Ministri i Mbrojtjes i Iranit ka udhëtuar drejt aleatit diplomatik dhe ekonomik, Kinës, në udhëtimin e tij të parë jashtë vendit që nga përplasja 12-ditore me Izraelin, e cila për pak kohë i futi SHBA-të në një konflikt të ri rajonal.

Aziz Nasirzadeh është një nga nëntë ministrat e mbrojtjes që media shtetërore kineze thotë se morën pjesë në një takim të Organizatës së Bashkëpunimit të Shangait (SCO) , një grupim rajonal sigurie i udhëhequr nga Kina dhe Rusia, i cili është bërë gjithnjë e më i rëndësishëm, ndërsa Pekini dhe Moska kërkojnë të ndërtojnë blloqe ndërkombëtare alternative ndaj atyre të mbështetura nga Shtetet e Bashkuara.

Takimi dy-ditor filloi të mërkurën në qytetin bregdetar kinez të Qingdaos, një ditë pasi një armëpushim midis Iranit dhe Izraelit shuajti ato që kishin qenë ditë të tëra sulmesh ajrore midis të dyjave, të ndërprera nga një sulm amerikan ndaj tre objekteve bërthamore iraniane.

Mbledhja e SCO-së përkoi me një takim të udhëheqësve të NATO-s në Hagë, ku Presidenti i SHBA-së Donald Trump tha se SHBA-të do të takohen me Iranin “javën e ardhshme” në lidhje me një marrëveshje të mundshme bërthamore.

Takimi i Pekinit, pjesë e ngjarjeve për kryesimin e saj të rradhës të SCO-së, nxori në pah rolin e Kinës si një lojtare kyçe ndërkombëtare, edhe pse ajo mbeti kryesisht në periferi të konfliktit Izrael-Iran – dhe rëndësinë që Teherani i kushton marrëdhënies së tij me Pekinin

Irani ka rihapur pjesërisht hapësirën e tij ajrore për fluturime në lindje dhe juglindje të vendit, transmeton Anadolu.

Sipas televizionit shtetëror iranian, zëdhënësi i Ministrisë së Rrugëve dhe Urbanizimit, Majid Akhavan bëri një deklaratë mbi këtë çështje.

Akhavan deklaroi se rajonet lindore dhe juglindore të vendit janë hapur për fluturime me miratimin e institucioneve përkatëse në mënyrë që fluturimet të kthehen gradualisht në normalitet dhe të sigurohet plotësisht siguria e fluturimeve.

Ai tha se rajoni është hapur për fluturime transiti kombëtar dhe ndërkombëtar. Akhavan vuri në dukje se fluturimet kanë filluar në aeroportet Bojnord, Sebzvar, Mashhad, Birjand, Zabul, Zahedan, Seravan, Chabahar, Iranshahr, Gonabad, Jiroft, Cask dhe Sarakhs.

Gjithashtu Akhavan tha se të gjitha aeroportet në veri, jug dhe perëndim të vendit, përfshirë aeroportet “Imam Khomeini” dhe “Mehrabad” të Teheranit, janë të mbyllura për fluturime deri në njoftim të mëtejshëm.

Krerët e 27 vendeve anëtare të Bashkimit Evropian do të mblidhen sot në Bruksel për të biseduar për sanksione më të ashpra kundër Rusisë, mënyrat për t’i shmangur tarifat e reja nga Shtetet e Bashkuara të Amerikës, si dhe mënyrën për ta bërë zërin e tyre të dëgjohet në konfliktet në Lindjen e Mesme.

Shumica e liderëve do të vijnë nga një samit i shkurtër, por intensiv i NATO-s, ku ata u zotuan të mërkurën për një rritje të madhe të shpenzimeve për mbrojtje dhe kufizuan disa prej dallimeve të tyre me presidentin amerikan, Donald Trump.

Presidenti i Ukrainës, Volodymyr Zelensky, do të marrë pjesë në samitin e BE-së përmes video konferencës, pas takimit të tij me Trumpin të mërkurën në Hagë.

