Studentët e Fakultetit të Shkencave të Ushqimit dhe Bioteknologjisë në UBT kanë realizuar me shumë sukses Panairin e Ushqimit në qytetin e Prizrenit, në një organizim që përveç prezantimit të produkteve inovative, shërbeu edhe si urë lidhëse ndërmjet akademisë dhe industrisë ushqimore.

Aktiviteti u mbajt në ambientet moderne të Parkut të Inovacionit dhe Trajnimeve (ITP), ku morën pjesë studentë, profesorë, ekspertë të industrisë dhe qytetarë të interesuar për ushqimin cilësor dhe të shëndetshëm.

Gjatë panairit, vizitorët patën mundësinë të shijojnë dhe të vlerësojnë produkte ushqimore të përgatitura nga vetë studentët, të cilat përfshinin nga ushqime tradicionale e deri te produktet më moderne të përpunuara me teknologji bashkëkohore. Kjo shpalosi jo vetëm kreativitetin dhe përkushtimin e studentëve, por edhe njohuritë e tyre të avancuara në bioteknologji dhe standardet e cilësisë ushqimore.

Në hapje të panairit, prof. Vehbi Sofiu, theksoi se ky aktivitet ishte më shumë se një ditë e zakonshme akademike – ishte një ditë e veçantë, e mbushur me orientim drejt shkencës, inovacionit dhe laboratorëve të avancuar që UBT ka ndërtuar për studentët e saj.

“Fakulteti i Shkencave të Ushqimit dhe Bioteknologjisë është ndër më të mirët në Republikën e Kosovës dhe më gjerë, dhe këtë po e dëshmojmë përmes arritjeve që studentët tanë po i prezantojnë në bashkëpunim me industrinë”, u shpreh ai.

Rektori i UBT-së, Prof. Dr. Edmond Hajrizi, në fjalën e tij përshëndetëse theksoi se Prizreni ka një traditë të madhe në prodhimtarinë ushqimore, dhe UBT po e përjeton dhe respekton këtë traditë përmes aktiviteteve konkrete.

“Krijohet një festival i vërtetë ku dërgojmë një mesazh të fuqishëm: që ushqimi cilësor, edukimi, dhe inovacioni janë baza për zhvillim të qëndrueshëm”, tha Rektori. Ai shtoi se UBT ka ndërtuar një ekosistem të mirëfilltë të quajtur “UBT Smart City”, me synim të transformojë kampuset në qendra të dijes, punësimit dhe stabilitetit ekonomik për komunitetin.

Menaxheri i projektit ITP Hans-Juergen Cassens, vlerësoi bashkëpunimin me UBT-në dhe rolin e saj në zhvillimin e ekosistemit lokal:

“UBT është partner kyç në ndërtimin e këtij ekosistemi të dijes dhe inovacionit. Si institucion, UBT luan rol të rëndësishëm si në edukim, ashtu edhe në gjenerimin e ideve dhe praktikave të reja që mund të shndërrohen në biznese të qëndrueshme”.

Në këtë ngjarje mori pjesë edhe Cengiz Çesko, Drejtor i Institutit të Forenzikës në UBT, i cili vlerësoi punën dhe angazhimin e studentëve, duke theksuar rëndësinë e bashkëpunimit ndërdisiplinar në fushën e shkencave të jetës, teknologjisë ushqimore dhe sigurisë ushqimore.

“Ky panair dëshmon qartë se studentët tanë po formohen jo vetëm si profesionistë të së ardhmes, por edhe si kontribuues të rëndësishëm në garantimin e cilësisë dhe sigurisë së ushqimit në vend”, u shpreh Çesko.

Ky panair dëshmoi edhe një herë përkushtimin e UBT-së ndaj arsimimit cilësor, praktikës profesionale dhe nxitjes së inovacionit. Studentët përjetuan një ditë ndryshe nga ligjëratat e zakonshme, ku prezantuan dijet dhe pasionin e tyre në një format interaktiv dhe të vlerësuar nga të gjithë të pranishmit.

Kryetari i Lidhjes Demokratike të Kosovës (LDK), Lumir Abdixhiku, ka reaguar pas marrjes në pyetje të ministrit në detyrë të Bujqësisë, Faton Peci, nga Prokuroria e Shtetit nën dyshimet për keqpërdorim të detyrës zyrtare në rastin e fabrikës për përpunimin e mbetjeve nën shtazore.

