Lajmet nga UBT

Në UBT promovohet libri “Gazetaria Online në Kosovë dhe në rajon, etika dhe sfidat e vetërregullimit”, i autorit Musa Sabedini – një libër voluminoz për fushën e gazetarisë

Rektori Hajrizi foli rreth rëndësisë së botimit të librave të tillë profesional dhe akademik, si dhe dha perspektivën e tij mbi integrimin e inteligjencës artificiale në gazetari.

Published

9 months ago

on

Me praninë e rektorit të UBT-së, Prof. Dr. Edmond Hajrizi, profesorëve, studentëve, miqve dhe familjarëve, profesori, autori, gazetari dhe publicistit, Musa Sabedini, promovoi librin voluminoz “Gazetaria Online në Kosovë dhe në rajon, etika dhe sfidat e vetërregullimit”, i cili është një libër profesional dhe kryesisht trajton gazetarinë online, etikën dhe sfidat e vetërregullimit.

Rektori Hajrizi foli rreth rëndësisë së botimit të librave të tillë profesional dhe akademik, si dhe dha perspektivën e tij mbi integrimin e inteligjencës artificiale në gazetari.

“Marrë parasysh kohën e teknologjisë dhe të digjitalizimit duhet të diskutojmë më thellë për këtë tematikë, ku në bazë të fokusit shihet se nuk ka shumë botime në drejtim të mediave online. Edhe pse në Kosovë kemi mbi 400 portale, në një mënyrë ose tjetër, ky koncept, ose ky libër do të shërbejë për të bërë një punë më të përgjegjshme”, ka thënë Rektori Hajrizi.

Dekani i Fakultetit Media dhe Komunikim në UBT, Ferid Selimi, në fjalën e tij përgëzoi autorin për guximin dhe vullnetin për t’u marr me krijimtari të tillë, e cila mund të jetë shpesh sfiduese.

“E përgëzoj për guximin që ka autori dhe profesori Musa Sabedini, për t’u marr me krijimtari të tillë. Të merresh me krijimtari apo hulumtime rreth problematikave të shumta është një çështje e ndërlikuar dhe profesori nuk po heziton asnjëherë”, është shprehur Selimi.

Recensenti Safet Zejnullahu tha se libri do të mbulojë një boshllëk të madh në studimet rreth medias së internetit në Kosovë.

“Libri “Gazetaria online në Kosovë dhe në rajon, etika dhe sfidat e vetërregullimit”, i autorit Musa Sabedini, do të mbulojë një boshllëk të madh në studimet rreth medias së internetit në Kosovë. Përveç material i duhur për studentët e gazetarisë, ky libër do të shërbejë si bazë e mirë edhe për studimet e ardhshme në këtë fushë”, tha Zejnullahu.

Për librin folën edhe profesori Adnan Merovci dhe Bejtush Gashi, të cilët përgëzuan autorin dhe u shprehën se fusha e gazetarisë ka nevojë për botime të tilla për t’u zhvilluar në mënyrën e duhur.

Profesori, gazetari, publicisti, autori i librit “Gazetaria Online në Kosovë dhe në rajon, etika dhe sfidat e vetërregullimit”, Musa Sabedini, falënderoi të gjithë të pranishmit në këtë promovim të këtij libri, njëherit rektorin e UBT-së, Prof. Dr. Edmond Hajrizin, dekanin e Fakultetin Media dhe Komunikim, Ferid Selimi, recensentin Safet Zejnullahu, duke besuar se ky libër do të jetojë gjatë dhe do të shërbejë shumë për studentët, gazetarët dhe profesionistët e medias.

“Gazetaria Online në përgjithësi është një zhanër, që ka shumë sfida e telashe profesionale, të papritura, të panjohura dhe bukur delikate. Ata që nuk e kanë provuar, peshën e kësaj zeje dhe se kanë përjetuar rëndësinë që ka, e kanë të vështirë dhe të pamundur, madje të flasin apo debatojnë hapur për këtë zeje, tashmë fort të aktualizuar. Libri po vije si rezultat i njohjes së thellë, i përjetimit shpirtëror të botës digjitale dhe online, që sjell ky risk, sa delikat e sfidues, aq edhe i shpejt dhe dobiprurës për botën bashkëkohore”, tha Sabedini.

