Presidenti i Shteteve të Bashkuara, Donald Trump, kërcënoi se Irani do të “fshihet nga faqja e dheut” nëse sulmon anijet amerikane që përpiqen të rihapin Ngushticën e Hormuzit.

Paralajmërimi vjen në kohën kur SHBA-ja po zhvillon një operacion detar, për të shoqëruar dhe nxjerrë në mënyrë të sigurt nga zona anijet e bllokuara.

Më shumë se 800 anije dhe rreth 20.000 anëtarë ekuipazhi mbeten të bllokuar në Ngushticën e Hormuzit, e cila është jetike për furnizimin global me naftë.

Duke folur për Fox News më 4 maj, Trump e përshkroi përpjekjen e marinës amerikane si “një nga manovrat më të mëdha ushtarake të bëra ndonjëherë”.

Ai, gjithashtu, tha se Irani është bërë “shumë më fleksibël” në negociatat për paqe, duke shtuar se SHBA-ja ka kapacitete ushtarake më të mëdha se Republika Islamike.

Sipas Uashingtonit, dhjetëra anije tregtare janë ridrejtuar, për shkak të situatës së tensionuar që vazhdon.

Irani, në anën tjetër, paralajmëroi se do t’i sulmojë anijet amerikane që i afrohen ngushticës dhe mohoi pretendimet e SHBA-së se ka shkatërruar gjashtë anije të vogla iraniane dhe ka kapur raketa e dronë iranianë.

Në një tjetër zhvillim, ministri i Jashtëm i Iranit u bëri thirrje Emirateve të Bashkuara Arabe që të mos anojnë nga “zgjidhja ushtarake” kundër Republikës Islamike.

Në një postim në X më 4 maj, Abbas Araqchi tha se beson se “nuk ka zgjidhje ushtarake” për krizën aktuale.

“Ndërsa bisedimet po përparojnë, falë përpjekjeve bujare të Pakistanit, Shtetet e Bashkuara duhet të jenë të kujdesshme që të mos tërhiqen përsëri në një moçal nga keqdashësit. Emiratet e Bashkuara Arabe duhet të mbeten gjithashtu vigjilente”, shtoi ai, duke iu referuar përpjekjeve të Islamabadit për të ndërmjetësuar në konflikt.

Që nga fillimi i sulmeve të Shteteve të Bashkuara dhe Izraelit kundër Iranit më 28 shkurt, Emiratet e Bashkuara Arabe kanë qenë ndër vendet më të prekura të Gjirit Persik nga sulmet iraniane, të cilat Teherani i përshkruan si përgjigje ndaj fushatës ushtarake SHBA-Izrael.

Një ditë para mesazhit të Araqchit, zëdhënësi i Ministrisë së Jashtme iraniane, Esmail Baqaei, kritikoi “sjelljen e papërshtatshme” të Emirateve të Bashkuara Arabe që nga fillimi i konfliktit, duke thënë se ato janë “lidhur” me agresorët kundër Iranit dhe se kanë krijuar “shumë probleme”.

Media iraniane, gjithashtu, publikoi raporte që pretendojnë se ka një bashkëpunim ushtarak midis Izraelit dhe Emirateve të Bashkuara Arabe, duke përfshirë dislokimin e sistemeve të përparuara të mbrojtjes ajrore.

Autoritetet e Emirateve thanë më 4 maj se vendi i tyre është nën sulmet iraniane me raketa dhe dronë dhe paralajmëruan se “nuk do të hezitojnë të mbrojnë sigurinë dhe sovranitetin e tyre”.

Autoritetet në portin Fujairah thanë se një sulm me dron goditi një instalim energjie, duke shkaktuar zjarr dhe duke plagosur tre persona. /REL/

UBT vazhdon të dëshmojë përkushtimin e tij ndaj ekselencës akademike dhe promovimit të studentëve në arenën ndërkombëtare, pasi punimi shkencor i studenteve Tringa Muhadri nga Fakulteti i Stomatologjisë dhe Ornela Lezi nga Fakulteti i Teknikës Dentare është pranuar për prezantim në edicionin e 12-të të International Student Congress (ISC MedUni Graz), i cili do të mbahet nga 3 deri më 6 qershor 2026 në Graz, Austri.

