Franca është duke i dhënë Ukrainës informata të inteligjencës ushtarake, pasi Uashingtoni njoftoi pezullimin e ndarjes së informatave të tilla me Kievin, tha të enjten ministri francez i Mbrojtjes, Sebastien Lecornu.

SHBA-ja tha të mërkurën se e ka pezulluar ndarjen e informatave të inteligjencës me Ukrainën, duke e ndërprerë ofrimin e të dhënave jetike që kanë ndihmuar atë ta shënjestrojë pushtuesin rus. Megjithatë, zyrtarë të administratës Trump kanë thënë se bisedimet pozitive mes Uashingtonit dhe Kievit nënkuptojnë se pezullimi mund të jetë i shkurtër.

Informatat e inteligjencës amerikane janë jetike për Ukrainën në përpjekjet e saj për t’i gjurmuar lëvizjet e trupave ruse dhe për t’i zgjedhur objektivat.

Ministri Lecornu tha se Franca po vazhdon ndarjen e informatave të inteligjencës me Ukrainën.

“Informatat tona të inteligjencës janë sovrane. Ukraina mund të përfitojë nga informatat e inteligjencës sonë”, shtoi ai.

SHBA-ja e mori vendimin pas përkeqësimit dramatik të raporteve mes Kievit dhe Uashingtonit. Presidenti amerikan, Donald Trump, dhe ai ukrainas, Volodymyr Zelensky, u përplasën në Zyrën Ovale javën e kaluar dhe pas kësaj, SHBA-ja njoftoi se ka pezulluar ndihmën thelbësore ushtarake për Ukrainën.

Drejtori i Agjencisë Qendrore amerikane të Inteligjencës (CIA), John Ratcliffe, konfirmoi të mërkurën se ndarja e inteligjencës është ngrirë, teksa Ukraina po vazhdon të luftojë kundër pushtimit që Rusia ka nisur më 2022.

Dy liderët e opozitës ukrainase kanë hedhur poshtë idenë e mbajtjes së zgjedhjeve ndërsa vendi është në luftë. Ish-presidenti Petro Poroshenko dhe Julia Tymoshenko kanë deklaruar se zgjedhjet duhet të zhvillohen vetëm pasi të vendoset paqja.

Deklaratat e tyre vijnë pas komentit të Donald Trump, i cili e quajti presidentin Volodymyr Zelenskyy një “diktator” për mosmbajtjen e zgjedhjeve presidenciale. Një narrativë shpesh e përdorur nga Kremlini në përpjekje për të delegjitimuar liderin ukrainas.

Përfaqësues të rrethit të Trump kanë zhvilluar bisedime me Poroshenkon dhe Tymoshenkon gjatë së mërkurës, por nga deklaratat e opozitës në Ukrainë duket se liderët nuk janë dakord me planin e SHBA për të mbajtur zgjedhje në kohë lufte.

Kushtetuta e Ukrainës nuk lejon mbajtjen e zgjedhjeve ndërsa vendi është nën ligjin ushtarak dhe do të kishte sfida të mëdha në realizimin e votimit për qytetarët që jetojnë në territoret e pushtuara dhe për ushtarët në vijën e frontit.

Poroshenko tha në Telegram se zgjedhjet duhet të zhvillohen vetëm pasi të jetë vendosur paqja, dhe jo më vonë se 180 ditë pas përfundimit të luftës. Nga ana tjetër, Tymoshenko theksoi se ekipi i saj “po bisedonte me të gjithë aleatët tanë që mund të ndihmojnë në sigurimin e një paqeje të drejtë sa më shpejt të jetë e mundur”, duke shtuar se zgjedhjet nuk duhet të mbahen para se kjo të arrihet.

Presidentja e Komisionit Evropian (KE), Ursula von der Leyen paralajmëroi se Evropa po përballet me një “rrezik të qartë dhe të pranishëm”.

Von der Leyen foli në hyrje të takimit të Partisë Popullore Evropiane (EPP) në të cilën ajo është anëtare, përpara mbajtjes së Samitit të jashtëzakonshëm të liderëve të BE-së.

