Lajmet

Kreu i Apelit në konferencën e fundit mburret me punën, ankohet për numrin e vogël të gjyqtarëve

Published

4 years ago

on

Kryetari i Gjykatës së Apelit, Hasan Shala, ka mbajtur konferencë për medie në përmbyllje të mandatit.

Me këtë rast tha se nga 19 931 lëndë ta pazgjidhura kanë arritur që t’i zgjidhin 7 812 lëndë.

“Gjykata e Apelit në vitin 2021, ka hyrë 10, 811 lëndë të pa zgjidhura, të trashëguara nga vitet paraprake. Gjatë kësaj periudhe raportuese, i kemi pranuar edhe 9 120, numër ky  me i larti që është regjistruar ndonjëherë”.

“Në punë total i kemi pasur 19  931 lëndë. Nga to janë zgjidhur 7 812 lëndë. Në procedurë janë edhe 12 119 lëndë. Shumica e lëndëve të mbetura, apo më saktësisht 10 187 janë të natyrës civile”.  

Hasani është ankuar për numrin e vogël të gjyqtarëve, duke shtuar se kanë 11 më pak se që i’u duhen.

“…është pak për fajin tonë, më saktësisht Këshillit Gjyqësor të Kosovës, dhe pa aftësisë se tij, për t’i plotësuar pozitat e lira të gjyqtarëve të Gjykatës së Apelit. Aktualisht kemi  11 gjyqtarë më pak, sa janë të planifikuar për vitin 2021 dhe për çdo ditë vonese në emërimin e tyre, stoku i lëndëve të pazgjidhura veç vjen e rritet”.

Kurse sa i përket rasteve të korrupsionit tha se kanë pasur në punë 59 lëndë, ndërsa i kanë përfunduar 45 sosh.

“Sa i përket lëndëve që kanë të bëjnë me korrupsionin zyrtar dhe keqpërdorimin e detyrës zyrtare, në vitin 2020 kemi hyrë me 20 lëndë te pa zgjidhura. Gjatë këtij viti kemi pranuar edhe 39. Në total në pune kemi pasur 59 lëndë. Janë kryer 45. Vazhdojnë te mbesin në procedurë edhe 14. Shumica nga to janë lëndë qe kanë ardhur në javët e fundit”.

Fjalimi i plotë:

Të nderuar gazetarë,

Të nderuar përfaqësues të shoqërisë civil,

Të nderuar të pranishëm,

 Mirë se keni ardhur!

1. Raporti 6 mujor

Ju e dini se Gjykata e Apelit tash e 4 vjet, e ka traditë që përmes takimeve të tilla, të paktën dy herë në vit,  ta informoj opinionin publik, lidhur me ecurinë e punës në këtë institucion.

Atëherë, pa humbur shumë kohë, me lejoni t’iu njoftoj me të dhënat statistikore të këtij 6 mujori të punës.

Gjykata e Apelit në vitin 2021, ka hyrë 10, 811 lëndë të pa zgjidhura, të trashëguara nga vitet paraprake. Gjatë kësaj periudhe raportuese, i kemi pranuar edhe 9,120, numër ky  me i larti që është regjistruar ndonjëherë. Në punë total i kemi pasur 19, 931 lëndë. Nga to janë zgjidhur 7,812 lëndë. Në procedurë janë edhe 12, 119 lëndë.

Shumica e lëndëve të mbetura, apo më saktësisht 10, 187 janë të natyrës civile.  

Fatkeqësisht , me gjithë përpjekjet  tona, numri i lëndëve të pazgjidhura në divizionin civil po rritet dita ditës. Kjo po ndodhë për dy arsye. E para për shkak se këtë vit, kemi një numër jashtëzakonisht të madh, enorm do të thosha, të lëndëve që na vinë nga 7 gjykatat themelore. Në vitin e kaluar në këso kohe kishim të pranuara 2,742 lëndë civile. Ndërsa sivjet deri me tani kemi pranuar, 4,684 ose rreth 2,000 lëndë ma shume.

E dyta, është pak për fajin tonë, më saktësisht Këshillit Gjyqësor të Kosovës, dhe pa aftësisë se tij, për t’i plotësuar pozitat e lira të gjyqtarëve të Gjykatës së Apelit. Aktualisht kemi  11 gjyqtarë më pak, sa janë të planifikuar për vitin 2021,  dhe për çdo ditë vonese në emërimin e tyre, stoku i lëndëve të pazgjidhura veç vjen e rritet.