Ai tutje tha se libri ka për qëllim të shpërfaq të mirat, anët negative, anën pozitive që krijon ky gjigant brilant, që po depërton në çdo qenie krijuese, për shkak të shpejtësisë marramendëse, që ka dhe depërtimit në botën dhe intelektin e çdo njeriu.

Libri ka 493 faqe ndërsa botues është UBT.

Libri “Gazetaria online në Kosovë dhe në rajon, etika dhe sfidat e vetërregullimit”, ka për synim t`i mësoj dhe edukojë jo vetëm studentët, por të gjithë ata që duan të jenë pjesë, e këtij rrjeti profesionistësh, që kanë përzgjedhur t`i përshtaten kodeve të etikës dhe standardeve profesionale të raportimit online.

Libri andaj merret, me të arriturat në këtë fushë, me përdorimin e uebsajtave të rinj dhe mundësinë, që ata kanë të punojnë, në këtë fushë, pa shpenzuar shumë.

Në Kapitullin e parë libri trajton historinë fillimisht të lindjes së gazetarisë online – digjitale, kompleksitetin e saj në kuptimin funksional dhe praktik, për teletekstin, videotekstin, për epokën elektronike dhe dixhitale, për gjuhën e përdorur në internet, për inovacionin dhe gazetarinë online, për lindjen e internetit që ka shpejtuar zhvillimin e medieve online ose mediet e reja, për World Wide Web, për web faqet, për internetin sot, për web 2.0, për strukturën e Web-it, për përmasat e World Wide Web, për Web 3.0, për internetin dhe raportimi për web, për stilin e të shkruarit në median online – web, për digjitalizimin e mediave që solli ndryshime të rëndësishme edhe për profesionin e gazetarit, për terminologjinë e re për median online, për karakteristikat, dhe parimet e Gazetarisë Online, për përparësitë dhe mangësitë e gazetarisë online, për disavantazhet dhe mungesa e fokusit në gazetari cilësore, për të ardhmen e medieve online, për standardet e reja të raportimit në gazetarinë online, për portalet dhe lexuesit atraktiv tek portalet, për artikullin Online dhe standardet e raportimit, për periudhën e vërtetë të gazetarisë online, për gazetaria online e cila kërkon besnikëri, saktësi, korrektësi dhe paanshmëri, për historinë e Gazetarisë Online, për Google, Yahoo, Hotmail, Facebook, Twiter, Instagram, Tik Tok, për bullizmin kibernetik, për websitet individuale të lajmeve, për krijimin e bllogjeve, për ndikimin e mediave sociale në blog, për portalin, përkufizimin dhe përgjegjësin, për rolin e administruesit të faqes në portal, për dizajnin dhe uebsajtet e lajmeve ditore, për reklamimi online – dhe ndikimin e tyre në gazetarinë online, për rolin e reklamës në tregun mediatik dhe në raportim, për artikullin e sponzorizuar, përkufizimin, karakteristikat dhe dizajnin, për rrezikun nga sulmet kibernetike etj.

Kurse në Kapitullin e dytë gjithashtu, kam trajtuar gjithçka që dihet mbi gazetarinë online, në Kosovë dhe rajon, për median online, që është trend i zhvillimeve të medieve në tërë botën, për vebsitet e para në Kosovë dhe kush konsiderohet nxitës i gazetarisë online, për lindjen e gazetarisë online në Kosovë dhe pse nuk dihet numri i saktë i portaleve, për gjendjen e portaleve dhe organizimin e brendshëm të mediumeve online në Kosovë, për faktin se a dihen dhe kush janë pronarët e portaleve në Kosovë, për transparencën e pronësisë së mediave në Kosovë, për portalet e vetëshpallura, të cilat vuajnë nga mungesa e profesionalizmit, për portalet në Kosovë, dëshmi dhe fakte, për portalet kryesore në qytetet e Kosovës, për ombrellën e gazetarisë online – KMShK, dhe çfarë duhet të dinë qytetarët, për ankesat ndaj portaleve, për rregullat e procedurës së KMShK, për ankesat e pranuara për shkeljet e Kodit të Etikës, për marketingun në portale, për financimin e mediave online, që është problemi më i madh në Kosovë, për gazetarinë qytetare, mediat sociale dhe platformat e tyre, për përparësitë dhe mangësitë e gazetarisë qytetare, për përgjegjësitë e gazetarisë qytetare, për mediet sociale, rrjetet sociale, ose mediat e gjeneratës së re, për rrjetet më të mëdha sociale në shifra, për mediat sociale dhe momentet e bukura, për zhvillimin e gazetarisë online në rajon, në Shqipëri, Serbi, Maqedoni e Mal të Zi, për uebsajtet individuale më të klikuara në Shqipëri, për portalet dhe mediet online, më me ndikim në Shqipëri, për vetërregullimin e mediave online në Shqipëri, për mediat Online në Bujanoc e Preshevë etj.

