Sekretari i përgjithshëm i NATO-s, Mark Rutte, ka thënë se pret që pas zgjedhjeve në Kosovë, të ketë një Qeveri stabile dhe se NATO-ja do të punojë me këdo që do të udhëheqë me vendin. Ai e ka thënë këtë në një konferencë me gazetarët, ku ka folur për takimin e ministrave të Mbrojtjes të vendeve anëtare, që zhvillohet të enjten në selinë e kësaj aleance në Bruksel.

“Ky ka qenë një proces demokratik. Ajo që ne kuptojmë është se i kemi rezultatet fillestare, por ende po vazhdon numërimi i votave dhe do t’i kemi edhe rezultatet finale. Dhe, bazuar në rezultatet deri tash duket se do të ketë një qeveri të koalicionit“, ka thënë Rutte.

“Natyrisht, ne sigurojmë që do të punojmë me këdo që do të udhëheqë me vendin. Dhe natyrisht u dëshirojmë të gjithë politikanëve gjithë të mirat në drejtimin e hapësirës politike dhe që të sigurojnë që të ketë një Qeveri stabile sa më parë që të jetë e mundur”, ka thënë Rutte.

Të dielën, më 9 shkurt, në Kosovë u mbajtën zgjedhjet parlamentare.

Nga rezultatet preliminare të publikuara deri më tash nga Komisioni Qendror i Zgjedhjeve (KQZ), Lëvizja Vetëvendosje, i ka fituar 40.81 për qind të votave.

Partitë opozitare, Partia Demokratike e Kosovës, i ka fituar 22.16 për qind të votave, ndërsa Lidhja Demokratike e Kosovës i ka siguruar 17.60 për qind të votave.

Koalicioni mes Aleancës për Ardhmëninë e Kosovës dhe NISMA-s, fitoi 7.46 për qind të votave. Ndërkohë, Lista Serbe – partia më e madhe e serbëve të Kosovës, i fitoi 4.43 për qind të votave.

Zgjedhjet e 9 shkurtit ishin zgjedhjet e para të rregullta që Kosova ka mbajtur që nga shpallja e pavarësisë.

Vëzhguesit thanë se zgjedhjet ishin të qeta, me disa parregullsi, por pa incidente të mëdha.

Dalja ishte 40.59 për qind e mbi 1.9 milion votuesve me të drejtë vote në Kosovë. Paraprakisht, për këto zgjedhje ka votuar edhe diaspora, nëpërmjet postës, por edhe fizikisht në disa përfaqësi diplomatike të Kosovës në botë./REL/

Gjykata Themelore në Tetovë ka marrë një vendim që Ziadin Sela është kryetari legjitim i Aleancës për Shqiptarët dhe se vulat e partisë i takojnë atij. Sipas këtij vendimi, kërkesa për ndryshimin e kryetarit nga Arben Taravari tek Ziadin Sela është e ligjshme dhe është miratuar në përputhje me statutin e partisë. Vendimi i gjykatës vërteton se Kongresi i 4-të i jashtëzakonshëm ka zgjedhur Ziadin Selën si kryetar të ri të partisë.

Në anën tjetër, krahu i Arben Taravarit ka reaguar duke deklaruar se vendimi është një interpretim i njëanshëm dhe se Taravari është kryetari legjitim i Aleancës për Shqiptarët, mbështetur nga shumica e anëtarëve të partisë. Ata kanë shprehur besimin se Gjykata e Apelit do ta vlerësojë ndryshe këtë çështje dhe do të përfundojë në favor të Taravarit.

Përplasjet brenda partisë janë thelluar pas zgjedhjeve të vitit 2024, ku dy grupet e Aleancës për Shqiptarët garuan në koalicione të ndryshme, me Taravarin duke u bashkuar me opozitën dhe Selën që mbështeti një front tjetër. Kjo ka çuar në ndarjen e partisë në dy grupe dhe një proces gjyqësor të vazhdueshëm për vendosjen e liderit legjitim të partisë./UBTNews/

Ndërprerja e projekteve së Agjencisë së SHBA-së për Zhvillim Ndërkombëtar (USAID) për Kosovë, e dëmton pozitën e SHBA-së në botë dhe shton rrezikun për vendet e cenueshme, ka thënë ish-ambasadori amerikan në Kosovë, Jeffrey Hovenier.

Në një opinion të publikuar në “TheBellighamHarald”, Hovenier ka thënë po ashtu se shpërbërja e USAID-it dëmton padrejtësisht nënpunësit publikë dhe jopartiakë.

