Lajmet

Kryetarët që rifituan postet në komunat e tyre

Disa prej tyre fituan pozitat e tyre për herë të dytë e disa prej tyre edhe për herë të tretë dhe më shumë.

Published

5 years ago

on

Zgjedhjet lokale që u mbajtën në Kosovë në shumë komuna nuk sollën ndonjë befasi sa i përket rezultatit dhe fitores të disa kandidatëve që u rikonfirmuan në pozitat e tyre si kryetarë komunash.

Madje disa prej tyre fituan pozitat e tyre për herë të dytë e disa prej tyre edhe për herë të tretë dhe më shumë.

Gazmend Muhaxheri i Lidhjes Demokratike të Kosovës në raundin e parë duke marrë 60.49 përqind. Muhaxheri në pozitën e kryetarit të Pejë arriti të konfirmohet për herën e tretë. Ai i fitoi garat në vitin 2013, pastaj në vitin 2017 e tash edhe në vitin 2021.

Fati i njëjtë e ka përcjellë edhe bashkëpartiakun e tij Imri Ahmetin në Lipjan. Edhe Ahmeti e përfundoi çështjen e fituesit në raundin e parë, duke marrë 56.42 përqind kështu duke e fituar postin e kryetarit të Lipjanit për herën e tretë radhazi,

Bashkim Ramosaj i Aleancës për Ardhmërinë e Kosovës do ta vazhdojë qeverisjen edhe për katër vjet të tjera në Deçan. Ramosaj po ashtu arriti të fitojë në raundin e parë duke marrë 64.90 përqind të votave. Kështu ai rizgjidhet për herën e dytë në krye të kësaj komune.

Gjithashtu edhe Bali Muharremaj, që vjen po ashtu nga Aleanca për Ardhmërinë e Kosovës dilemën e fituesit e përfundoi qysh në raundin e parë duke marrë 51.30 përqind të votave. Kështu ai rizgjidhet si kryetar i Suharekës për herën e dytë.

Postin e tij në Ferizaj e ruajti edhe Agim Aliu, i Partisë Demokratike të Kosovës. Aliu si kryetar i këtij qyteti u rikonfirmua pasi fitoi pa balotazh duke marrë 62.38 përqind të votave. Ai rizgjidhet për më shumë se dy herë në këtë pozitë.

Në të njëjtin post edhe për katër vitet e ardhshme do të qëndrojë edhe Ardian Gjini, që kandidojë për kryetar të Gjakovës. Ai arriti të rikonfirmohet për herën e dytë pasi në raundin e dytë e mposhti kandidaten e Lëvizjes Vetëvendosje Mimoza Kusari-Lila. Gjini mori 56.06 përqind të votave.

Edhe kolegu i tij nga AAK, Zenun Elezaj, do të jetë kryetar i Klinës edhe për një mandat. Ai fitoi përball Esat Racit nga Partia Demokratike e Kosovës. Elezaj në raundin e dytë mori 55.11 përqind të votave.

Karriken e kryetarit nuk do ta lëshojë as Ramiz Lladrovci, i Partisë Demokratike të Kosovës. Ai fitoi përballë Driton Ajazit, që vie nga Iniciativa Qytetare “Demokratët për Drenasin”. Lladrovci mori 54.14 përqind duke fituar mandatin për herën e dytë.

Po ashtu edhe bashkëpartiaku i tij Besim Ilazi, nuk do të lëviz nga pozita e të parit të Kaçanikut. Ai triumfoi në raundin e dytë duke e mposhtur kundërkandidatin nga Lëvizja Vetëvendosje Jeton Raka. Ilazi mori 53.20 përqind të votave.

Gjithashtu edhe Smajl Latifi i AAK-së konfirmohet edhe njëherë si kryetar i Rahovecit. Ai në raundin e dytë mori 65.32 përqind të votave duke e mundur Visar Korenicën nga Lëvizja Vetëvendosje. Kështu edhe Latifi merr më shumë se një mandat në krye të komunës së Rahovecit.

Edhe një mandat në krye të Vitisë do të jetë Sokol Haliti i LDK-së. Haliti rizgjidhet duke marrë mandatin për herën e tretë. Ai e mundi Arsim Ademin të Lëvizjes Vetëvendosje duke marrë 51.48 përqind të votave në raundin e dytë.

