UBT ofron programin master, E Drejta Civile dhe Pronës, program në të cilin studentët dhe të rinjtë do të mund të gjejnë njohuri profesionale dhe të përgjithshme teorike të së drejtës civile si prona, problemet evropiane dhe globale të tregtisë, si dhe të drejtat e njeriut.

Zhvillimi i të menduarit kritik dhe aftësive hulumtuese është pjesë e programit, duke ofruar një pasqyrë të pronësisë intelektuale, marrëveshjeve ndërkombëtare për tregti të lirë, zbatimin e ligjit, legalizimin e pronësisë, si dhe garantimin e lëvizjes së lirë të tregut ndërkombëtar.

Kurrikula është e hartuar në atë mënyrë që t’iu përgjigjet nevojave të studentëve të diplomuar në juridik dhe fushave të sistemit të drejtësisë, duke mbuluar çështjet dhe zhvillimet bashkëkohore në fushat e detyrimeve dhe kontratave, proceseve gjyqësore tregtare, të drejtave pronësore, ligjit të konkurrencës ose procesit gjyqësor.

Ky program është i përshtatshëm për studentët për faktin e zhvillimit të marrëdhënieve juridike ndërmjet qytetarëve dhe subjekteve private, të përfshira në çështje shumë të rëndësishme për avokatët e angazhuar.

Me Masterin në E Drejta Civile dhe Pronës në UBT, do të fitosh njohuri të thelluara, aftësi praktike dhe përgatitje profesionale për të qenë konkurrues në tregun vendor e ndërkombëtar. Ky është hapi yt drejt një karriere të suksesshme në botën e drejtësisë./UBTNews/

APLIKO TANI ONLINE!

Ish-kryetari i Këshillit Kombëtar Shqiptar në Serbi, Nevzad Lutfiu, ka ngritur sërish alarmin për pasivizimin e adresave në komunat me shumicë shqiptare në Luginën e Preshevës, duke e cilësuar këtë proces si “racizëm” dhe “spastrim të pastër etnik”.

Lutfiu ka bërë të ditur se më 4 gusht 2025 kishte kërkuar nga stacionet policore në Preshevë dhe Bujanoc të dhëna për numrin e adresave të pasivizuara nga janari deri në korrik të këtij viti. Sipas përgjigjes zyrtare që ka marrë më 13 gusht, në këtë periudhë në Komunën e Preshevës janë pasivizuar 174 adresa, ndërsa në Komunën e Bujanocit 26 adresa.

“Dyshoj se të dhënat për Komunën e Bujanocit janë të sakta, ndaj jam në pritje të një përgjigjeje tjetër për ta vërtetuar. Por, sidoqoftë, brenda 7 muajve, në këto dy komuna me shumicë shqiptare janë pasivizuar gjithsej 200 adresa”, ka deklaruar Lutfiu, në rrjetin e tij social në Facebook.

Lutfiu e ka quajtur këtë një proces të qëllimshëm për zbraktjen e shqiptarëve nga trojet e tyre dhe ka kërkuar reagim të menjëhershëm nga politika shqiptare:

“U bëj thirrje të gjithë akterëve politikë shqiptarë që të mblidhen për t’u koordinuar dhe për të bashkëvepruar”.

Pasivizimi i adresave në Luginën e Preshevës prej vitesh është denoncuar si një formë presioni administrativ, i cili, sipas përfaqësuesve shqiptarë, ka pasoja të drejtpërdrejta në uljen e numrit të banorëve dhe humbjen e të drejtave civile e politike.

Më shumë se 100 organizata jo qeveritare ndërkombëtare kanë akuzuar Izraelin se po e përdor ndihmën humanitare si armë në Gazë, duke thënë se shumica e agjencive kryesore nuk kanë qenë në gjendje të dërgojnë asnjë kamion me furnizime që nga fillimi i marsit, shkruan The Guardian.

Pavarësisht pretendimeve të autoriteteve izraelite se nuk ka kufizime për hyrjen e ndihmës humanitare në territor, grupet thonë se dhjetëra kërkesa për të sjellë ushqim, ilaçe, ujë dhe pajisje strehimi janë refuzuar me arsyetimin se organizatat “nuk janë të autorizuara për të shpërndarë ndihma”. Vetëm në korrik, sipas deklaratës, janë refuzuar mbi 60 kërkesa.

