Lajmet

Shqipëri: Arrestohet ish-deputeti i PS-së nën dyshime për shitje të sekreteve shtetërore

Published

2 years ago

on

Ish-deputeti i Partisë Socialiste në Shqipëri (PS), Jurgis Çyrbja, është arrestuar dhe po hetohet për tri vepra penale. Ai u arrestua mbrëmjen e 20 tetorit, ndërsa ditë më parë kishte hequr dorë nga mandati i deputetit, sipas tij, për arsye shëndetësore.

Struktura e Posaçme kundër Korrupsionit (SPAK) njoftoi se Çyrbja dyshohet për “tregim të sekretit shtetëror” më tepër se një herë, “përkrahje të autorit të krimit” dhe “korrupsion aktiv në zgjedhje”.

Hetimet ndaj ish-deputetit dhe bashkëpunëtorëve të tij janë realizuar në bashkëpunim me autoritetet evropiane të drejtësisë dhe Byronë Kombëtare të Hetimit, tha SPAK-u. Ndër provat e administruara në dosje janë dhe aktet e dërguara nga autoritetet franceze të drejtësisë, ndërsa personat e përfshirë në këtë aktivitet të paligjshëm kriminal kanë komunikuar ndërmjet tyre edhe me anë të aplikacionit “Sky Ecc”.

SPAK-u tha se funksionarë publikë – që deri tani nuk janë të identifikuar – kanë zbuluar sekrete shtetërore dhe kanë vënë në dijeni ish-deputetin. Këto të dhëna Çyrbja ja i ka dërguar përmes aplikacionit të enkriptuar “Sky Ecc” disa personave të shpallur në kërkim ndërkombëtar.

Gjithashtu bëhet e ditur se ish-deputeti socialist ishte vënë në dijeni të disa operacioneve të Policisë së Shtetit lidhur me kontrollet që do zhvilloheshin në zonën e Durrësit, për arrestimin e personave të shpallur në kërkim dhe ka dekonspiruar aksionet. Përmes këtij informacioni, personat e përfshirë në veprimtari të paligjshme janë fshehur dhe kanë arritur t’i shpëtojnë arrestimit, tha SPAK-u.

SPAK-u nënvizon se veprat penale për të cilat dyshohet, Çyrbja i ka kryer gjatë kohës që ka qenë deputet i Kuvendit të Shqipërisë.

“I hetuari për shkak të funksionit të tij si deputet i ka ofruar favorizime të ndryshme të hetuarit të shpallur në kërkim ndërkombëtar, A.H., duke ndërhyrë në agjenci të ndryshme të zbatimit të ligjit në Shqipëri, me qëllim favorizimin e tij apo të lidhjeve të ngushta familjare e shoqërore, duke konsumuar elementët e veprës penale ‘korrupsioni aktiv në zgjedhje’”, u tha në njoftim.

Në këmbim të këtyre favoreve të siguruara nga ish-deputeti, personi i shpallur në kërkim, sipas autoriteteve, siguronte votues në funksion të mbështetjes së tij si kandidat për deputet në Qarkun e Durrësit.

Me kërkesë të SPAK-ut, policia arrestoi ish-deputetin dhe një bashkëpunëtor të tij, ndërsa personi i shpallur në kërkim që prej janarit të vitit 2020, me inicialet A.H., nuk është arritur të arrestohet.

Policia ka kryer kontrolle në banesat e tyre dhe ka sekuestruar pesë telefona celularë, një hard disk të jashtëm, një pajisje regjistrimi në formë pakete, si dhe 1.100 euro e disa dokumente pronësie.

SPAK-u tha se hetimet vazhdojnë me administrimin e provave sa i përket implikimit të personave të tjerë, që dyshohet se janë të përfshirë në këtë veprimtari të paligjshme kriminale.

Jurgis Çyrbja ishte në fund të mandatit të dytë si deputet i Partisë Socialiste nga Qarku i Durrësit. Ai e dorëzoi mandatin një ditë pasi u thirr nga SPAK-u, duke deklaruar se mori këtë vendim për arsye shëndetësore.

