Ushtria e Shteteve të Bashkuara ka ndërmarrë një valë sulmesh kundër Iranit për të gjashtën natë radhazi, përgjatë një përplasjeje ushtarake për kontrollin e Ngushticës së Hormuzit.

Komanda Qendrore e SHBA-së (Centcom) njoftoi se sulmet kishin për qëllim “të zvogëlonin më tej aftësitë ushtarake iraniane”, ndërsa konfirmoi gjithashtu se ka hipur në një anije si pjesë e bllokadës së porteve iraniane. Në anën tjetër, mediat shtetërore dhe autoritetet provinciale të Iranit raportuan se sulmet amerikane goditën infrastrukturën civile, duke përfshirë ura, një stacion treni dhe një aeroport. BBC Verify ka konfirmuar sulmin mbi një urë në perëndim të Bandar Abbas-it në provincën Hormozgan.

Korpusi i Gardës Revolucionare të Iranit (IRGC) deklaroi se është hakmarrë duke goditur pikat e radarëve të vëzhgimit detar të SHBA-së në Oman, si dhe objektiva në Kuvajt dhe Bahrejn. Ky korpus pretendoi gjithashtu se ka sulmuar një qendër komande të operacioneve speciale të SHBA-së në Al-Tanf të Sirisë, pranë kufirit me Jordaninë, si kundërpërgjigje ndaj vrasjes së ushtarëve iranianë dy ditë më parë. Për këtë pretendim nuk ka pasur asnjë koment nga Siria apo SHBA-ja.

Autoritetet e Kuvajtit njoftuan se sulmet iraniane goditën stacionet e prodhimit të energjisë dhe të shkripëzimit të ujit, duke shkaktuar dëme materiale, një zjarr dhe ndërprerje të energjisë elektrike. Ndërkaq, ushtria e Jordanisë bëri të ditur se ka rrëzuar tre raketa iraniane, pa raportuar për viktima apo dëme.

Në Kurdistanit Irakian, tetë persona u vranë dhe disa të tjerë u plagosën në qytetin e Sulaymaniyah-s në orët e para të mëngjesit, sipas agjencisë kurde të lajmeve Rudaw dhe Agence France-Presse. Forcat kurde ia faturuan këtë sulm Iranit, ndërsa njoftuan veçmas se kanë rrëzuar edhe tetë dronë mbi qytetin e Erbit, pa pasur viktima.

Ngushtica e Hormuzit – një rrugë ujore kritike përgjatë bregdetit të Iranit, të cilën Teherani e bllokoi pas sulmeve të përbashkëta të SHBA-së dhe Izraelit – mbetet e mbyllur. Kjo situatë ka ndikuar në qarkullimin e naftës nga rajoni, gjë që shtyu kreun e Agjencisë Ndërkombëtare të Energjisë, Fatih Birol, të shprehë shqetësimin për furnizimet globale me energji nëse situata nuk përmirësohet në javët e ardhshme.

Gjatë ditës së premte, ministrat e jashtëm të Kinës dhe Pakistanit bënë thirrje që SHBA-ja dhe Irani të ndërpresin luftimet dhe të rifillojnë negociatat. Ndërkaq, sulmet amerikane të natës së fundit goditën gjithashtu pranë ishullit Qeshm, si dhe në qytetet bregdetare jugore Bandar Abbas dhe Bushehr, ku ndodhet edhe një central bërthamor. /BBC/

Më pak anije kanë udhëtuar të mërkurën përmes Ngushticës së Hormuzit, në ditën e parë pasi SHBA-ja riktheu bllokadën e saj detare ndaj porteve iraniane, teksa të dyja vendet përshkallëzuan sulmet në të gjithë Gjirin, treguan të dhënat e transportit detar.

Sipas të dhënave të kompanisë Kpler, shtatë anije e kaluan ngushticën të mërkurën, kryesisht në itinerarin iranian, duke shënuar rënie nga 13 që ishin një ditë më parë.

Armiqësitë janë intensifikuar që kur Irani deklaroi të shtunën vonë se kishte mbyllur Ngushticën e Hormuzit. Operacionet ushtarake po i pengojnë anijet të lundrojnë përmes kësaj rruge ujore, e cila përpara luftës mbante rreth një të pestën e dërgesave globale të naftës dhe gazit.

Të mërkurën, katër anije të zbrazëta hyrën në Gji, duke përfshirë tre tankerë të vegjël nafte dhe një anije të ngarkesave të thata për drithëra, treguan të dhënat. Tre anijet që dolën nga ngushtica të mërkurën transportonin gaz të lëngshëm të naftës (LPG), qymyr dhe karburant nafte .

Të martën, një tanker i tipit Suezmax që transportonte 1 milion fuçi naftë bruto saudite doli nga ngushtica me transponderin e fikur, treguan të dhënat e Kpler.

Të mërkurën nuk pati asnjë tanker të përmasave jashtëzakonisht të mëdha (VLCC) apo tanker të gazit natyror të lëngshëm (LNG) që të kalonte përmes ngushticës. /Reuters/ /E.A/

Presidenti i SHBA-së, Donald Trump, ka ashpërsuar skajshëm retorikën ndaj Iranit, duke kërcënuar se javën e ardhshme do të godasë direkt urat dhe termocentralet e vendit nëse Teherani zyrtar refuzon të ulet në tryezën e bisedimeve.

Ky paralajmërim i fortë vjen në një moment tejet kritik, ndërsa të dyja vendet po shkëmbejnë sulme ushtarake për të katërtën ditë radhazi. Gjatë një interviste të transmetuar në emisionin “Special Report with Bret Baier” në Fox News, Trump deklaroi prerë se gjërat do të përkeqësohen shumë për Iranin javën e ardhshme dhe se infrastruktura e tyre energjetike dhe ajo e transportit do të rrëzohen plotësisht nëse nuk ka negociata.

Ai shtoi se negociatorët amerikanë u kanë përcjellë homologëve iranianë mesazhin e qartë se është më mirë të arrijnë një marrëveshje, ose përndryshe nuk do t’u mbetet asgjë, duke saktësuar se goditjen e objektivave të energjisë po e ruan për në fund.

Ky kërcënim i hapur për të goditur infrastrukturën civile ka ngritur menjëherë alarme të kuqe në arenën ndërkombëtare. Kur Trump bëri paralajmërime të ngjashme gjatë muajit prill, shefi i OKB-së për të drejtat e njeriut, Volker Türk, reagoi ashpër duke kujtuar se sipas ligjit ndërkombëtar dhe Konventave të Gjenevës të vitit 1949, sulmet e qëllimshme ndaj civilëve dhe strukturave jetike për ta konsiderohen krime lufte.

Pavarësisht këtyre paralajmërimeve, Uashingtoni ka vazhduar me hapa konkretë në terren. Trump ka vendosur të tërhiqet nga kërcënimi i mëparshëm për vendosjen e një tarife prej 20% mbi anijet në Ngushticën strategjike të Hormuzit, duke njoftuar se kjo taksë do të zëvendësohet me marrëveshje masive tregtare dhe investimesh me shtetet e Gjirit.

Megjithatë, vetëm pak orë pas këtij njoftimi, Shtetet e Bashkuara kanë rifilluar bllokadën e plotë të porteve iraniane. Ky përshkallëzim i shpejtë i dhunës dhe bllokada detare kanë paralizuar thuajse tërësisht lëvizjen e tankerëve në Ngushticën e Hormuzit, duke shkaktuar menjëherë një rritje të ndjeshme të çmimeve të naftës në tregjet globale. /Reuters/