Botë

Kina, Meksika, Kanadaja reagojnë ndaj kërcënimeve të Trumpit për tarifa

Published

11 months ago

November 27, 2024

UBTnews

Kina dhe Meksika kanë reaguar ashpër pasi presidenti i ardhshëm i SHBA-së, Donald Trump, kërcënoi se do ta nisë presidencën e tij me një luftë të menjëhershme tregtare kundër tre partnerëve kryesorë ekonomikë të SHBA-së – Kinës, Meksikës dhe Kanadasë.

Trump paralajmëroi në rrjete sociale për tarifa të mëdha importi ndaj fqinjëve, Kanadasë dhe Meksikës, si dhe ndaj Kinës, nëse këto vende nuk ndalojnë emigracionin ilegal dhe trafikimin e drogës në Shtetet e Bashkuara.

Kina reagoi duke thënë se “askush nuk do të fitojë në një luftë tregtare”, ndërsa presidentja meksikane, Claudia Sheinbaum, paralajmëroi se “për çdo tarifë, do të ketë një përgjigje të ngjashme”.

Një burim nga qeveria kanadeze tha se kryeministri Justin Trudeau kishte bërë një telefonatë me Trumpin dhe kishte zhvilluar një diskutim “produktiv”, pa dhënë detaje të mëtejshme.

Këto tarifa kërcënojnë të çrregullojnë ekonominë globale, të thellojnë tensionet tashmë të mëdha me Kinën dhe të përmbysin marrëdhëniet me dy fqinjët e mëdhenj të SHBA-së.

Në platformën e tij Truth Social, Trump tha të hënën vonë se do të zbatojë tarifat menjëherë pasi të marrë detyrën më 20 janar, nëse kërkesat e tij nuk plotësohen.

Postimet sinjalizojnë seriozitetin e Trumpit për premtimin e tij kryesor të fushatës për të përdorur fuqinë ekonomike të SHBA-së si levë për çështje që shpesh nuk kanë lidhje me tregtinë – veçanërisht pretendimet e tij se Shtetet e Bashkuara janë të rrezikuara nga krimi dhe migrantët e rrezikshëm të huaj.

Të martën, Trump emëroi dy figura të rëndësishme në ekipin e tij ekonomik: Jamieson Greer si përfaqësuesin e tij tregtar dhe Kevin Hassett si këshilltarin e tij kryesor ekonomik, në krye të Këshillit Ekonomik Kombëtar të Shtëpisë së Bardhë.

Të dy kanë pasur role në administratën e tij të parë, me Greer që ka shërbyer si shef i kabinetit të ish-përfaqësuesit tregtar të SHBA-së, Robert Lighthizer.

“Do të nënshkruaj të gjitha dokumentet e nevojshme për t’i ngarkuar Meksikës dhe Kanadasë një tarifë 25 për qind për TË GJITHA produktet që hyjnë në Shtetet e Bashkuara”, postoi më herët Trump.

“Kjo tarifë do të mbetet në fuqi deri në atë moment kur droga, veçanërisht Fentanili, dhe të gjithë emigrantët e paligjshëm të ndalin këtë pushtim të vendit tonë!”, shtoi ai.

Në një postim tjetër, Trump tha se do të vendosë një tarifë dhjetë për qind ndaj Kinës, “mbi çdo tarifë shtesë”, sepse ekonomia e dytë më e madhe në botë “po dështon të ekzekutojë trafikantët e fentanilit”.

Liu Pengyu, zëdhënës i ambasadës kineze në SHBA, i tha AFP-së se “Kina beson se bashkëpunimi ekonomik dhe tregtar midis Kinës dhe SHBA-së është i ndërsjelltë dhe përfitues”.

Presidentja e Meksikës, Sheinbaum, i është kundërpërgjigjur Trump, duke thënë se diplomacia e tij e tarifave është “e papranueshme” dhe e bazuar në pretendime të gabuara.

“Nuk është me kërcënime apo tarifa që do të ndalet fenomeni i migracionit, as konsumimi i drogës në Shtetet e Bashkuara”, tha ajo.