Punimi me titull “Digital vs Conventional Impressions: Accuracy, Patient Comfort, and Comparison – Paper Review”, i realizuar nën mentorimin akademik të Prof. Asst. Genc Demjaha dhe Dr. Spec. Krenare Mehmeti, ka marrë vlerësim pozitiv nga Këshilli Organizativ i kongresit, duke u përzgjedhur për prezantim në një platformë prestigjioze ndërkombëtare që mbledh studentë, hulumtues dhe profesionistë të rinj nga fusha të ndryshme të shkencave shëndetësore.

Ky sukses përfaqëson jo vetëm një arritje të rëndësishme për studentet, por edhe një dëshmi të cilësisë akademike dhe përgatitjes profesionale që ofrojnë Fakulteti i Stomatologjisë dhe Fakulteti i Teknikës Dentare në UBT.

Përmes këtij punimi, studentet do të prezantojnë analiza mbi krahasimin ndërmjet metodave digjitale dhe konvencionale të impresioneve dentare, duke trajtuar elemente kyçe si saktësia, komoditeti i pacientit dhe përparësitë e teknologjive moderne në praktikën stomatologjike.

ISC MedUni Graz konsiderohet një nga platformat më të rëndësishme ndërkombëtare për studentët e shkencave shëndetësore, me fokus në promovimin e bashkëpunimit ndërdisiplinor, shkëmbimin e njohurive shkencore, ndërtimin e rrjeteve profesionale dhe avancimin e dialogut akademik global.

Pjesëmarrja e studenteve të UBT-së në këtë kongres prestigjioz konfirmon edhe një herë orientimin ndërkombëtar të institucionit dhe angazhimin e tij për të krijuar mundësi konkrete për studentët që të kontribuojnë në zhvillimin shkencor dhe profesional përtej kufijve vendorë.

Ky përfaqësim dinjitoz në Graz është një tjetër dëshmi se UBT po vazhdon të ndërtojë gjenerata profesionistësh dhe hulumtuesish të aftë për të konkurruar dhe kontribuar në skenën globale akademike.

Policia e Kosovës ka nisur hetimet për një rast të vrasjes në tentativë në Prishtinë, ku një person ka shtënë me armë zjarri në drejtim të dy të tjerëve. Sipas raportit zyrtar, nuk ka persona të lënduar, përveç dëmtimeve materiale që ka pësuar vetura e viktimave.

Në vendin e ngjarjes janë gjetur dhe sekuestruar katër gëzhoja, ndërsa njësitet relevante po punojnë për zbardhjen e rrethanave të rastit

“Është raportuar se i dyshuari mashkull kosovar ka shtënë me armë zjarri në drejtim të dy viktimave meshkuj kosovarë. Përveç dëmtimeve të veturës viktimat nuk janë lënduar. Në vendin e ngjarjes janë gjetur dhe sekuestruar 4 gëzhoja. Rasti është duke u hetuar”, sipas raportit të Policisë.

Kryeministri në detyrë, Albin Kurti, ka takuar në Jerevan edhe homologun e tij nga Finlanda, Petteri Orpo.

Në qendër të bisedës ishte mbështetja e Finlandës për anëtarësimin e Kosovës në Këshillin e Evropës dhe rrugëtimi drejt marrjes së statusit të vendit kandidat në Bashkimin Evropian.

Kurti vlerësoi lart ndihmën e Finlandës në luftimin e dezinformimit dhe veçoi modelin finlandez të “mbrojtjes gjithëpërfshirëse”, të cilin Qeveria e Kosovës tashmë e ka miratuar si koncept për organizimin e sigurisë shtetërore.

Lidhur me rëndësinë e luftimit të fushatave dezinformuese, gjatë takimit u diskutua edhe për mundësit e bashkpunimit në shumë fusha.

“Bashkëpunimi dhe ndihma e Finlandës në luftimin e dezinformimit është një element kyç për mbrojtjen e hapësirës demokratike dhe informimit publik të saktë”, shprehet Kurti.

Të dy udhëheqësit e mbyllën takimin duke riafirmuar gatishmërinë për thellimin e marrëdhënieve dypalëshe, veçanërisht në fushat që prekin sigurinë dhe stabilitetin rajonal.