“Përpjekja e administratës Trump për të shpërbërë Agjencinë e Shteteve të Bashkuara për Zhvillim Ndërkombëtar (USAID) dëmton interesat strategjike të SHBA-ve, dëmton reputacionin tonë ndërkombëtar, rrit rrezikun për popullatat më të cenueshme në botë dhe dëmton padrejtësisht nënpunësit publikë besnikë dhe jopartiakë”, ka shkruar Hovenier.

Ish-ambasadori amerikan ka përmendur edhe Kosovën.

“E di këtë mirë — deri gjashtë javë më parë, isha ambasador i SHBA-ve në Kosovë — një vend që ka një mision të madh të USAID-it. Kolegët tanë të USAID-it ishin një pjesë thelbësore e ekipit ndërinstitucional të ‘Country Team’ që unë drejtoja, duke mbështetur përpjekjet tona strategjike për të promovuar stabilitetin dhe prosperitetin në një cep të pasigurt të Evropës”, ka thënë ai.

Sipas tij, USAID është një mjet i vlefshëm i politikës së jashtme amerikane.

“Me më pak se 1 për qind të buxhetit federal, puna e kolegëve tanë të USAID-it është një investim i leverdishëm për Amerikën. Zvogëlimi ose eliminimi i programeve dhe stafit të USAID-it është një dhuratë për konkurrentët tanë. Investimet e Kinës në zhvillim në të gjithë botën janë rritur me 525 për qind gjatë 15 viteve të fundit; tërheqja e programeve dhe personelit zhvillimor të SHBA-ve zvogëlon ndikimin tonë dhe aftësinë për t’iu përgjigjur në mënyrë efektive zhvillimeve në rajone kyçe strategjike.”

“Dobësimi apo shkatërrimi i agjencisë nuk i shërben asnjë partie politike dhe është në dëm të të gjithë amerikanëve. … Edhe pse nuk biem dakord për të gjitha çështjet, ne jemi plotësisht dakord që USAID dhe programet amerikane të ndihmës së huaj janë jetike për interesat tona, se burrat dhe gratë profesionistë të USAID-it na kanë shërbyer mirë dhe se është detyra e administratës dhe Kongresit që të mbrojnë me shpejtësi rolin ligjor të agjencisë. Kjo përpjekje e administratës Trump për të shpërbërë USAID-in dëmton interesat prioritare të SHBA-së, mohon ndihmën jetike dhe trajton padrejtësisht shërbyesit publikë besnikë të SHBA-së”, ka shtuar ai.

Jeff Hovenier, së fundmi doli në pension pas 34 vitesh në shërbimin e Jashtëm të SHBA-ve. Detyra e tij e fundit ishte si ambasador i SHBA-ve në Kosovë.

Ekipet e shpëtimit nga Ministria Ruse e Situatave të Emergjencave kanë evakuuar të gjithë peshkatarët që ishin bllokuar në një ajsberg lundrues në Detin e Okhotsk në rajonin Sakhalin.

“Të gjithë peshkatarët janë evakuuar nga lumi i akullit. Gjithsej 139 persona. 31 shpëtimtarë dhe 17 njësi pajisjesh janë vendosur në vendin e ngjarjes “, thuhet në deklaratën në Telegram, raportoi TASS.

Shërbimi për shtyp i departamentit territorial të Ministrisë së Situatave të Emergjencave njoftoi se 44 persona u evakuuan me një helikopter të Ministrisë së Situatave të Emergjencave Ruse, 32 persona me varka të Ministrisë së Situatave të Emergjencave Ruse dhe 63 persona me varka vullnetare.

Të tjerët arritën vetë në breg.

Një çarje prej 10 metrash u formua nga fshati Malki deri në grykën e lumit Dolinka dhe shpëtimtarët përdorën një helikopter Mi-8 dhe një hovercraft për evakuim.

Më parë, agjencia ruse e lajmeve RIA raportoi se në Sakhalin, disa peshkatarë të mbërthyer në akull lundrues refuzuan të evakuoheshin për shkak të kapjes së tyre.

“Shpëtimtarët nga Ministria ruse e Emergjencave po përpiqen të evakuojnë burrat që lundrojnë në Detin Okhotsk, por disa tifozë të sporteve ekstreme nuk duan të largohen pa kapur në asnjë rrethanë ”, thuhet në deklaratë.