Kurse në Kapitullin e tretë kam trajtuar shqetësimet kryesore me të cilat preokupohet Gazetaria Online në Kosovë, duke filluar nga etika, vetërregullimi dhe sfidat, për integritetin dhe gazetarinë e pavarur, për etikën e gazetarisë, përkufizimin, historinë dhe rëndësinë e saj për mediet, për Kodin e Etikës së Gazetarisë, për ndershmërinë e gazetarëve që është kategori e cila kërkohet në mënyrë ultimative, për rëndësinë thelbësore të kodit të etikës për një gazetari të përgjegjshme, etikën e medias digjitale, problemet e veçanta etike, për praktikat dhe normat, për paanshmërinë, konfliktet e interesit dhe gazetarinë partiake, për etikën dhe legjislacionin në Kosovë, për rregulloret dhe ligjet për mediat në Kosovë, për ligjet mbi lirinë e informimit në Ballkan, dhe si prezantohet Kosova, për lirinë e shprehjes, për të drejtat e gazetarëve, siguria e tyre dhe mbrojtja e lirisë së medias, mëdyshjet e gazetarit në teren, për vetërregullimin për median online, lajmet e ngutshme dhe të pa verifikuara, për gazetarinë e “like”-ve që po e dëmton gazetarinë profesionale dhe shoqërinë, për gabimet dhe joshjen nga portalet kosovare, për efektet e pëlqimeve, në perceptimin e opinionit publik dhe opinionin personal, për shpifjen dhe fyerjen, për ligjin për shpifjen në internet dhe mediat sociale, nga këndi i avokatëve ndërkombëtar, për identifikimin e shpifjeve në internet, për gjuhën e urrejtjes, lajmet e rreme, dezinformimin dhe keqinformimin në mediet online në Kosovë, për vendosjen e aksesorëve për rrjetet sociale dhe lajmet e rreme, për bullizmin në Tik Tok, nga gjuha e urrejtjes deri tek tragjedia, për sfidat e medias online në Kosovë që janë të shumta, dhe cilat janë sugjerimet profesionale, për plagjiaturën, copy – paste, për të drejtat e autorit të mbrojtura nga ligjet, për transparencën e munguar të medias online në Kosovë, për risitë dhe kërkesat e gazetarisë online, për censurën dhe vet censurën tek gazetarët kosovar, për gazetarët kosovar, që punojnë pa kontrata pune, për Inteligjencën Artificiale dhe sfidat ndaj gazetarisë online etj.

Libri është edhe më i dobishëm, në një kohë kur në Kosovë e rajon ekzistojnë qindra portale, uebsajte, rrjete sociale e media tjera online, që veprojnë në mënyrë ligjore, e jo ligjore, me respektim të etikës, e me shkelje ekstreme të saj.

Ky libër nuk do të kishte vlerë profesionale, nëse nuk do e trajtonim me kujdes edhe vetërregullimin e portaleve në Kosovë, ose median digjitale, nga e cila më së shumti dëmtohet ose mund të pësoj dëme ligjore vet lexuesi i saj.

Libri rrëfen edhe për njohurit e shumta profesionale, që ndërlidhen me standardet e raportimit dhe kriteret që duhet të kenë, lajmet e shumta të plasuara në publik.

