Aktualitet

Nënkryetari i Dumës paralajmëron një Jaltë ose Potsdam të ri

Pyotr Tolstoy: Unë besoj se, pas të gjitha këtyre tensioneve, ne duhet të negociojmë.

Published

4 years ago

on

Për zgjidhjen e krizës në Ukrainë është e nevojshme një konferencë, si ato që janë mbajtur në fund të Luftës së Dytë Botërore, paralajmëroi Pyotr Tolstoy, nënkryetar i Dhomës së Ulët të Parlamentit të Rusisë, që ndryshe njihet si Duma ruse.

“Unë besoj se, pas të gjitha këtyre tensioneve, ne duhet të negociojmë. Sigurisht që na duhet një Jaltë e re ose një Potsdam i ri. Negociata reale për instalimin e sistemit të sigurisë në Evropë, e jo një bazë e NATO-s në kufijtë tanë”, tha Tolstoy në një intervistë për radion kombëtare belge (RTBF).

Konferencat në Potsdam dhe Jaltë u mbajtën në vitin 1945. Pjesëmarrëse në to ishin Shtetet e Bashkuara, Mbretëria e Bashkuar dhe Bashkimi Sovjetik.

Në Jaltë, në shkurt të vitit 1945, u ra dakord që Gjermania të ndahej në katër zona okupimi të pasluftës, që u vunë nën kontrollin e forcave ushtarake amerikane, britanike, franceze dhe sovjetike. Në zona të ngjashme u nda edhe qyteti i Berlinit.

Në konferencën në Potsdam, që u mbajt në korrik të të njëjtit vit, u ra dakord që Gjermania të ndahej në katër zona okupimi dhe që kufiri gjerman të zhvendosej në perëndim, ndërsa grupi i mbështetur nga Bashkimi Sovjetik, u njoh si Qeveri legjitime e Polonisë.

Pyotr Tolstoy është njëri nga 351 anëtarët e Dumës që Bashkimi Evropian i futi në listë të zezë, me vendimin e marrë më 22 shkurt, kur blloku miratoi sanksione të reja kundër Rusisë.

Shtetet e Bashkuara gjithashtu vendosën sanksione kundër Moskës.

Piotr Tolstoy është pasardhës i shkrimtarit të famshëm rus, Leo Tolstoy, dhe konsiderohet si bashkëpunëtor i ngushtë i presidentit rus, Vladimir Putin.

I pyetur nga RTBF për t’i komentuar sanksionet evropiane, Tolstoy parlajmëroi “kundër-sanksione nga Rusia”.

Ai tha se Evropa i detyrohet Rusisë 500 miliardë euro në ditë dhe Shtetet e Bashkuara 25 miliardë, për shkak të sanksioneve.

“Me sanksionet e reja evropiane dhe amerikane, ne do të largohemi më tej, dhe për këtë arsye, këto shifra do të rriten. Kjo është e sigurt”, tha Tolstoy.

Ai shtoi se Rusia do të veprojë ushtarakisht për t’i mbrojtur njerëzit që jetojnë në, siç tha ai, “republikat e pavarura”, nëse “Ukraina jep arsye për veprim ushtarak në këtë situatë shumë të tensionuar”.

Më 21 shkurt, presidenti i Rusisë, Vladimir Putin, mori vendim për njohjen e rajoneve separatiste të Ukrainës, Donjeck dhe Luhansk, si shtete të pavarura. Ai po ashtu urdhëroi vendosjen e trupave ruse në ato territore. Presidenti i Ukrainës, Volodymyr Zelensky, tha se kufijtë e vendit të tij mbeten të pandryshuar. Perëndimi nisi menjëherë me vendosjen e sanksioneve të reja kundër Rusisë.

Rusia, në fakt, është nën sanksione qëkur aneksoi Gadishullin ukrainas të Krimesë, në vitin 2014, dhe nisi mbështetjen për lëvizjen separatiste në lindje të Ukrainës.

Kriza e re u përshkallëzua nga fundi i vitit të kaluar, kur Rusia nisi grumbullimin e trupave të saj në kufijtë me Ukrainën.

Shteti rus kërkoi garanci nga NATO-ja se nuk do të zgjerohet më në lindje, por SHBA-ja dhe NATO-ja e refuzuan këtë kërkesë.

