Nënkolonele Valdeta Mehanja, pilote me Regjimentin e Avionëve 1-131, po përjeton një moment të veçantë në jetën e saj. Me origjinë shqiptare nga Kosova dhe qytetare e SHBA-së, ajo kurrë nuk kishte menduar se do ta vizitonte Shqipërinë, vendin e saj të origjinës.

“Unë kurrë nuk kam vizituar Shqipërinë më parë. Është një ndjenjë e pabesueshme të jem këtu si pilote, me uniformë dhe në ushtrinë amerikane. Nuk do ta kisha pasur këtë mundësi për të fluturuar mbi Shqipëri nëse nuk do të ishte ushtria. Të përjetosh këtë më bëri shumë të lumtur“, tha ajo.

Mehanja e përshkruan këtë mision si “përfundimin e një rrethi” pas një jete të vështirë. Ajo u rrit në varfëri dhe familja e saj u bë refugjate të luftës, duke lënë pas ato pak gjëra që kishin për të mbijetuar nga konflikti. Disa vite më vonë, si kontraktore për Departamentin e Mbrojtjes, konvoyi i saj në rrugën për në Bagdad u sulmua nga eksplozivë të improvizuar.

“Unë mendoja se ky ishte fundi,” tregoi ajo. Por pilotët amerikanë e shpëtuan, dhe kjo përvojë e bëri të vendosur të ndiqte ëndrrën e saj për aviacionin. “Kjo më bëri të doja të bashkohem me aviacionin. E dija se kisha një mision më të madh.”

Sot, Mehanja është një pilote e UH-60 Black Hawk për Ushtrinë e SHBA. Ajo e ndjeu se rrethi do të përfundonte kur dëgjoi se 1-131-të po shkonte në Shqipëri për të marrë pjesë në DEFENDER-Europe 21.

“Isha kaq e emocionuar. Nuk mund ta besoja që njësia e Gardës që u bashkova po shkonte në Shqipëri. Nuk e dija se sa e bukur ishte kjo vend deri sa fluturova mbi malet. Nuk mendoj se mund të kisha vizituar Shqipërinë në një mënyrë më të mirë“, tha ajo.

Gjatë qëndrimit të saj në Shqipëri, ajo ka fluturuar misione dhe ka shërbyer si përkthyese dhe këshilltare kulturore për amerikanët dhe shqiptarët. “Nëse punojmë së bashku, do të jemi më të fortë,” tha ajo.

Përveç detyrave ushtarake, Mehanja është bërë një figurë e njohur në vend. Ajo ka takuar shumë vendas, është intervistuar nga media të ndryshme dhe ka takuar Ambasadorin amerikan dhe Presidentin shqiptar Ilir Meta. “Ishte një moment shumë special për mua, dhe nuk do ta harroj kurrë,” tha ajo.

Familja e saj është jashtëzakonisht krenare. “Nuk mendoj se mama ime do të kishte menduar ndonjëherë se vajza e saj do të shkëmbejë duar me një president shqiptar,” tha ajo.

Mehanja mbetet modeste dhe shpreson që historia e saj të frymëzojë të tjerët. “Çdo gjë është e mundur nëse punoni fort për të. Kur mendoni se nuk mund të arrini diçka, kjo nuk do të thotë se është e pamundur,” theksoi ajo.

Ajo e ndien se suksesi i saj është rezultat i mbështetjes nga Regjimenti 1-131 dhe Garda Kombëtare e Alabamës. “Kam pasur njësinë më të mirë dhe kam qenë kaq me fat. Kjo është një përvojë që do ta vlerësoj gjithmonë,” përfundoi ajo./UBTNews/

Kryeministri i Kosovës, Albin Kurti është shprehur kundër vazhdimit të marrëveshjes Rama-Meloni për emigrantët dhe ngritjen e këtij modeli në vendet e tjera, ai tha se përsëritja do të sillte shqetësime për të drejtat e njeriut.

“Nëse qendra riatdhesimi të ngjashme me ato në Shqipëri mund të ndërtohen në vende të tjera të Ballkanit Perëndimor, si mund të sigurohemi që të drejtat e individëve të burgosur të respektohen”?