Në Departamente dhe divizione tjera, situata është më e mirë.  Në Departamentin për Krime të Rënda kemi vetëm 97 lëndë në punë. Në atë Special 7. Në këto dy departamente  lendet kryhen brenda javësh, gjë që është në përputhje me standardet më te mira, për gjykim në kohë të arsyeshme. Ka një tendencë të rritjes se lëndëve në Departamentin Administrativ. Vetëm gjatë këtij 6 mujori, kemi pranuar gati 500 lëndë te tilla, shifër kjo e përafërt me krejt lendet e pranuara gjatë vitit 2020. Andaj në këtë Departament, për ta menaxhuar ma mirë situatën, si kryetar i Gjykatës, e kam rrit numrin e gjyqtarëve nga 2  në 3, dhe numrin kolegjeve nga 1 në 2.

2. Lendet e Korrupsionit

Sa i përket lëndëve që kanë të bëjnë me korrupsionin zyrtar dhe keqpërdorimin e detyrës zyrtare, në vitin 2020 kemi hyrë me 20 lëndë te pa zgjidhura. Gjatë këtij viti kemi pranuar edhe 39. Në total në pune kemi pasur 59 lëndë. Janë kryer 45. Vazhdojnë te mbesin në procedurë edhe 14. Shumica nga to janë lëndë qe kanë ardhur në javët e fundit.

3. Përmbyllja e mandatit

Meqenëse është konferenca ime e fundit për media në cilësi të kryetarit të Gjykatës së Apelit, me lejoni që shumë shkurt, ta bëjë një përmbledhje të punëve me kryesore që janë bërë gjatë mandatit tim.

  • Është rritur numri i lëndëve te zgjidhura.

Pra edhe në vitin 2020, ndonëse kanë qenë rrethanat çfarë kanë qenë, ku kemi punuar me staf te reduktuar, ku kemi pas një numër jashtëzakonisht të madh, të infektuarve me Covid 19, kemi arritur t’i zgjidhim mbi 15 mijë lëndë, duke u bërë kështu gjykata me përformancen me te mirë në Kosovë.

  • Është rritur në mënyrë te konsiderueshme, por jo mjaftueshme  numri i gjyqtarëve dhe stafit mbështetës. 

Kjo ka ndodhurme insistimin tonë të vazhdueshëm, kërkesat tona të panumërta dhe presionin mbi organet gjegjës.

  • Janë nxjerr 2  buletine të praktikes gjyqësore te Gjykatës së Apelit.
  • Janë përmirësuar kushtet e punës se gjyqtarëve dhe stafit mbështetës.  
  • Është funksionalizuar Divizioni i Gjykatës se Apelit ne veri te Mitrovicës, i cili ndonëse ka pasur tendenca e presione, nuk kam lejuar për asnjë moment të punoj në kundërshtim me infrastrukturën ligjore të Kosovës, dhe kundër interesit të drejtësisë.
  • Është funksionalizuar Departamenti Special i Gjykatës së Apelit.
  • Është rritur transparenca dhe komunikimi me publikun. Jemi gjykata e vetme që krahas   i publikojmë raportet individuale të punës së gjyqtarëve në ëeb-portal.  
  • Është rritur efikasiteti dhe përgjegjësia në punë.
  • Është rritur cilësia në punë dhe cilësia e shërbimeve.
  • Nuk kemi pasur ndonjë gjyqtarë me procedurë penale.

Për fund, me lejoni t’iu falënderoj edhe njëherë për bashkëpunimin qe kemi pasur këto vite. Ka qenë një bashkëpunim shumë i mirë. Ne si gjykatë jemi munduar që gjithmonë te jemi në dispozicionin tuaj, duke iu përgjigjur kërkesave tuaja në kohë sa më të arsyeshme, duke i dëgjuar shqetësimet tuaja dhe duke i hapur dyert për ju. Nga ana tjetër edhe ju me profesionalizimin dhe përkushtimin e jashtëzakonshëm, keni qenë gjithmonë në shërbim të informimit të drejtë dhe drejtësisë.  

Faleminderit!

Related Topics:
Continue Reading

Lajmet

Studentët e UBT-së, një 8 Mars plot aktivitet dhe solidaritet në “Shtëpinë e të Moshuarve”

Published

2 days ago

on

March 8, 2025

By

Me rastin e Ditës Ndërkombëtare të Gruas, më 8 mars, një grup studentësh të Fakultetit të Psikologjisë në UBT, të udhëhequr nga Shqipe Shala dhe Kosovare Hamiti, së bashku me studentin e aktrimit Denis Arifi dhe dekanen e Fakultetit të Psikologjisë, Denis Celcima, organizuan një vizitë në Shtëpinë e të Moshuarve, një akt i mbushur me solidaritet dhe ndjeshmëri.

