Gjermania do t’i mbyllë që të tri konsullatat iraniane në Gjermani, si përgjigje ndaj ekzekutimit të shtetasit gjermano-iranian, Jamshid Sharmahd, nga Irani, tha të enjten vonë ministrja e Jashtme e Gjermanisë, Annalena Baerbock.

“Ne e kemi bërë të qartë vazhdimisht se ekzekutimi i një shtetasi gjerman do të ketë pasoja serioze”, tha Baerbock në Nju Jork.

“Prandaj, kam vendosur t’i mbyllë që të tri konsullatat iraniane në Frankfurt, Munih dhe Hamburg”, shtoi ajo.

Baerbock theksoi se marrëdhëniet e Gjermanisë me Iranin kanë “rënë më poshtë se në pikën e ulët”, pas ekzekutimit të Sharmahdit në Teheran më 28 tetor.

Baerbock tha se ekzekutimi i Sharmahdit tregon se “regjimi i padrejtësisë” në Iran vazhdon të veprojë me brutalitet.

Që të gjithë 32 punonjësit në tre konsullatat duhet të largohen nga vendi, përveç nëse kanë shtetësi gjermane.

Ambasada iraniane në Berlin nuk preket nga ky urdhër.

Irani thirri në takim të ngarkuarin e Gjermanisë me punë në Teheran për të protestuar ndaj vendimit “të padrejtë” të Gjermanisë, njoftuan media shtetërore më 31 tetor.

Media shtetërore iraniane tha se Sharmahd u ekzekutua pasi ishte dënuar për kryerjen e sulmeve terroriste.

Ministri i Jashtëm iranian, Abbas Araqchi, tha të qenit i pasitur me pasaportë gjermane nuk i jep askujt imunitet.

Kancelari gjerman, Olaf Scholz, iu bashkua Baerbockut për ta dënuar fuqishëm ekzekutimin e Sharmahdit, duke e quajtur atë “skandal” për Qeverinë iraniane.

Zëvendës i dërguarit të posaçëm, Abram Paley, nga Zyra e Dërguarit të Posaçëm të SHBA-së për Iranin, përshëndeti vendimin e Gjermanisë për mbylljen e tri konsullatave iraniane.

“Ne qëndrojmë të bashkuar me komunitetin ndërkombëtar për të mbajtur përgjegjës regjimin”, tha ai në X, duke e cilësuar ekzekutimin e Sharmahdit si “të padrejtë”.

Sharmahd, 69 vjeç, akuzohej nga Irani se udhëhiqte një grup promonarkist, për të cilin Teherani beson se ishte përgjegjës për një sulm vdekjeprurës me bombë në vitin 2008, si dhe për planifikimin e sulmeve të tjera në vend.

Katërmbëdhjetë iranianë dhe 210 të tjerë u plagosën në sulmin në xhaminë Sayyid al-Shuhada Husseiniya në Shiraz, gjatë një ceremonie për ta nderuar imamin Hussein, imamin e tretë të myslimanëve shiitë.

Ministria e Inteligjencës e Iranit e akuzoi Sharmahdin për planifikimin e sulmit, një akuzë të cilën familja e tij e hodhi poshtë si “qesharake”./REL/

Rajonet e goditura nga përmbytjet në Spanjë po përgatiten për reshje të tjera. Autoritetet lokale kanë njoftuar se disa qindra ushtarë janë angazhuar për të ndihmuar në operacionet e shpëtimit.

Të dhënat e fundit nga shteti iberik tregojnë se përmbytjet kanë shkaktuar mbi 205 viktima, duke e bërë këtë ngjarje një nga katastrofat natyrore më të rënda në dekadat e fundit.

Banorët e provincës së Valencias janë duke vlerësuar dëmet.

“Të katërt shpëtuam, por humbëm gjithçka; shtëpinë, makinën dhe dokumentet tona”, deklaron një grua.

“Bashkia njoftoi se niveli i ujit po rritej në orën 5 të mëngjesit, por tha se kishte gjithçka nën kontroll. Ne nuk ishim të shqetësuar sepse mendonim se nuk kishte rrezik. Edhe pas pune, shëtita me qenin tim”, deklaroi një tjetër qytetar.

Në qytetin Paiporta, të mbijetuarit nga përmbytjet janë rreshtuar për të marrë ushqim dhe ujë. Ky lokalitet, i vendosur në jug të Valencias, u shkatërrua nga një valë e papritur e baltës, që arriti deri në 2 metra lartësi.

Banorët deklaruan se uji kishte vërshuar ditën e martë, pa asnjë paralajmërim nga autoritetet. Sidoqoftë, ato kishin lëshuar alarmin e kuq për zonat në jug-perëndim të vendit.

Reshje të dendura shiu gjatë orëve të para të së premtes përmbytën një pjesë të qytetit dhe zonat përreth.

Koreja e Veriut do ta mbështesë Rusinë derisa ajo të arrijë fitore në luftën në Ukrainë, tha ministrja e Jashtme koreanoveriore, Choe Son Hui, të premten pas një takimi me homologun e vet rus në Moskë, Sergei Lavrov.