Kryeministri i Kosovës, Albin Kurti e ngriti këtë pyetje, duke theksuar se këto qendra do të rëndojnë “në ndërgjegjen e qytetarëve të Ballkanit dhe atyre të Bashkimit Evropian”.

Megjithatë pakti Rama-Meloni nuk është kundërshtuar në BE, të paktën nga Presidentja e Komisionit Europian, Ursula von der Leyen. Por, ajo mori kthesë, kur një gjykatë italiane urdhëroi kthimin e emigrantëve afrikanë nga Shqipëria, vetëm pas dy ditësh qëndrimi.

“Pranimi i përkohshëm i refugjatëve nëse e kërkon urgjenca është, natyrisht, gjithmonë i mundur. Për shembull, strehimi i shtetasve afganë në Ballkan, kur Talebanët morën pushtetin, por kjo nuk ka ngjashmëri me modelin që po diskutojmë. Po flasim për qenie njerëzore që ndaj të cilëve duhet të ketë kujdes”, ka thënë Kurti.

Afër dy milionë euro është kostoja e ndërtimit të rrugës “Nekibe Kelmendi” në Prishtinë. Kjo rrugë, kap gjatësinë e 1.7 kilometrave, ndërsa konsiderohet si jetike për evitimin e tollovisë në Kryeqytet.

Kreu i Prishtinës, Përparim Rama, ka thënë se kjo rrugë prej 1.7 kilometrave ka qenë në gjendje të mjerueshme, ndërsa tani do të ndihmojë në lehtësimin e trafikut në Kryeqytet.

“Jemi në përfundim të punimeve dhe një punë e madhe që është bërë në këtë pjesë një segment prej 1.7 kilometrave. E kemi pasur të ndarë në tri zona dhe këtu po përfundojmë këtë pjesën e fundit. E dini të gjithë se si ka qenë qasja dhe rruga ka qenë gjendje katastrofale, kurse tani është transformua që i ndihmon për një trafik më të mirë në qytet. Dalëngadalë me intervenime të ndryshme nga të gjitha pjesët e kryeqytetit po transformojmë infrastrukturën ne kryeqytet. Vetëm po angazhohemi të bëjmë transformimin për të mirën e qytetarëve të kryeqytetit”, ka thënë Rama.

E drejtori i Investime Kapitale në Komunën e Prishtinës, Krenar Xhaferri, ka thënë se ky projekt prej 1.7 kilometra ka kushtuar dy milionë euro.

“Kjo na ndihmon në momentin e asfaltimit të rrugës ‘A’ dhe kjo ka me qenë si nyje kyçe për zgjedhjen e problemit të komunikacionit. Përveç që jep zhvillim Prishtinës së re, ka me qenë një nyje e jashtëzakonisht në zgjidhjen e komunikacionit. Kostoja është 950 mijë euro, në total dy milionë euro 1.7 kilometra segment”, ka thënë Xhaferi.

Lidhja e Sindikatave të Maqedonisë ka llogaritur vlerën e shportës minimale sindikaliste për muajin tetor 2024. Që një familje katër anëtarëshe të mund të jetojë për bazë i nevojiten 61 249 denarë, ndërsa në krahasim me muajin shtator kjo vlerë është më e ulët për vetëm 57 denarë.

Nëse jetohet me qera në apartament prej 60 m2, për muajin tetor kostoja e shportës konsumatore është 76 624 denarë. Sipas kreut të Lidhjes së Sindikatave Sllobodan Trendafilov, edhe pse masa e Qeverisë për kufizimin e marzheve ka dhënë pjesërisht rezultatin e dëshiruar, lakmia e tregtarëve është më e madhe dhe shteti duhet urgjentisht t’i frenojë ato.

Sindikatat kërkojnë që Qeveria t’i përfshijë në krijimin e masave që ata të jenë më të mira, të bëhen kontrolle më të mëdha dhe nëse është e nevojshme të ketë edhe ndëshkime për tregtarët e paskrupull që pasurohen në kurrizin e punëtorëve dhe qytetarëve.