Në pozitën e kryetarit u rizgjodh edhe Shpejtim Bulliqi, nga Lëvizja Vetëvendosje i cili do ta udhëheqë Podujevën për katër vjet. Ai e mposhti Ekrem Hysenin e Lidhjes Demokratike të Kosovës. Bulliqi për herë të parë në krye të komunës së Podujevës u zgjodh në nëntor të vitit 2020.

Në krye të komunës së Obiliqit për herë të dytë do të jetë Xhafer Gashi. Ai fitoi në raundin e dytë përballë Halil Thaçit të Vetëvendosjes, duke marrë 61.41 përqind.

Kryetar i Fushë Kosovës edhe për një mandat do të jetë sërish Burim Berisha i Lidhjes Demokratike të Kosovës. Berisha është konfirmuar në krye të kësaj komune për më shumë se katër mandate. Ai në raundin e dytë e mposhti Enver Bajçincën e Lëvizjes Vetëvendosje, pasi mori 66.04 përqind të votave.

Ndërkaq bazuar në rezultatet e publikuara nga Komisioni Qendror i Zgjedhjeve mund të ketë ndryshim të rezultatit në komunën e Junikut dhe në Dragash.

Në Junik kryetari aktual Agron Kuçi nga AAK është në disavantazh ndaj kandidatit të LDK-së Ruzhdi Shehu.

Epërsia e Shehut ndaj Kuçit është 29 vota dhe me numërimi e votave me postë dhe të personave me aftësi të kufizuar mund të ketë përmbysje të rezultatit dhe konfirmim të Agron Kuçit edhe për një mandat në krye të Junikut.

E rezultat i ngushtë është edhe në Dragash ku në garë janë Shaban Shabani, nga PDK i cili është kryetar aktual dhe është në epërsi ndaj kandidati të LDK-së Behxhet Xheladinit. Edhe në këtë komunë mund të ketë përmbysje të rezultatit. Në rast se konfirmohet rezultati aktual Shaban Shabani i PDK-së rikonfirmohet në krye të Dragashit edhe për një mandat.

Related Topics:
Continue Reading

Vendi

Bypass apo stent? Kur kirurgjia e zemrës bëhet zgjedhja më e përshtatshme për pacientin

Published

13 hours ago

on

August 19, 2026

By

Shëndeti i zemrës nuk përcaktohet vetëm nga një diagnozë, por nga kompleksiteti i dëmtimeve, gjendja e përgjithshme e pacientit dhe mënyra më e sigurt për të rikthyer qarkullimin e duhur të gjakut në muskulin e zemrës. Për këtë arsye, jo çdo problem i arterieve koronare mund të zgjidhet me vendosjen e një stenti apo vetëm përmes trajtimit medikamentoz.

Në rastet kur bllokimet janë të shumta, të përhapura ose anatomikisht komplekse, kirurgjia e bypass-it mund të jetë një alternativë e rëndësishme terapeutike, e cila vendoset pas vlerësimit të plotë të pacientit nga ekipi specialistik.

Pikërisht për këtë çështje, Dr. Sulejman Kusi, specialist i kardiologjisë/kardiokirurgjisë në United Hospital, shpjegon se vendimi ndërmjet stentit dhe bypass-it duhet të bazohet në karakteristikat konkrete të sëmundjes koronare dhe në gjendjen e përgjithshme shëndetësore të pacientit. Zgjedhja e trajtimit nuk është një vendim që merret në mënyrë të njëjtë për të gjithë, por kërkon ekzaminime, vlerësim të enëve koronare dhe gjykim të specializuar mjekësor.

Rikuperimi pas bypass-it kërkon kujdes dhe disiplinë

Pas një operacioni bypass, rikthimi në aktivitetet e përditshme është një proces gradual. Kujdesi për plagën operative, aktiviteti fizik i kontrolluar dhe ushqyerja e shëndetshme janë pjesë të rëndësishme të periudhës së rikuperimit.

Pacientët këshillohen që plagën operative ta mbajnë të pastër dhe të thatë, të ecin çdo ditë sipas udhëzimeve të mjekut dhe të kryejnë ushtrimet e frymëmarrjes pa e sforcuar organizmin. Po ashtu, një regjim ushqimor i balancuar, me më shumë fruta, perime dhe peshk dhe me kufizim të kripës së tepërt, mund të jetë pjesë e rëndësishme e kujdesit afatgjatë për shëndetin kardiovaskular.

