Forcat izraelite kanë arrestuar 30 palestinezë gjatë bastisjeve të fundit ushtarake në Bregun Perëndimor të pushtuar, tha sot Shoqata Palestineze e të Burgosurve, transmeton Anadolu.

Në mesin e të ndaluarve kishte shtatë nxënës të shkollave të mesme, të cilët u morën në paraburgim nga Izraeli vetëm disa orë para provimeve të tyre përfundimtare, tha Shoqata në një deklaratë.

Ajo tha se bastisjet para agimit kishin në shënjestër nxënësit e regjistruar për provimet e shkollës së mesme, veçanërisht në qytezën Deir Istiya në provincën veriore Salfit, ku u ndaluan gjashtë nxënës dhe disa nga baballarët e tyre.

Një nxënës i shtatë u arrestua në Tulkarem, gjithashtu në veri të Bregut Perëndimor. Ndërsa baballarët e ndaluar u liruan më vonë, nxënësit mbeten në paraburgim izraelit, tha grupi.

Arrestimet erdhën ndërsa ministrat dhe politikanët izraelitë kanë intensifikuar thirrjet për aneksimin e Bregut Perëndimor, duke përshkallëzuar më tej tensionet në territorin e pushtuar.

Sipas Ministrisë palestineze të Arsimit, 67 nxënës të shkollave të mesme janë penguar të japin provimet e tyre këtë vit për shkak të ndalimeve nga ana e Izraelit. Izraeli ka arrestuar mijëra palestinezë në Bregun Perëndimor të pushtuar që nga fillimi i luftës së tij gjenocidale në Gaza në tetor 2023.

Sipas shifrave palestineze, të paktën 988 palestinezë janë vrarë dhe më shumë se 7.000 janë plagosur në Bregun Perëndimor nga forcat izraelite dhe kolonët e paligjshëm që nga tetori 2023.

Gjykata Ndërkombëtare e Drejtësisë (GJND) korrikun e kaluar e shpalli pushtimin e territorit palestinez nga Izraeli të paligjshëm dhe bëri thirrje për evakuimin e të gjitha vendbanimeve kolone në Bregun Perëndimor dhe Kudsin Lindor.

Izraeli është përgjegjës për “një nga gjenocidet më mizore në historinë moderne”, tha sot raportuesja speciale e OKB-së për territorin e pushtuar palestinez, Francesca Albanese, duke akuzuar Tel Avivin për përdorimin e Gazës si një terren provash dhe duke bërë thirrje për veprime të gjera ndërkombëtare, përfshirë embargo të plotë armësh dhe pezullimin e lidhjeve tregtare dhe të investimeve, raporton Anadolu.

“Situata në territorin e pushtuar palestinez është apokaliptike“, tha Albanese në Këshillin e të Drejtave të Njeriut, ku ajo prezantoi raportin e saj të fundit. “Në Gaza, palestinezët vazhdojnë të durojnë vuajtje përtej imagjinatës. Izraeli është përgjegjës për një nga gjenocidet më mizore në historinë moderne“, nënvizoi ajo.

Albanese tha se shifrat zyrtare numërojnë mbi 200.000 palestinezë të vrarë ose të plagosur, por ekspertët kryesorë të shëndetësisë vlerësojnë se “numri i vërtetë është shumë më i lartë”. Ajo denoncoi të ashtuquajturin Fondacion Humanitar të Gazës, mekanizmi i ri i ndihmës i Izraelit në Gaza si “një kurth vdekjeprurës, i projektuar për të vrarë ose detyruar ikjen e një popullsie të uritur, të bombarduar dhe të dobësuar”.

Ajo theksoi fitimet ekonomike të arritura gjatë luftës, duke vënë në dukje se në 20 muajt e fundit, kompanitë e armëve kanë arritur “fitime pothuajse rekord” duke furnizuar Izraelin me armë të përdorura për të bombarduar Gazën. “Kompanitë e armëve kanë arritur fitime pothuajse rekord duke pajisur Izraelin me armë të teknologjisë së fundit për të lëshuar 85.000 tonë eksplozivë, gjashtë herë më fuqishëm se Hiroshima, për të shkatërruar Gazën”, tha ajo.

Raporti gjithashtu vuri në dukje fitime “213 për qind” në Bursën e Tel Avivit që nga tetori 2023, duke përshkruar një kontrast të fortë: “Një popull u pasurua, një popull u fshi”. Duke akuzuar Izraelin për përdorimin e luftës për të “testuar armë të reja, mbikëqyrje të personalizuar, dronë vdekjeprurës (dhe) sisteme radari”, Albanese paralajmëroi se pambrojtja e Palestinës e ka bërë atë “një laborator ideal për kompleksin ushtarako-industrial izraelit”.

Ajo emëroi 48 aktorë korporata, përfshirë prodhues armësh, banka, kompani teknologjike, gjigantë të energjisë dhe institucione akademike, duke pohuar se ata janë të lidhur drejtpërdrejt me një “ekonomi pushtimi” më të gjerë që mbështet veprimet e shtetit izraelit.

