Pas Kampionatit Evropian 2024, i fituar nga Spanja, vëmendja e tifozëve do të kthehet në Kupën e Botës 2026, kompeticioni i radhës ndërkombëtar. Ndeshjet kualifikuese për Botërorin kanë nisur tashmë në pjesën tjetër të botës, por kombëtaret evropiane do të nisin garën më vonë.

Si funksionojnë ndeshjet kualifikuese të Kupës së Botës 2026?

Format i ri për kualifikueset e Botërorit 2026 u zbulua nga UEFA më 25 janar. 55 kombëtare evropiane do të ndahen në 12 grupe, ku çdo grup do të ketë katër ose pesë ekipe (nuk do të ketë më grupe me pesë ose gjashtë skuadra). Fituesit e grupeve do të sigurojnë automatikisht kualifikimin në fazën finale të Kupës së Botës, ndërsa nënkampionët dhe katër skuadrat me renditjen më të mirë në Ligën e Kombeve do të kalojnë në fazën e play-off për të luftuar për një vend në turneun botëror.

Më 13 dhjetor do të hidhet shorti për të ndarë ekipet në 12 grupe. Shorti do të përfshijë tetë kombëtaret më të mira të Ligës së Kombeve, të cilat do të jenë kokë serish në grupet përkatëse (katër fituesit dhe katër vendet e dyta që kalojnë në play-off), ndërsa katër kombëtaret e tjera do të jenë ato që kanë renditjen më të mirë në FIFA, por nuk kanë siguruar ende kualifikimin.

Kualifikueset e Kupës së Botës 2026: Vazo dhe grupet e përkohshme

Vazo 1: Francë, Spanjë, Angli, Portugali, Holandë, Belgjikë, Itali, Gjermani, Kroaci, Zvicër, Danimarkë, Austri.

Vazo 2: Ukraina, Turqi, Suedi, Uellsi, Poloni, Hungari, Serbi, Greqia, Rumania, Norvegjia, Sllovakia, Republika Çeke.

Vazo 3: Skoci, Sllovenia, Republika e Irlandës, Shqipëria, Maqedonia e Veriut, Gjeorgjia, Finlanda, Islanda, Irlanda e Veriut, Izraeli, Bosnja dhe Hercegovina, Mali i Zi.

Vazo 4: Bullgaria, Luksemburgu, Bjellorusia, Armenia, Kosova, Kazakistani, Azerbajxhani, Estonia, Qipro, Letonia, Far Oer, Lituani.

Vazo 5: Moldavia, Andorra, Malta, San Marino, Gjibraltar, Lihtenshtajni.

Shqipëria gjendet në Vazon e tretë, ndërsa kombet më të forta evropiane, si Franca, Spanja dhe Anglia, janë të vendosura në Vazon 1. Pas shortit të 13 dhjetorit, grupet do të bëhen të qarta dhe do të nisë gara për kualifikimin në Kupën e Botës 2026, një sfidë që do të tërheqë vëmendjen e shumë tifozëve në mbarë Evropën dhe botën./UBTNews/

Çekia ka siguruar kreun e grupit në Ligën B të Ligës së Kombeve, pas një fitoreje 2-1 ndaj Gjeorgjisë, duke e mbyllur kështu grupin në vendin e parë dhe siguruar ngjitjen automatike në Ligën A.

Golat e Jan Sulç dhe Adam Hlozek i dhuruan 3 pikë të arta Çekisë, ndërkohë që golin e vetëm për Gjeorgjinë e shënoi Giorgi Mikautadze. Ky rezultat ka qenë vendimtar për pozitat në grup, pasi Gjeorgjia, pas kësaj disfate, mbylli garën në vendin e tretë, duke lënë Shqipërinë në fund të renditjes.

Në këtë mënyrë, Gjeorgjia do të luajë në fazën e “Play-Out”, ku do të synojë të mbajë vendin në Ligën B. Shqipëria, nga ana tjetër, e mbylli grupin në vendin e fundit, pa mundur të arrijë asnjë fitore në këtë edicion të Ligës së Kombeve.

Pas këtyre ndeshjeve, Shqipëria do të mbetet në pritje të mundësive të ardhshme për të avancuar në konkurset ndërkombëtare, ndërkohë që Çekia mund të shijojë suksesin dhe ngjitjen në Ligën A./UBTNews/

Federata e Boksit e Kosovës (FBoxK) do të organizojë turneun e 26-të ndërkombëtar “Adem Jashari”, i cili do të mbahet më 23 dhe 24 nëntor 2024 në Pallatin e Rinisë dhe Sportit në Prishtinë.

FBoxK ka njoftuar se ka bërë të gjitha përgatitjet për organizimin sa më të mirë të këtij turneu, i cili nga viti në vit po bëhet edhe më masiv dhe cilësor. Turneu është në kalendarin e garave evropiane dhe botërore, dhe vlerësohet si njëra prej ngjarjeve më të mëdha të sportit në Kosovë, marrë parasysh edhe faktin se mbahet nën patronatin e kryeministrisë së Republikës së Kosovës.

Pjesëmarrëse në turne do të jenë tetë shtete. Gjysmëfinalet do të zhvillohen më 23 nëntor, me fillim në ora 16:00, ndërsa finalet të nesërmen (24 nëntor) me fillim në ora 12:00.