Lajmet

Materniteti në Preshevë, ka ndryshuar kualitativisht shëndetin e grave

Published

5 years ago

on

Ndonëse nuk i ka mundësitë të ofrojë të gjitha shërbimet e nevojshme, Materniteti i Shtëpisë së Shendetit në Preshevë, po ndikon pozitivisht në shëndetin e grave e vajzave të trevës. Problemet më të mëdha të këtij materniteti, janë mungesa e sallës së operacionit dhe anestezionit, për çka zakonisht gratë, nuk mund të marrin shërbimin kur ato bëjnë lindjet e para të fëmijëve.

Lirigzona Nuredini

Preshevë, 7 qershor – Valdete Miftari bëri lindjen e fëmijës së saj të tretë në maternitetin e Shtëpisë së Shëndetit në Prishevë. Ajo është e kënaqur me shërbimin që merr aty. Thotë se mirëpritet nga stafi shëndetësor, porse e bënë të ndihet rehat edhe fakti se stafi i flet në gjuhën shqipe.

“Jam e kënaqur me punën që e bënë ky staf profesional, duke na mundësuar të ndjehemi më rehat. Unë e kam bërë lindjen e tretë dhe me të vërtetë është shumë e mirë që ne si nëna shqiptare të lindim në vendin ku flasim shqip”, tha ajo.

Megjithatë, materniteti i Shtëpisë së Shëndetit të Preshevës, nuk ofron të gjitha shërbimet e nevojshme për secilën lindje. Mungesa e sallës së operacionit dhe anestezionit, janë mungesa të theksuara. Si rrjedhojë, gratë që lindin për herë të parë, nuk mund të shërbehen në këtë ambient dhe detyrohen që lindjet t’i bëjnë në spitalin e qytetit të Vranjës. Materniteti ka nevojë për shtim të kapaciteteve edhe në aspekte tjera teknike e profesionale. Megjithatë, që nga hapja e tij, me 13 korrik të vitit 2015, që ishte bërë edhe me mbështetje të donatorëve nga ndryshëm, në këtë ambient kanë lindur 241 fëmijë.

Doktor Astrit Berisha, njëherësh zëvendësdrejtor në Shtëpinë e Shëndetit, thotë se është në dobi për vendin që gratë të lindin në këtë maternitet.

“Në përgjithësi, gratë shtatëzëna kanë dobi nga hapja e maternitetit këtu, sepse e kanë afër vendin ku duhet të shkojnë qoftë për kontrollime qoftë për konsultime, por dhe për lindje”, tha Berisha për UBTNEWS.

Ai tregon se jo të gjitha gratë mund të kryejnë lindjet e fëmijëve në institucionin që ai bashkëdrejton. Në këtë ambient, thotë ai, bëhen lindjet e caktuara të referuara nga mjeku përgjegjës i pacientes.

“Pikërisht për këtë gjë, vetëm një numër i grave shtatëzëna kryejnë këtu lindjen, ato që lindin për të dytën herë dhe ato që i kanë parametrat normal për një lindje”, tha ai për UBTNEWS.

Ndaras nga gjinekologjia ku janë të punësuar 3 gjinekolog në shërbim të grave, në maternitet punojnë 3 gjinekologe dhe 3 infermiere akushere.

Remzije Berisha gjinekologe në maternitet thotë për UBTNEWS që materniteti ofron nivel të lartë të numrit të shërbimeve, pavarësisht kushteve jo krejtësisht të duhura në të cilat punojnë.

“Gjinekologët kanë numër të madh të pacientëve, mbi 100 kontrollime gjatë një muaji”, tha ajo.

Pos lindjeve, materniteti ofron edhe shërbime tjera për kujdesin shëndetësor të grave.

Imrane Rexhepi infermiere kryesore thotë se hapja e maternitetit ka ofruar mundësi shumë të mirë për gratë dhe fakti që ato mirëpriten nga stafi profesional, që kryesisht janë gra, i bënë që të shprehen më lirshëm.

