Rektori i UBT-së, Prof. Dr. Edmond Hajrizi, prezantoi në Romë rezultatet e punës shkencore dhe inovative të ekipit të UBT-së dhe Universitetit të Sofjes për zhvillimin e programit të mençur për sigurinë kibernetike, i cili po implementohet tashmë në qytetin e mençur të UBT-së. Ky prezantim rriti interesimin e pjesëmarrësve, të cilët shtruan pyetje dhe shprehën kërkesën për implementimin e këtij modeli edhe në vende dhe sisteme të tjera në botë.

Gjatë Konferencës më të madhe të IEEE-së për Teknologji dhe Siguri, Rektori Hajrizi prezantoi temën “Advanced Techniques for Reconnaissance and Enumeration in Internal Network Security Assessments”, duke përfshirë rezultatet e punimeve shkencore të realizuara nga ai dhe kolegët nga UBT dhe Universiteti i Sofjes për Teknologji, në kuadër të programit për avancime shkencore.

Në kuadër të konferencës dhe panairit të teknologjisë, Rektori pati mundësinë të takojë përfaqësues dhe ekspertë nga ushtritë pjesë e Aleancës së NATO-s, ushtria italiane dhe amerikane, universitete të ndryshme nga e gjithë bota, si dhe përfaqësues të kompanive kryesore të sektorit teknologjik. Ai gjithashtu takoi Prof. DePonte, udhëheqësin e konferencës, me të cilin ranë dakord për nismat dhe marrëveshjet e bashkëpunimit në fusha specifike.

Rektori Hajrizi prezantoi punën e bërë në UBT në fushat e shkencës dhe teknologjisë që lidhen me sektorin e mbrojtjes, sigurisë dhe menaxhimit të infrastrukturës kritike dhe të qëndrueshme, duke vënë theks të veçantë në sigurinë kibernetike, robotikë, teknologjinë e droneve, 5G, Internet of Things, Digital Twins dhe Inteligjencën Artificiale. Ai prezantoi gjithashtu një sërë projektesh të financuara nga UBT dhe Bashkimi Evropian, të cilat kanë rezultuar me produkte dhe aplikacione inovative.

IEEE është një nga organizatat më prestigjioze në botë, dhe punimet e saj vlerësohen jashtëzakonisht shumë ndërkombëtarisht. Prof. Dr. Edmond Hajrizi është anëtar i rregullt i IEEE-së dhe kontribuon prej vitesh me punime dhe organizimin e eventeve të saj. UBT ka një kontribut të spikatur në kuadër të konferencave të IEEE-së.

Autore: Diona Hajrizi dhe Diellza Beka – studente të vitit të dytë në Fakultetin Media dhe Komunikim në UBT

Nga 13 shtatori, kur nisi fushata për raundin e parë të zgjedhjeve lokale në Prishtinë, e deri më 11 tetor, një ditë para mbajtjes së tyre, kandidatët për kryetar të kryeqytetit e zhvilluan fushatën e tyre elektorale jo vetëm në terren, por edhe në rrjetet sociale, duke synuar që të jenë “in” me kohën përmes platformave si Facebook dhe TikTok.

Megjithatë, rezultatet përfundimtare të raundit të parë nuk përputheshin gjithmonë me ato të klikimeve dhe shikimeve në platformat digjitale. Kjo tregon se angazhimi politik në Kosovë ende kërkon bashkërendimin mes fushatës tradicionale dhe asaj moderne, me një dominim të vazhdueshëm të asaj të parës – në shtëpi, kafene apo oda.

Fushata online: Kush ndikoi më shumë në publik

Të dhënat e grumbulluara tregojnë se kandidatja e PSD-së, Besa Shahini, ishte më e klikuar dhe më e shikuar në rrjetet sociale sesa kandidati i Lëvizjes Vetëvendosje, Hajrulla Çeku, ndonëse ky i fundit arriti të kualifikohej për në balotazh.

Rezultati përfundimtar i raundit të parë të zgjedhjeve për Prishtinën, sipas Komisionit Qendror të Zgjedhjeve, i renditi kandidatët kështu: Përparim Rama (LDK) mori 35 mijë e 595 vota, apo 33.71 për qind, Hajrulla Çeku (LVV) mori 35 mijë e 77 vota, apo 33.21 për qind, Uran Ismaili (PDK) mori 29 mijë 203 vota, apo 27.65 për qind, Bekë Berisha (AAK) mori 3 mijë 298 vota, apo 3.12 për qind, dhe Besa Shahini (PSD) mori 1 mijë 652 vota, apo 1.56 për qind.

Por në arenën digjitale, përparësitë ishin disi të ndryshme.

Uran Ismaili – më shumë shikime, më pak pëlqime

Postimet e kandidatit të PDK-së, Uran Ismaili, në Facebook arritën 16 milionë shikime, 230 mijë pëlqime dhe 3 mijë shpërndarje. Përmbajtja e tij ishte kryesisht e fokusuar në prezantimin e programit katërvjeçar dhe takimet me qytetarët.

