Ukraina do të marrë raketa amerikane me rreze të mesme

Presidenti Joe Biden, thotë se ShBA do të dërgojë sisteme më të avancuara raketash në Ukrainë për të ndihmuar trupat e saj të zmbrapsin forcat ruse, të cilat po fitojnë terren në lindje.

Uashingtoni thotë se raketat e shumta HIMARS, do t’i lejojnë forcat ukrainase të godasin objektivat në fushën e betejës nga një distancë më e madhe brenda Ukrainës, por jo të sulmojnë territorin rus.

Ushtria e armatosur e Kievit kishte kërkuar armë më të avancuara për ta ndihmuar atë të shmangte ofensivën e Rusisë në rajonin lindor të Donbasit.

Forcat ruse marrin pjesën më të madhe të Severodonetsk nën kontroll

Forcat ruse marrin kontrollin e pjesës më të madhe të qytetit lindor të Ukrainës, Severodonetsk, pas javësh luftimesh për qendrën kryesore industriale në Lugansk, një nga dy rajonet administrative që përbëjnë Donbasin.

“Për fat të keq, sot, trupat ruse kontrollojnë pjesën më të madhe të qytetit“, thotë guvernatori i Lugansk Sergiy Gaiday në një video.

Evakuimet nga qyteti janë ndalur nga luftimet. Të hënën, një gazetar francez që shoqëronte një autobus të evakuuarve u vra nga bombardimet ruse.

Gaiday thotë gjithashtu se forcat ruse goditën një rezervuar me acid nitrik në një fabrikë kimike në Severodonetsk, duke u bërë thirrje banorëve të qëndrojnë në strehimore.

“Për ushtrinë ruse, për komandantët rusë, për ushtarët rusë, çdo çmenduri është absolutisht e pranueshme”, tha presidenti ukrainas, Volodymyr Zelensky, në një adresë video në Telegram.

Ukraina për Macron: Ju lutem, na vizitoni

Ministri i Jashtëm i Ukrainës, i kërkon presidentit francez, Emmanuel Macron, të vizitojë vendin para fundit të qershorit, kur përfundon presidenca e Francës me BE-në.

“Do të ishte mirë që Macron të vinte gjatë presidencës franceze të BE-së, dhe gjëja më e mirë do të ishte që ai të vinte me më shumë dërgesa armësh për Ukrainën“, i tha ai kanalit francez të lajmeve LCI.

Kryeministri britanik Boris Johnson, lideri kanadez Justin Trudeau, presidentja e Komisionit Evropian Ursula von der Leyen dhe një mori zyrtarësh të tjerë të rangut të lartë evropianë dhe amerikanë kanë vizituar Kievin që nga fillimi i prillit.

Zyrtarja e parë e lartë franceze që vizitoi ishte ministrja e re e jashtme, Catherine Colonna, të hënën.

Furnizimet me gaz nga Gazprom, ndërpriten në Danimarkë

Kompania daneze energjetike, Orsted, thotë se gjigandi rus i gazit Gazprom Export do të ndërprejë furnizimet për Danimarkën, të mërkurën pasi kompania daneze refuzoi të paguajë në rubla.

Gazprom ka ndërprerë furnizimin me gaz në Holandë, Finlandë, Bullgari dhe Poloni për të njëjtën arsye.

Mijëra krime lufte të dyshuara në Donbas

Ukraina po heton disa mijëra raste të dyshuara për krime lufte në rajonin e Donbasit, thotë kryeprokurori i Kievit.

Gjatë një vizite në Hagë, prokurorja e përgjithshme e Ukrainës, Iryna Venediktova thotë se rreth 15 mijë raste të krimeve të supozuara të luftës janë raportuar në mbarë vendin që nga pushtimi i Rusisë më 24 shkurt.

Porti i Mariupolit rifillon veprimtarinë

Një anije mallrash e nisur për në Rusi është larguar nga Mariupoli i pushtuar, më pak se dy javë pasi u dorëzuan mbrojtësit e fundit ukrainas të qytetit port strategjik, thonë sundimtarët e rinj të qytetit.

Dhjetra anije me kontejnerë janë bllokuar në portet ukrainase të cilat janë bllokuar nga anijet ruse. Rusia është në bisedime me Turqinë për krijimin e një korridori të sigurt për kompanitë detare.

Macron thotë se ai dhe kancelari gjerman, Olaf Scholz, i kanë kërkuar Vladimir Putinit, që t’i japë fund bllokadës së Rusisë ndaj portit të madh ukrainas të Detit të Zi të Odessa-s, sipas kushteve të një rezolute të OKB-së

Dënohen edhe dy ushtarë rusë

Dy ushtarë rusë dënohen me më shumë se 11 vjet burg në Ukrainë, për shkelje të rregullave të luftës duke bombarduar zonat civile në rajonin verilindor të Kharkiv.

Dënimet e tyre vijnë një javë pasi një gjykatë e Kievit dënoi një ushtar rus 21-vjeçar me burgim të përjetshëm për vrasjen e një civili të paarmatosur në biçikletën e tij. /UBTNews/