“Është shumë e arsyeshme kur grave u jepet hapësirë që të shprehen për shumë probleme gjinekologjike. Gjithësesi materniteti ka rezultuar me efikasitet edhe në parandalimin e shumë sëmundjeve”, tha ajo.

Me shërbim 24 orësh për çdo ditë të javës, materniteti bënë ngritje të njohurive te pacientet për rëndësinë e shëndetit gjinekologjik.

“Ndihma ime për gratë është shërbim që përfshinë vetëdijësimin e saj gjatë shtatëzënisë, si të ushqehet, të mbrohet nga punët e rënda fizike, të merret me aktivitet fizik, të bëjë kontrollet e rregullta gjinekologjike, të mbajë higjijenen personale, si të kujdeset për bebën, etj”, thotë ajo.

Në këto kohë të dominimit të situatës nga pandemia e shkaktuar nga COVID19, në këtë maternitet ka pasur numër të shtuar të pacienteve të cilave u janë ofruar shërbime të ndryshme mjekësore e këshilla shëndetësore./UBTNews

Related Topics:
Continue Reading

Lajmet

PDK kërkon nënshkrimet e opozitës dhe shumicës për seancë të jashtëzakonshme për Specialen

Published

29 seconds ago

on

October 6, 2026

By

Partia Demokratike e Kosovës ka nisur mbledhjen e nënshkrimeve të deputetëve për thirrjen e një seance të jashtëzakonshme, me qëllim votimin në lexim të dytë të ndryshimeve në Ligjin për Dhomat e Specializuara.

Gjatë një konference për media, kryetari i PDK-së, Bedri Hamza, bëri të ditur se deri më tani janë siguruar 29 nënshkrime – 22 nga grupi parlamentar i PDK-së dhe 7 nga Aleanca për Ardhmërinë e Kosovës. Për thirrjen e seancës së jashtëzakonshme sipas Rregullores së Kuvendit nevojiten së paku 40 nënshkrime.

Hamza konfirmoi se i kanë dërguar ftesë zyrtare kryetares së Kuvendit dhe u kanë kërkuar mbështetje me nënshkrime deputetëve të Lidhjes Demokratike të Kosovës, Lëvizjes Vetëvendosje si dhe komuniteteve joshumicë joserbe.

“PDK-ja po pret dhe po kërkon që të thirret seanca në mënyrë që të aprovohet Ligji për Dhomat e Specializuara. Iu kemi dërguar ftesë të gjithë deputetëve të VV-së, LDK-së dhe komuniteteve joshumicë joserbe që të na japin nënshkrimet, meqë kërkojmë me ngulm që ky ligj të miratohet”, deklaroi Hamza. /E.A/

Continue Reading

Lajmet

Mblidhet grupi parlamentar i LVV-së, pritet caktimi i seancës për presidentin

Published

51 minutes ago

on

October 6, 2026

By

Grupi Parlamentar i Lëvizjes Vetëvendosje pritet të mblidhet sot në orën 14:00, mëson Ekonomia Online nga burimet e saj brenda këtij subjekti politik.

Mbledhja e parlamentarëve të shumicës vjen në një moment të tensionuar politik, kur Kuvendi i Kosovës ende nuk ka caktuar një orar zyrtar për mbajtjen e seancës plenare.

Sot është afati i fundit kushtetues për zgjedhjen e kreut të ri të shtetit. Nëse deputetët dështojnë të zgjedhin presidentin e ri deri në mesnatë, Kuvendi shpërndahet automatikisht dhe vendi shkon në zgjedhje të jashtëzakonshme parlamentare. /E.A/

Continue Reading

Lajmet

UBT ofron 20% bursë studimi për Masterin në Shkenca dhe Teknologji të Ushqimit

Published

1 hour ago

on

October 6, 2026

By

Në një kohë kur siguria ushqimore përbën një nga sfidat më kryesore globale, UBT ka hapur aplikimet për programin Master në Shkenca dhe Teknologji të Ushqimit, duke ofruar 20% bursë studimi përmes skemës “Engaged Scholarship” për të gjithë kohëzgjatjen e studimeve.