Sheinbaum theksoi se industria narkotike e Meksikës ekziston kryesisht për të shërbyer kërkesën në Shtetet e Bashkuara.

“Shtatëdhjetë për qind e armëve të paligjshme të konfiskuara nga kriminelët në Meksikë vijnë nga vendi juaj”, tha ajo. “Tragjikisht, është në vendin tonë ku humben jetë nga dhuna që vjen si pasojë e përmbushjes së kërkesës për drogë në vendin tuaj”.

William Reinsch, këshilltar i lartë në Qendrën për Studime Strategjike dhe Ndërkombëtare, tha se kërcënimet online të Trumpit mund të jenë bllof – një strategji e “kërcënimit, e ndjekur nga negociatat”.

Megjithatë, ndërsa ishte në detyrë, Trump nisi një luftë të plotë tregtare me Kinën, duke vendosur tarifa të rëndësishme mbi qindra miliarda dollarë mallra kineze.

Kina u kundërpërgjigj me tarifa hakmarrëse ndaj produkteve amerikane, duke prekur veçanërisht fermerët amerikanë.

Ekonomistët thonë se tarifat mund të dëmtojnë rritjen ekonomike të SHBA-së dhe të nxisin inflacionin, pasi ato paguhen nga importuesit që shpesh ia kalojnë këto kosto konsumatorëve.

Trump ka thënë se do ta vendosë Howard Lutnickun, një kritik të Kinës, si sekretarin e tij të tregtisë për të udhëhequr politikën tregtare.

Lajmet

Trump: Putin duhet të ndalë luftën në Ukrainë e jo të testojë raketa

Published

14 hours ago

October 27, 2025

UBT News

Presidenti amerikan, Donld Trump, tha se homologu i tij rus, Vladimir Putin, duhet t’i japë fund luftës në Ukrainë në vend se të testojë raketa me kapacitet bërthamor.

Udhëheqësi amerikan shtoi se vendi i tij e ka të pozicionuar një nëndetëse bërthamore afër brigjeve të Rusisë.

Një ditë më parë, Putin tha se Rusia ka testuar me sukses raketën lundruese, që funksionon me energji bërthamore, Burevestnik – armë me kapacitet bërthamor që Moska pretendon se mund të depërtojë në çdo mburojë mbrojtëse.

Kurse, Putin tha se shteti do të lëvizë drejt dislokimit të kësaj arme.

Moska theksoi se raketa 9M730 Burevestnik (e njohur si Storm Petrel) kishte fluturuar 14.000 kilometra.

“Ata e dinë që ne kemi një nëndetëse bërthamore, më të mirën në botë, pranë brigjeve të tyre. Kështu që, nuk kemi nevojë të fluturojmë 8 mijë milje (14.000 kilometra)”, u tha Trump gazetarëve nga Shtëpia e Bardhë.

Që kur u bë publik raketa 9M730 Burevestnik më 2018, Putin e ka paraqitur këtë armë si përgjigje ndaj lëvizjeve të SHBA-së për të krijuar një mburojë nga sulmet ajrore, pasi Uashingtoni më 2001 u tërhoq nga Traktati për raketa antibalistike i vitit 1972.

Trump vazhdimisht ka folur për dislokimin e nëndetëseve amerikane pranë brigjeve të Rusisë, pas deklaratave të ish-presidentit rus, Dmitry Medvedev, mbi rrezikun e një lufte midis dy fuqive bërthamore.

Megjithatë, është gjë e rrallë që palët të flasin publikisht për vendndodhjen e nëndetëseve të armatosura me armë bërthamore.

Duke folur për testimin e raketës ruse, Trump u shpreh:“Ne testojmë raketa gjatë gjithë kohës. Ata nuk po luajnë lojëra me ne, e as ne nuk po luajmë lojëra me ta”, përfundoi Trump./S.K/EO/

Lajmet

Dy të arrestuar për vjedhjen e bizhuterive në muzeun e Luvrit në Paris

Published

19 hours ago

October 27, 2025

UBT News

Mediat franceze kanë njoftuar se dy të dyshuar janë arrestuar për vjedhjen e xhevahireve të çmuara të kurorës nga muzeu i Luvrit në Paris.