NATO, e udhëhequr nga SHBA-ja, nuk i kushtoi rëndësi Ukrainës gjatë samitit, por lufta e Rusisë në Ukrainë mbetet shqetësimi kryesor për BE-në.

Krerët e bllokut do të bisedojnë për rundin e 18-të të sanksioneve kundër Rusisë dhe nëse do të vazhdojnë ta mbajnë çmimin tavan për naftën ruse. Këto masa po kundërshtohen nga disa vende, sepse mund t’i rrisin çmimet e energjisë.

Ndërkohë, kërcënimi i Trumpit me tarifa po rëndon mbi BE-në, e cila negocion marrëveshje tregtare në emër të të gjitha 27 vendeve anëtare. Trumpi e sulmoi Spanjën të mërkurën për mosshpenzim të mjaftueshëm në mbrojtje dhe sugjeroi tarifa të reja.

Presidenti i Francës, Emmanuel Macron, e kritikoi Trumpin për nisjen e një lufte tregtare me aleatë të vjetër.

Liderët evropianë janë gjithashtu të shqetësuar për pasojat nga luftërat në Lindjen e Mesme dhe BE-ja po shtyn për ringjalljen e negociatave diplomatike me Iranin për programin e tij bërthamor.

Vendet anëtare të BE-së kanë mosmarrëveshje të brendshme për të kapërcyer. Ato janë të ndara në lidhje me politikat ndaj Izraelit për shkak të veprimeve të tij në Rripin e Gazës. Dhe, partitë e majta po kritikojnë shefen e Komisionit Evropian, Ursula von der Leyen, për largimin nga drejtimi i politikave klimatike të BE-së në favor të investimeve ushtarake.

Mbrojtja dhe siguria ka gjasa të jenë në krye të agjendës. Samiti do të përfundojë me një deklaratë përfundimtare që do të përcaktojë agjendën e bllokut për katër muajt e ardhshëm dhe do të shërbejë si tregues i ndjesive politike në Evropë mbi çështje kryesore rajonale dhe globale./REL

Presidenti amerikan Donald Trump ka përsëritur deklarimin se gjatë mandatit të tij ka ndalur shpërthimin e një konflikti të armatosur mes Kosovës dhe Serbisë. Këto deklarata i bëri në margjinat e Samitit të NATO-s, që po mbahet në Hagë të Holandës.

Teksa komentoi mbi situatat globale dhe konfliktet e fundit në botë, Trump përmendi edhe tensionet në Ballkanin Perëndimor, duke thënë se “Serbia ishte gati të vepronte”, por ai e kishte ndalur eskalimin.

“Ndalëm Serbinë që ishte gati të vepronte… Putini më telefonoi dhe më tha: ‘A mund të të ndihmoj me Iranin’? I thashë jo, mund të më ndihmosh me Rusinë. Sepse në javët e fundit zgjidhëm çështjen e Indisë dhe Pakistanit, Kosovës e Serbisë”, u shpreh Trump.

Ai shtoi se gjatë kohës së presidencës së tij ishte arritur stabilitet në rajone të ndryshme, përfshirë Kosovën, duke e cilësuar këtë si një ndër sukseset e tij ndërkombëtare.

Trump ka theksuar disa herë në të kaluarën se ishte ai që parandaloi një luftë të re mes Prishtinës dhe Beogradit, duke kritikuar presidentin aktual amerikan, Joe Biden, për, siç tha, “veprime të gabuara” në lidhje me politikën e jashtme në Ballkan.

“Gjatë mandatit tim të parë, Serbia dhe Kosova ishin në përplasje të ashpra dhe konflikti ishte gati të shpërthente në luftë. Unë e ndalova! Biden e ka dëmtuar perspektivën afatgjatë, por unë do ta rregulloj sërish!”, ka shkruar Trump më parë në rrjetin Truth Social.