Kosova është e pranishme në Eurovision përmes krijimtarisë së dizajnerëve të saj, ndonëse nuk merr pjesë si shtet në garë.

Dy dizajnerët kosovarë, Valdrin Sahiti dhe Drenusha Xharra, kanë veshur prezantuesen e finales së Eurovision Song Contest 2025, Victoria Swarovski, në skenën që u mbajt në Vjenë.

Sipas mediave ndërkombëtare, Sahiti ka dizajnuar një fustan në ngjyrë smerald-jeshile me detaje që theksojnë siluetën, ndërsa Xharra është autore e një fustani ngjyrë vjollcë të veshur gjatë mbrëmjes finale.

Kjo prani vlerësohet si një përfaqësim i rëndësishëm i dizajnit kosovar në një nga skenat më të mëdha ndërkombëtare të muzikës dhe televizionit.

Reperi kanadez Drake, sipas raportimeve që po qarkullojnë në rrjete sociale dhe disa media online, ka publikuar një projekt të pazakontë duke nxjerrë njëkohësisht tre albume me tituj “Iceman”, “Habibti” dhe “Maid of Honour”.

Në këto projekte thuhet se marrin pjesë një sërë emrash të njohur të skenës botërore si Future, Sexyy Red dhe 21 Savage, ndërsa produksioni përfshin emra si Boi-1da, DJ Frisco954 dhe të tjerë.

Në mesin e bashkëpunimeve bie në sy edhe një artiste shqiptare, Qendresa. Sipas raportimeve, ajo bashkëpunon me Drake në këngën “Slap The City”, e renditur si e treta në albumin “Habibi”, i cili përmban gjithsej 11 këngë.

Qendresa, e rritur në Londër me origjinë shqiptare, thuhet se ka mbi 900 mijë dëgjues mujor në Spotify, ndërsa kënga e saj më e dëgjuar është “2 much”, me mbi 15 milionë dëgjime.

Regjisori i njohur italian Paolo Sorrentino ka bërë një batutë me humor ndaj presidentit të Italisë, Sergio Mattarella, gjatë ceremonisë së 145-vjetorit të SIAE në Pallatin Quirinale.

“Po të banohej bota vetëm nga ju dhe artistët, do të jetonim të gëzuar dhe paqësisht. Fatkeqësisht janë edhe të tjerët”, u shpreh Sorrentino, duke shkaktuar të qeshura mes të pranishmëve.

Sorrentino, fitues i çmimit Oscar për filmin “The Great Beauty”, konsiderohet një nga emrat më të rëndësishëm të kinemasë evropiane bashkëkohore.

Në të njëjtën ceremoni, presidenti Sergio Mattarella vlerësoi rolin e SIAE në mbrojtjen e autorëve dhe krijimtarisë, duke theksuar kontributin e saj në jetën kulturore dhe ekonomike të Italisë.

SIAE, Shoqata Italiane e Autorëve dhe Botuesve, administron të drejtat e autorit për mbi 126 mijë krijues dhe rreth 30 milionë vepra në Itali.