“Bassam al-Assaf” ka vendosur një gardh të gjatë me tela me gjemba rreth kompleksit dhe ka përforcuar portat e shkollës, në përpjekje për t’u ofruar qetësi prindërve. Tashmë, ekipet e ambulancave janë vendosur në rrugën jashtë shkollës, ndërsa disa prindër vullnetarisht po qëndrojnë jashtë shkollës gjatë gjithë ditës, si një veprim shtesë mbrojtjeje, raporton BBC.

Në ditën e parë të vitit të ri shkollor palestinez, drejtori i shkollës së djemve në al-Mughayyir, “Bassam al-Assaf”, mbërriti në punë para agimit, duke kaluar pranë rrethimit të sapovendosur me tela me gjemba dhe portave të përforcuara të shkollës, ndërsa dielli fillonte të depërtonte mes ullinjve përreth fshatit, thellë në Bregun Perëndimor të pushtuar.

“Jemi të frikësuar”, tha al-Assaf. “Nxënësit kanë frikë dhe prindërit e tyre kanë frikë”.

Gjashtë persona, përfshirë tre nxënës të kësaj shkolle, janë vrarë në al-Mughayyir këtë vit, në një valë dhune të lidhur me kolonët kundër palestinezëve. Njëri prej tyre, 14-vjeçari Aws al-Naasan, u qëllua për vdekje nga një kolon jashtë portave të shkollës në prill.

“Isha brenda klasës sime dhe dy nxënës të vegjël erdhën me vrap për të më thënë se kishte kolonë pranë murit të shkollës”, kujton mësuesi i anglishtes, Waheed Abu Naem, vëllai i të cilit, Jihad, u vra gjithashtu nga një ushtar izraelit në të njëjtin sulm.

Waheed tha se po përpiqej t’i zhvendoste nxënësit në një vend të sigurt brenda portës së shkollës, kur koloni qëlloi në drejtim të tyre. Pamjet e regjistruara me telefon tregojnë momentin kur Aws u qëllua.

“Kur e ktheva pashë shumë gjak që i dilte nga hunda dhe goja dhe plumbin në kokë”, tha Waheed. “E humbëm”.

Ai tha se plumbat vazhduan të godisnin ndërtesën e shkollës, ndërsa nxënësit fshiheshin pas mureve të klasave ose shtriheshin përtokë.

Ushtria izraelite në një deklaratë në atë kohë tha se ishin hedhur gurë ndaj një veture që transportonte “civilë, përfshirë një ushtar rezervist”, dhe se rezervisti kishte dalë nga automjeti dhe kishte qëlluar ndaj personave të dyshuar.

Mediat izraelite raportuan se rezervisti u pezullua më vonë nga detyra dhe se nisi një hetim.

Që nga ajo ditë, numri i viktimave është rritur, bashkë me frikën e prindërve.

Hezitimi për t’i çuar fëmijët në shkollë

Gjatë verës, edhe dy nxënës të tjerë u qëlluan për vdekje nga forcat izraelite gjatë sulmeve dhe inkursioneve të kolonëve në fshat, së bashku me një 19-vjeçar që sapo kishte përfunduar shkollën.

Në të dyja rastet, ushtria izraelite tha se forcat e saj iu përgjigjën personave që nxitën “një trazirë të dhunshme”.

Me tri banka bosh në klasat e tyre, disa prindër hezitonin t’i dërgonin fëmijët në shkollë për vitin e ri shkollor.

Shkolla ndodhet pikërisht në skajin e al-Mughayyir, një fshat i izoluar në verilindje të Ramallahut, i rrethuar gjithnjë e më shumë nga postblloqe të kolonëve hebrenj dhe që shpesh bllokohet nga forcat izraelite, të cilat rregullisht vendosin një pikë kontrolli të improvizuar në hyrje.

“Bassam al-Assaf” ka vendosur një gardh të gjatë me tela me gjemba rreth kompleksit dhe ka përforcuar portat e shkollës, në përpjekje për t’u ofruar qetësi prindërve. Tashmë, ekipet e ambulancave janë vendosur në rrugën jashtë shkollës, ndërsa disa prindër vullnetarisht po qëndrojnë jashtë shkollës gjatë gjithë ditës, si një veprim shtesë mbrojtjeje.

