Në kuadër të ciklit të ligjëratave të lëndës “Strategjia Kombëtare e Sigurisë”, studentët e vitit të parë të programit të Studimeve të Sigurisë patën mundësinë të ndjekin një ligjëratë tematike të mbajtur nga një figurë e shquar ndërkombëtare në fushën e sigurisë – Profesori amerikan Col. Chad Austin.

Ligjërata u organizua nga Prodekani i Fakultetit të Studimeve të Sigurisë, Prof. Arian Kadriu dhe Prof. Shaip Osmani, dhe u zhvillua në një atmosferë dinamike dhe interaktive, ku të pranishmit patën mundësinë të përfshihen në diskutime të hapura mbi çështje aktuale të sigurisë globale.

Prof. Col. Chad Austin, i cili aktualisht ligjëron në United States Air Force Academy në Colorado Springs, ShBA, si dhe në European University Viadrina Frankfurt (Oder) në Brandenburg, Gjermani, solli një pasqyrë të thelluar mbi temat kyçe si: lidershipi në kontekste të tensionuara, kornizat ligjore të sigurisë, dhe proceset e negociatave gjatë konflikteve.

Gjatë prezantimit, Prof. Austin ndau përvoja konkrete nga puna e tij me misionet ushtarake ndërkombëtare, duke ndriçuar rëndësinë e përgatitjes akademike të studentëve të sigurisë për të kuptuar dhe menaxhuar situata të ndërlikuara në mjedise reale të konfliktit dhe diplomacisë ndërkombëtare.

Ky aktivitet është pjesë e vazhdimësisë së bashkëpunimit të Fakultetit të Studimeve të Sigurisë me Ushtrinë Amerikane dhe me ekspertë ndërkombëtarë të fushës së sigurisë, përmes ligjëratave tematike, tryezave të rrumbullakëta dhe konferencave shkencore. Kjo qasje e hapur dhe ndërkombëtare kontribuon ndjeshëm në zgjerimin e horizontit akademik të studentëve dhe në përgatitjen e tyre për sfidat e reja të sigurisë globale.

Në kuadër të bashkëpunimit ndëruniversitar, një delegacion nga Fakulteti i Biznesit i Universitetit “Aleksandër Moisiu”, Durrës (UAMD), realizoi një vizitë zyrtare në Parkun Shkencor, Inovativ dhe Teknologjik të UBT-së, në Lipjan. Kjo vizitë përfaqëson një hap të rëndësishëm drejt thellimit të marrëdhënieve institucionale mes dy universiteteve.

Gjatë takimit u diskutua për bashkëpunimin në kuadër të projektit ndërkombëtar mbi Ekonominë Qarkulluese, i cili është pjesë e programit Erasmus+. Palët ndanë përvojat e synimet e përbashkëta për të kontribuar në zhvillimin e qëndrueshëm ekonomik dhe përfshirjen aktive të studentëve dhe stafit akademik në projekte kërkimore me ndikim praktik.

Përveç këtij projekti, u shqyrtuan mundësitë për zgjerimin e bashkëpunimit në fusha tjera akademike, përfshirë zhvillimin e programeve të përbashkëta studimore në nivelin Master dhe Doktoratë. Të dy universitetet shprehën vullnetin për të punuar në dizajnimin dhe implementimin e programeve, me qëllim rritjen e cilësisë së arsimit të lartë në të dy vendet.

UBT zyrtarisht ka hapur fazën e regjistrimeve të hershme për vitin akademik 2025/2026, duke ofruar një mundësi të shkëlqyer për të gjithë maturantët që synojnë të ndërtojnë një të ardhme të suksesshme.

Në kuadër të këtij procesi, UBT ofron zbritje prej 20 për qind në tarifat studimore për katër prej programeve më të kërkuara në Kosovë:

• Media dhe Komunikim
• Gjuhë Angleze
• Shkenca Politike
• Inxhinieri e Energjisë

Kjo iniciativë është pjesë e përkushtimit të vazhdueshëm të UBT-së  për të ofruar gjithmonë një arsim cilësor, si dhe për të mbështetur të rinjtë në fazën më vendimtare të jetës së tyre – zgjedhjen e drejtimit të karrierës.

Media dhe Komunikim

Programi Media dhe Komunikim në UBT ofron një mundësi të shkëqyer për zhvillimin e njohurive dhe aftësive në fushat si: media digjitale, menaxhimin e mediave, kamerat dhe shumë më tepër se kaq.

Fakulteti Media dhe Komunikim në UBT është një qendër e njohur kombëtare dhe ndërkombëtare për arsimimin e gjeneratave të reja në arsimin e lartë në fushën mediale me një staf të dëshmuar studiuesish dhe profesionistësh nga industria e mediave në Kosovë dhe rajon.