Rikuperimi kërkon durim, terapi dhe monitorim

Periudha pas operacionit të zemrës nuk duhet parë si një kthim i menjëhershëm në ritmin e mëparshëm të jetës. Ajo kërkon disiplinë, durim dhe ndjekje të vazhdueshme mjekësore. Ecja e përditshme, ushtrimet e frymëmarrjes, marrja e rregullt e terapisë së përshkruar dhe pushimi i mjaftueshëm janë ndër elementet që mund ta mbështesin rikuperimin.

Në javët e para mund të shfaqen lodhje, shqetësime të menaxhueshme në kraharor, çrregullime të gjumit apo ulje e oreksit. Megjithatë, çdo simptomë e re, e fortë ose që përkeqësohet duhet t’i komunikohet ekipit mjekësor dhe nuk duhet të trajtohet vetëm me vetëkujdes.

Mosha e shtyrë nuk është kriteri i vetëm për kirurgjinë

Një prej pyetjeve të rëndësishme për pacientët dhe familjarët është nëse operacioni në zemër është i sigurt te personat në moshë të shtyrë. Sipas Dr. Sulejman Kusit, mosha në vetvete nuk e përcakton sigurinë e ndërhyrjes. Vlerësimi duhet të marrë parasysh gjendjen e përgjithshme shëndetësore, funksionimin e organeve, sëmundjet shoqëruese, gjendjen e zemrës dhe kompleksitetin e problemit koronar.

Për këtë arsye, vendimi për ndërhyrje kirurgjikale duhet të merret individualisht, pas një vlerësimi të plotë specialistik dhe pas peshimit të përfitimeve dhe rreziqeve për secilin pacient.

Në fund, mesazhi kryesor është i qartë: kujdesi për zemrën nuk përfundon me ndërhyrjen kirurgjikale. Bypass-i apo stenti mund të jenë pjesë e trajtimit, por kontrolli i faktorëve të rrezikut, terapia e përshkruar, aktiviteti fizik i përshtatur dhe ndjekja mjekësore mbeten thelbësore për shëndetin afatgjatë.

Për informacione dhe konsultime në United Hospital:
📞 038 60 70 70 / 046 60 70 70

Vendimi ndërmjet trajtimit medikamentoz, stentit dhe bypass-it duhet të merret vetëm nga mjeku/ekipi specialistik pas vlerësimit individual të pacientit./rajonipress/

Continue Reading

Vendi

Në Zubin Potok identifikohen mbetje kockore të së paku 23 personave

Published

13 hours ago

on

August 19, 2026

By

Prokuroria Speciale dhe Instituti i Mjekësisë Ligjore thanë se në Zubin Potok, në lokacionet ku dyshohet se ka varre masive, bazuar në vlerësimet preliminare janë identifikuar mbetje kockore që dyshohet se u përkasin të paktën 23 individëve.

“Identifikimi i plotë do të bëhet pas përfundimit të ekzaminimeve mjeko-ligjore dhe procedurave përkatëse”, u tha në njoftim.

Kryeministri në detyrë i Kosovës, Albin Kurti, më herët kishte deklaruar se mbetjet mortore të gjetura në Kalludër të Vogël, mund t’u përkasin grupit të 23 shqiptarëve që ishin zhdukur në atë pjesë të Kosovës në vitin 1999.

Ky grup, i njohur si “grupi i intelektualëve të Mitrovicës” është i zhdukur që nga 19 prilli i vitit 1999. Në mesin e tyre kishte mjekë, profesorë, avokatë dhe profile të tjera.

Gërmimet në Zubin Potok nisën më 28 korrik dhe gërmimet janë kryer në Kalludër të Vogël, Jakubë dhe në një lokacion tjetër në këtë komunë, në veri të Kosovës.

Gërmimet nisën pas një hetimi dyvjeçar lidhur me dyshimet për krime lufte.

Më 15 gusht, autoritetet kishin njoftuar se në Kalludër ishin gjetur mbetje eshtërore të të paktën tre personave.

“Aktualisht, lidhur me këtë rast janë duke u hetuar tre persona J.R., M.J dhe M.B. nën dyshimin për kryerjen e veprës penale ‘Krime lufte kundër popullsisë civile’, të cilët ndodhen në masën e paraburgimit”, tha Prokuroria Speciale e Kosovës.