Opozita e pati akuzuar Çyrbjen si person të lidhur me bandat kriminale, që kur ai u zgjodh deputetet në mandatin e parë në vitin 2017. Pas arrestimit të tij, kryetari i Partisë Demokratike në opozitë, Sali Berisha deklaroi se të gjitha akuzat e opozitës u provuan dhe kërkoi dorëheqjen e kryeministrit të Shqipërisë, Edi Rama. Ai kritikoi SPAK-un duke thënë se në vend që të dërgonte dosjen e ish-deputetit të PS-së në Kuvend, i kërkou atij të jepte dorëheqjen./REL/

Related Topics:
Continue Reading

lajme

Shkarkohet Blerim Isufaj nga posti i Kryeprokurorit të Prokurorisë Speciale

Published

6 hours ago

on

October 2, 2026

By

Kryeprokurori i Prokurorisë Speciale, Blerim Isufaj, është shkarkuar të premten nga Këshilli Prokurorial i Kosovës (KPK), ka mësuar KOHA.

Gjatë ditës ishte bërë e ditur se KPK-ja do të mblidhej në një takim të jashtëzakonshëm, ku në rend dite ishte diskutimi për performancën e Isufajt.

Isufaj ishte zgjedhur për herë të parë në krye të Prokurorisë Speciale në vitin 2019, ndërsa ishte rizgjedhur në këtë pozitë në vitin 2023.

Gjatë mandatit të tij, Isufaj ka qenë një prej figurave më të kritikuara në sistemin prokurorial nga Lëvizja Vetëvendosje. Ai ishte votuar edhe nga Këshilli Prokurorial për pozitën e Kryeprokurorit të Shtetit, por procesi kishte mbetur pezull dhe nuk ishte dekretuar nga ish-presidentja Vjosa Osmani.

Kryeministri Albin Kurti kishte deklaruar më herët se në sistemin prokurorial “shumica e problemeve kanë emër të përveçëm”, duke iu referuar Isufajt.

Më 2 shtator, Isufaj pati një përplasje me disa anëtarë të Këshillit Prokurorial të Kosovës. Përplasjet u zhvilluan gjatë shqyrtimit të raportit të punës së Prokurorisë Speciale për vitin 2025, i cili më pas u rrëzua nga KPK-ja.

D.L

Continue Reading

Aktualitet

Nis takimi mes Kurtit dhe Hamzës

Published

7 hours ago

on

October 2, 2026

By

Ka nisur takimi mes kryeministrit Albin Kurti dhe kryetarit të Partisë Demokratike të Kosovës (PDK), Bedri Hamza.

Në takim pritet të diskutohen çështja e zgjedhjes së presidentit të ri dhe ndryshimet e mundshme në Ligjin për Dhomat e Specializuara të Kosovës.

Hamza është parë duke hyrë në objektin e Qeverisë i shoqëruar nga deputeti i PDK-së, Rrahman Rama.

Kuvendi i Kosovës ka afat deri më 6 tetor për zgjedhjen e presidentit të ri. Nëse presidenti nuk zgjidhet brenda këtij afati, vendi shkon në zgjedhje të reja.

D.L

Continue Reading

lajme

“Jo në emrin tim” para Ministrisë së Drejtësisë “Voto Ligjin”, kërkohet miratimi i ligjit për mbrojtjen e UÇK-së

Published

8 hours ago

on

October 2, 2026

By

Protestuesit e iniciativës “Jo në emrin tim” kanë zhvilluar sot një aksion simbolik para Ministrisë së Drejtësisë, ku kanë vendosur një baner me mbishkrimin “Voto Ligjin”, duke kërkuar procedimin dhe miratimin e ligjit për mbrojtjen e UÇK-së.

Aktivisti Rron Kafegjolli deklaroi se qytetarët prej 17 ditësh po kërkojnë miratimin e këtij ligji, duke e cilësuar vonesën si të papranueshme.

Sipas Kafegjollit, bazuar në deklarimet e kryeministrit Albin Kurti, ligji po mbahet i bllokuar në Ministrinë e Drejtësisë dhe Ministrinë e Financave.

