Për herë të parë pas gati një shekulli, vepra “La femme aux lilas” e piktorit francez Pierre-Auguste Renoir do të dalë në ankand, me një vlerë të parashikuar nga 25 deri në 35 milionë dollarë.

Piktura do të prezantohet më 18 maj në ankandin e Artit të Shekullit të 20-të të shtëpisë prestigjioze Christie’s. Ajo paraqet Nini Lopez, një aktore të re pariziene, të portretizuar me flokë të artë, lëkurë të zbehtë dhe faqe të skuqura, teksa mban një buqetë me lule të bardha dhe rozë dhe shikon në distancë.

Vepra u ble fillimisht në vitin 1929 për 100 mijë dollarë nga koleksionistja amerikane Joan Whitney Payson dhe bashkëshorti i saj, Charles Payson. Që atëherë, ajo ka qenë pjesë e një prej koleksioneve më të rëndësishme të artit impresionist dhe post-impresionist në Shtetet e Bashkuara. Familja Whitney-Payson njihet si një ndër koleksionistet më të mëdha amerikane të shekullit 20, ndërsa koleksioni i tyre sot është në huazim të përhershëm në Muzeun e Artit Portland në Maine. Aktualisht, piktura është pjesë e koleksionit të Lorinda Payson de Roulet, vajza e çiftit.

Dalja në ankand e kësaj vepre pas 97 vitesh konsiderohet një moment i rëndësishëm për tregun ndërkombëtar të artit, duke rikthyer në vëmendje një nga emrat më të mëdhenj të impresionizmit.

Më 20 dhe 21 prill, Biblioteka Kombëtare e Kosovës mori pjesë në aktivitetet e rrjetit TRADUKI, duke shënuar një moment të rëndësishëm në angazhimin e saj ndërkombëtar.

Më 20 prill, Drejtoresha e Bibliotekës mori pjesë në takimin e programit të TRADUKI-t, ndërsa më 21 prill u mbajt takimi i 37-të i Komitetit të këtij rrjeti, ku Biblioteka Kombëtare e Kosovës mori pjesë për herë të parë si anëtarja më e re. Të dyja takimet u mbajtën në Sarajevë, me pjesëmarrjen e përfaqësuesve nga shtetet anëtare të rrjetit TRADUKI.

Gjatë këtyre takimeve, Drejtoresha prezantoi Bibliotekën Kombëtare të Kosovës, skenën letrare kosovare dhe synimet strategjike të institucionit për zgjerimin dhe integrimin në rrjetin letrar evropian. U theksua në veçanti rëndësia e promovimit dhe përkthimit të letërsisë shqipe, si dhe krijimi i bashkëpunimeve të qëndrueshme me institucione të librit dhe të kulturës në rajon dhe në Evropë.

Kjo pjesëmarrje përfaqëson një hap të rëndësishëm drejt fuqizimit të prezencës së Kosovës në rrjetet ndërkombëtare të librit dhe kulturës, duke hapur mundësi të reja për autorët, përkthyesit dhe letërsinë shqipe në përgjithësi.

Kornisti i jashtëzakonshëm Felix Klieser do të vijë në Prishtinë për një koncert me Orkestrën e Filharmonisë së Kosovës. Nën drejtimin e Gregory Charette, ai do të interpretojë Koncertin nr. 1 për korno nga Strauss, si dhe Koncertin për dy korno nga Haydn, ku do t’i bashkohet edhe kornisti shqiptar Ilir Kodhima.

I njohur ndërkombëtarisht për virtuozitetin dhe muzikalitetin e tij të rrallë, Klieser konsiderohet një nga emrat më të spikatur të skenës bashkëkohore të kornos, duke performuar me orkestrat më prestigjioze në botë.

Në pjesën e dytë të koncertit, Orkestra e Filharmonisë së Kosovës do të interpretojë Simfoninë nr. 5 të Schubert-it.

Në shënim të Ditës Botërore të Inovacionit dhe Kreativitetit, dje u mbajt një ngjarje e organizuar nga Ministria e Industrisë, Ndërmarrësisë, Tregtisë dhe Inovacionit, ku u mblodhën përfaqësues institucionalë, partnerë dhe akterë të rëndësishëm të fushës së inovacionit dhe zhvillimit.

Në këtë aktivitet morën pjesë Kryeministri Albin Kurti, Ministrja e Kulturës Saranda Bogujevci, si dhe Ministrja e Ndërmarrësisë Mimoza Kusari-Lila, së bashku me përfaqësues të tjerë institucionalë dhe partnerë relevantë. Gjatë diskutimeve u theksua nevoja për forcimin e një ekosistemi funksional që mbështet transformimin e ideve në iniciativa konkrete, përmes politikave mbështetëse, financimit të inovacionit, bashkëpunimit ndërinstitucional dhe lidhjes së ngushtë ndërmjet sektorit publik dhe privat.

Ky angazhim synon të fuqizojë kreativitetin dhe inovacionin si motor të zhvillimit ekonomik, duke krijuar mundësi të reja për të rinjtë, bizneset dhe sektorët kreativë në Kosovë.