Bursa vlen për një sere profesionistësh të fushës, përfshirë teknologët e ushqimit, nutricionistët, infermierët, kontrollorët e cilësisë, inspektorët ushqimorë dhe laborantët ushqimorë.

Programi është i ndërtuar sipas standardeve të universiteteve më të avancuara evropiane dhe synon përgatitjen e kuadrove udhëheqëse për tregun e punës. Përmes punës praktike në laboratorë modernë, studentët trajnohen në kontrollin e cilësisë, inxhinierinë e përpunimit, kiminë e mikrobiologjinë ushqimore, si dhe zhvillimin e produkteve inovative në përputhje me legjislacionin dhe normat ndërkombëtare.

Përveç komponentës teoretike dhe praktike, ky program vë fokus të veçantë te kërkimi shkencor dhe zgjidhja e problemeve reale me të cilat përballet industria ushqimore sot. Studentët aftësohen për të analizuar parametrat dietikë, për të optimizuar linjat e prodhimit industrial me eficiencë energjetike dhe për të garantuar qëndrueshmëri mjedisore në çdo fazë të përpunimit të ushqimit.

Gjithashtu, mjedisi interaktiv, stafi akademik me përvojë ndërkombëtare dhe rrjeti i gjerë i partneriteteve u mundësojnë studentëve përfitimin e kompetencave të nevojshme për pozita drejtuese e ekzekutive në sektorin publik dhe privat, si dhe për vazhdimin e studimeve të doktoraturës.

Për më shumë informata mbi aplikimin dhe përfitimin e bursës prej 20%, të gjithë të interesuarit mund të drejtohen pranë hapësirave të UBT-së apo faqeve zyrtare të këtij institucioni.

Continue Reading

Lajmet

Pas tensioneve në Prishtinë, Sindikata e Policisë shpreh mbështetje për zyrtarët në terren

Published

2 hours ago

on

October 6, 2026

By

Sindikata e Policisë së Kosovës ka dënuar aktet e dhunës gjatë protestave të fundit në Prishtinë, duke shprehur mbështetje për zyrtarët policorë të angazhuar në ruajtjen e rendit dhe sigurisë.

Në një komunikatë pas mbledhjes së Këshillit Drejtues, Sindikata ka theksuar se e drejta për protestë, shprehje të lirë dhe tubim paqësor është e drejtë themelore që duhet të respektohet, por nuk duhet të shndërrohet në dhunë ndaj policëve, institucioneve apo qytetarëve.

“SPK dënon fuqishëm çdo akt dhune, hedhjen e mjeteve piroteknike, mjeteve të forta dhe çdo sulm ndaj zyrtarëve policorë që janë në kryerje të detyrës zyrtare”, thuhet në komunikatë.

Sindikata ka theksuar se policët nuk janë palë në debatet politike, por profesionistë që kanë për detyrë zbatimin e ligjit dhe garantimin e sigurisë për të gjithë.

Ajo ka shprehur mbështetje për zyrtarët policorë të angazhuar në terren dhe ka bërë thirrje që dallimet politike të mos shndërrohen në përplasje me ta.

“Policët janë bijtë dhe bijat tuaja, vëllezërit dhe motrat tuaja. Shumë prej tyre kanë qenë bashkëluftëtarë tuaj dhe sot vazhdojnë t’i shërbejnë vendit dhe qytetarëve të Republikës së Kosovës”, thuhet më tej në reagim.

Sipas SPK-së, çdo polic i lënduar gjatë kryerjes së detyrës është anëtar i një familjeje që pret të kthehet shëndoshë e mirë në shtëpi pas përfundimit të ndërrimit.

Në fund, Sindikata ka bërë të ditur se do të vazhdojë të qëndrojë pranë zyrtarëve policorë dhe të mbrojë të drejtat dhe dinjitetin e tyre profesional, duke theksuar se çdo veprim ndaj tyre duhet të vlerësohet në bazë të ligjit dhe jo të përkatësisë apo qëndrimeve politike./A.K/

Continue Reading

Të kërkuara