“Erdha sepse kjo i bën fëmijët të ndiejnë se prindërit e tyre janë me ta, se janë të sigurt, kjo u jep një lloj sigurie”, tha Haroon Bishara, i cili ka një djalë në klasën e parë dhe një në të dytën.

“Këtë vit kemi më shumë frikë për fëmijët tanë. E dimë se në shkollë nuk ka siguri”, shtoi ai.

Por Bishara tha se kjo frikë ishte e përzier me vendosmërinë për të mos lejuar që kërcënimi nga sulmet e kolonëve t’i detyronte të largoheshin.

Të rreshtuar në oborr, nxënësit dëgjuan gjatë gjithë ditës udhëzimet që mësuesit përsëritën vazhdimisht: nëse ushtarët ose kolonët afrohen pranë shkollës, mos bërtisni, mos u afroni dhe mos reagoni.

Pak më shumë se një orë pasi nisën mësimet, kolonët u panë përmes dritareve të shkollës: dy burra që çonin delet përmes fushave palestineze, disa qindra metra larg shkollës, ndërsa ushtarët izraelitë qëndronin aty pranë.

Pak minuta më vonë, u shfaq një tjetër kolon me një tufë delesh.

“Që nga prilli ata janë afruar më shumë me fshatin”, tha Abu Naem. “Më parë i mbanin delet pas kësaj kodre, por tani ushtarët i sjellin kolonët deri te fshati”.

BBC-ja i ka kërkuar ushtrisë izraelite një përgjigje ndaj të gjitha akuzave të përfshira në këtë raport, por ajo nuk ka dhënë një përgjigje përpara publikimit të tekstit.

“Shënjestrimi i qëllimshëm”

Të gjitha vendbanimet izraelite në Bregun Perëndimor të pushtuar janë të paligjshme sipas të drejtës ndërkombëtare. Shumë prej postblloqeve të vogla dhe të improvizuara të kolonëve që janë shtuar përreth al-Mughayyrit janë gjithashtu të paligjshme sipas ligjit izraelit.

Por një prej ekipeve të ambulancës të vendosura jashtë shkollës tha se, në vend që t’i largonin vendbanimet e paligjshme, ushtarët izraelitë kishin filluar të mbështesnin dhe lehtësonin inkursionet e kolonëve në fshat.

Hadi al-Naasan, shofer ambulance në fshat, tha se gjatë vitit të fundit kishte pasur një ndryshim në sjelljen e forcave izraelite. Sipas tij, rritja e numrit të palestinezëve të vrarë dhe të plagosur në al-Mughayyir këtë vit e pasqyronte këtë ndryshim.

“Në fillim të vitit 2025, sulmet e kolonëve ishin të pakta, për shkak të ndërhyrjeve të ushtrisë”, tha ai. “Në vitin 2026, situata ndryshoi plotësisht: kolonët u bënë plotësisht të mbrojtur nga ushtarët pushtues. Këtë vit, numri i dëshmorëve është më i lartë, numri i të plagosurve është gjithashtu shumë më i madh, dhe numri i fëmijëve të plagosur është rritur gjithashtu”.

Hadi, së bashku me banorë të tjerë të al-Mughayyrit, beson se disa kolonë izraelitë tashmë po i shënjestrojnë qëllimisht fëmijët, me qëllim që të ushtrojnë presion mbi të rriturit e fshatit që të largohen nga shtëpitë e tyre.

Një Komision Hetimor i OKB-së, në një raport të publikuar në qershor, konstatoi se sulmet e kolonëve “kanë përdorur fëmijët si mjet në kuadër të një strategjie më të gjerë shtrënguese për t’i dëbuar palestinezët nga toka e tyre”.

Ai përshkroi gjithashtu “një model të kolonëve që shënjestronin qëllimisht fëmijët palestinezë” teksa ata luanin pranë shtëpive të tyre, shkonin ose ktheheshin nga shkolla, kujdeseshin për fermat apo kullosnin bagëtitë, “duke i kthyer hapësirat e përditshme në vende frike”.

