Apple e publikoi iOS 18 gjatë vitit 2024 dhe tani janë bërë të ditura edhe shifrat zyrtare të përhapjes së këtij versioni, bashkë me të dhënat për iPad dhe sistemin iPadOS 18.

Sipas statistikave nga Apple, 88 për qind e iPhone-ve të prezantuar në katër vitet e funditpërdorin iOS 18. Nëse marrim parasysh pajisjet në qarkullim, përfshirë edhe më të vjetrat, kjo përqindje është 82, çka mbetet një shifër shumë mbresëlënëse. Po ashtu, 9 për qind e pajisjeve të tjera ende përdorin iOS 17.

Është e pritshme që një pjesë e vogël e përdoruesve të mos duan të përditësojnë telefonin e tyre, por në këtë rast, ky numër është mjaft i ulët.

Sa i përket iPad-it, 81 për qind e pajisjeve të reja janë të përditësuara në iPadOS 18, ndërsa në shkallë kjo shifër është 71%. Kjo mund të lidhet me faktin se shumë përdorues i përdorin iPad-et vetëm për detyra bazike, si shfletimi i internetit apo shikimi i videove, dhe nuk ndjejnë nevojën për funksionalitete të reja.

Apple pritet të prezantojë versionin e radhës të iOS dhe iPadOS gjatë konferencës WWDC javën e ardhshme. Nuk është e sigurt nëse versioni i ri do të quhet iOS 19, pasi sipas thashethemeve, Apple mund të kalojë në sistemin e emërtimit sipas viteve — gjë që do të thotë se mund të shohim një iOS dhe iPadOS 26.

Po Androidi si qëndron?

Android 15 është i instaluar në vetëm 4.5 për qind të pajisjeve Android, versioni më i përdorur i Android-it aktualisht është Android 14, i cili përbën 27.4 për qind të të gjitha instalimeve. Arsyeja kryesore pse përqindjet janë kaq të ulëta në krahasim me Apple-in, lidhet me mënyrën se si shpërndahen përditësimet në Android — ku çdo prodhues pajisjesh (si Samsung, Xiaomi etj.) vendos vetë kur (dhe nëse) do të ofrojë përditësimet për pajisjet e tij.

Google ka filluar të bëjë disa ndryshime në mënyrën e publikimit të përditësimeve kryesore të Android-it, ndaj këto statistika ndryshojnë në të ardhmen.

Franca po planifikon të forcojë ndalimin e përdorimit të telefonave celularë në shkollat e mesme, duke vendosur që nxënësit e moshës 11 deri 15 vjeç t’i mbyllin pajisjet në dollapë ose çanta në fillim të ditës mësimore dhe t’i përdorin pas përfundim të saj.

Ministrja e Arsimit deklaroi në senat se synimi është që fëmijët të shkëputen nga celularët gjatë ditës shkollore, duke filluar nga shtatori në shkollat e mesme të Francës, raportojnë mediat ndërkombëtare.

Elisabeth Borne u shpreh: “Në një kohë kur përdorimi i telefonave është gjithnjë në diskutim për shkak të pasojave të shumta negative, ky hap është i domosdoshëm për mirëqenien e arritjet e nxënësve tanë.”

Që nga 2018, Franca ka ndaluar përdorimin e celularëve në shkollat e mesme, të quajtura colleges. Ky ndalim ka përfshirë mbajtjen e telefonave të fikur në çanta dhe ndalimin e përdorimit në ambientet shkollore, madje edhe gjatë pushimeve.

Ky rregull ka dhënë rezultate pozitive: fëmijët janë më aktivë fizikisht, kanë më shumë ndërveprime shoqërore, më pak raste ngacmimi dhe përqendrim më të mirë në mësime, por janë hasur raste ku disa nxënës janë përpjekur të përdorin telefonin fshehurazi në tualete për të parë video gjatë pushimeve.

Qeveria franceze synon të shkojë më tej me një shkëputje të plotë nga teknologjia gjatë ditës. E ashtuquajtura “pauzë dixhitale” e detyrueshme është testuar në një program pilot në rreth 100 shkolla për gjashtë muaj. Telefonat dorëzohen në hyrje dhe vendosen në një dollap, kuti të veçantë, ose në çanta që çelen përmes mekanizmit elektronik kur nxënësit largohen për në shtëpi./The Guardian/

Koreja e Jugut ka ndaluar shkarkimet e reja të chatbot-it të inteligjencës artificiale (AI) të Kinës DeepSeek, sipas mbikëqyrësit të mbrojtjes së të dhënave personale të vendit.

Agjencia qeveritare tha se modeli i AI do të bëhet sërish i disponueshëm për përdoruesit e Koresë së Jugut kur të bëhen “përmirësime dhe zgjidhje” për të siguruar që ai është në përputhje me ligjet e vendit për mbrojtjen e të dhënave personale, shkruajnë mediat e huaja.