Ky bllokim ka lënë miliona dollarë vlerë mallrash të bllokuara në magazina në Jordani dhe Egjipt, ndërsa spitalet po mbeten pa furnizime bazë dhe civilët po vdesin nga uria dhe sëmundje të parandalueshme. Shumë nga organizatat e prekura thonë se kanë punuar në Gazë për dekada.

Grupet e lidhin pengesën me rregulla të reja regjistrimi të prezantuara në mars, të cilat i lejojnë autoritetet izraelite të refuzojnë aplikimet bazuar në kritere të paqarta, si për shembull. “delegjitimimi” i shtetit. Agjencitë thonë se ky proces po përdoret për të kontrolluar organizatat e pavarura dhe për të censuruar raportimin humanitar.

“Që nga vendosja e bllokadës së plotë më 2 mars, CARE nuk ka mundur të dërgojë asnjë nga furnizimet tona të parapozicionuara me vlerë 1.5 milionë dollarë në Gaza”, tha Jolien Veldwijk, drejtoreshë e vendit për CARE. Oxfam tha se ka mbi 2.5 milionë dollarë mallra të bllokuara për hyrje.

Nënshkruesit u bënë thirrje qeverive dhe donatorëve që të ushtrojnë presion mbi Izraelin për t’i dhënë fund kufizimeve, të kërkojnë hapjen e të gjitha pikave tokësore të kalimit dhe të sigurojnë që agjencitë të mund të veprojnë pa kompromentuar pavarësinë apo sigurinë e stafit.

Kryetari i Odës Ekonomike të Kosovës (OEK), Lulzim Rafuna, e cilësoi vendimin e Zyrës së Rregullatorit për Energji (ZRrE) që nga 16 gushti të shkëputen nga rrjeti energjetik të gjitha bizneset që nuk kanë kontrata me furnizues të licencuar si kërcënim dhe skandal për ekonominë e vendit.

Ai kërkoi nga ZRrE-ja që të mos ndërmarrë hapa të tillë deri në një vendim përfundimtar gjyqësor.

“Është kërcënimi i radhës nga ZRrE-ja. Kërcënimin e parë e kishim më 1 qershor, të dytin më 30 korrik dhe ky është kërcënimi i radhës. Në kushte normale, ZRrE-ja është dashur të rregullojë tregun dhe biznesi me vullnetin e vet të dalë në tregun e lirë, por fatkeqësia është kjo që është. Ne i bëjmë thirrje ZRRE-së që të jetë e matur dhe të mos ndërmarrë veprime të ndalë energjinë elektrike, sepse do të ishte skandal për ekonominë e Kosovës”, tha Rafuna.

Ai tha se Gjykata Komerciale nuk ka vendosur ende për çështjen kryesore, por vetëm ka hequr masën e përkohshme.

“Nuk është vendosur çështja meritore, thelbi i ankesës, por është vendosur sa i përket masës së jashtëzakonshme. Shkalla e parë e Gjykatës Komerciale e ka anuluar njoftimin e ZRrE-së dhe e ka shpallur të kundërligjshëm. Shkalla e dytë e ka shfuqizuar masën e përkohshme që e ka vendosur Gjykata Komerciale, mirëpo ende nuk është vendosur mbi objektin e ankesës së bizneseve. I bëjmë thirrje ZRrE-së të presim derisa të vendosin mbi thelbin definitiv, të ulemi së bashku të gjithë, t’i bashkërendojmë aktivitetet, kohën dhe të caktojmë momentumin më të mirë të bizneseve për të dalë në tregun e lirë. Në këtë mënyrë e ruajmë biznesin, ekonominë e vendit dhe mbrojmë qytetarët e Kosovës”, tha ai.

Rafuna përmendi të dhënat e Bankës Qendrore të Kosovës (BQK), duke thënë se rritja ekonomike ka rënë në nivelin e vitit 2015, ndërsa parashikohet të përmbyllet me vetëm 4 për qind në fund të vitit.