Magazinë

Krijuesit e “Adolescence” duan vëmendjen e të rriturve: Djemtë adoleshentë në krizë

Published

on

Bota për fëmijët sot duket shumë ndryshe nga ajo që ishte për prindërit e tyre. Ky ndryshim theksohet në një skenë të serialit të njohur të platformës transmetuese Netflix, “Adolescence”, ka shkruar CNN.

Në episodin II, Inspektori i Krimeve, Luke Bascombe (rolin e të cilit e luan Ashley Walters) shkon në shkollë të mesme për të hetuar pse 13-vjeçari Jamie Miller (rolin e të cilit e luan Owen Cooper), personazhi kryesor i serialit, dyshohet se ka vrarë shoqen e tij të klasës, Katie.

Bazuar në ndërveprimet në Instagram, mendon se ishin miq dhe të lidhur romantikisht. Djali i tij, nxënës në shkollë, i tregon se ka gabuar.

Emojit që Katie kishte përdorur nuk ishin “të pafajshme”. Ato ishin formë koduese e ngacmimit: emoji i dinamitit përfaqëson një pilulë të kuqe që shpërthen, një referencë për “manosferën” (grupet online të djemve që kanë ide ekstremiste për marrëdhëniet me gratë).

Emoji apo simboli “100” është një aludim për këtë grup, që sugjeron një teori që thotë se 80% e grave tërhiqen nga 20% e djemve.

Ky zbulim është tronditës për Bascombe dhe të tjerët të rritur, që nuk e dinë cilat ide të dëmshme e të rrezikshme ndikojnë te të rinjtë dhe si depërtojnë në jetën e tyre. Kjo ngjarje me papërputhshmëri është në qendër të “Adolescence”, serial britanik që ka ngjallur diskutime për qëndrimet e djemve të rinj ndaj grave, kulturën “incel” (djemtë që ndihen të margjinalizuar dhe kanë urrejtje ndaj grave), përdorimin e telefonave të mençur dhe shumë çështje të tjera.

Seriali fillon si dramë krimi, por gjatë katër episodeve, eksploron çfarë mund të ketë shtyrë një djalë që duket i pafajshëm të bëjë diçka kaq të tmerrshme. Dhe përgjigjet që ofron nuk janë aspak të thjeshta. Në një intervistë Jack Thorne, një nga krijuesit e serialit, flet për hulumtimet e tij në qoshet më të errëta të internetit, zemërimin e djemve të rinj dhe shpresat që ka për prindërit.

Pse e krijoi këtë histori?

“Filloi me mikun tim Stephen Graham. Ai më telefonoi e tha se duhet të shkruajmë një serial për djemtë që urrejnë vajzat dhe për krimin me thika, që është problem i madh këtu në Britani”, ka thënë Thorne.

Ata u nisën nga diskutimi për zemërimin e djemve, për mizorinë e tyre dhe për ndërtimin e një portreti të ndërlikuar të maskulinitetit.

“Si u bëmë ne e si po bëhen adoleshentët tani, në mënyra të ngjashme, por edhe të ndryshme?”, ka thënë tutje Thorne.

A ishin këto tema që i ka menduar gjatë kohës?

“Ka kohë që i mendoj, por diçka që kam tendencë ta kisha injoruar. Kur u futa më thellë, pashë shumë ide që më befasuan dhe që, nëse do t’i kisha dëgjuar në momentin e gabuar, do të më kishin çuar në rrugë që jam shumë i lumtur që nuk i kam ndjekur”, ka thënë skenaristi.

Tutje ai ka shpjeguar se si funksion kultura “incel”.

“Idetë e kulturës ‘incel’ janë tërheqëse se u japin kuptim shumë ndjenjave: izolimit, vetëvlerësimit të ulët, ndjenjës së padëshirueshmërisë. Ata të thonë se ka një arsye pse bota është kundër teje: sepse bota është ndërtuar nga një këndvështrim femëror, dhe gratë kanë gjithë fuqinë. Ata të japin udhëzime për t’u përmirësuar: të bëhesh më i fortë, të mësosh të manipulosh dhe të dëmtohesh”, ka thënë ai.

Cili iishte procesi i kërkimit për të shkruar karakterin e Jamie?

“Për të kuptuar këto ide, hulumtova në vende të errëta si platforma “Reddit” dhe “4chan”, duke ndryshuar algoritmin. Krijova llogari anonime e fillova të ndiqja njerëzit e dukshëm. Ata më çuan tek ata që ishin më pak të dukshëm, dhe këta ishin ata që më interesuan më shumë”, ka treguar Thorne.

Ka thënë se 13-vjeçari s’është duke e ndjekur personazhin e rrjeteve sociale, ish-kik-boksierin profesional, Andrew Tate, në mënyrë direkte.

“Ndoshta është duke ndjekur dikë që është i pasionuar pas lojërave ose muzikës, dhe që ka ndjekur Andrew Taten më parë dhe tani e përhap atë ide në një formë tjetër”, ka shpjeguar Thorne.

