Mbrëmja evropiane në “San Siro” solli një nga surprizat më të mëdha të viteve të fundit në UEFA Champions League. Kampionët e Norvegjisë, Bodo/Glimt, mposhtën Interin me rezultat 2-1 në Milano, duke vulosur kualifikimin me shifrat e përgjithshme 5-2 dhe duke siguruar një vend në fazën e 1/8-tave.

Skuadra italiane e nisi ndeshjen me pritshmëri të larta, por mysafirët treguan qetësi dhe organizim të admirueshëm. Në minutën e 58-të, Jens Petter Hauge përfitoi nga një gabim në mbrojtjen zikaltër dhe kaloi norvegjezët në epërsi. Vetëm 14 minuta më pas, Hauge u shndërrua në asistues, duke shërbyer për Hakon Evjen, i cili dyfishoi avantazhin dhe heshti tribunat italiane.

Interi reagoi në minutën e 76-të me golin e Alessandro Bastonit, por kjo mjaftoi vetëm për të zbutur humbjen, jo për të shmangur eliminimin.

Me këtë sukses, Bodo/Glimt hyn në histori si skuadra e parë norvegjeze që fiton dy ndeshje në fazën eliminatore të Champions League. Jo vetëm kaq, ata u bënë edhe ekipi i parë jashtë pesë ligave më të forta evropiane që regjistron katër fitore radhazi ndaj skuadrave nga këto kampionate, një arritje që nuk ishte parë që nga epoka e artë e Ajaxit në sezonin 1971/72, i udhëhequr nga legjenda Johan Cruyff.

Seria mbresëlënëse e norvegjezëve kishte nisur më herët me fitore ndaj gjigantëve evropianë si Manchester City dhe Atlético Madrid, përpara se të konfirmohej kulmi me dy triumfe ndaj Interit.

Tashmë, sytë janë drejt shortit të radhës, ku Bodo/Glimt mund të përballet me Sporting CP ose sërish me Manchester Cityn. Mbetet për t’u parë nëse aventura e tyre do të vazhdojë si një përrallë moderne e futbollit evropian, apo nëse surpriza do të ndalet këtu.

Në Ligën e Kampionëve mbrëmë janë zhvilluar edhe tri ndeshje. Në raundin tjetër ka kalur Atletiko Mardid, pasi mundi Bryzhin e Beligjikës me rezultat të përgjithshëm 7:4 (3:3 ndeshja e parë, 4:1 dje). Leverkuzeni eliminoi Olympiakosin me rezultat të përgjithshëm 2:0, që ishte rezultat i ndeshje së parë. Dje dy skuadrat luajtën barazim. Tutje kaloi edhe Njukastëll. Dje mundi Karabahun me rezultat 3:2, derisa në ndeshjen e parë kishte fituar 6:1.

Përfaqësuesja e vajzave të Kosovës në futboll do të zbresë në fushë në fillim të marsit për dy ndeshje të rëndësishme ndërkombëtare.

Prishtina  do të presë këtë verë dy Kampionate Evropiane për hendbollistët deri në 20 vjeç. Shorti për këto gara është hedhur  në Vjena nga EHF.

Në “Men’s 20 EHF Championship I 2026” do të luajnë Kosova, Estonia, Gjeorgjia, Italia, Mali i Zi dhe Holanda. Kosova ka arritur në këtë nivel pas rezultateve të mira të arritura më herët dhe do të ketë ndeshje të vështira.

Në të njëjtën kohë do të zhvillohet edhe “Men’s 20 EHF Championship II 2026”, ku marrin pjesë Belgjika, Bullgaria, Finlanda, Britania e Madhe, Luksemburgu dhe Sllovakia.

Të dy kampionatet do të mbahen nga 12 deri më 19 korrik. Në fillim, ekipet do të luajnë secila me të gjitha ekipet e tjera, pastaj do të vazhdojnë ndeshjet për renditjen përfundimtare.

Ndërkohë, Kombëtarja U18 e Kosovës do të marrë pjesë në “Men’s 18 EHF Championship II 2026” në Gjeorgji në fillim të gushtit, ku do të garojnë edhe Belgjika, Bullgaria, Qipro, Gjeorgjia dhe Britania e Madhe.

Këto organizime e vendosin Prishtinën në qendër të hendbollit evropian për të rinj gjatë verës.

Klubi KB Sigal Prishtina, ka mbajtur një konferencë të jashtëzakonshme për media, ku drejtuesit aktualë kanë folur për gjendjen financiare dhe sfidat me të cilat po përballet klubi.

Drejtori i Përgjithshëm, Luan Maloku, deklaroi se pas marrjes së detyrës kanë hasur në një situatë të rëndë financiare, duke theksuar se rreth 700 mijë euro të derdhura në muajt nëntor dhe dhjetor të vitit të kaluar nuk figurojnë në llogaritë e klubit në fillim të janarit.

“Llogaritë i kemi marrë 0-0. Pagat e lojtarëve dhe stafit kanë qenë të papaguara. Edhe pasi janë derdhur rreth 700 mijë euro, ne sërish nuk kemi qenë të paguar. Ekziston edhe një overdraft prej 50 mijë eurosh minus, si dhe obligime ndaj autobusëve, aviokompanive dhe procese të tjera përmbarimore. Megjithatë, kjo nuk na ndal të ecim përpara”, theksoi Maloku.

Ai shtoi se klubi ka edhe obligime ndaj ATK-së, Federatës së Basketbollit të Kosovës dhe Ligës, si dhe dy raste në BAT, për të cilat tha se janë në proces negociimi. Sipas tij, situata është e menaxhueshme dhe nuk rrezikon ekzistencën e klubit.

Maloku bëri thirrje publike për mbështetje më të madhe nga Komuna e Prishtinës dhe sponsorët potencialë, duke theksuar se klubi ka nevojë për përkrahje institucionale dhe financiare për sezonin e ardhshëm.

“Ne si Prishtina do të mbijetojmë sepse kemi sponsorë dhe kemi njerëz që nuk e lejojnë këtë klub të bie. Klubi kurrë më i bashkuar nuk ka qenë se tani. Dera është e hapur për këdo që dëshiron të ndihmojë, dhe do të ketë transparencë të plotë”, u shpreh ai.

Në të njëjtën linjë ishte edhe Drejtori Sportiv, Edmond Azemi, i cili theksoi se klubi nuk do të dorëzohet dhe do të vazhdojë të punojë me korrektësi dhe transparencë.

“Ne kurrë nuk do të dorëzohemi. Do të punojmë fort dhe do të jemi të hapur me mediat dhe qytetarët. Klubi i Prishtinës e meriton të jetë në vendin e parë”, deklaroi Azemi.

Edhe kapiteni Arbër Sinani siguroi tifozët se skuadra do të vazhdojë të japë maksimumin në parket, pavarësisht vështirësive financiare.

“Garantojmë se nuk do të dorëzohemi”, tha Sinani, duke kërkuar mbështetjen e tifozëve në këtë periudhë sfiduese për klubin bardhekaltër.

Pavarësisht krizës momentale, drejtuesit e Sigal Prishtinës u shprehën të bindur se klubi do ta tejkalojë këtë fazë dhe do të vazhdojë rrugëtimin e tij në basketbollin kosovar.