Një javë pasi u bë tituj globalë, DeepSeek u bë i popullarizuar në Korenë e Jugut, duke u ngjitur në krye të dyqaneve të aplikacioneve me mbi një milion përdorues javor. Por, rritja e popullaritetit të tij tërhoqi vëmendjen nga vendet në mbarë botën të cilat kanë vendosur kufizime në aplikacion për shqetësimet e privatësisë dhe sigurisë kombëtare.

Komisioni për Mbrojtjen e Informacionit Personal të Koresë tha se DeepSeek u bë i padisponueshëm në App Store të Apple dhe Google Play të shtunën në mbrëmje.

Kjo erdhi pasi disa agjenci qeveritare të Koresë ndaluan punonjësit të shkarkonin chatbot në pajisjet e tyre të punës. Presidenti në detyrë i Koresë së Jugut Choi Sang-mok e ka përshkruar Deepseek si një “tronditje”, që ndikon në industritë e vendit, përtej AI.

Pavarësisht pezullimit të shkarkimeve të reja, njerëzit që e kanë tashmë në telefona janë në gjendje të vazhdojnë ta përdorin ose mund ta përdorin atë nëpërmjet faqes së internetit të DeepSeek. /UBT News/

UBT-ja ka arritur të krijojë qytetin e mençur në fushën e teknologjisë, duke ua mundësuar studentëve të ndërlidhin mësimin teorik dhe atë praktik. UBT është modeli i parë i një qyteti të mençur i kompletuar në Kosovë dhe në rajon dhe një prej të parëve në botë. Modeli i konceptuar dhe zhvilluar nga rektori Edmond Hajrizi me ekipin e tij ka hasur në një interesim dhe vlerësim të madh në botë.

Themeluesi dhe rektori i UBT-së në një intervistë televizive për Tëvë1 foli mbi të arriturat e institucionit që ai drejton dhe si e ka ndryshuar “qyteti i mençur” mënyrën se si studentët mësojnë dhe ndërveprojnë.

 “Është dashtë të krijohet një ekosistem inovativ, një lloj kompleksiteti i funksioneve në mënyrë që këto teknologji të përdoren dhe ne atë e kemi përmbyllur dhe e kemi ndërlidhur më një qytet të mençur që po e quaj ‘smart city’, një qytet ku ka të gjitha funksionet fizike të qytetit, ka shkollën, ka spitalet, ka fabrikën, ka serrat, prodhon energji vet, ka teknologji të ndryshme, ka muzeun, ka galeri, faktikisht të gjitha funksionet fizike i kemi ndërtuar në miniaturë, në një hapësirë në kampusin e UBT-së dhe mandej mbi këtë bazë i kemi vendosur të gjitha këto teknologji të cilat e kompletojnë këtë strukturën teknologjike, duke e futur shembull rrjetëzimin në bazën e internetit, duke i vendosur antenat e telekomit ne bazën 5G sepse gjenerata e 5 krijon një koncept shumë tjetër të përjetimeve, dukurive të cilat nuk i ke përjetuar më herët, realitetin virtual, sigurinë kibernetike, teknologji të ndryshme, ‘cloud teknologjia’ apo formate tjera, ‘data center’, ku ruhen të dhënat, një qendër ‘super-computer’, të kompjuterëve të themi me një performancë më të lartë ku përpunohen të dhënat e mëdha dhe tani aty është një fushë eksperimentale që të gjithë ata nga këndvështrimi i tyre mund ta gjejnë veten dhe mund të përdorin këto vegla për të arritur qëllimin që e kanë”, ka deklaruar Hajrizi.

Përveç tjerash, rektori Hajrizi tha se edhe praktikat e telemjekësisë mund të kryhen në kampusin inovativ.

“Nëse flasim për mjekësinë, atëherë e kanë sallën e operacionit, e kanë 5G mund të bëjnë edhe telemjekësi, mund ta testojnë se si duket që një kirurg nga distanca, në kohë reale mund të bëjë operacione pa qenë gjithë kohës në prezencë fizike, ai tjetri mund ta përcjell se si duket lëvizja e një automjeti pa vozitës, ky tjetri mund ta përcjell shembull pjesën e gjenerimit të energjisë, përcjellja e të gjithëve përmes sensorëve që ne po i themi ‘internet of thinks’ ku mund të hapet dritarja, mund të mbyllet, mund të ndalet energjia e panevojshme që mos të shpenzohet. Mund të bëhen ajrosje të ndryshme, thjeshtë optimalizohet kualiteti i jetës. Serrat atje mund të monitorohen në mënyrë të vazhdueshme qoftë me i dhënë ndriçim më shumë, qoftë ngrohje më shumë, qoftë ajrosje më shumë dhe të gjithë e shohin nga një këndvështrim i tyre”, u shpreh Hajrizi.

Intervistën e plotë të rektorit Hajrizi mund ta gjeni në linkun në vijim: