Më shumë vende perëndimore vendosën sanksione ndaj Rusisë, pas Shteteve të Bashkuara, Bashkimit Evropian dhe Britanisë në përpjekje për të ndëshkuar Moskën për veprimet e saj në Ukrainë.

Australia më 23 shkurt tha se do të bashkohej me Shtetet e Bashkuara dhe Britaninë duke shënjestruar dy banka ruse dhe duke vendosur ndalime udhëtimi për tetë anëtarë të Këshillit të Sigurimit të Putinit.

Kryeministri Scott Morrison – si udhëheqësit në Shtetet e Bashkuara dhe Britani – tha se sanksionet ishin grupi i parë në një arsenal sanksionesh të mundshme që Australia mund të përdorë kundër Rusisë.

Ndërkohë, kryeministri japonez, Fumio Kishida, më 23 shkurt përshkroi gjithashtu masat kundër Rusisë, duke thënë se qeveria e tij do të ndalojë shpërndarjen e re të letrave me vlerë të qeverisë ruse në Japoni.

Japonia do të ndalojë gjithashtu udhëtimin e njerëzve të lidhur me dy rajonet separatiste ukrainase dhe do të ngrijë asetet e tyre në Japoni, tha Kishida.

Lëvizjet vijnë pas vendimit të Putinit për të njohur dy rajone separatiste në Ukrainën lindore si shtete të pavarura dhe për të dërguar trupa atje, veprime që u dënuan nga Perëndimi, Kombet e Bashkuara dhe vende e organizata të tjera.

Pavarësisht veprimeve të tij, Putin më 23 shkurt tha se vendi i tij ishte gati të kërkonte “zgjidhje diplomatike” për krizën aktuale, por ai theksoi se interesat e Rusisë nuk ishin të negociueshme.

“Vendi ynë është gjithmonë i hapur për dialog të drejtpërdrejtë dhe të ndershëm, për kërkimin e zgjidhjeve diplomatike për problemet më komplekse”, tha Putin në një fjalim.

Megjithatë, ai shtoi se: “interesat e Rusisë, siguria e qytetarëve tanë, janë të panegociueshme për ne”.

Perëndimi e ka akuzuar Putinin se po kërkon një pretekst për një pushtim të plotë të Ukrainës pasi Rusia grumbulloi më shumë se 150,000 trupa përgjatë kufirit, duke fajësuar shpesh Kievin për dhunën në rajon.

“Askush prej nesh nuk do të mashtrohet” nga pretendimet e Putinit për Ukrainën, tha presidenti i ShBA, Joe Biden në një fjalim më 22 shkurt, ndërsa shpalli sanksionet e para kundër Rusisë për agresionin e saj.

“Ky është fillimi i një pushtimi rus të Ukrainës”, tha Biden, duke iu referuar planeve të deklaruara të Putinit për të dërguar trupa përtej rajoneve në Ukrainën lindore që separatistët e mbështetur nga Rusia pretendojnë se i kontrollojnë.

Masat e Uashingtonit përfshijnë sanksione ndaj dy bankave ruse dhe sanksionet për të bllokuar qasjen e Moskës në institucionet financiare perëndimore.

Britania, BE-ja dhe Kanadaja njoftuan sanksione të ngjashme kundër Moskës, ku shumica thonë se mund të vendosen masa më serioze nëse Rusia kryen një pushtim në shkallë të plotë të Ukrainës.

Në anën tjetër, kancelari gjerman Olaf Scholz tha se vendi i tij po pezullonte procesin e certifikimit të gazsjellësit Nord Stream 2 nga Rusia në reagim ndaj veprimeve të Moskës në Ukrainë.

Scholz u tha gazetarëve se kishte kërkuar të pezullonte procesin e rishikimit nga rregullatori gjerman për tubacionin prej 11 miliardë dollarësh që është projektuar për të ofruar gaz natyror në Gjermani nga Rusia nëpërmjet Detit Baltik.

Tubacioni është kundërshtuar prej kohësh nga Shtetet e Bashkuara dhe disa vende evropiane, të cilët thonë se do të rriste varësinë e Evropës nga furnizimet ruse të energjisë.

Uashingtoni ka thënë gjithashtu se do të shkaktojë dëm ekonomik për Ukrainën, duke i mundësuar Moskës të ridrejtojë eksportet e gazit rreth Ukrainës, duke e privuar vendin nga miliarda dollarë në vit tarifa tranziti.

Dhoma e Lartë e Parlamentit të Rusisë votoi njëzëri më 22 shkurt për të plotësuar kërkesën e Putinit për të përdorur forcën ushtarake jashtë vendit, një veprim që ndez më tej krizën me vendet perëndimore.

Votimi erdhi pasi Putin i dërgoi një letër Këshillit të Federatës duke kërkuar zyrtarizimin e një dislokimi ushtarak në rajonet në Ukrainën lindore që separatistët e mbështetur nga Rusia pretendojnë se i kontrollojnë një ditë pasi Putin njohu pavarësinë e tyre.

Putini më vonë shtroi kushtet për t’i dhënë fund krizës që ka kërcënuar ta fusë Evropën në luftë. Këto përfshijnë heqjen dorë nga Ukraina nga ambicia e saj për t’u bashkuar me NATO-n./REL