“Ky nuk është një udhëzim çfarëdo që mund ta kaloni lart e poshtë nëpër zyra. Sepse bëhet fjalë për ligjin që mbron të vërtetën e UÇK-së dhe ne nuk do të lejojmë zvarritjen e tij”, u shpreh ai.

Kafegjolli kritikoi ministren Donika Gërvalla dhe ministrin Hekuran Murati, duke kërkuar nga institucionet që të veprojnë në përputhje me kërkesat e qytetarëve.

“Institucionet e këtij shteti nuk mund të mbeten peng i inateve apo bindjeve personale të ministres Gërvalla dhe ministrit Murati. Shteti nuk është pronë private e dikujt”, tha Kafegjolli.

Duke iu referuar afatit për zgjedhjen e presidentit, i cili skadon më 6 tetor, ai i bëri thirrje Qeverisë që të mos e zvarrisë më tej procesin e miratimit të ligjit.

“Qeveria duhet ta dijë se rinia po ju vëzhgon dhe 6 tetori po afron me shpejtësi. Mos e provokoni durimin tonë”, deklaroi ai.

Kafegjolli e përmbylli fjalimin duke i bërë thirrje Qeverisë që ta dëgjojë zërin e protestuesve dhe të veprojë lidhur me kërkesën për miratimin e ligjit.

D.L

Continue Reading

Lajmet

Master në Gjuhë, Media dhe Komunikim në UBT: Formimi profesional për liderët e së ardhmes

Published

8 hours ago

on

October 2, 2026

By

Në një epokë ku media dhe komunikimi po transformohen me ritme të shpejta, profesionistët e së ardhmes kanë nevojë për njohuri të avancuara, mendim kritik dhe aftësi praktike.

Pikërisht për këtë, UBT ofron programin Master në Gjuhë, Media dhe Komunikim, të konceptuar për të përgatitur profesionistë të aftë për të udhëhequr në sektorin e medias, komunikimit dhe marrëdhënieve me publikun.

Programi Master në Gjuhë, Media dhe Komunikim ndërthur në mënyrë strategjike shkencat sociale, teknologjinë e informacionit, gazetarinë, Marrëdhëniet me Publikun (PR) dhe krijimin e përmbajtjes digjitale.

Përmes kombinimit të njohurive teorike me përvojën praktike dhe hulumtimin shkencor, studentët zhvillojnë kompetenca të avancuara për t’u përballur me kërkesat e tregut modern të punës, si në Kosovë ashtu edhe në tregun global.

Një rëndësi e veçantë i kushtohet etikës profesionale, mendimit kritik dhe aftësisë për të analizuar, interpretuar dhe menaxhuar komunikimin dhe imazhin e institucioneve dhe organizatave.

Kjo e bën programin një mundësi të përshtatshme për të gjithë ata që synojnë të avancojnë profesionalisht në media, gazetari, komunikim strategjik, PR, marketing dhe përmbajtje digjitale.

Përveç mundësisë për të ndjekur një program Master të orientuar drejt zhvillimit profesional, UBT ofron edhe një mbështetje të rëndësishme financiare për studentët. Përmes bursës Engaged Scholarship, studentet që janë pjesë e kësaj fushe përfitojnë 20% zbritje në tarifën e studimeve gjatë gjithë periudhës së programit Master.

Kjo bursë përfaqëson një mundësi konkrete për studentët që duan të investojnë në arsimimin e tyre të avancuar, duke pasur njëkohësisht mbështetje financiare gjatë gjithë rrugëtimit akademik.

Master në Gjuhë, Media dhe Komunikim në UBT është një mundësi për të zgjeruar njohuritë, për të zhvilluar kompetenca profesionale dhe për të ndërtuar bazat e një karriere të suksesshme në një sektor që ndryshon vazhdimisht.

Apliko në programin Gjuhë, Media dhe Komunikim -Master dhe përfito 20% bursë përmes Engaged Scholarship.

Continue Reading

Të kërkuara