Përmes një postimi në rrjete sociale, Abdixhiku e ka cilësuar këtë zhvillim si një shenjë të një epoke të re për drejtësinë në vend. Ai tha se pas shumë vitesh pritjeje, ka ardhur koha që pasuria publike të mbrohet dhe keqpërdoruesit të japin llogari.

“Le të shpresojmë e besojmë, se pas aq shumë vitesh pritjeje, një guxim i tillë tashmë ka lindur. Dhe me të, ka lindur dhe një epokë e re e popullit tonë,” ka shkruar Abdixhiku.

Ai theksoi se në këtë epokë të re, askush nuk do të jetë mbi ligjin dhe çdo cent i vjedhur do t’i kthehet qytetarëve të Kosovës.

“Në këtë epokë, një e vërtetë e pashmangshme do të qëndrojë gjithëherë – se paratë e vjedhura nga ata që e shohin veten mbi shtet, ligj e vend, do të kthehen cent më cent. Nga të gjithë!”, shtoi ai.

Kreu i LDK-së gjithashtu shprehu besimin se edhe në Kosovë do të dalin në pah prokurorë e hetues me integritet dhe guxim për të hetuar çdo akt korruptiv – përfshirë ata të kryer nga zyrtarët më të lartë të shtetit.

“Edhe në Kosovë, si në çdo shtet tjetër evropian, do të dalin prokurorë e prokurore, djem e vajza të reja me guxim e integritet, që do të trajtojnë secilin akt korruptiv, sidomos atë të pushtetarëve”, theksoi Abdixhiku.

Ndërkohë, ministri në detyrë i Bujqësisë, Faton Peci, është liruar në procedurë të rregullt pas intervistimit disa orësh nga Prokuroria Speciale. Ai është marrë në pyetje lidhur me dyshimet për keqpërdorime në procesin e tenderimit për funksionalizimin e fabrikës për mbetjet nën shtazore.

Hetimet përfshijnë edhe bastisje në katër institucione: Ministrinë e Bujqësisë, Agjencinë për Zhvillimin e Bujqësisë, Agjencinë e Ushqimit dhe Veterinarisë, si dhe kompaninë përfituese të kontratës.

Nga sot, më 28 maj, edhe pika kufitare Glloboçicë – Jazhincë mes Kosovës dhe Maqedonisë së Veriut do të funksionojë me vetëm një kontroll kufitar, duke lehtësuar qarkullimin ndërmjet dy vendeve.

Në orën 14:00 pritet të bëhet inaugurimi zyrtar i kësaj pike të përbashkët kufitare, që është e dyta e këtij lloji pas asaj të Hanit të Elezit – Bllacë, e cila u inaugurua në muajin prill.

Sipas njoftimit të Ministrisë së Punëve të Brendshme të Kosovës, në këtë ceremoni do të marrin pjesë ministrat e brendshëm të të dyja shteteve dhe zëvendëskryeministri i parë i Maqedonisë së Veriut, Izet Mexhiti.

“Ky pikëkalim i përbashkët është njëri nga dy pikat kufitare të parashikuara në Protokollin e Implementimit të Marrëveshjes ndërmjet Qeverisë së Republikës së Kosovës dhe Qeverisë së Republikës së Maqedonisë së Veriut, për pikat kufitare Hani i Elezit – Bllacë dhe Glloboçicë – Jazhincë, të nënshkruar në nëntor 2024 gjatë mbledhjes së përbashkët të dy qeverive”, thuhet në komunikatën e MPB-së.

Ky zhvillim pritet të kontribuojë në rritjen e bashkëpunimit ndërkufitar, rritjen e efikasitetit të kontrollit kufitar, si dhe në lehtësimin e lëvizjes së lirë për qytetarët dhe mallrat.

Partia Demokratike e Kosovës (PDK) ka paralajmëruar një konferencë për media që do të mbahet sot në selinë qendrore të partisë.

Sipas njoftimit për media nga ky subjekt politik, konferenca pritet të nisë në orën 11:00.

Megjithatë, nuk janë dhënë detaje lidhur me temën apo arsyen e kësaj konference.