Me kujdes andaj në libër është shkruar edhe për të gjitha prapaskenat e këtij digasteri problematik dhe tejet misterioz, që në fakt as media, e gazetar me përvojë të gjatë, e kanë të vështirë të japin definicione, e vlerësime për të kuptuari e drejtë dhe të qartë, mbi rolin që duhet të ketë media online.

Libri pashmangshëm pasuron këtë gjuhë goditëse, pasuron mënyrën e komunikimit në raport me publikun, pasuron gazetar, redaktor e botues të portaleve, të cilët edhe mund të përfitojnë nga njohurit shkencore, e studimore të prezantuara mjeshtërisht në këtë libër, me literaturë të kompletuar dhe krahasuese me vendet e rajonit.

Një pjesë e librit i kushtohet edhe gjendjes së medieve online, në Maqedoni e Shqipëri, për të parë dallimet në funksion të ekzistimit dhe përvojave që kanë këto shtete fqinje.

Kuptohet që nuk pretendojmë të jemi fundi i këtij studimi ose prezantimi, sepse nuk mund ta dimë asnjëherë rrëfimin, pas 20 viteve të avancimit të kompjuteristikës, e cila pritet të sjell avancime, e risi edhe më të mëdha në fushën digjitalizues, e ku pashmangshëm bëjnë pjesë edhe mediet online, por shpresoj dhe mendoj, se libri është një ndihmesë dhe një shtytje për ata studiues të rinj, që e duan dhe e përjetojnë të bërit realitet Gazetarinë Online, me kritere, me standarde dhe etikë të avancuar.

Të gjithë këta kapituj në vete përmbajnë dilema dhe shqetësime të shumta profesionale, të cilat i kuptojnë dhe mund t`i zgjidhin apo përjetojnë, vetëm ata që e kanë provuar në kurrizin e tyre të jetuarit, me orë të tëra mbi laptopin inteligjent, që aq sa na gëzon, e lumturon, po aq na shkakton edhe telashe, strese e sfida, gjatë praktikimit të gazetarisë online.

Related Topics:
Continue Reading

Lajmet nga UBT

UBT zyrtarizon projektin Erasmus + Jean Monnet – Një hap i rëndësishëm drejt integrimit evropian të Kosovës

Published

1 day ago

on

November 1, 2024

By

Në UBT u mbajt takimi i parë për zyrtarizimin e projektit të Bashkimit Evropian Erasmus + Jean Monnet, i cili ka si qëllim të kontribuojë në përparimin e integrimit evropian të Kosovës.

Projekti, i titulluar “AKIL-BE” (Advancing Kosovo’s Integration into the EU through Learning about the EU), ka si synim të forcojë kuptimin dhe ndërgjegjësimin mbi Bashkimin Evropian në Kosovë, duke theksuar rolin kyç të edukimit dhe kërkimit në këtë proces.
Rektori i UBT-së, Prof. Dr. Edmond Hajrizi, theksoi rëndësinë e këtij projekti për zhvillimin e njohurive mbi Bashkimin Evropian në vend.

“Me një diversitet prej 150 profileve të ndryshme, projekti ka potencialin të reflektojë nevojat dhe aspiratat e shoqërisë kosovare, duke ofruar një qendër të rëndësishme për mësim dhe zhvillim profesional. Ky është një hap i rëndësishëm në përpjekjet për të forcuar lidhjet midis Kosovës dhe Bashkimit Evropian, duke e bërë këtë kohë të përshtatshme për të rinjtë dhe profesionistët e ardhshëm në vend,” tha Rektori Hajrizi.

Manjolla Zaçellari, koordinatore e projektit, vlerësoi përfshirjen në këtë iniciativë dhe theksoi se UBT është vendi i duhur për të promovuar studimet evropiane. “Ky projekt është i hapur për të gjithë të interesuarit e të gjitha drejtimeve, që kanë interes në zhvillimin dhe avancimin e nxënies mbi integrimet evropiane”, theksoi ajo.