Cilat janë pyetjet që përpiqet t’u japë përgjigje seriali?

“Po pyesnim veten: Pse e bëri Jamie atë që bëri? Kjo nuk është pyetje se ‘kush e bëri?’ por ‘pse e bëri?’. Kjo është arsyeja pse shkojmë në shkollë në episodin e dytë, për të kuptuar sistemin arsimor dhe si funksionon ai. Në episodin e tretë, përpiqemi të kuptojmë se si mendon ai, çfarë ka përpunuar. Dhe në episodin e katërt, arrijmë në një vend shumë të ndërlikuar. Nuk do të thotë që mund të fajësojmë vetëm prindërit, por ata janë pjesërisht përgjegjës”, ka thënë Thorn.

Si mund të adresohet radikalizimi i djemve të rinj?

Regjisori ka thënë se duhet gjetur mënyra e duhur për përdorimin e rrjeteve duke cekur se problemet nuk vijnë direkt nga platformat.

“Duhet të gjejmë një mënyrë për të trajtuar përdorimin e mediave sociale. Ky është një problem i vështirë, sepse nuk do të vijë nga vetë platformat. Në Britani, po flasim për moshën kur duhet lejuar qasje në përdorim të rrjeteve sociale, ndërsa në Australi, ata që janë nën 16 vjeç ndalohen t’i përdorin rrjetet sociale. Kjo është përgjegjësia e kompanive që menaxhojnë këto platforma”, ka thënë tutje Thorne.

Çfarë mësimesh mund të nxjerrin prindërit nga ky serial?

Thorne ka thënë se është e nevojshme vëmendja e të rriturve ndaj adoleshentëve, pasi ata janë në krizë.

“Duhet të dëgjojmë fëmijët, janë të cenueshëm e kanë nevojë për ne. Kjo është për të gjithë, jo vetëm për prindërit. Dëgjoni fëmijët. Kjo është për mësuesit, dëgjoni nxënësit e studentët tuaj. Kjo është për politikanët, dëgjoni të rinjtë. Ata janë të përjashtuar tani dhe po kalojnë një dhimbje të madhe. Duhet t’i ndihmojmë”, ka thënë Thorne.

Ai ka thënë se ajo që duhet të bëjnë të rriturit është t’i dëgjojnë, të gjejnë mënyra për t’i bërë ata të flasin e të kuptojnë çfarë po i shqetëson.

“Përndryshe mund të jemi duke humbur mundësinë për t’i ndihmuar ata”, ka përfunduar skenaristi.

Magazinë

Spotify heq masivisht përmbajtjen e krijuar nga AI

Published

on

Spotify ka njoftuar një operacion të gjerë kundër keqpërdorimit të inteligjencës artificiale, duke bërë të ditur se gjatë vitit të kaluar ka hequr më shumë se 75 milionë këngë “spam”.

Sipas kompanisë, ky hap synon të mbrojë artistët nga paraqitjet e rreme, mashtrimet dhe përmbajtja e dobët e gjeneruar nga AI. Spotify ka prezantuar gjithashtu rregulla dhe mjete të reja që synojnë të mbrojnë identitetin e artistëve dhe të rrisin transparencën për dëgjuesit.

Këto masa vijnë në një kohë kur teknologjia gjenerative e AI po ndryshon rrënjësisht industrinë e muzikës, duke sjellë shqetësime për përmbajtje të padëshiruar, vokale “deepfake” dhe publikime mashtruese.

Spotify ka miratuar politikë të re që ndalon klonimin e zërit të artistëve dhe incizimet “deepfake”, përveç rasteve kur ato janë të licencuara zyrtarisht. Kompania po merr masa për të ndaluar publikimet e rreme që paraqiten si krijime të artistëve të tjerë.

Për të parandaluar manipulimet, këtë vjeshtë Spotify prezanton një sistem të ri që identifikon përmbajtjen e padëshiruar.

Ky filtër do të zbulojë llogaritë që përdorin taktika të tilla si duplikimet, këngët shumë të shkurtra dhe strategjitë mashtruese, duke i ndaluar këto materiale nga rekomandimet e platformës. Gjithashtu, Spotify mbështet standardin e ri për etiketimin e përmbajtjes së krijuar me AI, që u lejon artistëve dhe shtëpive botuese të tregojnë se si është përdorur gjatë krijimit të një kënge, qoftë tek vokalet apo instrumentalet.

Etiketat do të shfaqen direkt në aplikacion, sipas informacionit të dhënë nga distributorët dhe partnerët.

Që nga qershori, përdoruesit e Spotify vunë re një grup të ri të quajtur The Velvet Sundown, dhe shumë dyshuan se ishte i krijuar nga AI.

Megjithëse grupi e mohoi këtë në rrjetet sociale, më vonë u zbulua se këngët ishin vërtet të gjeneruara nga inteligjenca artificiale, duke treguar se publiku nuk është gjithmonë i lehtë për t’u mashtruar. /A.Z/UBT News/

Continue Reading

Magazinë

Madonna rrëfen përvojën tronditëse me infeksionin bakterial

Published

on

Ikona e popit, Madonna, ka folur për herë të parë hapur mbi problemet serioze shëndetësore që e çuan në spital, duke ndarë detaje të dhimbshme nga ajo periudhë.

