Mundësi kosovar Egzon Xhoni do ta vazhdojë garën për medaljen e bronztë në Lojërat Mesdhetare “Taranto 2026”.

Xhoni u mposht në duelin e tij nga Islam Dudaev, medalist i bronztë olimpik në “Paris 2024”, i cili përfaqëson Shqipërinë. Dudaev triumfoi me rezultat 11:2 dhe më pas arriti të kualifikohet në finale.

Kualifikimi i Dudaevit në finale i ka dhënë mundësi Xhonit të vazhdojë garën për medaljen e bronztë. Mundësit kosovar i duhen edhe dy fitore për të siguruar medaljen.

Xhoni po garon në kategorinë deri në 74 kilogramë, në stilin e lirë, ndërsa tash do të kërkojë një paraqitje të suksesshme në garat për bronzin.

Të gjithë sytë tash janë te mundësi kosovar, me shpresën që ai ta shfrytëzojë mundësinë dhe të sigurojë një medalje për Kosovën.

D.L

Përfaqësuesja e Kosovës në volejboll për meshkuj është mposhtur nga Egjipti me rezultat 3:0, në ndeshjen e tretë të saj në Lojërat Mesdhetare “Taranto 2026”.

Egjipti e dominoi ndeshjen dhe i fitoi të tre setet me rezultatet 25:12, 25:19 dhe 25:17.

Për “Dardanët” kjo ishte humbja e tretë radhazi në këtë garë, pas disfatave ndaj Greqisë dhe Spanjës.

Kosova po merr pjesë për herë të parë në Lojërat Mesdhetare në volejbollin për meshkuj, ndërsa skuadra drejtohet nga trajneri malazez Darko Prebiraçeviç.

Pavarësisht rezultateve negative, “Dardanët” po vazhdojnë përvojën e tyre në këtë garë ndërkombëtare.

D.L

Përfaqësuesja e Kosovës U18 në futboll për vajza është mposhtur 4:1 nga Italia në ndeshjen e zhvilluar të dielën në kuadër të Lojërave Mesdhetare.

Italianet e nisën më mirë takimin dhe e dominuan pjesën e parë. Daria Rosso shënoi në minutën e 12-të, ndërsa Giulia Guerzoni realizoi dy herë, në minutat 25 dhe 35, për ta dërguar Italinë në pushim me epërsi 3:0.

Italia e gjeti edhe golin e katërt menjëherë pas fillimit të pjesës së dytë, përmes Rachele Andreangeli. Kosova reagoi dhe arriti të shënojë golin e nderit në minutën e 55-të, me Mehmeti, por nuk arriti të rikthehej në lojë.

Kjo ishte ndeshja e radhës për Kosovën në turne, ndërsa “Dardanet” do ta vazhdojnë garën me ndeshjen ndaj Marokut më 25 gusht.

D.L

Presidenti i UEFA-s, Aleksander Çeferin, ka deklaruar se nuk do të kandidojë për president të FIFA-s, por njëkohësisht ka paralajmëruar kreun e Federatës Ndërkombëtare të Futbollit, Gianni Infantino, se duhet të japë dorëheqje ose të përballet me një kandidat në zgjedhjet e marsit.

Infantino është vënë nën presion të shtuar pas planit për shitjen e aksioneve te investitorët privatë. Edhe pse ky plan ka dështuar, UEFA vazhdon të kërkojë largimin e tij nga drejtimi i FIFA-s. Ndërkohë, tri konfederata e kanë akuzuar Infantinon për mashtrim, ndërsa UEFA ka kërcënuar edhe me bojkotimin e garave të FIFA-s.

“Një mundësi është që ai të kuptojë se nuk ka mbështetje. Dhe kjo nuk është vetëm mbështetje politike e atyre që votojnë, por edhe mbështetja e komunitetit të futbollit, tifozëve, lojtarëve, ish-lojtarëve dhe trajnerëve”, ka thënë Çeferin në një podkast britanik, raportoi të hënën AP.

“Dhe mundësia e dytë është që ai të shkojë në zgjedhje në mars. Por, në atë rast, mendoj se do të ketë një kandidat kundër tij. Nuk e di ende se kush”, shtoi ai.

Infantino është në krye të FIFA-s që nga viti 2016 dhe deri në paraqitjen e planit për shitjen e aksioneve shihej si favorit për t’u rizgjedhur pa kundërshtar në vitin e ardhshëm në Marok. FIFA ka caktuar 18 nëntorin si afat për paraqitjen e kandidaturave për president.

Pavarësisht se është përmendur vazhdimisht si një kandidat i mundshëm për ta sfiduar Infantinon, Çeferin ka mohuar çdo interesim për këtë post dhe ka shprehur përkushtimin e tij ndaj UEFA-s.

“Nuk jam i interesuar për dy arsye. E para është se e dua UEFA-n dhe më pëlqen puna këtu. Në një moment të caktuar është koha për ta shijuar pak jetën. Arsyeja e dytë është se kredibiliteti im është shumë më i madh nëse nuk jam i interesuar për pozitën”, u shpreh Çeferin.

58-vjeçari slloven tha gjithashtu se propozimi për shitjen e aksioneve të Botërorit përbënte një kërcënim edhe më të madh për futbollin sesa projekti i Superligës Evropiane, të cilin UEFA e kundërshtoi me sukses në vitin 2021.

Sipas Çeferinit, kundërshtimi ndaj këtij propozimi nuk vjen vetëm nga vendet e mëdha evropiane.

“Nga njëra anë ishin Anglia dhe Gjermania, të cilat nuk e duan këtë, sepse këto para nuk janë aq të mëdha për to. Por, nga ana tjetër, ishin San Marino, Qiproja dhe Lihtenshtajni, që thanë: ‘Nuk jemi në shitje’”, ka deklaruar ai.

D.L