“Armët dhe sistemet e të dhënave brutalizojnë dhe mbikëqyrin palestinezët“, tha ajo. “Kolonitë përhapen, të financuara nga bankat dhe siguruesit, të mundësuara nga lëndët djegëse fosile dhe të normalizuara nga platformat turistike, zinxhirët e supermarketeve dhe institucionet akademike”, theksoi Albanese.

Sipas ligjit ndërkombëtar, tha ajo, edhe një lidhje minimale me këtë sistem mbart përgjegjësi të qartë. “Ekziston një përgjegjësi ‘prima facie’ mbi çdo shtet dhe entitet korporativ që të abstenojë plotësisht nga ose t’u japë fund marrëdhënieve me këtë ekonomi pushtimi”.

Në një apel të drejtpërdrejtë drejtuar shteteve, Albanese bëri thirrje për hapa të guximshëm. “Shtetet anëtare duhet të vendosin embargo të plotë armësh ndaj Izraelit, të pezullojnë të gjitha marrëveshjet tregtare dhe marrëdhëniet e investimeve dhe të zbatojnë llogaridhënien, duke siguruar që entitetet korporative të përballen me pasoja ligjore për përfshirjen e tyre në shkelje të rënda të ligjit ndërkombëtar”, tha ajo.

Albanese u bëri thirrje bizneseve të veprojnë, duke theksuar: “Subjektet korporative duhet të ndërpresin urgjentisht të gjitha aktivitetet e biznesit dhe të ndërpresin marrëdhëniet e lidhura drejtpërdrejt me, që kontribuojnë dhe që shkaktojnë shkelje të të drejtave të njeriut dhe krime ndërkombëtare kundër popullit palestinez”.

Ajo tha se nuk beson më se injoranca ose ideologjia janë shpjegime të mjaftueshme për mosveprimin global. “Përballë gjenocidit kaq të dukshëm, kaq të transmetuar drejtpërdrejt, këto shpjegime nuk janë të mjaftueshme”, deklaroi ajo.

Albanese përfundoi me një thirrje që shoqëria civile të luajë rolin e saj, duke thënë: “Sindikatat, avokatët, grupet e shoqërisë civile dhe qytetarët e zakonshëm duhet të inkurajojnë ndryshime të tilla në sjellje nga ana e bizneseve dhe qeverive duke nxitur bojkote, shkëputje lidhjesh tregtare, sanksione dhe llogaridhënie. Ajo që vjen më pas varet nga të gjithë ne”.

Ukraina dhe Shtetet e Bashkuara te Amerikës po vazhdojnë negociatat mbi ndihmën amerikane për Kievin – pas një njoftimi të Pentagonit për ndalimin e dërgesave të disa armëve amerikane që tashmë janë planifikuar të dërgohen.

“Aktualisht, Kievi dhe Uashingtoni po përpunojnë të gjitha detajet e mbështetjes ushtarake – në nivel operacional, përfshirë mbrojtjen ajrore”, tha presidenti ukrainas Volodymyr Zelensky, në fjalimin e tij dje në mbrëmje.

“Në një mënyrë ose në një tjetër, ne duhet të sigurojmë mbrojtjen e popullit tonë”, tha ai.

Marrëveshjet për prodhimin e armëve po përgatiten gjithashtu me Danimarkën dhe partnerë të tjerë.

Ndalimi i dërgesave iu atribuua shqetësimeve mbi pakësimin e rezervave të armëve amerikane.

Ministria e Jashtme ukrainase thirri dje zëvendësambasadorin amerikan në Kiev, John Ginkel për të diskutuar rreth ngrirjes  së pjesshme të armëve, e cila ishte miratuar  gjatë  kohës së ish-presidentit, Joe Biden.

Gjatë bisedimeve në Kiev, zëvendësministrja e Jashtme Mariana Betsa theksoi rëndësinë e vazhdimit të dorëzimit të paketave mbrojtëse të premtuara më herët. /atsh

Ushtria izraelite njoftoi të enjten në mëngjes se ka kryer sulme ajrore në Gazën veriore, duke goditur një qelizë terroriste që qëlloi me raketa drejt Izraelit një ditë më parë. Sulmet aktivizuan sirenat në qytetin Sderot dhe zonat përreth.

Forcat Ajrore Izraelite (IAF) raportuan se gjatë operacionit kanë goditur rreth 150 objektiva terroriste në të gjithë Rripin e Gazës. Sipas ushtrisë, sulmet shkatërruan rrugë nëntokësore, struktura ushtarake, armë, poste snajperësh dhe vende të tjera të infrastrukturës së organizatave terroriste, duke vrarë terroristë.

Këto veprime vijnë pas paralajmërimit të IDF-së për evakuimin e banorëve në disa zona të Gazës, i dërguar mbrëmjen e së mërkurës, ku iu kërkua qytetarëve të largohen nga zonat e rrezikuara.