Netflix pritet të sjellë javën e ardhshme një adaptim të ri të “Little House on the Prairie”, bazuar në serinë e njohur të librave për fëmijë të autores Laura Ingalls Wilder.

Seriali origjinal, i transmetuar nga viti 1974 deri në 1984, u bë një fenomen televiziv ndërkombëtar, duke ndjekur jetën e familjes Ingalls në qytetin Walnut Grove të Minesotës gjatë shekullit XIX. Ai tërhoqi deri në 20 milionë shikues për episod në Shtetet e Bashkuara dhe u transmetua në më shumë se 100 vende të botës.

Edhe pse shumë njerëz e kujtojnë si një serial të ngrohtë familjar, kritikët theksojnë se versioni i viteve ’70 trajtoi tema shumë më të rënda sesa përshtypja që ka lënë te publiku.

Përveç historive për jetën e përditshme në komunitet, seriali përfshinte edhe tema si abuzimi i fëmijëve, vrasjet, varësia nga droga, vetëvrasja, problemet e shëndetit mendor, kanceri dhe vështirësitë e shtatzënisë.

Sipas studiuesve të televizionit, këto histori pasqyronin realitetin e ashpër të jetës në kufirin amerikan gjatë shekullit XIX, ku sëmundjet, humbja e fëmijëve dhe komplikimet gjatë lindjes ishin të zakonshme.

Versioni i ri i Netflix-it pritet t’i qëndrojë më besnik toneve familjare dhe frymës së librave origjinalë të Laura Ingalls Wilder, duke ofruar një qasje më të afërt me materialin burimor.

Mbetet të shihet nëse adaptimi i ri do të arrijë suksesin dhe ndikimin kulturor që pati seriali origjinal, i cili edhe sot vazhdon të mbetet ndër produksionet televizive më të dashura për disa breza shikuesish./BBC/A.K/

Dy persona u ngjitën në majën e ndërtesës ikonike Empire State Building në Nju Jork, ku shpalosën një banderolë me mesazhin: “Kur fuqia e dashurisë mposht dashurinë për pushtetin, bota njeh paqen.”

Sipas Reuters, bëhet fjalë për rusët Angela Nikolau dhe Ivan Kuznetsov, i njohur edhe si Vanya Beerkus, të cilët njihen për ngjitjet e tyre në rrokaqiej dhe struktura të larta në vende të ndryshme të botës. Historia e tyre është dokumentuar edhe në filmin e Netflix “Skywalkers: A Love Story”, i publikuar në vitin 2024.

Pas zbritjes nga maja e ndërtesës, çifti u arrestua nga Policia e Nju Jorkut dhe përballet me disa akuza, përfshirë hyrje të paligjshme, rrezikim të jetës dhe shkelje të masave të sigurisë.

Menaxhmenti i Empire State Building e cilësoi incidentin si një hyrje të paautorizuar, duke theksuar se ngjarja nuk ka rrezikuar vizitorët apo stafin e ndërtesës.

Sipas raportimeve, para se të nisnin zbritjen, Ivan Kuznetsov i propozoi martesë partneres së tij, Angela Nikolau, e cila pranoi, duke e kthyer aksionin simbolik në një moment personal që mori vëmendje të madhe në rrjetet sociale.

Autoritetet amerikane kanë nisur hetimet për të zbuluar se si çifti arriti të anashkalonte masat e sigurisë dhe të ngjitej në majën e kullës 443 metra të lartë, një prej monumenteve më të njohura të Nju Jorkut./A.K/

Këngëtari amerikan Chris Brown është shpallur përgjegjës nga një gjykatë në Los Angeles për një sulm të rëndë të qenit ndaj pastrueses së shtëpisë së tij në vitin 2020 dhe është urdhëruar të paguajë 12.9 milionë dollarë dëmshpërblim.

Vendimi u mor pas një gjykimi dyjavor, ku juria vendosi në favor të Maria Avila, e cila u sulmua nga një qen i racës Caucasian Shepherd, me peshë rreth 90 kilogramë, teksa po nxirrte mbeturinat në rezidencën e Brown në Tarzana të Kalifornisë.

Sipas padisë, sulmi i qenit i shkaktoi Avilas lëndime të rënda, duke i shqyer pjesë të mëdha të lëkurës dhe duke i lënë plagë të përhershme në fytyrë, dëmtime në shikim, dëmtime nervore dhe shenja të rënda në trup.

Gjatë procesit gjyqësor u tha se, në vend që të thërriste shërbimet e emergjencës ose t’i ofronte ndihmë të plagosurës, Brown ishte larguar nga vendi i ngjarjes me këshillën e menaxherit të tij, nga frika se prania e tij do të shkaktonte një “cirk mediatik”.

Vetë këngëtari pranoi se mbante një pjesë të përgjegjësisë, por kundërshtoi shkallën e lëndimeve të Avilas dhe argumentoi se ajo mbante një pjesë të fajit për incidentin. Ai deklaroi se qeni përdorej për arsye sigurie dhe nuk ishte kafsha e tij personale, ndërsa pretendoi se i kishte paralajmëruar punonjëset të mos afroheshin pranë qenve pa praninë e rojeve të sigurisë.

Megjithatë, Maria Avila dhe motra e saj e mohuan se kishin marrë një paralajmërim të tillë, duke theksuar se një bisedë e tillë do të kishte qenë e vështirë edhe për shkak të barrierës gjuhësore.

Si rezultat i vendimit, Chris Brown dhe kompania e tij Black Pyramid LLC do të duhet t’i paguajnë Avilas 12.9 milionë dollarë dëmshpërblim për neglizhencë./BBC//A.K/

Aktorja e njohur amerikane Sharon Stone është rikthyer në pasarelë pas më shumë se tri dekadash, duke marrë vëmendjen kryesore në Paris Fashion Week.

68-vjeçarja parakaloi në sfilatën e koleksionit pranverë/verë 2027 të Vetements, e veshur me një stil elegant dhe modern, që përfshinte xhaketë të bardhë, këmishë të zezë me kravatë dhe çizme të gjata prej lateksi.

Me një paraqitje të sigurt dhe stil të veçantë, Stone rikujtoi rikthimin e saj të parë në pasarelë që nga viti 1993, kur kishte mbyllur një sfilatë të Valentino Garavani në Paris.

Rikthimi i saj është pritur me interes të madh në botën e modës, duke e vendosur sërish në qendër të vëmendjes si një ikonë e stilit dhe kinemasë./A.K/