“Marrëdhëniet tona tradicionale dhe historike, të cilat kanë përshkruar dhe sprovuar rrugët e historisë, sot…po rriten në një shkallë të re marrëdhëniesh së miqësisë së pamposhtur ushtarake”, i tha ajo Lavrovit.

Ajo i lavdëroi liderin e Koresë së Veriut, Kim Jong Un, dhe presidentin rus, Vladimir Putin, për rolin e tyre për thellimin e lidhjeve.

Ajo tha se Pheniani nuk ka asnjë dyshim se ushtria dhe populli rus, nën “udhëheqjen e mençur” të Putinit, do të “arrijnë fitore të madhe në luftën e tyre të shenjtë për t’i mbrojtur të drejtat sovrane dhe interesat e sigurisë së shtetit të tyre”.

“Dhe, ne gjithashtu garantojmë se deri në ditën e fitores, në do të qëndrojmë fuqishëm përkrah partnerëve tanë rusë”, tha ajo.

Lavrovi foli për “marrëdhënie shumë të ngushta” mes ushtrive të të dy vendeve dhe tha se kjo ua mundëson atyre të zgjidhin çështje të rëndësishme të sigurisë së bashku.

Asnjëri prej tyre nuk foli për deklaratat e Shteteve të Bashkuara, NATO-s, Koresë së Jugut dhe Ukrainës gjatë kësaj jave, se Koreja e Veriut i ka dërguar rreth 10.000 trupa në Rusi.

Sekretari amerikan i Shtetit, Antony Blinken, tha të enjten se 8.000 trupa koreanoveriore janë në rajonin Kursk të Rusisë, ku trupat ukrainase kryen një inkursion në gusht dhe prej atëherë mbajnë nën kontroll qindra kilometra katror territor. Ai tha se pret këta trupa të dërgohen në vijën e frontit në ditët në vijim.

“Ne u jemi thellësisht mirënjohës miqve tanë koreanë për qëndrimin e tyre parimor në lidhje me ngjarjet që po zhvillohen në Ukrainë si pasojë e synimeve të Perëndimit për ta zgjeruar NATO-n në lindje dhe për ta nxitur haptazi regjimin racist për shfarosjen e çdo gjëje që është ruse”, tha Lavrov.

Choe tha se Veriu dhe Rusia duhet të vazhdojnë thellimin e marrëdhënieve në përputhje me traktatin e nënshkruar muaj më parë nga liderët e dyja vendeve, i cili përmban një klauzolë për mbrojtje të përbashkët.

Moska, e cila e nisi pushtimin e plotë të Ukrainës në shkurt 2022, nuk e ka mohuar e as pranuar troç se Koreja e Veriut i ka dërguar ushtarë. Por, Putini tha se i takon Rusisë se si ta zbatojë traktatin me Kimin./REL/

Pamjet satelitore të regjistruara nga Maxar Technologies tregojnë shkallën e madhe të shkatërrimit në Valencia, një qytet spanjoll që është zhytur nën ujë dhe baltë si pasojë e përmbytjeve katastrofike. Këto imazhe, të marra para dhe pas ngjarjeve të fundit, përshkruajnë një situatë alarmante dhe të tronditshme për banorët e rajonit.

Vendi është goditur nga stuhi të forta, të cilat janë karakterizuar nga forma V, e cila tregon ashpërsinë e fenomeneve atmosferike dhe aktivitetin e lartë të rrufesë. Këto stuhira kanë sjellë reshje të konsiderueshme shiu, me intensitet që ka arritur më shumë se 50 milimetra për orë, duke shkaktuar përmbytje të rrezikshme në zonat urbane dhe rurale.

Temperaturat në majat e reve të stuhisë që goditën Valencia kanë qenë tejet ekstreme, duke rënë nën -60 gradë Celsius. Lartësitë e këtyre reve të dendur kanë arritur në mbi 13 kilometra, duke dëshmuar për fuqinë e jashtëzakonshme të stuhive.

Njëkohësisht, aktiviteti elektrik ka qenë alarmant; të martën, janë regjistruar mbi 96,000 shkarkime elektrike, duke theksuar intensitetin e fenomenit atmosferik që ka prekur këtë pjesë të Spanjës. Këto kushte ekstremisht të motit kanë shkaktuar jo vetëm dëme materiale, por edhe shqetësime të mëdha për sigurinë e banorëve.

Autoritetet lokale janë në gatishmëri të plotë për të adresuar situatën emergjente dhe për të ndihmuar ata që janë prekur nga përmbytjet. Ndërkohë, përpjekjet për të ndihmuar ata që kanë humbur shtëpitë dhe pasuritë e tyre janë në fokusin e organizatave humanitare dhe institucioneve qeveritare.

Kjo situatë tragjike është një përkujtesë e qartë për rëndësinë e përgatitjes ndaj katastrofave natyrore dhe nevojës për strategji të qëndrueshme për menaxhimin e emergjencave në një botë që po përballet me ndryshime klimatike gjithnjë e më të shpejta./UBTNews/