Zyra e prokurorit të Parisit tha se njëri prej burrave ishte marrë në paraburgim ndërsa po përgatitej të merrte një fluturim nga Aeroporti Charles de Gaulle, njofton BBC.

Sendet me vlerë 88 milionë euro (76 milionë paund; 102 milionë dollarë) u vodhën nga muzeu më i vizituar në botë të dielën e kaluar, kur katër hajdutë me vegla elektrike hynë me forcë në ndërtesë në mes të ditës.

Ministri i drejtësisë i Francës ka pranuar se protokollet e sigurisë dështuan, duke e lënë vendin me një imazh jo të mirë./S.K/KP/BBC/

Lajmet

India dhe Kina rifillojnë fluturimet direkte, përmirësohen marrëdhëniet

Published

19 hours ago

October 27, 2025

UBT News

Fluturimet direkte midis Indisë dhe Kinës kanë rifilluar, ndërsa marrëdhëniet midis vendeve duket se po përmirësohen.

Fluturimi IndiGo 6E 1703 nga Kolkata u ul në qytetin jugor kinez të Guangzhou të hënën, duke transportuar rreth 180 pasagjerë, njofton BBC.

Fluturimet midis dy vendeve u pezulluan për herë të parë gjatë pandemisë Covid në fillim të vitit 2020 dhe nuk u rifilluan pasi një përplasje vdekjeprurëse në një zonë kufitare të diskutueshme të Himalajeve përshkallëzoi tensionet.

Por të dy vendet kanë rindërtuar vazhdimisht marrëdhëniet dhe vitin e kaluar ata arritën një marrëveshje historike mbi patrullat kufitare./S.K/KP/BBC/

Lajmet

Uragani Melissa forcohet në kategorinë 4 ndërsa i afrohet Xhamajkës

Published

19 hours ago

October 27, 2025

UBT News

Uragani Melissa arriti në kategorinë 4 ndërsa lëvizi në veriperëndim përmes Detit të Karaibeve raportoi Qendra Kombëtare e Uraganeve e SHBA-së (NHC).

Uragani Melissa që po lëviz ngadalë drejt Xhamajkës, sipas parashikimeve thuhet se mund të intensifikohet në një stuhi të Kategorisë 5- niveli më i lartë i forcës së uraganit, ndërsa i afrohet vendit ishullor.

“Përmbytje të menjëhershme dhe rrëshqitje toke kërcënuese për jetën dhe katastrofike” parashikohen në disa pjesë të Xhamajkës dhe Hispaniolës jugore deri në mes javë, paralajmëroi NHC në rrjetin X.

Natën e së dielës, Melissa ishte epiqendra rreth 205 kilometra (125 milje) në jug-jugperëndim të Kingstonit, Xhamajka, duke sjellë erëra maksimale të qëndrueshme prej 239 km/orë (145 mph), sipas NHC.

Këto erëra mund të rriten në shpejtësi në më shumë se 250 km/orë nëse arrin forcën e Kategorisë 5 të hënën siç pritet thuhet në njoftim.

Uragani, i cili po udhëton në drejtim të perëndimit me vetëm 7 km/orë, pritet të lëvizë pranë ose mbi Xhamajka herët të martën përpara se të kalojë Kubën në Bahamas juglindore gjatë së mërkurës.

Deri në 1,016 mm (40 inç) shi mund të godasin pjesë të Xhamajkës, Haitit dhe Republikës Dominikane, ndërsa Shërbimi Meteorologjik i Xhamajkës tha se një valë stuhie deri në 4 metra (13 këmbë) pritej përgjatë bregdetit jugor të vendit.

Një paralajmërim për uragan, që tregon kushte të mundshme për uragan, u lëshua për gadishullin jugperëndimor të Haitit dhe Kubën juglindore./S.K/Deutsche Welle/