Princi Harry dhe Meghan Markle pritet të rikthehen në Mbretërinë e Bashkuar në fund të këtij muaji për një qëndrim më të gjatë, ndërsa raportohet se fëmijët e tyre, Princi Archie dhe Princesha Lilibet, pritet të ndjekin shkollën në Britani.

Sipas burimeve për Page Six, Pallati Mbretëror është vënë në dijeni për planet e çiftit dhe Mbreti Charles III është informuar personalisht për këtë hap. Po ashtu, bëhet e ditur se vetë Mbreti 77-vjeçar është një nga arsyet kryesore të këtij rikthimi, pasi ai shpreson të kalojë më shumë kohë me Harryn dhe Meghanin në nivel privat.

Megjithatë, Mbreti e ka bërë të qartë se statusi i tyre mbetet i pandryshuar: Duka dhe Dukesha e Sussex-it do të vazhdojnë të jetojnë si persona privatë dhe anëtarë të familjes mbretërore pa detyra apo obligime zyrtare. /E.A/

Producenti francez i filmit Nicolas Altmayer dhe bashkëshortja e tij, Mathilde Favier, drejtuese me përvojë në shtëpinë e modës Dior, kanë humbur jetën në një aksident automobilistik në Francë më 17 gusht.

Altmayer ishte 61 vjeç, ndërsa Favier 56. Vdekja e tyre ka tronditur industrinë franceze të filmit dhe modës.

Nicolas Altmayer ishte bashkëthemelues i kompanisë së prodhimit “Mandarin & Compagnie”, të cilën e krijoi në vitin 1996 së bashku me vëllain e tij, Eric Altmayer. Kompania ka prodhuar më shumë se 70 filma artistikë, mes tyre “Brice De Nice”, filmat “OSS 117”, “Chocolat”, “The First Day Of the Rest Of Your Life” dhe disa vepra të regjisorit François Ozon.

Në vitin 2017, Nicolas dhe Eric Altmayer u nderuan me çmimin “Daniel Toscan du Plantier” nga Akademia Franceze “César”, si producentët e vitit.

Ndërkohë, Mathilde Favier ishte një nga figurat e njohura të industrisë franceze të modës. Ajo kishte drejtuar marrëdhëniet me publikun në grupin LVMH dhe kishte mbajtur poste të rëndësishme në Dior Couture, duke u vlerësuar për përvojën dhe rrjetin e gjerë të kontakteve në këtë industri.

Aksidenti ka ndodhur në rajonin Deux-Sèvres, në Francën perëndimore. Sipas Prokurorisë së Niort-it, automjeti me të cilin udhëtonin Altmayer dhe Favier është përplasur me një automjet të rëndë transporti që po lëvizte në drejtim të kundërt./A.K/

Reperi amerikan Kanye West, i njohur edhe me emrin Ye, pritet të mbajë dy koncerte në Shën Petersburg të Rusisë gjatë muajit tetor.

Lajmi është bërë i ditur nga kanali në Telegram i Gazprom Arena, stadiumit ku parashihet të zhvillohen koncertet.

West është përballur gjatë këtij viti me anulimin e disa koncerteve dhe ndalimin e performancave në disa vende evropiane, pas një sërë deklaratash antisemitike, përfshirë lavdërimet për Adolf Hitlerin dhe përdorimin e simboleve naziste.

Në janar, reperi kishte kërkuar falje për deklaratat e tij, duke thënë se ato kishin qenë të lidhura me probleme personale dhe shëndetësore.

Nëse koncertet zhvillohen sipas planit, Kanye West do të jetë një nga emrat më të mëdhenj ndërkombëtarë të muzikës që viziton Rusinë që nga nisja e pushtimit të plotë të Ukrainës nga Moska në vitin 2022.

Dy koncertet janë planifikuar të mbahen më 10 dhe 11 tetor. Sipas agjencisë shtetërore ruse TASS, biletat më të lira, me çmim prej rreth 92 eurosh, janë shitur brenda vetëm një ore.

Ndërkaq, çmimi i biletave më të shtrenjta arrin deri në 1.600 euro./A.K/

Filmi “Spider-Man: Brand New Day” ka ruajtur vendin e parë në kinematë amerikane, duke arkëtuar rreth 60 milionë euro gjatë fundjavës së tretë të shfaqjes.

Filmi i Sony dhe Marvel, ku Tom Holland rikthehet në rolin e Peter Parkerit, vazhdon suksesin edhe në tregun ndërkombëtar, duke kaluar shifrën prej 1,7 miliardë eurosh të ardhura globale.

Sipas të dhënave të publikuara, “Spider-Man: Brand New Day” është bërë një nga filmat më të shpejtë që ka kaluar këtë shifër, menjëherë pas filmit “Avengers: Endgame” të vitit 2019.

Në vendin e dytë është renditur “The Odyssey”, me rreth 20 milionë euro të arkëtuara gjatë fundjavës së pestë të shfaqjes. Filmi epik i Universal, i bazuar në tregimin e lashtë grek, ka vazhduar suksesin edhe në tregjet ndërkombëtare, duke debutuar së fundmi edhe në Kinë.

Ndërkohë, dy filma të rinj kanë debutuar në listën e box-office. “The End of Oak Street”, me Anne Hathaway dhe Ewan McGregor në rolet kryesore, është renditur në vendin e tretë me rreth 18 milionë euro të ardhura.

Në vendin e katërt ka përfunduar filmi i animuar “PAW Patrol: The Dino Movie”, me rreth 17,7 milionë euro të arkëtuara në Amerikën e Veriut.

Në pjesën tjetër të listës janë dokumentari “Katseye: Wild Hearts” dhe “Six: The Musical Live”, ndërsa komedia “One Night Only” nuk ka arritur të përmirësojë rezultatet, duke shënuar një rënie të ndjeshme të të ardhurave në fundjavën e dytë.

Suksesi i filmave të mëdhenj këtë verë ka ndikuar në rritjen e përgjithshme të shitjes së biletave në kinema, duke i dhënë Hollywood-it një përfundim të fuqishëm të sezonit veror./A.K/