Izraeli e ka hedhur poshtë raportin, duke e cilësuar atë si një “mashtrim shpifës”.

Fermeri, Sami Abu Rahma, beson fort se disa kolonë të dhunshëm po i shënjestrojnë fëmijët.

Në fund të korrikut, djali i tij nëntëvjeçar, Salim, u qëllua dhe u plagos teksa luante me vëllezërit dhe motrat e tij në fermën familjare të deleve jashtë al-Mughayyrit. Plumbi ende ndodhet në krahun e tij.

Pamjet e kamerave të sigurisë në fermë tregojnë Salimin duke treguar me gisht dhe duke u bërtitur prindërve të tij se kolonët po afroheshin, përpara se të vraponte për t’u strehuar me vëllezërit, motrat dhe nënën e tij, ndërsa dëgjohen dy të shtëna. Salimi shihet duke kapur shpatullën.

“Në atë moment, nuk mendon më; thjesht ndien frikë”, tha Sami. “Frikë se, Zoti na ruajt, sulmuesi po qëllonte për të vrarë. Gjëja e parë që të shkon në mendje është humbja e gjësë më të çmuar që ke”, shtoi Sami.

Ai tha se burri që qëlloi djalin e tij jetonte në një postbllok të paligjshëm të kolonëve, i cili ishte shfaqur pranë fermës në qershor, dhe se më parë kishte qëlluar ndaj Salimit në të njëjtën zonë, një javë më herët.

“Ti nuk ndihesh më se mund t’i mbash të sigurt në rrugë, madje as në shkollë”, tha ai.

“Kolonët nuk duan që ne të qëndrojmë këtu; duan të na bëjnë të ndihemi sikur nuk kemi të ardhme këtu”.

Sami tha se ishte fermeri i fundit që mban dele që kishte mbetur në atë zonë, pasi të tjerët ishin larguar me forcë nga sulmet e kolonëve. Sipas tij, koloni që qëlloi djalin i kishte thënë vazhdimisht familjes të largohej nga toka e tyre.

“Pavarësisht se sa i vendosur mund të jesh për të qëndruar”, shtoi ai, “çfarë bën kur kolonët fillojnë të qëllojnë mbi fëmijët e tu?”

Këshilli rajonal i kolonëve tha se një ushtar jashtë detyrës ishte arrestuar nën dyshimin se kishte lidhje me të shtënat.

“Na vjen keq për çdo dëm ndaj njerëzve të pafajshëm, qofshin hebrenj apo arabë, dhe kundërshtojmë çdo akt dhune që shkel ligjin”, thuhej në një deklaratë të tij, duke shtuar se kundërshtonte “përpjekjen për t’ia atribuuar të gjithë komunitetit të kolonëve në Jude dhe Samari aktet që ende nuk janë përcaktuar nga një hetim, si dhe pretendimin e pabazë se kullotja e ligjshme e deleve apo prania hebraike në zonë janë pjesë e një plani të qëllimshëm për të dëmtuar fëmijët ose për t’i dëbuar banorët nga shtëpitë e tyre”.

Al-Mughayyri është pjesë e një modeli që po shfaqet në të gjithë Bregun Perëndimor të pushtuar, ku gjithnjë e më shumë postblloqe të paligjshme të kolonëve po rrethojnë fshatrat palestineze, kolonët po marrin më shumë mbrojtje nga forcat izraelite dhe sulmet po zhvendosen nga fermat dhe tokat e kullotave drejt zonave të banuara, ku gratë dhe fëmijët janë më të rrezikuar.

“Fëmijët, kur shohin ushtrinë duke hyrë, nuk e kuptojnë rëndësinë e situatës”, tha Hadi al-Naasan, pjesëtar i ekipit lokal të ambulancës. “Të rriturit janë më të vetëdijshëm se si mund të zhvillohen ngjarjet”.

Statistikat e OKB-së

Shifrat e OKB-së sugjerojnë se numri i palestinezëve të plagosur gjatë sulmeve të kolonëve nga ushtarët izraelitë ose vetë kolonët është rritur ndjeshëm këtë vit, në një mesatare prej tre të plagosurish në ditë, ndërsa edhe numri i plagosjeve të shkaktuara drejtpërdrejt nga kolonët është më i lartë.