Objektivat kryesore të projektit përfshijnë promovimin e studimeve evropiane dhe përdorimin e metodave bashkëkohore të mësimdhënies për të arritur një publik të gjerë. Një aspekt thelbësor është përgatitja e qytetarëve të Kosovës për anëtarësimin në Bashkimin Evropian, duke theksuar rëndësinë e njohjes së institucioneve evropiane dhe të tregut të brendshëm.

Projekti do të përfshijë 15 module të ndryshme, si “The Founding of the EU and Enlargement”, “EU Institutions”, “Single Market and Common Currency”, “Freedom of Movement and Schengen”, dhe “Digital Europe Politics”. Pjesëmarrësit do të kenë mundësinë të mësojnë nga profesorë të ftuar nga Austria dhe Polonia, duke siguruar një perspektivë ndërkombëtare dhe rajonale.

Një nga veçoritë më të rëndësishme të këtij projekti është përfshirja e një audience më të gjerë, duke krijuar një platformë për dialog dhe bashkëpunim me vendet e tjera të Evropës. Kjo do të ndihmojë në ndërtimin e lidhjeve të forta dhe në promovimin e një kuptimi të thellë të integrimit evropian në Kosovë. Me një fokus të tillë, projekti “AKIL-BE” paraqet një mundësi unike për të rinjtë dhe profesionistët që dëshirojnë të kontribuojnë në të ardhmen evropiane të vendit./UBTNews/

Continue Reading

Lajmet

Projekti i studentëve të UBT-së fiton vendin e parë në asamblenë  rinore S!NERGY

Published

1 day ago

on

November 1, 2024

By

Asambleja Rinore S!NERGY, një ngjarje e rëndësishme e organizuar nga IAYSP EUME, u mbajt nga 24 deri më 27 tetor në Budapest, Hungari. Ky event ofroi një platformë për të rinjtë nga e gjithë Europa dhe Lindja e Mesme për të prezantuar iniciativat e tyre dhe për të ndarë përvoja të çmuara.

Në fjalën e saj përshëndetëse, Prof. Dr. Denis Çelçima, dekania e Fakultetit të Psikologjisë në UBT, theksoi mbështetje të fortë për nismat që fokusohen tek të rinjtë dhe përpjekjet për ndërkombëtarizim. Dekania përcolli urimet e Rektorit Prof. Dr. Edmond Hajrizi, duke theksuar rëndësinë e angazhimit të UBT-së në zhvillimin e projekteve rinore dhe në ndihmën e tyre për të arritur qëllime ambicioze.

Ejona Icka, drejtoresha ekzekutive e YSP Balkan, foli për bashkëpunimin frutdhënës me UBT, duke e cilësuar këtë partneritet si një ndikim pozitiv në zhvillimin e projekteve rinore. Ajo theksoi se ky bashkëpunim ka krijuar mundësi për rinjtë të angazhohen në iniciativa që adresojnë çështje të rëndësishme sociale dhe zhvillimore.

Në këtë asamble, studentët e UBT-së paraqitën tre projekte të shkëlqyera, duke e bërë kështu të qartë përfaqësimin dinjitoz të Kosovës në arenën ndërkombëtare. Njëri nga këta projekte, i realizuar nga studentët Blend Reselica, Klea Vezaj, Gjergj Rexhaj dhe Vlera Krelani, u shpall fitues i vendit të parë. Ky projekt u vlerësua si më inspiruesi, duke adresuar në mënyrë efektive disa nga Objektivat e Zhvillimit të Qëndrueshëm (SDGs).

Bogdan Pammer, presidenti i IAYSP EUME, theksoi se kontributet e YSP Balkan dhe UBT kanë ndihmuar në krijimin e një platforme ndërkombëtare, ku të rinjtë e talentuar mund të angazhohen në proceset formuese dhe ndërtuese të vendeve të tyre, duke adresuar me efikasitet sfidat që i përballin.

Ky sukses u shoqërua me urime të shumta për studentët e UBT-së për arritjet e tyre të jashtëzakonshme, dhe një falënderim të veçantë për YSP Balkan për mbështetje të vazhdueshme dhe për punën e palodhur të realizuar deri tani.

