Ushtarët e Indisë dhe Pakistanit kanë këmbyer zjarr në ditën e katërt me radhë në Kashmirin e kontestuar, tha ushtria e Nju Delhit më 28 prill.

Nuk ka raportime për viktima dhe Islamabadi ende nuk ka konfirmuar ende lajmin për këmbimin e zjarrit.

India e ka akuzuar Pakistanin se mbështet “terrorizimin ndërkufitar” pasi një sulmues i armatosur vrau 26 persona javën e kaluar, që ishte sulmi më i rëndë ndaj civilëve në Kashmirin – me shumicë myslimane – në çerekshekullin e fundit.

Ky sulm ka rritur tensionet mes dy rivalëve me fuqi bërthamore.

Islamabadi ka mohuar se ka pasur ndonjë rol, duke thënë se kjo ishte një përpjekje për ta lidhur Pakistanin me sulmin dhe duke u zotuar se do të përgjigjet ndaj veprimeve të Indisë.

“Gjatë natës midis 27 dhe 28 prillit… postet e ushtrisë pakistaneze nisën zjarr të paprovokuar përtej vijës së kontrollit”, tha ushtria indiane, duke iu referuar kufirit de facto në Kashmirin e kontestuar.

“Trupat indiane janë përgjigjur menjëherë dhe në mënyrë efektive”, u tha në deklaratë.

Pas sulmit të 22 prillit, Nju Delhi ndërmori disa hapa diplomatikë, duke tërhequr vizat për pakistanezët, duke pezulluar një marrëveshje për ndarjen e ujërave si dhe njoftoi për mbylljen e kufirit kryesor tokësor me Pakistanin.

Në përgjigje, Islamabadi urdhëroi dëbimin e diplomatëve dhe këshilltarëve ushtarakë indianë, anuloi vizat për shtetasit indianë dhe ndaloi avionët e Indisë që të përdornin hapësirën ajrore pakistaneze.

Kombet e Bashkuara u kanë bërë thirrje palëve për “përmbajtje maksimale” në mënyrë që çështjet të “mund të zgjidhen në mënyrë paqësore përmes një angazhimi të ndërsjellë dhe konstruktiv”./REL/

Gjermania i ka bërë thirrje Ukrainës të mos pranojë propozimin e fundit për paqe të presidentit amerikan Donald Trump, i cili sugjeron që Kievi të heqë dorë nga territore të mëdha në këmbim të një armëpushimi me Rusinë.

Ministri gjerman i Mbrojtjes, Boris Pistorius, deklaroi të dielën për transmetuesin publik ARD se një marrëveshje e tillë do të ishte e barasvlershme me një “kapitullim”. Sipas tij, ndonëse Ukraina mund të jetë e detyruar të bëjë disa kompromise territoriale për të arritur një armëpushim të qëndrueshëm, ajo nuk duhet të pranojë kushtet e ofruara nga Trump.

“Ukraina padyshim e di se mund të duhet të heqë dorë nga një pjesë e territorit për të arritur një armëpushim të qëndrueshëm që është rënë dakord me mirëbesim”, tha Pistorius. “Por ata sigurisht nuk do të shkojnë aq larg, ose nuk duhet të shkojnë aq larg, sa propozimi i fundit nga presidenti amerikan.”

Pistorius shtoi se propozimi i paraqitur nga Trump nuk sjell asnjë vlerë të shtuar për Ukrainën dhe se një marrëveshje e tillë mund të ishte arritur edhe një vit më parë, në kushte që ai i konsideron të papranueshme.

Sipas raportimeve të mëparshme nga Axios, e ashtuquajtura “ofertë përfundimtare” e Trump përfshin njohjen nga Shtetet e Bashkuara të Krimesë si pjesë e Rusisë, njohjen jozyrtare të kontrollit rus mbi territoret e pushtuara pas vitit 2022, ndalimin e anëtarësimit të Ukrainës në NATO dhe heqjen e sanksioneve kundër Rusisë të vendosura që prej vitit 2014.

Komentet e Pistorius vijnë në një kohë kur në Washington po diskutohet seriozisht mundësia e vazhdimit të rolit ndërmjetësues në konflikt. Senatori amerikan Marco Rubio deklaroi së fundmi se administrata Trump po shqyrton nëse palët janë mjaftueshëm afër një marrëveshjeje për të justifikuar një investim të mëtejshëm diplomatik. Megjithatë, Rubio nuk specifikoi një afat përfundimtar për arritjen e një përparimi.

Presidenti amerikan Donald Trump thotë se është shumë i zhgënjyer me Rusinë dhe beson se Presidenti Vladimir Putin duhet të ndalojë së shtëni mbi Ukrainën dhe të bëjë marrëveshje.

”Volodymyr Zelensky është më i qetë dhe dëshiron një marrëveshje”, theksoi Trump pas takimit me presidentin ukrainas në Kishën e Shën Pjetrit.

”Takimi ynë shkoi mirë. Zelensky po bën një punë të mirë dhe dëshiron një marrëveshje. Ai ka kërkuar më shumë armë”, shtoi Trump.

“Mendoj se po, theksoi Trump në përgjigje të pyetjes nëse sipas mendimit të tij, presidenti ukrainas Volodymyr Zelensky do të ishte i gatshëm të lëshonte Krimenë si pjesë të një marrëveshjeje për t’i dhënë fund luftës.

“Krimea u dorëzua vite më parë, pa asnjë të shtënë. Pyeteni Obamën”, theksoi Trump.

Shën Pjetri është zyra më e bukur që kam parë ndonjëherë. Ishte një pamje shumë e bukur”, theksoi Trump duke iu referuar takimit me Zelenskyn në prag të funeralit të Papa Françeskut./ATSH/

Sekretari amerikan i Shtetit, Marco Rubio, ka deklaruar se java e ardhshme do të jetë vendimtare për arritjen e një marrëveshjeje paqeje që synon t’i japë fund luftës mes Rusisë dhe Ukrainës.

Sipas NBC News, Rubio theksoi se Ukraina dhe Rusia janë tani më afër një marrëveshjeje paqeje se sa në çdo moment të tre viteve të fundit, duke vënë në dukje se një marrëveshje duhet të finalizohet në të ardhmen e afërt.

Rubio shpjegoi se Shtetet e Bashkuara kanë shmangur vendosjen e sanksioneve të reja ndaj Rusisë në një përpjekje për të krijuar kushte më të favorshme për negociata. Ai paralajmëroi se çdo veprim që do të pengonte dialogun mund të çonte në dy vjet të tjera luftë, një skenar që Shtetet e Bashkuara dëshirojnë të shmangin.

“Sa herë që filloni të ndërmerrni veprime të tjera, po e dënoni veten me dy vjet të tjera luftë dhe ne nuk duam që kjo të ndodhë,” tha Rubio. Ai gjithashtu theksoi se SHBA është e vetmja palë që aktualisht angazhohet në dialog me të dyja palët, duke theksuar rolin unik të Uashingtonit në këtë proces diplomatik të vazhdueshëm.

Në një kontekst të ngjashëm, Presidenti i SHBA, Donald Trump, gjatë funeralit të Papës Françesku në Vatikan, siguroi presidentin estonez Alar Karis se Shtetet e Bashkuara do të mbeten të angazhuara në negociatat e paqes për Ukrainën, duke shtuar se palët ishin “shumë afër” një rezolute, sipas mediave estoneze.