Kjo rritje është shoqëruar me zgjerimin e vendbanimeve izraelite dhe postblloqeve të kolonëve në Bregun Perëndimor.

Të gjitha vendbanimet izraelite në Bregun Perëndimor janë të paligjshme sipas të drejtës ndërkombëtare dhe qeveria izraelite, e cila mbështet fuqishëm zgjerimin e vendbanimeve, po përballet me presion në rritje ndërkombëtar.

Arrestimi i disa kolonëve të dhunshëm dhe një plan i raportuar i kryeministrit izraelit për të çmontuar postblloqet e paligjshme në Bregun Perëndimor, nuk i kanë ndalur deri tani sulmet dhe as nuk i kanë qetësuar palestinezët, të cilët thonë se postblloqet e shkatërruara më parë nga autoritetet izraelite janë rindërtuar shpejt.

Teksa zgjedhjet izraelite janë më pak se dy muaj larg, ministria izraelite e Financave çoi përpara këtë javë planet për të marrë nën kontroll regjistrimin e tokave në Bregun Perëndimor dhe Jerusalemin Lindor, një masë që organizata izraelite monitoruese e vendbanimeve “Peace Now” e përshkroi si “një hap të qartë drejt aneksimit”.

Kryeministri izraelit, Benjamin Netanyahu, ia ka atribuuar dhunën e kolonëve një pakice të vogël ekstremiste, duke i përshkruar ata në një intervistë të fundit televizive si “150 delinkuentë të rinj”.

Që nga fillimi i vitit 2025, OKB-ja ka regjistruar 316 palestinezë të vrarë nga forcat izraelite ose kolonët dhe më shumë se 5,600 të plagosur, deri në fund të korrikut 2026. Sipas OKB-së, gjatë së njëjtës periudhë janë vrarë 20 izraelitë, përfshirë një fëmijë dhe tetë pjesëtarë të forcave të sigurisë, ndërsa 123 izraelitë janë plagosur.

Prindërit palestinezë që kanë qëndruar në fshatra si al-Mughayyri, pavarësisht përshkallëzimit të dhunës së kolonëve, tani po përballen me një frikë gjithnjë e më të madhe se mund t’i humbasin fëmijët e tyre nëse qëndrojnë në tokën e tyre.

Organizata e Veteranëve të Luftës e UÇK-së ka thirrur një protestë gjithëpopullore për sot në orën 12:00 në sheshin “Skënderbeu” në Prishtinë, për të kundërshtuar vendimin dënues të Dhomave të Specializuara ndaj katër ish-udhëheqësve të Shtabit të Përgjithshëm të UÇK-së. Nënkryetari i kësaj organizate, Gazmend Syla, ka bërë të ditur se protesta do të jetë plotësisht paqësore dhe pa persona të maskuar, duke u distancuar nga incidentet e dhunshme që ndodhën pas shpalljes së verdiktit. Ai ka theksuar se ky vendim tenton të barazojë krimet serbe me luftën çlirimtare, por se asnjë gjykatë nuk mund ta tjetërsojë të vërtetën e luftës për liri.

Përveç protestës, përfaqësuesit e OVL-UÇK-së kanë shpalosur një platformë me hapa konkretë deri në përfundimin e procesit në Apel për rastin e Hashim Thaçit, Jakup Krasniqit, Kadri Veselit dhe Rexhep Selimit. Siç njoftoi nënkryetari Fatmir Sopi, kjo platformë kërkon debat parlamentar për amendamentimin ose shfuqizimin e Ligjit për Dhomat e Specializuara, rivlerësim institucional të mandatit të gjykatës në raport me pretendimet fillestare të raportit të Këshillit të Evropës, si dhe mbështetje të plotë juridike e financiare për procesin e ankesave.