Ballkani Perëndimor ishte i përfaqësuar me dinjitet, me 14 pjesëmarrës nga Shqipëria, Kosova, Maqedonia e Veriut dhe Serbia, duke demonstruar unitet dhe forcë rajonale. YSP Balkan shprehu mirënjohje për institucionet mbështetëse si UBT, Shkolla e Mesme UBT dhe Universiteti i Tetovës, të cilat luajnë një rol të rëndësishëm në avancimin e iniciativave rinore.

Me fillimin e nëntorit, YSP Balkan është e ngazëllyer për të nisur vitin e tretë të projekteve, trajnimeve dhe aktiviteteve në Ballkan. Këtë vit, organizata mirëpret partnerë dhe institucione të reja, të cilët janë të gatshëm të mbështesin iniciativat dhe programet me fokus te rinia. Kjo është një periudhë premtuese për të rinjtë, që do të kontribuojnë në zhvillimin e qëndrueshëm të rajonit./UBTNews/

Continue Reading

Lajmet nga UBT

Analiza e zbatimit të politikave të gjelbra të BE-së në Kosovë: Një kontribut shkencor nga Arian Kadriu, Aleksandra Palkova dhe Visar Hoxha

Published

2 days ago

on

October 31, 2024

By

Punimi “Political and Security Reasons as Factors of Implementing EU Green Policies and Directives in Kosovo to Align with the EU Acquis and Transition Towards a Greener Country,” i studiuar nga profesorët Aleksandra Palkova, Arian Kadriu dhe Visar Hoxha, i publikuar së fundi në revistë shkencore ofron një analizë të hollësishme mbi faktorët politikë dhe të sigurisë që ndikojnë në zbatimin e politikave të gjelbra të Bashkimit Evropian (BE) në Kosovë.

 

Ky hulumtim është një kontribut i rëndësishëm në fushën e politikave mjedisore dhe procesin e integrimit evropian të vendit. Në aspektin e përmbajtjes dhe tematikës, studimi fillon me një analizë të kontekstit politik dhe mjedisor në Kosovë, duke e theksuar nevojën për një përputhje të ngushtë me standardet e BE-së. Autorët diskutuan rëndësinë e implementimit të direktivave të BE-së si një hap të domosdoshëm për integrimin e Kosovës në strukturat evropiane dhe për forcimin e stabilitetit politik në rajon.

Punimi identifikon sfidat kryesore me të cilat përballen institucionet kosovare në zbatimin e këtyre politikave. Këto përfshijnë mungesën e stabilitetit politik, pengesat në infrastrukturë dhe burime të kufizuara financiare. Autorët analizojnë si këto faktorë mund të pengojnë përparimin në implementimin e politikave të gjelbra dhe si mund të ndikojnë në perceptimin publik rreth këtyre iniciativave. Një pjesë e rëndësishme e studimit përqendrohet në ndikimin e sigurisë mbi zhvillimin mjedisor. Politikat e energjisë dhe menaxhimi i burimeve natyrore shpesh preken nga tensionet politike dhe konflikte të mundshme. Autori shqyrton se si një ambient i sigurt mund të inkurajojë investimet në energjinë e rinovueshme dhe praktikat e qëndrueshme, duke e shndërruar Kosovën në një model për zhvillimin e qëndrueshëm.

Cila është rëndësia e hulumtimit, ndalemi në aspektin e perspektivës të re mbi ndërvarësinë mes politikës, sigurisë dhe zhvillimit mjedisor. Hulumtimi kontribuon në literaturën ekzistuese duke theksuar se politika mjedisore nuk mund të ndahen nga çështjet politike dhe të sigurisë, duke ofruar një qasje të integruar për analizën e politikave të gjelbra.

Punimi paraqet rekomandime konkrete për politikat publike që mund të ndihmojnë në përmirësimin e implementimit të politikave të gjelbra. Këto përfshijnë krijimin e një kornize ligjore më të fortë, inkurajimin e bashkëpunimit ndërmjet institucioneve lokale dhe organizatave ndërkombëtare, dhe zhvillimin e programeve edukative për rritjen e vetëdijes publike mbi rëndësinë e politikave të qëndrueshme.

