonin Nizhny Novgorod të Rusisë, duke shkaktuar ndërprerje të energjisë dhe ujit të ngrohtë. Në anën tjetër, Presidenti Volodymyr Zelensky njoftoi se sulmet ruse mbi infrastrukturën energjetike lanë qindra mijëra shtëpi pa energji elektrike në katër rajone të Ukrainës. /BBC/