Njëri nga të arrestuarit, sipas autoriteteve, dyshohet se në kohën e luftës kishte qenë pjesë aktive e Armatës Jugosllave.

Sipas Institutit të Krimeve të Kryera Gjatë Luftës në Kosovë, 1.577 persona vazhdojnë të jenë të zhdukur nga lufta e viteve 1998-1999, ndërsa janë dokumentuar gjithsej 12.230 viktima të luftës.

Kosova ka kërkuar vazhdimisht nga Serbia bashkëpunim për zbardhjen e fatit të personave të zhdukur dhe qasje në arkivat ushtarake që sipas autoriteteve mund të ndihmojnë në identifikimin e lokacioneve të varreve të mundshme.
/REL/

Continue Reading

Vendi

PDK i kërkon përseri Avni Deharit vazhdimin e seancës konstituive më 20 gusht

Published

14 hours ago

on

August 19, 2026

By

Deputetët e Partisë Demokratike të Kosovës (PDK) i kanë dërguar kërkesë zyrtare kryesuesit të seancës konstituive, Avni Dehari, për të thirrur vazhdimin e seancës ditën e enjte, më 20 gusht.

Përmes një letre, PDK-ja ka theksuar se caktimi i seancës është një obligim kushtetues dhe procedural i kryesuesit, duke paralajmëruar se vonesat e mëtejshme thellojnë shkeljet ligjore.

“Moskonstituimi i Kuvendit brenda afatit të përcaktuar tashmë ka krijuar një situatë të rëndë të shkeljes së Kushtetutës dhe të mosrespektimit të aktgjykimeve të Gjykatës Kushtetuese. Mosrespektimi i afateve dhe procedurave të përcaktuara me Rregulloren e Kuvendit vetëm sa e thellon më tej këtë situatë”, ,thuhet në kërkesen e PDK-së.

Kjo kërkesë vjen në kuadër të aksioneve të vazhdueshme të PDK-së, deputetët e së cilës po protestojnë çdo mëngjes para Qeverisë dhe po mblidhen çdo dy ditë në sallën e Kuvendit.

Në anën tjetër, që nga vazhdimi i fundit më 8 gusht, kryesuesi Avni Dehari nuk ka thirrur seancë të re, duke mbështetur qëndrimin e kryetarit të Lëvizjes Vetëvendosje, Albin Kurti, se pa një marrëveshje politike seancat mbeten “shterpe”. Kurti ka kërkuar më shumë kohë për negociata, me arsyetimin se pa një dakordim për postin e presidentit, vendi do të shkojë pashmangshëm në zgjedhje të reja.

Përderisa PDK-ja dhe AAK-ja kanë refuzuar takimet me Kurtin, ky i fundit ka zhvilluar negociata me Lidhjen Demokratike të Kosovës (LDK), përfshirë një takim me liderin e saj, Lumir Abdixhiku, për të diskutuar rreth çështjes së presidentit. Ndërkohë, afati kushtetues 30-ditor për konstituimin e Kuvendit pas certifikimit të rezultateve tashmë ka kaluar. /E.A/

Continue Reading

Lajmet

Murici dhe Vojvoda shkëlqejnë në Kupën e Italisë: Zënë vend në formacionin e javës

Published

15 hours ago

on

August 19, 2026

By

Dyshja e kombëtares së Kosovës, Arijanet Muric dhe Mërgim Vojvoda, kanë dhënë paraqitje të shkëlqyera në Kupën e Italisë, duke u përfshirë në formacionin më të mirë të javës sipas platformës së specializuar të statistikave, SofaScore.

Portieri Arijanet Muric dhuroi një paraqitje të nivelit të lartë në fitoren 3-0 të Sassuolos ndaj Cesenas, duke u vlerësuar me notën e lartë 8.7.

Nga ana tjetër, mbrojtësi Mërgim Vojvoda po ashtu ishte vendimtar në triumfin e Udineses kundër Padovas me rezultat 1-0, ku për performancën e tij u shpërblye me notën 8.3.

Përfshirja e të dy futbollistëve kosovarë në 11-shen më të mirë konfirmon formën e tyre të mirë në fillim të këtij edicioni në futbollin italian. /E.A/

Continue Reading

Të kërkuara