 

Aktiviteti i cili ka për qëllim nderimin dhe mbështetjen e individëve të moshuar që kanë dhënë një kontribut të çmuar në shoqëri, ishte një ngjarje që bashkoi energjinë rinore me përvojën dhe mençurinë e brezit të kaluar.

Pjesëmarrësit në këtë aktivitet sollën momente të bukura, duke realizuar aktivitete artistike, këngë dhe poezi, por mbi të gjitha, biseda të ngrohta që krijuan një lidhje të veçantë me ata që kishin kaluar një jetë plot mundime dhe përpjekje.

Ndërkohë, studentët e Gjimnazit në UBT kontribuan në këtë atmosferë me një program të pasur aktivitetesh dhe performancash, që përfshinte shfaqje teatrale, muzikë dhe lojëra ndërvepruese, duke e pasuruar kështu këtë ditë me ngjyra dhe emocione të veçanta.

Eventi përveç se ishte një mundësi për të shprehur mirënjohjen ndaj kontributit të gruas në shoqëri, ishte gjithashtu një shembull i bukur i solidaritetit ndërgjeneracional, ku brezat e rinj dhe ata të moshuar u bashkuan për të ndarë momente të paharrueshme. Kjo ngjarje, më shumë se një vizitë për të moshuarit, ishte një thirrje e fuqishme për të reflektuar mbi vlerat e bashkëjetesës, respektit dhe dashurisë për njëri-tjetrin.

Në këtë ditë të veçantë, u nderua jo vetëm gruaja, por gjithashtu edhe fuqia e saj për të formuar dhe shëndoshur shoqërinë nëpërmjet mundësive që ofron dashuria dhe angazhimi./UBTNews/

Continue Reading

Lajmet

Kosova pa asnjë kontratë lobimi në SHBA

Published

2 days ago

on

March 7, 2025

By

Si rrallëherë në historinë e pasluftës së Kosovës, institucionet shtetërore, aktualisht, nuk kanë asnjë kontratë aktive lobimi në Shtetet e Bashkuara. Njohësit e politikave vendore dhe ndërkombëtare paralajmërojnë se kjo rrezikon ta lërë Kosovën nën hije dhe “pa një vend në tavolinë”.

Që nga viti 1992, Kosova ka pasur pothuajse vazhdimisht kompani lobimi, të kontraktuara për të shtyrë përpara agjendën dhe interesat e saj në SHBA, shkruan REL.

Për momentin, asnjë kontratë e tillë nuk listohet si aktive në ueb-faqen e Aktit të Regjistrimit të Agjentëve të Huaj (FARA) të Departamentit amerikan të Drejtësisë.

Deri vitin e kaluar, Ministria e Punëve të Jashtme dhe Diasporës (MPJD) e Kosovës i ka pasur dy marrëveshje të tilla, por ato tani kanë skaduar.

Edhe pse ministrja e Jashtme, Donika Gërvalla, ka thënë se do të shqyrtohet vazhdimi i atyre kontratave njëvjeçare, një gjë e tillë nuk është bërë.

Analistja politike, Donika Emini, paralajmëron se institucionet e Kosovës nuk duhet të mbështeten vetëm në diplomacinë konvencionale – pra përmes ambasadave e konsullatave – veçanërisht në kohën kur, siç thotë, “tensionet gjeopolitike po përshkallëzohen dhe përçarjet transatlantike po thellohen”.

“Kosova kërkon e pret mbështetje politike nga SHBA-ja pa ofruar asgjë në këmbim. Uashingtoni nuk është një vend ku vlerësohesh vetëm për vullnetin e mirë; është një fushëbetejë e influencës, ku lobimi, partneritetet strategjike dhe aftësia diplomatike përcaktojnë se kush zë vend në tavolinë”, thotë për Radion Evropa e Lirë Emini, nga Grupi Këshillëdhënës në Evropë për Politika të Ballkanit.

Dhe, kush po zë vend në tavolinë? Serbia, thotë Emini.

Ajo argumenton se, përderisa Kosova nuk po arrin ta prezantojë veten si “kontribuuese e vlefshme në rendin e ri global”, Serbia “është pozicionuar si një aktore transaksionale, duke ofruar bashkëpunim ekonomik dhe duke shfrytëzuar burimet e saj natyrore”.

“Nëse Kosova nuk modernizon qasjen e saj diplomatike, rrezikon të bëhet një lojtare dytësore në politikën rajonale, me fatin e saj të diktuar gjithnjë e më shumë nga të tjerët, jo vetëm nga SHBA-ja, por edhe nga rivalët e saj rajonalë, të cilët janë shumë më agresivë, strategjikë dhe transaksionalë në angazhimin e tyre me Uashingtonin”, shton Emini.

