Qeveria e re e koalicionit – e udhëhequr nga konservatorët në Gjermani – ka miratuar eksporte armësh me vlerë gati 4 milionë euro (4,6 milionë dollarë) në Izrael – gjatë pesë javëve të para në detyrë.

Të dhënat u zbuluan nga Ministria e Ekonomisë – në përgjigje të një pyetjeje nga anëtarja e parlamentit e partisë së majtë, Desiree Becker.

Midis 7 majit dhe 10 qershorit 2025, prodhuesit gjermanë u autorizuan të furnizonin armë me vlerë 3,986 milionë euro në Izrael – një vend që është përballur me kritika të ashpra për veprimet e tij ushtarake në Rripin e Gazës palestineze.

“Në këto eksporte nuk u përfshinë armë lufte”, tha ministria.

Kjo është hera e parë që qeveria e re ka zbuluar shkallën e eksporteve të armëve të miratuara në Izrael. Vëllimi i këtyre miratimeve është relativisht i vogël krahasuar me qeverinë e mëparshme.

Ata miratuan eksporte armësh me vlerë gati gjysmë miliardi euro për Izraelin – pas sulmit terrorist të Hamasit më 7 tetor 2023.

Vetëm në tremujorin e parë të vitit 2025, eksportet arritën në 28 milionë euro – duke e vendosur Izraelin në vendin e 10-të midis përfituesve kryesorë të eksporteve të armëve gjermane./atsh

Shefi i OKB-së për Refugjatët, Filippo Grandi tha se më shumë se 2 milionë sirianë janë kthyer në vendin e tyre që nga dhjetori, transmeton Anadolu.

“Mbi dy milionë refugjatë sirianë dhe të zhvendosur janë kthyer në shtëpi që nga dhjetori, një shenjë shprese mes tensioneve në rritje rajonale“, shkroi Komisioneri i Lartë i OKB-së për Refugjatët (UNHCR), Grandi në X.

Duke theksuar se po udhëton nga Libani për në Siri për Ditën Botërore të Refugjatëve, Grandi përsëriti nevojën për një “zgjidhje politike” në Siri.

“Kjo vërteton se na duhen zgjidhje politike, jo një valë tjetër paqëndrueshmërie dhe zhvendosjeje“, vuri në dukje ai.

Pas shumë vite vuajtjesh dhe vështirësish në kampet e refugjatëve, mijëra civilë sirianë filluan të kthehen në vendin e tyre ndërsa paqja dhe siguria vazhdon të mbizotërojë në Siri pas rënies së regjimit të Bashar al-Asadit.

Miliona sirianë kanë ikur nga vendi drejt shteteve fqinje për të kërkuar siguri mes shkatërrimit masiv dhe një krize humanitare që po përkeqësohej nën sundimin e Asadit.

Asadi, udhëheqësi i Sirisë për gati 25 vjet, iku në Rusi në dhjetor, duke i dhënë fund regjimit të Partisë Baath, e cila ka qenë në pushtet që nga viti 1963.

Ahmad al-Sharaa, i cili udhëhoqi forcat anti-regjim për të rrëzuar Asadin, u shpall president për një periudhë kalimtare në fund të janarit.

Presidenti rus Vladimir Putin tha dje se është i hapur për të biseduar me kancelarin gjerman Friedrich Merz.

Nëse kancelari Merz do të telefononte dhe do të donte të fliste, Putini tha se do të pranonte.

“Ne jemi gjithmonë të hapur për këtë”, tha presidenti rus.

Megjithatë, Putini tha se nuk e shihte pozicionin e Gjermanisë si neutral – kur bëhej fjalë për luftën e Rusisë kundër Ukrainës – atë që quhet një “operacion special” në Rusi.

Gjermania është në anën e Ukrainës, duke furnizuar vendin me tanke dhe duke marrë pjesë në armiqësi dhe për këtë arsye nuk është një ndërmjetëse”, tha Putini.

Deklarata e udhëheqësit të Kremlinit erdhi gjatë një takimi me përfaqësues të agjencive kryesore ndërkombëtare të lajmeve, duke shënuar komentet e tij të para publike për Merz që nga zgjedhja e tij, në maj.

Që nga marrja e detyrës, Merz nuk ka pasur kontakt me Putinin, por i ka bërë vazhdimisht thirrje udhëheqësit të Kremlinit, si në fjalime ashtu edhe gjatë një vizite në Kiev, që të binte dakord për një armëpushim në luftën e Rusisë kundër Ukrainës – deri më tani pa sukses.

Marrëdhëniet gjermano-ruse janë në nivelin më të ulët historik. Merz, në veçanti, është përballur me kritika në Moskë për mbajtjen e një qëndrimi konfrontues ndaj Rusisë.

Rusia ka kundërshtuar furnizimet e armëve të Gjermanisë në Ukrainë dhe ka lëshuar paralajmërime të forta, veçanërisht kundër furnizimit të Kievit me raketa kruiz “Taurus” për sulme në territorin rus.

Putin deklaroi se ndihma gjermane nuk ka ndikim në rrjedhën e luftimeve në Ukrainë./atsh