Nëse po të bien flokët, duken të holluar, pa jetë apo thjesht kërkon më shumë volum dhe shkëlqim – zgjidhja ndoshta nuk është vetëm në shampo apo trajtime të jashtme.

Ajo që ha ndikon direkt në shëndetin e flokëve. Rrënjët e flokëve janë të gjalla dhe si çdo pjesë tjetër e trupit, kanë nevojë për ushqyes të mirë për të prodhuar flokë të fortë dhe të shëndetshëm.

Më poshtë janë disa nga ushqimet më të fuqishme për të nxitur rritjen e flokëve dhe për të rritur volumin në mënyrë natyrale.

Salmoni për shkëlqim natyral

Peshqit si salmoni, sardelet dhe skumbria janë të pasur me yndyrna të shëndetshme omega-3. Trupi nuk i prodhon vetë këto yndyrna, duhet t’i marrësh nga ushqimi. Omega-3 ndihmojnë në mbrojtjen e trupit nga sëmundjet, por janë të rëndësishme për rritjen e flokëve e për t’i mbajtur të shëndetshëm.

Kosi grek për rritjen e flokëve

I pasur me proteinë, që është baza kryesore për ndërtimin e flokëve. Ai përmban një vitaminë të quajtur vitamina B5 (acid pantotenik), e cila ndihmon në përmirësimin e qarkullimit të gjakut në kokë dhe nxit rritjen e flokëve. Kjo vitaminë mund të ndihmojë gjithashtu kundër rënies apo hollimit të flokëve. Nëse ke parë etiketa në produkte për flokët apo lëkurën, mund të kesh parë këtë përbërës.

Spinaqi për flokë të fortë, jo të brishtë

Ashtu si shumë perime të gjelbra me gjethe, spinaqi është i mbushur me lëndë ushqyese të mrekullueshme. Ai përmban vitaminë A, hekur, beta-karoten, acid folik dhe vitaminë C. Këto përbërës punojnë për të mbajtur skalpin të shëndetshëm dhe për të parandaluar thyerjen dhe thatësinë e flokëve. Nëse do një ndryshim, edhe lakra jeshile (kale) është një alternativë shumë e mirë.

Drithëra të pasuruara me hekur për të parandaluar rënien e flokëve

Mungesa e hekurit mund të shkaktojë rënien e flokëve. Fatmirësisht, hekuri mund të gjendet në drithëra, makarona apo bukë të pasuruara me këtë mineral, por edhe te soja, thjerrëzat dhe mishi i kuq, sidomos te mëlçia. Gjithashtu, shumë perime me gjethe të errëta dhe fruta deti janë burime të mira hekuri.

Patatet e ëmbla kundër flokëve të thatë dhe pa shkëlqim

Nëse flokët janë të thatë e pa jetë, patatet e ëmbla janë zgjidhje e shkëlqyer, përmbajnë antioksidues beta-karoten, që trupi e kthen në vitaminë A. Kjo vitaminë ndihmon skalpin të prodhojë yndyrën natyrale që mbron flokët nga tharja. Beta-karoteni gjendet edhe në karrotë, kungull, pjepër dhe mango.

Vezët për rritje dhe forcim

Vezët janë burim i mirë proteine dhe hekuri, dy përbërës që ndihmojnë shumë në rritjen e flokëve. Ato përmbajnë gjithashtu biotin, një lloj i vitaminës B që ndihmon në rritjen dhe forcimin e flokëve. Mungesa e biotinës mund të shkaktojë rënie të flokëve. Ajo ndihmon edhe në forcimin e thonjve të brishtë.

Forca të rënda policore rrethuan shtëpinë luksoze të Gordon Ramsay në Los Anxhelos pas një telefonate që doli të ishte një mashtrim.

Telefonuesi raportoi se të shtëna u qëlluan në rezidencën e shefit të famshëm në Bel Air. Ngjarja ka ndodhur rreth orës 20:40.

Policia ka reaguar menjëherë, por sipas vlerësimeve fillestare, shumë shpejt është konstatuar se informacioni ishte i rremë. Fqinjët raportuan se nuk kishte ndodhur asnjë incident dhe Gordon Ramsay nuk ishte në shtëpi në atë kohë.

Duke folur për TMZ, burime policore folën për një incident “swatting”, siç quhen shakatë me akuza të rreme që synojnë të mobilizojnë në masë forcat e sigurisë. Kjo praktikë ka marrë përmasa në SHBA, ku disa personazhe të famshëm kanë rënë viktimë e saj.

Kohët e fundit, Nicki Minaj ishte shënjestër e një shakaje të ngjashme në shtëpinë e saj në Hidden Hills, ndërsa Jennifer Aniston, Chris Brown, Rihanna, Justin Bieber dhe Tom Cruise kanë qenë të gjithë në shënjestër në të kaluarën.

Aktorja dhe këngëtarja Selena Gomez, ka treguar se ndihet krenare për origjinën e saj meksikane, e cila sipas saj, ka pasur ndikim të madh në jetën dhe karrierën e saj.

32-vjeçarja ka theksuar se ka krijuar një lidhje të veçantë me gratë e tjera latine në industrinë e argëtimit.

“Prejardhja ime meksikane është diçka që ka ndikuar në gjithë jetën time, dhe jam e vetëdijshme për rëndësinë që ka përfaqësimi. Gjatë këtyre viteve në këtë industri, disa nga gratë më mbështetëse që kam njohur kanë qenë gra të tjera latine. E dua atë lidhje që kemi mes vete”, ka thënë ajo për Billboard.

Më 2021, Gomez ka publikuar albumin e shkurtër “Revelación”, projektin e parë të realizuar në gjuhën spanjolle. Ky album ka debutuar në vendin e parë të Top Latin Albums, duke u bërë albumi i parë nga një artiste grua që arrin këtë sukses që prej albumit “El Dorado” të Shakira.

“Nuk përqendrohem shumë te statistikat apo listat muzikore, por kur dëgjoj diçka të tillë, ndjej vetëm krenari. Shakira është një ikonë, dikë që e kam admiruar gjithmonë dhe që e dua shumë”, është shprehur Gomez.

Ajo ka shtuar se realizimi i një albumi të tërë në spanjisht ishte dëshirë e kahershme.

“Gjithmonë kam dashur të bëj një projekt të tërë në spanjisht. Gjatë viteve kam publikuar versione në spanjisht të disa këngëve, por një album i plotë në këtë gjuhë kishte shumë rëndësi për mua. Kam punuar shumë që të nderoja rrënjët e mia latine”, ka thënë ylli.

Në vitin 2024, Gomez ka luajtur edhe në filmin në gjuhën spanjolle “Emilia Perez”, një tjetër hap i rëndësishëm për karrierën e saj ndërkombëtare. Ajo ka thënë se e ka shijuar sfidën e të aktruarit në një gjuhë tjetër.

“E shtyva veten drejt hapësirave të pakëndshme, që për një aktore janë më shpërblyeset. Ishte një përvojë magjike dhe puna me regjisorin Jacques Audiard ishte një nga përvojat më të mira që kam pasur ndonjëherë”, ka thënë artistja.

Gomez, e fejuar me producentin muzikor Benny Blanco, ka thënë se tani është në një fazë ku po zgjedh me kujdes projektet e ardhshme.

“Po marr kohën time për të gjetur rolin dhe regjisorin e duhur, sepse dua që projekti i radhës të jetë sfidues dhe i papritur”, ka thënë ndër të tjera këngëtarja.