Legjenda britanike e rock-ut, The Rolling Stones, është “pothuajse gati” për të publikuar albumin e tyre të ri, sipas Marlon Richards, djalit të Keith Richards.

Pas suksesit të albumit Hackney Diamonds më 2023, albumi i 24-të i studios dhe i pari me këngë të reja që nga A Bigger Bang në 2005 – grupi duket se nuk ka ndërmend të ndalet. Albumi, që përfshinte edhe regjistrimet e fundit të bateristit Charlie Watts, i cili vdiq në 2021, u ngjit menjëherë në krye të top-listave britanike dhe fitoi Grammy për albumin më të mirë rock.

Në një intervistë për Record Collector, Marlon Richards tregoi se anëtarët e mbetur të grupit po punojnë intensivisht në studio në Londër.

“Janë aty çdo ditë, deri natën vonë. Mendoj se janë pothuajse gati. Grammy i fundit i ka motivuar shumë,” tha ai.

Ai shtoi se zërat për një turne po rriten: “Duket se po planifikojnë një turne në Europë”. Kjo vjen pas anulimit të mundshëm të turneut të këtij viti për shkak të problemeve me datat dhe vendet e koncerteve, ku ishin diskutuar qytete si Parisi, Londra, Barcelona dhe Roma.

Mick Jagger, 82 vjeç, Keith Richards, 81 vjeç, dhe Ronnie Wood, 78 vjeç, vazhdojnë të sfidojnë kohën dhe, nëse gjithçka shkon sipas planeve, viti 2026 mund të sjellë rikthimin madhështor të grupit në skenat europiane.

Pyetja mbetet: a do të arrijnë fansat këtë herë të marrin atë që duan?

Përgatiti: A.Z. /UBT News/

Sofia Vergara zbuloi se i’u desh të humbiste ceremoninë e ndarjes së çmimeve Emmy të mbrëmshme për shkak të një infeksioni në sy.

Konkretisht, ajo ndau në Instagramin e saj se pak para se të shkonte në Emmy, kishte “alergjitë më të çmendura të syve”.

“Nuk arrita aty, por në urgjencë. Më vjen keq, më është dashur ta anuloj. Alergjia më e çmendur pak para se të hipja në makinë”, tha ajo.

Në postim, Vergara ndau një video të shtrirë në një shtrat në dhomën e urgjencës, duke larë syrin. Ajo ishte planifikuar të prezantonte ceremoninë e këtij viti, ashtu si edhe Eric Dane, i cili nuk u shfaq.

Emmy u prezantuan nga komediani i nominuar për Grammy, Nate Bargatze. Ndër fituesit e mëdhenj ishin “The Pitt” i HBO Max dhe “The Studio” i Apple TV+, që morën çmime për serialet më të mira dramë dhe komedi.

“Adolescence” ishte fituesi i madh në kategorinë e serialeve antologjike, duke fituar kategorinë kryesore dhe të gjitha çmimet e aktrimit.

Noah Wyle, Britt Lower, Seth Rogen, Jean Smart, Jeff Hiller, Hannah Einbinder dhe Cristin Milioti ishin ndër të famshmit që morën çmime. Owen Cooper i “Adolescence” u bë fituesi më i ri mashkull ndonjëherë në kategorinë e aktorit mbështetës për miniserial a serial antologjik.

Tramell Tillman bëri histori si afrikano-amerikani i parë që fitoi çmimin për aktorin më të mirë mbështetës në serial dramë për rolin në “Severance”.

Kur këngëtari britanik, David Bowie, vdiq në 2016, ai la pas albumin e fundit “Blackstar”, por pak veta e dinin se ai kishte nisur edhe një projekt tjetër, një muzikal i quajtur “The Spectator”, sipas BBC.

Ky projekt ishte i bazuar në Londrën e shekullit XVIII dhe kishte si subjekt krimin, satirën dhe artin e kohës.

Shënimet për “The Spectator” u gjetën të mbyllura në studion e Bowies në Nju Jork, të ruajtura në arkivat personale.

Vetëm Bowie dhe asistenti i tij kishin çelësin e dhomës. Tani ato janë dhuruar në  “V&A museum” dhe do të jenë të hapura për publikun në “Qendrën David Bowie” e cila çelet 13 shtator. Bowie ishte i tërhequr nga krimi dhe personazhe të njohur si hajduti Jack Sheppard.

Ai analizoi kulturën dhe artin e kohës, duke përfshirë piktorë si Joshua Reynolds dhe William Hogarth, dhe zhvillimin e muzikaleve si formë satire politike.

“Bowie ishte i interesuar në rolin e artistit si komentues i shoqërisë, dhe mund të shihnim paralelizma me ditët e sotme. Ai ishte gjithmonë një pionier që nuk donte të kufizohej nga një gjini e vetme”, tha Madeleine Haddon, kuratore e koleksionit.

200 objekte do të jenë në ekspozitë, nga kostume skenike deri tek tekstet e shkruara me dorë dhe vizitorët rezervojnë takime për të parë pjesë të tjera të koleksionit.