Në paraqitjen e saj të parë në një podcast, këngëtarja e njohur i tregoi Jay Shetty-t në “On Purpose” se në qershor të vitit 2023 kishte përjetuar një infeksion të rëndë bakterial, i cili e detyroi të qëndronte në kujdes intensiv.

Ajo zbuloi se kishte qenë pa ndjenja për katër ditë dhe se mjekët kryen një ndërhyrje gjatë hospitalizimit. Më herët, në dhjetor të po atij viti, Madonna u kishte rrëfyer fansave në një koncert në Brooklyn se kishte kaluar një “komë të induktuar për 48 orë”.

“Po përgatitesha për turneun tim kur papritur u përballa me një infeksion bakterial,” kujtoi ajo.

“Një moment isha duke vallëzuar, dhe momentin tjetër u zgjova në kujdes intensiv, pas katër ditësh pa ndjenja.” /A.Z/UBT News/

 

Continue Reading

Magazinë

Shenja të fshehura! Si u kuptua fundi i martesës së Kidman dhe Urban?

Published

on

Aktorja australiano-amerikane Nicole Kidman dhe muzikanti Keith Urban po divorcohen pas 19 vitesh martesë.

Ata u panë për herë të fundit së bashku në publik në qershor të këtij viti, gjatë një ndeshjeje të Kupës së Botës për Klube të FIFA-s midis Los Angeles FC dhe Esperance Sportive de Tunis.

Ekspertët e gjuhës së trupit vënë re se që atëherë marrëdhënia e tyre nuk dukej si më parë. Louise Mahler nga Daily Mail tha se Nicole dukej e tensionuar dhe se Keith shpesh shikonte diku tjetër, ndërsa ajo e ndiqte me sy.

Scott Taylor shtoi se paraqitja e tyre e fundit ishte më e ftohtë se ato të mëparshmet, duke vërejtur mungesën e emocioneve të vërteta dhe ndryshimin në shprehjet e fytyrës.

Sipas një burimi për Page Six, Kidman kishte përpjekur ta shpëtonte martesën, por përpjekjet nuk patën sukses. Ata jetojnë të ndarë që nga fillimi i verës. /A.Z/UBT News/

Continue Reading

Magazinë

Kidman dhe Urban ndahen pas dy dekadash martesë, si do të ndahet pasuria e tyre?

Published

on

Pas pothuajse 19 vitesh së bashku, Nicole Kidman dhe Keith Urban kanë konfirmuar ndarjen, duke bërë bujë jo vetëm për shkak të anës emocionale, por edhe për pasurinë e madhe që kanë grumbulluar ndër vite.

Çifti ka qenë një nga më të fuqishmit në industrinë e argëtimit, me prona të shumta dhe të ardhura nga filmat, muzika dhe reklamat.

Pasuritë individuale

Nicole zotëron pasuri neto të vlerësuar 250 milionë dollarë, falë karrierës së saj të gjatë në film dhe televizion, kontratave me marka të njohura si edhe investimeve në pasuri të paluajtshme. Keith ka pasuri 75 milionë dollarë, të ardhura të fituara nga muzika, turnetë botërore, katalogu muzikor, pjesëmarrja si gjyqtar në emisione televizive dhe kontratat publicitare.

Pasuritë e përbashkëta

Ata kanë prona luksoze në Nashville, Beverly Hills, New York, Sydney e toka bujqësore në Australi. Një pjesë e këtyre pronave të përbashkëta, ndërsa të tjera në pronësi individuale. Të ardhurat e kombinuara nga filmat dhe serialet e Kidman, edhe fitimet e Urban nga muzika dhe të drejtat e autorit, përbëjnë një pjesë të rëndësishme të pasurisë së tyre të përbashkët.

Si do të ndahet pasuria?

Varet nga juridiksioni ku do të zhvillohet divorci e nëse ekziston një marrëveshje paramartesore, e cila deri tani nuk është bërë publike.

Në ShBA, pasuritë e fituara gjatë martesës ndahen në mënyrë të barabartë ose “të drejtë” (equitable distribution). Në Australi, gjykatat marrin parasysh si kontributet financiare, ashtu edhe ato jo-financiare të secilit bashkëshort.

Pasuritë e fituara para martesës, trashëgimitë dhe dhuratat mbeten individuale. Gjithashtu, përveç pasurive, procesi përfshin edhe ndarjen e detyrimeve financiare dhe borxheve.

Çfarë pritet më tej?

Sipas mediave ndërkombëtare, Keith Urban ka siguruar një banesë të veçantë, duke sinjalizuar nisjen e ndarjes së pronave.

Nëse Kidman merr kujdestarinë e fëmijëve e qëndron në rezidencat kryesore, kjo ndikon edhe në vendimet për mirëmbajtjen dhe mbështetjen financiare. /A.Z/UBT News/

Continue Reading

Të kërkuara