Në TikTok, ai shënoi 10 milionë shikime, 250 mijë pëlqime dhe 40 mijë shpërndarje, duke shfrytëzuar trendet për të tërhequr vëmendjen e të rinjve. Me 26 milionë shikime gjithsej në të dy rrjetet, Ismaili del kandidati më i shikuar në total, por jo më i pëlqyeri.

Përparim Rama – dominim në Facebook

Kandidati i LDK-së, Përparim Rama, numëroi 18 milionë shikime, 500 mijë pëlqime dhe 8 mijë shpërndarje në Facebook, ku fushata e tij u fokusua në projektet e realizuara dhe planin për katër vitet e ardhshme.

Në TikTok, Rama grumbulloi 2 milionë shikime, 60 mijë pëlqime dhe 8 mijë shpërndarje, duke u renditur i dyti për nga popullariteti në rrjetet sociale. Totali i tij në të dy platformat arriti në 20 milionë shikime dhe 560 mijë pëlqime.

Besa Shahini – mesazhe autentike dhe përmbajtje sociale

Kandidatja e PSD-së, Besa Shahini, u vlerësua për stilin e saj autentik në komunikim. Ajo kishte 7 milionë shikime, 28 mijë pëlqime dhe 1 mijë shpërndarje në Facebook, ndërsa në TikTok arriti 4 milion shikime, 60 mijë pëlqime dhe 2 mijë shpërndarje.

Videot e saj shpesh fokusoheshin në probleme konkrete të banorëve të Prishtinës, të cilat ajo i përcillte me ton empatik dhe të drejtpërdrejtë.

Hajrulla Çeku – aktiv në terren, më pak online

Kandidati i LVV-së, Hajrulla Çeku, kishte një prezencë më të kufizuar digjitale. Në Facebook regjistroi 4 milionë shikime, 170 mijë pëlqime dhe 6 mijë shpërndarje, ndërsa në TikTok arriti vetëm 150 mijë shikime, 4 mijë pëlqime dhe 600 shpërndarje.

Ai qëndroi i katërti për nga popullariteti në rrjetet sociale, megjithëse arriti të siguronte vendin e dytë në zgjedhje.

Ekspertët: Rrjetet sociale, pjesë e domosdoshme e politikës moderne

Eksperti i komunikimit digjital, Valon Kerolli, thekson se rrjetet sociale janë bërë mjeti kryesor i fushatave zgjedhore në Kosovë, duke ndryshuar mënyrën e komunikimit me publikun.

“Në Kosovë, rrjetet sociale janë bërë mjeti kryesor i fushatave. Tek votuesit e rinj ndikimi i tyre është dominues. Politikanët e kanë kuptuar se komunikimi i shpejtë dhe direkt është më efektiv sesa format tradicionale”, deklaron Kerolli.

Ai shton se përmbajtja kreative dhe organike shpesh ka ndikim më të madh se reklamat e paguara.

“Nëse përmbajtja është e mirë dhe autentike, ajo ka më shumë ndikim sesa reklamat. Politikanët duhet të përdorin video të shkurtra e dinamike, sepse këto konsumohen më shpejt dhe ndikojnë më shumë tek audienca e re”.

Ndërsa analisti politik Visar Xani thekson se rrjetet sociale kanë marrë rol qendror në politikën kosovare, duke zëvendësuar format tradicionale të komunikimit.

“Çdo reagim, video apo postim mund të kthehet në temë dite dhe të ndikojë në orientimin e opinionit publik”, thotë Xani.

Sipas tij, autenticiteti dhe sinqeriteti i komunikimit janë faktorët që përcaktojnë besueshmërinë e një kandidati.

“Kur komunikimi është i drejtpërdrejtë dhe i sinqertë, votuesi e ndjen. Por kur përmbajtja bëhet vetëm marketing politik, efekti është i kundërt – krijon lodhje dhe dyshim tek publiku”.

Ai përfundon se, ndonëse rrjetet sociale krijojnë momentum dhe imazh, fitorja në zgjedhje ende varet nga kontakti real me qytetarin dhe struktura organizative në terren.

“Rrjetet sociale krijojnë energji, por për fitore duhen edhe besueshmëria dhe kontakti real me qytetarin”.

Edhe pse fushatat digjitale e rritën dukshmërinë e kandidatëve, rezultatet përfundimtare të raundit të parë të zgjedhjeve për Prishtinën treguan se shikimet dhe klikimet në Facebook e TikTok nuk garantuan fitore. Kandidatët që dominuan online nuk përputheshin gjithmonë me renditjen finale në kutitë e votimit, duke treguar se autenticiteti, angazhimi në terren dhe kontakti real me qytetarin mbeten çelësi i suksesit politik në Kosovë./UBTNews

Gjatë vizitës zyrtare në Itali, Rektori i UBT-së, Prof. Dr. Edmond Hajrizi, zhvilloi një vizitë në Universitetin UniMarconi, i pari institucion digjital i i akredituar në Itali.