Gjuhë Angelze

Programi Gjuhë Angleze ofron një përgatitje të thelluar në gjuhësi, duke iu mundësuar studentëve të përgatiten profesionalisht dhe të marrin njohuritë e nevojshme nga ekspertët më të mirë të gjuhës.

Me një infrastrukturë moderne të pajisur me teknologjitë më të fundit, iu ofron mundësi të praktikojnë dhe demonstrojnë njohuritë e balancuara teorike dhe praktike të gjuhës angleze.

Shkenca Politike

Programi Shkenca Politiken në UBT ofron një kombinim të teorisë politike me kontekste praktike, duke trajtuar me kujdes situatat ndërkombëtare dhe kombëtare të politikës.

Studentët pas përfundimit të këtij porgrami do të mund të zotërojnë njohuri të gjera teorike dhe konceptet themelore teorike politike dhe të njohin çështjet kryesore të zhvillimeve politike bashkëkohore në teorinë shkencore dhe në praktikë.

Inxhineri e Energjisë

Ndërsa Programi Inxhinieri e Energjisë, një ndër porgramet më innovative në UBT, u ofron studentëve njohuri të avancuara në energjinë e rinovueshme.

Fakulteti është themeluar në një bazë të fortë akademike dhe profesionale, duke ofruar mundësi të shkëlqyera për studentët që synojnë të bëhen liderë.

Nga UBT u bëhet thirrje të gjithë të rinjve që të përfitojnë nga kjo mundësi dhe të bëhen pjesë e UBT-së. Regjistrimet e hershme janë të hapura dhe interesimi është gjithmonë dhe më i madh, për të mos humbur këtë mundësi, të gjithë maturantët ftohen të rezervojnë vendin e tyre sa më parë.

Ndërsa UBT vazhdon të mbetet ndër institucionet më të avancuara të arsimit të lartë në rajon, me një infrastrukturë moderne, staf akademik të kualifikuar dhe partneritete ndërkombëtare që garantojnë një përvojë arsimore të klasit botëror.

Në kuadër të Ditës Botërore të Lirisë së Shtypit, në UBT është mbajtur një forum i nivelit të lartë, i cili mblodhi së bashku personalitete të njohura të gazetarisë, komunikimit dhe rregullatorëve mediatikë, për të trajtuar temën shumë të ndjeshme dhe aktuale të etikës në media.

Të pranishëm në këtë aktivitet ishin: Rektori i UBT-së, Prof. Dr. Edmond Hajrizi, Kryetarja e Autoritetit të Mediave Audiovizive në Shqipëri, Armela Krasniqi, Kryetari i Komisionit të Pavarur për Media, Besnik Berisha, Dekani i Fakultetit Media dhe Komunikim në UBT, Prof. Dr. Ferid Selimi, Kryeredaktorja e KTV-së dhe Kryetare e Këshillit të Mediave të Shkruara të Kosovës, Brikenda Rexhepi, gazetari dhe autori i disa botimeve në fushën e etikës mediatike, Prof. Musa Sabedini, drejtuesit dhe redaktorë të mediave vendore si Muhamet Hajrullahu, Ilir Zylfiu, Shkodran Gajraku, si dhe profesorë e studentë të fushës së komunikimit.

Në fjalën hapëse, Rektori i UBT-së, Prof. Dr. Edmond Hajrizi, theksoi rëndësinë e thellimit të diskutimit për etikën profesionale në gazetari, duke vënë në dukje se kjo çështje nuk është vetëm akademike, por përbën një dimension thelbësor për funksionimin e shoqërisë demokratike:

“Pjesa e etikës është një tematikë që nuk duhet anashkaluar. Janë çështje me interes për t’u diskutuar për të gjithë, dhe uroj që ky forum të shërbejë për konkluzione konkrete që të japim një mesazh të qartë nga ky takim”.

Ai shtoi se në bashkëpunim me ekspertë të fushës janë realizuar disa hulumtime për të analizuar nivelin e etikës në media dhe ndikimin që ajo ka në rritjen e besueshmërisë tek publiku. Duke vlerësuar punën e gazetarëve, Hajrizi ngriti edhe çështjen e stabilitetit financiar, duke thënë se gazetarët nuk paguhen sa duhet dhe kjo ndikon në cilësinë e punës së tyre.

“Gazetaria është profesion fisnik. Por, për ta mbështetur atë, duhet t’u krijojmë kushte të qëndrueshme financiare gazetarëve, që të mos bien pre e ndikimeve negative”, tha ai.

Në këtë diskutim, Dekani i Fakultetit Media dhe Komunikim në UBT, Prof. Dr. Ferid Selimi, tha se etika është një nga shtyllat bazë të formimit profesional të studentëve të komunikimit, dhe UBT është e përkushtuar që përmes kurrikulave moderne dhe trajnimve të përgatit gazetarë të përgjegjshëm.