Punimi gjithashtu nënvizon potencialin e politikave të gjelbra për të stimuluar zhvillimin ekonomik në Kosovë. Implementimi i praktikave të qëndrueshme në sektorët si energjia e rinovueshme, menaxhimi i mbetjeve dhe bujqësia e qëndrueshme mund të krijojë vende të reja pune dhe të ndihmojë në diversifikimin e ekonomisë.

Në përfundim, ky studim është një kontribuim i rëndësishëm në kuptimin e dinamikave komplekse që lidhen me zbatimin e politikave mjedisore në Kosovë. Ai ofron një analizë të hollësishme dhe të integruar, duke ndihmuar në formimin e politikave të ardhshme dhe në strategjitë për promovimin e zhvillimit të qëndrueshëm në vend. Me këtë punim, autorët jo vetëm që adresojnë sfidat aktuale, por gjithashtu ofrojnë një vizion të qartë për të ardhmen e Kosovës si një vend të angazhuar për zhvillimin mjedisor dhe politik të qëndrueshëm./UBTNews/D.E.

Studimin shkencor mund ta lexoni në: https://doi.org/10.25143/socr.29.2024.2.61-74

 

Continue Reading

Lajmet

Nora Gjakova nis rrugëtimin akademik në UBT në programin e Masterit për Shëndet dhe Aktivitet Fizik

Published

3 days ago

on

October 30, 2024

By

Kampionia olimpike në xhudo, Nora Gjakova, ka marrë një hap të rëndësishëm në karrierën e saj akademike duke u regjistruar në programin e Masterit për Shëndet dhe Aktivitet Fizik në UBT.

 

Nora Gjakova, e njohur si medaliste e artë në Lojërat Olimpike, ka treguar përkushtim të jashtëzakonshëm për sportin dhe është një inspirim për shumë sportistë të rinj. Pas suksesit të saj të madh në Tokio, ku fitoi medaljen e artë, ajo ka vendosur të investojë në edukimin e saj për të thelluar njohuritë mbi shëndetin dhe aktivitetin fizik, duke u bërë kështu një model edhe në aspektin akademik.

Programi i Masterit në Shëndet dhe Aktivitet Fizik është program që do t’i mundësojë Norës të zhvillojë aftësi dhe njohuri të reja, të cilat do t’i shërbejnë në karrierën e saj si trajnere dhe promovuese e aktiviteteve fizike dhe shëndetësore.

Gjakova shprehu emocionet e saj për këtë hap të ri në jetën e saj, duke theksuar rëndësinë e arsimit në formimin e një sportisti të suksesshëm. “Jam shumë e lumtur që kam mundësinë të studioj në UBT. Shëndeti dhe aktiviteti fizik janë të rëndësishëm për të gjithë, dhe unë shpresoj të kontribuoj në këtë fushë,” tha Nora.

Agron Thaçi, Dekan i Fakultetit të Shkencave të Sportit dhe Lëvizjes, vlerësoi se regjistrimi i Nora Gjakovës në programin e Masterit në Shëndet dhe Aktivitet Fizik është një ngjarje e rëndësishme për fakultetin dhe për komunitetin tonë akademik.

Ai theksoi se Nora është një kampione që përfaqëson vlerat më të larta të sportit dhe punës së palodhur, duke shërbyer si një inspirim për të rinjtë. “Prania e saj në radhët tona do të sjellë një energji pozitive dhe një përkushtim të jashtëzakonshëm, duke e forcuar lidhjen mes praktikës sportive dhe arsimimit. Besoj se Nora do të kontribuojë ndjeshëm në promovimin e kulturës së shëndetit dhe aktivitetit fizik, duke ndihmuar në formimin e brezit të ri të profesionistëve në këtë fushë,” tha ai.

Regjistrimi i Norës në programin e Masterit është një nxitje për sportistët e rinj, duke treguar se suksesi në sport mund të kombinohet me arsimimin dhe zhvillimin profesional. Me përkushtimin dhe pasionin e saj, Nora Gjakova vazhdon të jetë një shembull frymëzues për shumë individë që dëshirojnë të ndjekin ëndrrat e tyre, qoftë në sport, qoftë në arsim./UBTNews/

Continue Reading

Të kërkuara