Putin tha më 21 shkurt se anëtarësimi i Ukrainës në NATO do të paraqiste rrezik për sigurinë ruse.

“Në Evropë kemi iluzionin se kemi fituar Luftën e Ftohtë dhe se mund t’i sjellim trupat e NATO-s dhe bazat raketore në kufijtë tanë [rusë]”, tha Tolstoy.

“Besoni se do të presim dhe ta shikojmë këtë për dekada? Jo. Kemi pritur për 20 vjet, ka qenë një kohë e gjatë”, shtoi ai.

Duke theksuar se askush nuk ka interes për një luftë të vërtetë, nënkryetari i Dumës ruse tha se prania e trupave ruse në “republika”, do të ndalojë “së paku aktivitetet e nacionalistëve ukrainas”.

“Nëse ndalen, nuk mendoj se do të ushtrojmë ndonjë presion ushtarak. Por, nëse nuk ndalen, ne do të bëjmë diçka për të ndalur masakrën që ka tetë vjet që po vazhdon dhe që Evropa nuk dëshiron ta njohë ose ta shohë”, tha Tolstoy.

Konflikti midis separatistëve pro-rusë dhe forcave qeveritare në lindje të Ukrainës vazhdon qysh nga viti 2014. Mbi 14,000 njerëz humbën jetën në luftime dhe palët vazhdimisht akuzojnë njëra-tjetrën për nxitjen e tyre.

Komuniteti ndërkombëtar nuk e njohu kurrë aneksimin e Krimesë, ndërsa vendimin e 21 shkurtit të Putinit e cilësoi si shkelje të rëndë të sovranitetit dhe integritetit territorial të Ukrainës.

Related Topics:
Continue Reading

Vendi

Bypass apo stent? Kur kirurgjia e zemrës bëhet zgjedhja më e përshtatshme për pacientin

Published

3 hours ago

on

August 19, 2026

By

Shëndeti i zemrës nuk përcaktohet vetëm nga një diagnozë, por nga kompleksiteti i dëmtimeve, gjendja e përgjithshme e pacientit dhe mënyra më e sigurt për të rikthyer qarkullimin e duhur të gjakut në muskulin e zemrës. Për këtë arsye, jo çdo problem i arterieve koronare mund të zgjidhet me vendosjen e një stenti apo vetëm përmes trajtimit medikamentoz.

Në rastet kur bllokimet janë të shumta, të përhapura ose anatomikisht komplekse, kirurgjia e bypass-it mund të jetë një alternativë e rëndësishme terapeutike, e cila vendoset pas vlerësimit të plotë të pacientit nga ekipi specialistik.

Pikërisht për këtë çështje, Dr. Sulejman Kusi, specialist i kardiologjisë/kardiokirurgjisë në United Hospital, shpjegon se vendimi ndërmjet stentit dhe bypass-it duhet të bazohet në karakteristikat konkrete të sëmundjes koronare dhe në gjendjen e përgjithshme shëndetësore të pacientit. Zgjedhja e trajtimit nuk është një vendim që merret në mënyrë të njëjtë për të gjithë, por kërkon ekzaminime, vlerësim të enëve koronare dhe gjykim të specializuar mjekësor.

Rikuperimi pas bypass-it kërkon kujdes dhe disiplinë

Pas një operacioni bypass, rikthimi në aktivitetet e përditshme është një proces gradual. Kujdesi për plagën operative, aktiviteti fizik i kontrolluar dhe ushqyerja e shëndetshme janë pjesë të rëndësishme të periudhës së rikuperimit.

Pacientët këshillohen që plagën operative ta mbajnë të pastër dhe të thatë, të ecin çdo ditë sipas udhëzimeve të mjekut dhe të kryejnë ushtrimet e frymëmarrjes pa e sforcuar organizmin. Po ashtu, një regjim ushqimor i balancuar, me më shumë fruta, perime dhe peshk dhe me kufizim të kripës së tepërt, mund të jetë pjesë e rëndësishme e kujdesit afatgjatë për shëndetin kardiovaskular.

