Ministri në detyrë i Punëve të Brendshme, Xhelal Sveçla, ka reaguar pas arrestimit të shtatë qytetarëve të nacionalitetit serb në Graçanicë, të cilët dyshohet se kanë ushtruar presion dhe kërcënime ndaj votuesve me qëllim ndikimin në procesin zgjedhor.

Sveçla tha se zgjedhjet në Kosovë, pavarësisht sfidave dhe bllokadave politike që kanë ndodhur në raste të caktuara, vazhdojnë të vlerësohen pozitivisht në raportet ndërkombëtare për standardin e organizimit dhe garantimin e shprehjes së lirë të vullnetit të qytetarëve.

Ai përshëndeti veprimin e institucioneve të sigurisë për arrestimin e të dyshuarve në Graçanicë, duke theksuar se ata “përmes kërcënimeve, presionit dhe shantazhit kanë tentuar të ndikojnë në vullnetin e lirë të votuesve”.

Sipas Sveçlës, veprime të tilla që targetojnë qytetarët e komunitetit serb në Kosovë janë rezultat i “direktivave të orkestruara nga Serbia”, të cilat, sipas tij, synojnë të cenojnë pluralizmin politik dhe rendin demokratik në vend.

“Institucionet e Republikës së Kosovës do të veprojnë me vendosmëri ndaj çdo përpjekjeje për të frikësuar qytetarët dhe për të deformuar vullnetin e tyre politik”, deklaroi ai.

Në fund, ministri në detyrë theksoi se institucionet do të garantojnë që procesi zgjedhor të mbetet i lirë dhe i paprekur nga ndërhyrjet e jashtme.

Administrata e Donald Trump po planifikon t’u bëjë të ditur aleatëve të NATO se do të zvogëlojë kapacitetet ushtarake që Shtetet e Bashkuara do të kenë në dispozicion për të ndihmuar vendet evropiane të aleancës në rast krizash të mëdha ose konfliktesh ushtarake.

Sipas burimeve të njohura me çështjen, vendimi pritet të prezantohet gjatë një takimi të shefave të politikave të mbrojtjes në Bruksel. Ky veprim lidhet me strategjinë e Trumpit që vendet evropiane të marrin më shumë përgjegjësi për sigurinë e kontinentit dhe të mos varen aq shumë nga mbështetja amerikane.

Në kuadër të modelit të njohur si “NATO Force Model”, shtetet anëtare përcaktojnë një numër forcash që mund të aktivizohen në rast lufte, sulmi ndaj një vendi anëtar apo ndonjë krize tjetër madhore. Megjithatë, Pentagoni ka vendosur të zvogëlojë ndjeshëm angazhimin amerikan në këtë strukturë, edhe pse detajet e plota mbeten ende sekrete.

Burimet thanë se administrata amerikane ende nuk ka sqaruar se sa shpejt do të transferohen këto përgjegjësi tek aleatët evropianë, por ky ndryshim shihet si një sinjal konkret i politikës së re të Uashingtonit ndaj NATO-s. Zyrtarët amerikanë kanë bërë të ditur se SHBA-ja do të vazhdojë të ofrojë mbrojtjen bërthamore për aleancën, edhe nëse Evropa merr rol më të madh në forcat konvencionale.

Ky zhvillim vjen në një kohë tensionesh në rritje brenda aleancës. Javët e fundit, administrata Trump ka njoftuar për tërheqjen e rreth 5 mijë trupave amerikane nga Evropa dhe anulimin e një dislokimi ushtarak në Poloni, vendime që kanë shkaktuar shqetësim te aleatët evropianë dhe kritikë në Kongresin amerikan.

Disa vende evropiane kanë shprehur frikën se Uashingtoni mund të reduktojë më tej praninë e tij ushtarake në kontinent, megjithëse diplomatët e NATO-s besojnë se SHBA-ja do të vazhdojë të mbështesë Evropën në rast rreziku serioz. Nga ana tjetër, aleatët evropianë argumentojnë se po rrisin shpenzimet ushtarake dhe kapacitetet mbrojtëse, por theksojnë se ky proces kërkon kohë. /Reuters/

Këngëtarja shqiptare me famë botërore, Bebe Rexha, në bashkëpunim me grupin Faithless, ka arritur vendin e parë në WARM Global Dance Radio chart me këngën “New Religion”.

Kënga, e publikuar në mars, kryesoi renditjen për javën e 23 majit, pas mbi 900 transmetimeve në më shumë se 200 radio në mbarë botën.

“New Religion” ka shënuar sukses edhe në toplistat e Billboard, duke arritur vendin e parë në Dance/Mix Show Airplay, si dhe pozicione të larta në listat Pop Airplay dhe Rhythmic Airplay.

Projekti përfshin elemente nga hiti legjendar “Insomnia” i Faithless dhe shënon suksesin e parë në krye të kësaj liste si për Bebe Rexhën ashtu edhe për grupin Faithless.

Në kuadër të 18 Majit – Ditës Ndërkombëtare të Muzeve, Muzeu Kombëtar i Kosovës organizoi dje një sërë aktivitetesh me temën “Museums uniting a divided world”.

Aktiviteti përfshiu një panel diskutimi në dy sesione, ku u trajtua roli i muzeve në ndërtimin e paqes, dialogut kulturor dhe krijimin e hapësirave edukative për brezat e rinj.

Paneli u hap nga zëvendësministrja e Kulturës, Nora Arapi Krasniqi, dhe drejtoresha e Muzeut Kombëtar të Kosovës, Vjollca Aliu, të cilat theksuan rëndësinë e muzeve në ruajtjen e kujtesës dhe forcimin e bashkëpunimit kulturor.

Gjatë diskutimeve u trajtuan edhe temat që lidhen me identitetin kombëtar, sfidat kuratoriale dhe përfshirjen e komunitetit në aktivitetet muzeore.

Ky aktivitet u cilësua si një mundësi e rëndësishme për reflektim dhe shkëmbim idesh mbi rolin e muzeve në shoqëri.