Gjykata Speciale në Hagë ka dënuar Hashim Thaçin dhe Jakup Krasniqin me nga 25 vjet burgim, Kadri Veselin me 18 vjet dhe Rexhep Selimin me 13 vjet burgim për krime lufte, ndërsa të gjithë janë shpallur të pafajshëm për akuzat që lidheshin me krime kundër njerëzimit. /E.A/

Kuvendi i Shqipërisë ka dalë me një deklaratë të përbashkët zyrtare pas dënimit të ish-krerëve të Ushtrisë Çlirimtare të Kosovës nga Dhomat e Specializuara në Hagë, duke e cilësuar aktgjykimin ndaj Hashim Thaçit, Kadri Veselit, Rexhep Selimit dhe Jakup Krasniqit si thellësisht të padrejtë dhe të papranueshëm.

Përmes këtij reagimi, legjislativi shqiptar rikujtoi se lufta e UÇK-së ishte një përpjekje e drejtë dhe e domosdoshme për çlirim ndaj represionit, spastrimit etnik dhe gjenocidit të ushtruar nga regjimi i Sllobodan Millosheviçit. Në deklaratë nënvizohet se asnjë vendim gjyqësor nuk mund të rishkruajë historinë e një populli, të barazojë agresorin me viktimën apo të zbehë kontributin e krerëve të UÇK-së në rrugëtimin e Kosovës drejt lirisë dhe pavarësisë.

Tirana zyrtare shprehu gjithashtu shqetësimin e thellë për përdorimin e standardeve të dyfishta në rajon, duke dënuar glorifikimin e kriminelëve serbë të luftës në Beograd, si dhe tentativat e Serbisë dhe Rusisë për ta instrumentalizuar këtë proces me qëllim delegjitimimin e shtetësisë së Kosovës.

Në përmbyllje, Kuvendi i Shqipërisë iu bëri thirrje të drejtpërdrejtë dy qeverive, asaj në Tiranë dhe Prishtinë, si dhe dy parlamenteve përkatëse, që të koordinojnë urgjentisht veprimet institucionale për ndjekjen e shkallëve të mëtejshme të procesit ligjor. Gjithashtu, Shqipëria u zotua se do të vazhdojë të denoncojë në të gjitha forumet ndërkombëtare krimet e luftës dhe gjenocidin e kryer nga Serbia, duke kërkuar drejtësi të plotë për viktimat.

Kryetari i Trupit Gjykues në Dhomat e Specializuara në Hagë, Charles L. Smith, ka marrë vendim për nisjen e procedurave që lidhen me kompensimin dhe reparacionet ndaj viktimave në procesin gjyqësor ndaj Hashim Thaçit, Kadri Veselit, Rexhep Selimit dhe Jakup Krasniqit.

Përmes këtij urdhri, të bazuar në nenin 22(8) dhe rregullën 168 të rregullores së gjykatës, Trupi Gjykues ka caktuar kalendarin e afateve për Mbrojtjen, Zyrën e Prokurorit të Specializuar (ZPS) dhe Përfaqësuesin e Viktimave për paraqitjen e kërkesave dhe provave përkatëse.

Afatet kryesore të caktuara nga Trupi Gjykues:

22 Shtator 2026: Mbrojtja duhet të paraqesë çdo kundërshtim eventual lidhur me zhvillimin e procedurës së reparacioneve, si dhe të njoftojë nëse synon të paraqesë prova. Po ashtu, brenda kësaj date Përfaqësuesi i Viktimave duhet të njoftojë për çdo ndryshim në paraqitjen e provave, ndërsa Sekretaria dhe Mbrojtja duhet të riklasifikojnë apo dorëzojnë versionet publike të parashtresave të nëntorit 2025.

25 Shtator 2026: Afati i fundit që Përfaqësuesi i Viktimave dhe ZPS-ja të dërgojnë përgjigjet e tyre ndaj kundërshtimeve të mundshme të Mbrojtjes.

7 Tetor 2026: Data deri kur Përfaqësuesi i Viktimave mund të paraqesë provat e tij lidhur me dëmshpërblimin.

14 Tetor 2026: Përfaqësuesi i Viktimave obligohet të dorëzojë kërkesën përfundimtare e zyrtare për reparacione.

4 Nëntor 2026: Mbrojtja dhe Zyra e Prokurorit të Specializuar duhet t’i përgjigjen zyrtarisht kërkesës së paraqitur për kompensimin e viktimave.