Rikuperimi kërkon durim, terapi dhe monitorim

Periudha pas operacionit të zemrës nuk duhet parë si një kthim i menjëhershëm në ritmin e mëparshëm të jetës. Ajo kërkon disiplinë, durim dhe ndjekje të vazhdueshme mjekësore. Ecja e përditshme, ushtrimet e frymëmarrjes, marrja e rregullt e terapisë së përshkruar dhe pushimi i mjaftueshëm janë ndër elementet që mund ta mbështesin rikuperimin.

Në javët e para mund të shfaqen lodhje, shqetësime të menaxhueshme në kraharor, çrregullime të gjumit apo ulje e oreksit. Megjithatë, çdo simptomë e re, e fortë ose që përkeqësohet duhet t’i komunikohet ekipit mjekësor dhe nuk duhet të trajtohet vetëm me vetëkujdes.

Mosha e shtyrë nuk është kriteri i vetëm për kirurgjinë

Një prej pyetjeve të rëndësishme për pacientët dhe familjarët është nëse operacioni në zemër është i sigurt te personat në moshë të shtyrë. Sipas Dr. Sulejman Kusit, mosha në vetvete nuk e përcakton sigurinë e ndërhyrjes. Vlerësimi duhet të marrë parasysh gjendjen e përgjithshme shëndetësore, funksionimin e organeve, sëmundjet shoqëruese, gjendjen e zemrës dhe kompleksitetin e problemit koronar.

Për këtë arsye, vendimi për ndërhyrje kirurgjikale duhet të merret individualisht, pas një vlerësimi të plotë specialistik dhe pas peshimit të përfitimeve dhe rreziqeve për secilin pacient.

Në fund, mesazhi kryesor është i qartë: kujdesi për zemrën nuk përfundon me ndërhyrjen kirurgjikale. Bypass-i apo stenti mund të jenë pjesë e trajtimit, por kontrolli i faktorëve të rrezikut, terapia e përshkruar, aktiviteti fizik i përshtatur dhe ndjekja mjekësore mbeten thelbësore për shëndetin afatgjatë.

Për informacione dhe konsultime në United Hospital:
📞 038 60 70 70 / 046 60 70 70

Vendimi ndërmjet trajtimit medikamentoz, stentit dhe bypass-it duhet të merret vetëm nga mjeku/ekipi specialistik pas vlerësimit individual të pacientit./rajonipress/

Continue Reading

Vendi

Në Zubin Potok identifikohen mbetje kockore të së paku 23 personave

Published

3 hours ago

on

August 19, 2026

By

Prokuroria Speciale dhe Instituti i Mjekësisë Ligjore thanë se në Zubin Potok, në lokacionet ku dyshohet se ka varre masive, bazuar në vlerësimet preliminare janë identifikuar mbetje kockore që dyshohet se u përkasin të paktën 23 individëve.

“Identifikimi i plotë do të bëhet pas përfundimit të ekzaminimeve mjeko-ligjore dhe procedurave përkatëse”, u tha në njoftim.

Kryeministri në detyrë i Kosovës, Albin Kurti, më herët kishte deklaruar se mbetjet mortore të gjetura në Kalludër të Vogël, mund t’u përkasin grupit të 23 shqiptarëve që ishin zhdukur në atë pjesë të Kosovës në vitin 1999.

Ky grup, i njohur si “grupi i intelektualëve të Mitrovicës” është i zhdukur që nga 19 prilli i vitit 1999. Në mesin e tyre kishte mjekë, profesorë, avokatë dhe profile të tjera.

Gërmimet në Zubin Potok nisën më 28 korrik dhe gërmimet janë kryer në Kalludër të Vogël, Jakubë dhe në një lokacion tjetër në këtë komunë, në veri të Kosovës.

Gërmimet nisën pas një hetimi dyvjeçar lidhur me dyshimet për krime lufte.

Më 15 gusht, autoritetet kishin njoftuar se në Kalludër ishin gjetur mbetje eshtërore të të paktën tre personave.

“Aktualisht, lidhur me këtë rast janë duke u hetuar tre persona J.R., M.J dhe M.B. nën dyshimin për kryerjen e veprës penale ‘Krime lufte kundër popullsisë civile’, të cilët ndodhen në masën e paraburgimit”, tha Prokuroria Speciale e Kosovës.