Rektori Hajrizi vlerësoi kontributin e profesorëve të UBT-së të cilët publikojnë herë pas here libra të rëndësishëm për etikën dhe komunikimin, duke përmendur veçanërisht kontributin e gazetarit dhe profesorit Musa Sabedini, i cili ka mbi 33 vite përvojë dhe ka botuar tri libra, ndërsa së shpejti pritet të publikojë edhe një tjetër që prek temat delikate të etikës mediatike në Kosovë.

Ndërkohë, Armela Krasniqi, Kryetare e AMA-s në Shqipëri, theksoi se edhe pse janë vendosur gjoba ndaj televizioneve, problemi kryesor mbetet edukimi i individëve, sidomos në raport me platformat si TikTok. Ajo tha se janë vërejtur disa shkelje serioze të ligjit dhe mungesë transparence në pronësinë e mediave online.

“Nuk është e lehtë të konkurrosh në një mjedis të tillë mediatik. Ka media që nuk dihet kush janë pronarët e tyre, dhe kjo e bën të vështirë rregullimin. Por, shtypi duhet të jetë i lirë, sepse vetëm një shtyp i lirë krijon qytetarë të shëndetshëm”, tha mes tjerash Krasniqi.

Besnik Berisha, Kryetar i Komisionit të Pavarur për Media, theksoi se liria e shprehjes ka kuptim vetëm kur menaxhohet me vetëkontroll dhe jo me masa ndëshkuese.

“Sfidat për gazetarët rriten kur raportojnë për interesa të mëdha financiare. Media duhet të jetë profesionale dhe objektive, jo shërbëtore e grupeve të interesit. Misioni ynë është të nxisim diversitetin, jo të mbyllim mediat”, u shpreh Berisha.

Prof. Musa Sabedini, gjatë fjalës së tij, tha se mungesa e literaturës ka qenë nxitje për të përfshirë temat e etikës në tekstet që ai ka shkruar, duke u përpjekur të trajtojë ato tema për të cilat të tjerët nuk kanë guxuar të flasin.

“Gazetaria online ka mungesë dokumentimi, mungesë transparence për përmbajtjen dhe kufijtë e saj. Ka gazetarë të mirë, por mungojnë ata që kanë guximin të dalin në terren. Gazetari duhet të jetë në gjendje të përballet me institucionet, me pushtetin, pa frikë. Etika nuk është një ditë në vit, por duhet të jetë pjesë e përditshmërisë sonë”, potencoi Sabedini.

Brikenda Rexhepi, Kryeredaktore në KTV dhe Kryetare e Këshillit të Mediave të Shkruara të Kosovës, theksoi se përkundër përpjekjeve për vetërregullim, ka raste kur gazetarët qëllimisht e shkelin etikën për klikime dhe përfitime financiare.

“Media duhet të ketë pronësi të qartë, transparencë financiare dhe profesionalizëm. Një gazetar i mirë duhet të formohet në terren, të dijë të shmangë shkeljen e etikës dhe të ruajë balancën mes lirisë dhe përgjegjësisë. Liria nuk është kur publikohen foto të fëmijëve në kushte të papërshtatshme apo kur promovohen përmbajtje që nxisin vetëvrasje. Kjo është e papranueshme”, vlerësoi Rexhepi.

Kryeredaktori i Telegrafi, Muhamet Hajrullahu, me rreth 25 vite përvojë në media, u shpreh i shqetësuar për renditjen e Kosovës në vendin e 99-të për lirinë e medias. Ai theksoi nevojën për t’u përshtatur me format inovative të gazetarisë dhe rritjen e profesionalizmit.

Safet Zejnullahu theksoi se roli i gazetarit është i pazëvendësueshëm edhe në kohën e inteligjencës artificiale.

“Gazetari duhet të jetë në vendin e ngjarjes, të dijë të bëjë gjithçka – të raportojë, të fotografojë, të analizojë. Redaksitë nuk kanë më luksin të kenë staf të ndarë për gjithçka, por kjo nuk duhet të cenojë cilësinë”, potencoi ai.

Prof. Afërdita Maliqi, gazetare dhe ligjëruese që nga viti 1999, tha se pavarësisht moshës, është e rëndësishme të përqafohen risitë, por pa lënë pas profesionalizmin dhe etikën. Ndërsa, gazetari Shkodran Gajraku, që ka nisur punën në media që nga viti 2008, ndau përvojën e tij, duke theksuar lirinë që ka pasur në raportim, por edhe sfidat, përfshirë kërcënimet e drejtpërdrejta.

Në këtë forum u dha një mesazh i qartë: Etika në gazetari nuk është luks, por domosdoshmëri. Liria e shprehjes dhe përgjegjësia duhet të ecin krah për krah, për një media më të lirë, më të drejtë dhe më profesionale. /UBT News/