Parlamenti Evropian po zhvillon procesin e verifikimit të komisionerëve të rinj të Bashkimit Evropian, një procedurë që do të zgjasë nga 4 deri më 12 nëntor 2024. Gjatë kësaj kohe, 26 politikanë do të përballen me pyetje të detajuara për të vlerësuar përshtatshmërinë e tyre për postet e larta në Komisionin Evropian, institucion qendror i BE-së me mbi 38,000 të punësuar.

Sipas rregullave strikte të parlamentit, çdo kandidat duhet të përballet me një seancë të pyetjeve që zgjat tre orë, ku tetë grupe të deputetëve shqyrtojnë në detaje karrierën, interesat financiare, qëndrimet morale dhe politike, si dhe çështjet potenciale të diskutueshme. Deputetët vlerësojnë gjithashtu sjelljen dhe reagimet e kandidatëve, duke marrë parasysh shenjat e vetëbesimit, nervozizmit ose paqartësisë.

Presidentja e Komisionit, Ursula von der Leyen, e cila është konfirmuar tashmë nga Parlamenti Evropian, do të udhëheqë ekipin e ri që pritet të nisë punën më 1 dhjetor, por vetëm pasi deputetët të miratojnë përbërjen e plotë të Komisionit. Përpara kësaj, parlamenti mund të refuzojë kandidatët që nuk plotësojnë standardet, një ndodhi e rrallë por jo e paprecedentë.

Ndër shembujt e refuzimeve të mëparshme është ai i italianit Rocco Buttiglione në vitin 2004, i cili u kundërshtua për qëndrimet e tij të ashpra kundër të drejtave të komunitetit LGBTQ+, dhe francezes Silvi Gulard në 2019 për dyshime lidhur me angazhimet e saj financiare. Këtë herë, emra si komisioneri hungarez Oliver Varhelyi janë në qendër të vëmendjes, pasi ai konsiderohet një aleat i kryeministrit të Hungarisë, Viktor Orban. Edhe kandidatja bullgare Ekatarina Zaharieva dhe Glenn Micallef nga Malta mund të përballen me vështirësi për shkak të çështjeve të mëparshme ose mungesës së përvojës.

Një faktor kyç që po ndikon në këtë proces është Viktor Orban, kryeministri hungarez, i cili mund të bllokojë përbërjen e Komisionit të ri nëse kandidati i tij refuzohet. Orban njihet për kritikat e tij ndaj BE-së, duke akuzuar Komisionin se funksionon si një byrokraci autokratike. Ndërkohë, bllokimi i fondeve evropiane për Hungarinë mbetet një temë e nxehtë për shkak të politikave të tij që shkelin vendimet e Gjykatës Evropiane të Drejtësisë.

Komisioni i ri i Ursula von der Leyen ka prezantuar një strukturë të re, duke theksuar më shumë tranzicionin ekonomik të BE-së drejt neutralitetit klimatik dhe krijimin e portofoleve të reja si Mbrojtja e kafshëve, Ndërtimi i banesave dhe Mesdheu, që i është caktuar komisioneres kroate Dubravka Shuica për të forcuar marrëdhëniet me fqinjët e Afrikës së Veriut.

Nëse të gjitha kandidatët miratohen, ata do të fitojnë paga që fillojnë nga 26,000 euro bruto në muaj, ndërsa presidentja e Komisionit përfiton 31,800 euro. Këto pozita janë të lakmueshme, por të mbushura me sfida të mëdha, që shihen në përpjekjet për të balancuar interesat e ndryshme të shteteve anëtare dhe të garantuar që BE-ja të mbetet e bashkuar përballë sfidave të brendshme dhe të jashtme./UBTNews/

Inteligjenca amerikane ka lëshuar një paralajmërim të rëndësishëm për ndërhyrjet e vazhdueshme të Rusisë në procesin zgjedhor të Shteteve të Bashkuara. Sipas burimeve zyrtare, grupet e inteligjencës në qeverinë amerikane kanë vërejtur operacione të reja dhe të shtuar të ndikimit, të cilat synojnë të minojnë besimin publik në integritetin e zgjedhjeve dhe të nxisin përçarje mes qytetarëve amerikanë.

Në një deklaratë të përbashkët të lëshuar nga FBI, Zyra e Drejtorit të Inteligjencës Kombëtare dhe Agjencia e Sigurisë së Kibernetikës dhe Infrastrukturës, u bë e ditur se “komuniteti i inteligjencës pret që këto aktivitete do të intensifikohen gjatë ditës së zgjedhjeve dhe javët në vijim.” Deklarata paralajmëron se përpjekjet për ndikim të huaj do të përqendrohen kryesisht në shtetet e pavendosura, ku ndikimi mund të ketë më shumë peshë në rezultatin përfundimtar të zgjedhjeve.