Njëri nga të arrestuarit, sipas autoriteteve, dyshohet se në kohën e luftës kishte qenë pjesë aktive e Armatës Jugosllave.

Sipas Institutit të Krimeve të Kryera Gjatë Luftës në Kosovë, 1.577 persona vazhdojnë të jenë të zhdukur nga lufta e viteve 1998-1999, ndërsa janë dokumentuar gjithsej 12.230 viktima të luftës.

Kosova ka kërkuar vazhdimisht nga Serbia bashkëpunim për zbardhjen e fatit të personave të zhdukur dhe qasje në arkivat ushtarake që sipas autoriteteve mund të ndihmojnë në identifikimin e lokacioneve të varreve të mundshme.
/REL/

Continue Reading

Vendi

PDK i kërkon përseri Avni Deharit vazhdimin e seancës konstituive më 20 gusht

Published

4 hours ago

on

August 19, 2026

By

Deputetët e Partisë Demokratike të Kosovës (PDK) i kanë dërguar kërkesë zyrtare kryesuesit të seancës konstituive, Avni Dehari, për të thirrur vazhdimin e seancës ditën e enjte, më 20 gusht.

Përmes një letre, PDK-ja ka theksuar se caktimi i seancës është një obligim kushtetues dhe procedural i kryesuesit, duke paralajmëruar se vonesat e mëtejshme thellojnë shkeljet ligjore.

“Moskonstituimi i Kuvendit brenda afatit të përcaktuar tashmë ka krijuar një situatë të rëndë të shkeljes së Kushtetutës dhe të mosrespektimit të aktgjykimeve të Gjykatës Kushtetuese. Mosrespektimi i afateve dhe procedurave të përcaktuara me Rregulloren e Kuvendit vetëm sa e thellon më tej këtë situatë”, ,thuhet në kërkesen e PDK-së.

Kjo kërkesë vjen në kuadër të aksioneve të vazhdueshme të PDK-së, deputetët e së cilës po protestojnë çdo mëngjes para Qeverisë dhe po mblidhen çdo dy ditë në sallën e Kuvendit.

Në anën tjetër, që nga vazhdimi i fundit më 8 gusht, kryesuesi Avni Dehari nuk ka thirrur seancë të re, duke mbështetur qëndrimin e kryetarit të Lëvizjes Vetëvendosje, Albin Kurti, se pa një marrëveshje politike seancat mbeten “shterpe”. Kurti ka kërkuar më shumë kohë për negociata, me arsyetimin se pa një dakordim për postin e presidentit, vendi do të shkojë pashmangshëm në zgjedhje të reja.

Përderisa PDK-ja dhe AAK-ja kanë refuzuar takimet me Kurtin, ky i fundit ka zhvilluar negociata me Lidhjen Demokratike të Kosovës (LDK), përfshirë një takim me liderin e saj, Lumir Abdixhiku, për të diskutuar rreth çështjes së presidentit. Ndërkohë, afati kushtetues 30-ditor për konstituimin e Kuvendit pas certifikimit të rezultateve tashmë ka kaluar. /E.A/

Continue Reading

Lajmet

Murici dhe Vojvoda shkëlqejnë në Kupën e Italisë: Zënë vend në formacionin e javës

Published

5 hours ago

on

August 19, 2026

By

Dyshja e kombëtares së Kosovës, Arijanet Muric dhe Mërgim Vojvoda, kanë dhënë paraqitje të shkëlqyera në Kupën e Italisë, duke u përfshirë në formacionin më të mirë të javës sipas platformës së specializuar të statistikave, SofaScore.

Portieri Arijanet Muric dhuroi një paraqitje të nivelit të lartë në fitoren 3-0 të Sassuolos ndaj Cesenas, duke u vlerësuar me notën e lartë 8.7.

Nga ana tjetër, mbrojtësi Mërgim Vojvoda po ashtu ishte vendimtar në triumfin e Udineses kundër Padovas me rezultat 1-0, ku për performancën e tij u shpërblye me notën 8.3.

Përfshirja e të dy futbollistëve kosovarë në 11-shen më të mirë konfirmon formën e tyre të mirë në fillim të këtij edicioni në futbollin italian. /E.A/

Continue Reading

Të kërkuara