Me këtë rast, Rektori Hajrizi u takua me Rektorin e UniMarconi-t, Prof. Marco Abate, me Prof. Ulrike Haider-Quercia, udhëheqëse e Shkollës së Doktoratës, si dhe me Prof. Francesco Gaspari, përgjegjës për bashkëpunimin ndërkombëtar.

Të dy rektorët shkëmbyen përvoja rreth zhvillimit të universiteteve moderne, bashkëpunimeve ndërkombëtare dhe mundësive për forcimin e partneritetit ndërmjet dy institucioneve në fusha të ndryshme, si mobiliteti akademik, studimet e përbashkëta, projektet kërkimore dhe inovacioni.

Profesori Gaz Ejupi është kurator në “Reporting House”. E hapur më 2024, kjo shtëpi shpërfaq historinë e një prej kohëve më të rënda dhe më të ndritshme të Kosovës. Ejupi, që është profesor në UBT, në Podcastin e Mediave të UBT-së, flet për themelimin e “Reporting House”, një ndërmarrje shumë e rëndësishme e dokumentimit të historisë më të re të Kosovës, me theks të veçantë historinë e medias në Kosovë.

Ejupi, teksa flet për idenë fillestare, thekson se ka qenë një ide që kjo të realizohet në Bosnje, por që nuk është bërë kurrë. Ndaj, realizimit të saj në Kosovë i është kushtuar shumë rëndësi që nga fillimi.

Sipas Profesor Ejupit, që në fillim është menduar të shihet cila duhet të jetë përmbajtja e ekspozitës, në mënyrë që të rinjtë ta kuptojnë historinë.

U deshën pothuaj dy vjet që të shikohen të gjitha materialet, dhe që ato të përzgjidhen me kujdes, për të qenë pjesë e ekspozitës.

Dhe del se përzgjedhja ka qenë e duhura, sepse suksesi i ekspozitës është i madh. Vetëm për pak më shumë se një vit, mbi 16 mijë vizitorë.

“Ekspozita përmban mbi 30 orë material në video. Ka qenë një debat shumë serioz derisa kemi huazuar materialet nga BBC. Kemi pesë ekrane. Kemi materiale që nuk janë shfaqur asnjëherë nëpër televizione. Janë të paedituara. Ka materiale që i kanë dhënë shikuesit”, thotë Ejupi, për të shtuar se “prej tre mijë fotografive i kam përzgjedhë pesë dhe kemi krijuar një katror në mes të hapësirës së rezistencës, ku janë edhe protestat e grave, mbajtur asokohe”.

Ejupi çmon lart një artefakt – fletoren e familjes Jashari, fletore në të cilën është e vizatuar e gjithë storja e familjes së komandantit Adem Jashari. Fletoren e ka sjellë Donika Shahini, që ka qenë përkthyese në atë kohë në një televizion japonez. Ata kanë qenë ndër të parat ekipe që kanë hyrë në Prekaz pas luftës treditore dhe dikush nga ekipi japonez i ka sugjeruar të mbajë diçka si shenjë të asaj kohe.

“Pas 25 vitesh, Donika na dhuron fletoren, që është një nga pikat kryesore të ekspozitës”, thotë Ejupi dhe tregon se fletorja përmban vizatime të fëmijëve, që e kanë përshkruar komplet ngjarjen.

Ejupi flet për rëndësinë e “Reporting House”, që është bërë një pikë reference takimi në qytet. Thekson se ka njerëz që e vizitojnë nga disa herë. Dhe, ajo që është më e rëndësishmja – mbi 70 për qind e vizitorëve janë të huaj.

Në Kosovë, problemi më i madh është dokumentimi i historisë. Profesor Ejupi thotë se “Reporting House”, i shërben kujtimit të një gjenerate që po shkon, për t’ua kthyer në kujtesë atë që ka ndodhur.

Edhe gazetarët e asaj kohe, që kanë dhënë materiale, kanë kthyer kujtesën në atë kohë, në ato zhvillime që i kanë përjetuar.

Por, efektin më të madh ekspozita e ka te gjeneratat e reja. Shumë të rinj vazhdojnë ta vizitojnë atë. Shumë nxënës shkollash e vizitojnë atë në formë të organizuar. Dhe kjo është shumë e rëndësishme.

Në bisedën për mediat e UBT-së, profesori dhe kuratori Gaz Ejupi paralajmëron projektin e ri të “Reporting House”, që ka të bëjë me ekspozitën e Bllacës. Ideja është që vagonët që kanë bartur mbi 400 mijë njerëz nga Prishtina dhe qytetet e tjera për në Bllacë të shndërrohen në galeri kujtimesh për atë kohë./E.S/UBTNews