Në këtë dokument, Rusia është përshkruar si “kërcënimi më aktiv” në lidhje me ndërhyrjet e huaja, duke nënvizuar seriozitetin e këtyre veprimeve të vazhdueshme. Sidoqoftë, Moska ka mohuar kategorikisht akuzat për ndërhyrje në proceset zgjedhore të Shteteve të Bashkuara, duke i cilësuar ato si të pabaza.

Një nga shembujt konkretë të këtyre ndërhyrjeve përfshin një video të prodhuar nga aktorë rusë të ndikimit, e cila shpërndante në mënyrë të rreme një intervistë të fabrikuar. Kjo video pretendonte mashtrime zgjedhore në Arizona, duke përfshirë akuza për fletëvotime të falsifikuara nga jashtë shtetit dhe manipulimin e listave të votuesve për të favorizuar zëvendëspresidenten Kamala Harris. Këto pretendime janë cilësuar si një përpjekje për të përhapur dezinformata dhe për të krijuar paqartësi në mesin e votuesve amerikanë.

Ekspertët e inteligjencës theksojnë se mbrojtja e procesit zgjedhor është më kritike se kurrë, duke bërë thirrje për vigjilencë të shtuar nga qytetarët dhe autoritetet për të parandaluar ndikimin e huaj në demokracinë amerikane./UBTNews/

Nënpresidentja Kamala Harris dhe ish-Presidenti Donald Trump mbajtën fjalimet e tyre të fundit para votuesve të hënën në të njëjtën pjesë të Pensilvanisë, afërsisht në të njëjtën kohë, duke kaluar ditën e fundit të fushatës presidenciale në një shtet që mund të jetë vendimtar në zgjedhjet e 5 nëntorit.

Dy kandidatët mbajtën tubime elektorale në këndin juglindor të Pensilvanisë. Zoti Trump bëri fushatë në Reding, rreth 48 kilometra larg qytetit të Allentaunit, ku demokratja Harris mbajti një fjalim rreth gjysmë ore më vonë.

“Fitorja në Pensilvani do të na jepte fitoren në zgjedhjet në të gjithë vendin”, tha zoti Trump.

Në të vërtetë, një fitore e zotit Trump në Pensilvani, një shtet me 19 vota në Kolegjin Elektoral, do të vështirësonte përpjekjen e zonjës Harris për të siguruar 270 votat e nevojshme për të fituar zgjedhjet presidenciale.

Kandidatja demokrate për presidente, Kamala Harris e kaloi gjithë të hënën në Pensilvani, shteti i pavendosur me numrin më të madhe të votave në Kolegjin Elektoral, duke theksuar nevojën për të fituar në këtë shtet.

“Ne kemi nevojë që të gjithë në Pensilvani të votojnë”, tha ajo. “Vota juaj do të jetë vendimtare në këto zgjedhje.”

“A jeni gati?”, tha zonja Harris para një tubime fushate më herët në Skranton, me një tabelë të madhe “VOTO PËR LIRI” mbrapa saj.

Zoti Trump shkoi fillimisht në Karolinën e Veriut përpara se të vizitonte qytetin Reding në Pensilvani. Ai më pas shkoi në anën tjetër të Pensilvanisë, në qytetin e Pitsburgut, përpara se të mbyllte fushatën me një tubim elektoral në Grand Rapids të Miçiganit. Zoti Trump ka mbajtur tubimin e tij të fundit elektoral në këtë qytet edhe në zgjedhjet e viteve 2016 dhe 2020.

Ish-Presidenti Trump në Karolinën e Veriut më herët foli për politikat e tij të ashpra të imigracionit dhe u përqendrua në disa nga kritikat e tij të zakonshme ndaj rivalëve demokratë. Ai gjithashtu dukej se i referohej videos që gati fundosi fushatën e tij të vitit 2016, ndërsa shprehu habinë për dy krahët gjigantë mekanikë që kapën raketën e ripërdorshme të Elon Muskut, “sikur të kapësh fëmijën tënd të bukur”.

“Shikoni, unë jam përmirësuar shumë. Vite më parë, do të kisha thënë diçka tjetër. Por unë kam mësuar”, tha zoti Trump, duke shkaktuar të qeshura nga turma. “Do të kisha qenë pak më i rrezikshëm.”

Në javët e fundit të fushatës së vitit 2016 u publikuan disa kaseta të emisionit “Access Hollyëood”, në të cilën zoti Trump mburrej për kapjen e grave nga organet e tyre gjenitale.

Ish-Presidenti Trump do të bëj fushatë në qytetet Reding dhe Pitsburg në Pensilvani, në të cilat po bën fushatë edhe demokratja Kamala Harris. Kandidati republikan për president do ta mbyllë fushatën e tij ashtu siç i mbylli dy të parat, me një tubim natën vonë në Grand Rapids të Miçiganit.