Aktualisht, institucionet shtetërore të Serbisë kanë pesë kontrata lobimi aktive në SHBA. Institucionet e Kosovës s’kanë treguar nëse do të nënshkruhen kontrata të tilla tani, pas ndërrimit të administratës në SHBA./REL/

Continue Reading

Lajmet

GAP: 57 për qind e bizneseve në pronësi të grave kanë prezencë online

Published

2 days ago

on

March 7, 2025

By

Sot, Instituti GAP publikoi raportin e titulluar “Fuqizimi i bizneseve në pronësi të grave dhe pakicave etnike në Kosovë përmes tregtisë elektronike”. Ky raport ofron një analizë të përdorimit të e-tregtisë nga bizneset mikro, të vogla dhe të mesme në pronësi të grave dhe pakicave etnike në Kosovë.

Sipas GAP-it, gjetjet janë bazuar në të dhëna të mbledhura përmes një ankete gjithëpërfshirëse me 757 biznese, si dhe informacione nga fokus grupe dhe intervista individuale të mbajtura me pronarë/e të këtyre bizneseve.

“Gjetjet tregojnë se 57% e bizneseve në pronësi të grave dhe 56% e bizneseve në pronësi të pakicave etnike në Kosovë kanë prezencë online. Megjithatë, jo të gjitha prej tyre e shfrytëzojnë këtë mundësi për tregti elektronike (e-tregti), me vetëm 28% të bizneseve në pronësi të grave dhe 49% të bizneseve në pronësi të pakicave etnike që përfshihen në shitje online. Platformat e rrjeteve sociale mbeten mjetet kryesore për promovim dhe ndërveprim me klientët”, thuhet në raport.

GAP njofton po ashtu se shumica e bizneseve në pronësi të grave dhe pakicave etnike të cilat përdorin tregtinë elektronike operojnë në sektorin e tregtisë me shumicë dhe pakicë.

“Sa i përket gjenerimit të të ardhurave, gjetjet e anketës tregojnë se këto biznese gjenerojnë më pak se 25% të gjithsej të ardhurave të tyre përmes e-tregtisë. Megjithëse pjesëmarrja e tyre në e-tregti po rritet gjithnjë e më shumë, përfitimi përmes e-tregtisë mbetet relativisht i ulët”, thuhet në raport.

Më tej thuhet se raporti gjithashtu thekson se pandemia e COVID-19 ka përshpejtuar ndjeshëm përdorimin e e-tregtisë, me platforma të integruara që ndihmuan në përmirësimin prezencën dhe rritjen e shitjeve për një numër të konsiderueshëm biznesesh.

“Raporti thekson nevojën e vazhdueshme për mbështetje në fusha të tilla si marketingu digjital, zhvillimi i faqeve të internetit dhe përmirësimi i aftësive për menaxhimin e rrjeteve sociale”, thuhet në komunikatë.

Instituti GAP i bën thirrje institucioneve lokale dhe ndërkombëtare për të mbështetur këto biznese përmes programeve të personalizuara të trajnimeve, subvencioneve për shërbime profesionale marketingu dhe lehtësimin e partneriteteve me platforma të e-tregtisë.

“Këto masa do të ndihmojnë në fuqizimin ekonomik të bizneseve të grave dhe pakicave etnike, duke kontribuar në një ekonomi më gjithëpërfshirëse dhe më të qëndrueshme në Kosovë”, thuhet në komunikatë.

Continue Reading

Lajmet

Osmani: Mësuesit mbeten shtylla e shoqërisë dhe ata që formësojnë mendjet dhe zemrat e kombit

Published

2 days ago

on

March 7, 2025

By

Presidentja Vjosa Osmani ka uruar mësuesit për ditën e tyre 7 Marsin.

“Më 7 Mars kujtojmë themelimin e shkollës së parë shqipe në Korçë më 1887, një akt i guximshëm i patriotëve tanë, që e kuptuan se pa gjuhë dhe dije, nuk ka as komb të suksesshëm. Sot, shkolla është më shumë se një institucion mësimor – është fortesa ku ndërtohet e ardhmja. Mësuesit mbeten shtylla e shoqërisë dhe ata që formësojnë mendjet dhe zemrat e kombit”, ka thënë Osmani.

Osmani ka thënë se në këtë ditë do të nderojmë të gjithë mësuesit,  ata që na mësuan shkronjat e para dhe ata që ende mësojnë brezat e rinj.

“Respekt, mirënjohje dhe përulësi para misionit të tyre fisnik”, ka thënë presidentja në urimin e saj.

Continue Reading

Të kërkuara