Këngëtarja dhe sipërmarrësja botërore Rihanna është shfaqur në numrin më të ri të revistës “W”, në një edicion të veçantë të dedikuar kulturës pop, ku përfshihet edhe një fotosesion artistik së bashku me vajzën e saj të vogël, Rocki.

Në këtë botim, figura të njohura të muzikës dhe modës si A$AP Rocky, SZA, Mariah Carey dhe Mary J. Blige ndajnë kujtime dhe vlerësime për artisten, e cila konsiderohet si një nga emrat më ndikues në industrinë moderne të muzikës dhe stilit.

Rihanna nisi karrierën në moshë të re me hitin “Pon de Replay” dhe ndër vite ka arritur sukses të madh me 9 çmime Grammy dhe 14 këngë që kanë kryesuar toplistat amerikane. Përveç muzikës, ajo ka ndërtuar edhe një perandori biznesi me markat Fenty Beauty dhe Savage x Fenty, të cilat janë vlerësuar për qasje gjithëpërfshirëse në modë dhe bukuri. Në intervistat për revistën, bashkëpunëtorët e saj e përshkruajnë si një figurë që ka ndryshuar standardet e industrisë, duke mbetur gjithmonë autentike dhe inovative.

Në fotosesionin e realizuar nga Tim Walker, vëmendje të veçantë ka tërhequr edhe paraqitja e vajzës Rocki, në një nga daljet e saj të para publike, e cila është komentuar për konceptin artistik dhe stilin unik.

Aktorja britanike Beverley Callard u detyrua të largohej nga reality show “I’m A Celebrity… South Africa” pasi humbi ndjenjat në kamp, muaj para se të diagnostikohej me kancer të gjirit.

Callard, e njohur për rolin e saj si Liz McDonald në “Coronation Street”, kishte zbuluar në shkurt se vuan nga kjo sëmundje. Në episodin e transmetuar të martën, i xhiruar në shtator para diagnozës, ajo u shfaq emocionale duke njoftuar largimin, duke thënë se ishte “shumë e zhgënjyer”.

Në një video të publikuar në rrjetet sociale, aktorja shpjegoi se ishte ndier keq dhe kishte humbur ndjenjat për një kohë të shkurtër gjatë xhirimeve. Ajo u dërgua në një njësi mjekësore, ku mjekët vendosën se nuk mund të vazhdonte garën. Callard theksoi se në atë kohë nuk ishte në dijeni për sëmundjen, por e ndiente se gjendja e saj shëndetësore nuk ishte e mirë. Ajo shtoi se ky moment shënoi fillimin e problemeve të saj shëndetësore.

Pavarësisht kësaj, aktorja u shpreh e vendosur për ta përballuar sëmundjen, duke theksuar se do ta mposhtë atë. Ajo gjithashtu u shpreh krenare për pjesëmarrjen në spektakël dhe dëshirën për të dëshmuar se mosha nuk është pengesë.

Gjatë episodit, Callard u pa duke i njoftuar konkurrentët për largimin e saj, ndërsa ata e mbështetën emocionalisht, duke theksuar se shëndeti i saj është më i rëndësishëm.

Mbi 20 vjet pas publikimit të filmit të parë “The Devil Wears Prada”, yjet kryesore u ribashkuan në Londër për të festuar daljen e vazhdimit të shumëpritur.

Në film rikthehen aktorët kryesorë Meryl Streep, Anne Hathaway, Emily Blunt dhe Stanley Tucci, ndërsa kastit i janë shtuar edhe emra të rinj si Simone Ashley dhe Kenneth Branagh. Ashtu si në filmin origjinal të vitit 2006, historia përqendrohet në jetën e personazheve kryesore dhe sfidat e tyre në botën e gazetarisë së modës në një peizazh mediatik në ndryshim.

Anne Hathaway u shpreh se ishte shumë kënaqësi të rikthehej në këtë projekt pas dy dekadash, ndërsa Emily Blunt e përshkroi rikthimin në rolin e saj si të natyrshëm dhe të lehtë. Ajo shtoi se nuk e kishte imagjinuar suksesin e madh dhe ndikimin ndërbrezor që do të kishte filmi origjinal. Interesi i madh për vazhdimin u dëshmua edhe gjatë xhirimeve, kur mijëra njerëz dolën në rrugë për të ndjekur nga afër realizimin e skenave. Në film paraqitet shkurt edhe krijuesja e përmbajtjes Amelia Dimoldenberg, e cila e quajti përfshirjen e saj një moment të pabesueshëm, duke theksuar se filmi kishte ndikuar në zgjedhjen e saj për të studiuar gazetari mode.

Ndërkohë, aktori dhe komediani Caleb Hearon, që luan një nga asistentët e Miranda Priestly, e cilësoi përvojën si emocionuese dhe nder, ndërsa Simone Ashley e përshkroi rolin e saj si një nga kulmet e karrierës, duke vlerësuar bashkëpunimin me aktorët e njohur si një përvojë të çmuar profesionale.

Bang Si-hyuk, producenti i njohur i K-pop-it dhe themeluesi i grupit BTS, mund të përballet me arrestim për akuza të tregtisë mashtruese përpara se kompania e tij, Hybe, të dilte në bursë.

Sipas policisë së Koresë së Jugut, ai dyshohet se në vitin 2019 ka mashtruar investitorët duke pretenduar se listimi publik i kompanisë nuk ishte i mundshëm, ndërkohë që në mënyrë të fshehtë po përgatiste daljen në bursë. Hybe u listua në tregun Kospi në tetor të vitit 2020, dhe autoritetet pretendojnë se Bang përfitoi rreth 200 miliardë won nga kjo situatë. Ai i ka mohuar akuzat.

Rasti është në hetim prej kohësh dhe ka përfshirë kontrolle në selinë e kompanisë, ngrirje të disa aseteve dhe thirrje për dorëheqjen e tij nga posti i drejtuesit. Bang, 53 vjeçari, ka deklaruar se veprimet e tij kanë qenë të rregullta dhe ligjore, ndërsa që nga muaji gusht i është ndaluar të udhëtojë jashtë vendit. Kërkesa për urdhër-arrest vjen vetëm disa javë pasi BTS nisi një turne botëror pas një pauze gati katërvjeçare. Sipas vlerësimeve të industrisë, kompania Hybe mund të përfitojë mbi 1 miliard dollarë nga ky turne, i cili përfshin 34 qytete në mbarë botën.

Njoftimi për turneun ndikoi edhe në rritjen e aksioneve të kompanisë, duke i shtuar mbi 1 trilion won vlerës së tregut. Sipas ligjit në Korenë e Jugut, personat që shpallen fajtorë për përfitime të paligjshme mbi 5 miliardë won mund të dënohen nga pesë vite burg deri në burgim të përjetshëm.