Ajo theksoi se janë mbledhur për një samit të jashtëzakonshëm që do të fillojë në orët në vijim. “Jemi në një kohë të jashtëzakonshme ku shohim se Evropa po përballet me një rrezik të qartë dhe të pranishëm. Ne duhet ta vendosim Evropën në një pozicion ku ajo të mund të vetëmbrohet dhe të mbrojë“, tha Von der Leyen.

Presidentja e KE-së potencoi rëndësinë e vendosjes së Ukrainës në një pozicion për të mbrojtur veten dhe për të siguruar paqe të drejtë dhe të qëndrueshme. Ajo njoftoi në këtë drejtim do t’u prezantojë liderëve një plan të ri të quajtur “ReArm” i cili synon të riarmatosë rajonin duke rritur shpenzimet e mbrojtjes të Evropës.

Pasi bëri të ditur se plani i ri kap vlerën prej 800 miliardë euro, Von der Leyen tha: “Ai u siguron vendeve anëtare më shumë mjete financiare për shpenzime ushtarake dhe ofron mundësinë për furnizime të përbashkëta në nivel evropian. Si një pikë shumë e rëndësishme mund të sigurojë dobi edhe ndaj Ukrainës, sepse falë këtij plani vendet anëtare mund të investojnë në industrinë e mbrojtjes të Ukrainës ose të furnizojnë kapacitete ushtarake dhe t’ia japin ato Ukrainës“.

Udhëheqësit e BE-së janë mbledhur në Bruksel dhe do të diskutojnë mbështetjen për Ukrainën dhe mënyrat për të rritur shpenzimet për mbrojtjen e Evropës.

Rusia ka reaguar me përbuzje ndaj fjalimit të Emmanuel Macron, drejtuar kombit francez, ku paralajmëroi se Rusia përbën një kërcënim të drejtpërdrejtë për Francën dhe Evropën.

Figura të larta ruse, përfshirë ligjvënës, hodhën poshtë deklaratat e Macron, duke i cilësuar ato si nxitëse të frikës dhe e akuzuan presidentin francez për krijimin e tensioneve të panevojshme. Konstantin Kosachev, senator i lartë rus, e quajti deklaratën e Macron si një keqinterpretim të thellë të veprimeve të Rusisë, duke thënë se Moska thjesht po reagonte ndaj zgjerimit të NATO-s dhe jo duke ndjekur një politikë agresioni.

“Një analizë e tillë e gabuar çon në gabime fatale,” tha Kosachev, duke shtuar se presidenti francez po mashtronte qytetarët dhe aleatët e tij.

Ish-presidenti rus, Dmitry Medvedev, nuk ngurroi të tallte presidentin francez, duke e quajtur atë “Micron”. Medvedev tha se Macron do të zhduket nga skena politike në vitin 2027, vit që përkon me përfundimin e mandatit të tij të dytë si president i Francës.

“Vetë Micron nuk përbën kërcënim. Ai do të zhduket përgjithmonë jo më vonë se 14 maj 2027 dhe ai nuk do të mungojë”.

Zëdhënësja e Ministrisë së Jashtme të Rusisë, Maria Zakharova, gjithashtu i kundërpërgjigj Macron-it, duke u tallur me pohimin e tij se Franca ka ushtrinë më efektive në Evropë, dhe sugjeroi që ai mund të dëshirojë ta vendosë këtë pretendim në provë.

Ndërkohë, komentatorët e lidhur me Kremlinin e akuzuan Macron për shtrembërimin e realitetit, me

Në fjalimin e tij të mbajtur më 8 mars 2024, Macron e cilësoi Rusinë si një kërcënim të qartë dhe të pranishëm për Evropën dhe e përshkroi luftën në Ukrainë si një “konflikt global”. Ai theksoi se Rusia ka mobilizuar ushtarë të Koresë së Veriut dhe pajisje iraniane për të ndihmuar këto shtete të armatosen dhe për të forcuar ndikimin e saj në kontinentin evropian.

Macron gjithashtu theksoi se Rusia po shkel kufijtë dhe po zhvillon aktivitete destabilizuese, duke përfshirë sulme dixhitale ndaj spitaleve dhe përpjekje për të manipuluar zgjedhjet në Rumani dhe Moldavi. “Rusia po përpiqet të manipulojë opinionet tona me gënjeshtra të përhapura në rrjetet sociale,” tha ai.