Aktualitet

Hakerët rusë sulmojnë përsëri agjencitë e ShBA-së

Published

5 years ago

May 28, 2021

Betim Gashi

Microsoft paralajmëroi se hakerat rusë që dyshohet të jenë prapa sulmit katastrofik SolarWinds vitin e kaluar, kanë nisur një sulm tjetër kibernetik. Kjo po ndodhë tri javë para se presidenti Joe Biden të takohet me presidentin rus, Vladimir Putin.

Microsoft tha se grupi i njohur si Nobelium, kishte shënjestruar mbi 150 organizata në të gjithë botën javën e fundit, duke përfshirë agjencitë qeveritare, konsulentët dhe organizatat joqeveritare. Ata dërguan email ‘phishing’ – mesazhe mashtrimi për të shtyrë njerëzit që të dorëzojnë informacione të ndjeshme ose për të shkarkuar programe të dëmshme – në më shumë se 3 mijë llogari email, tha gjigandi i teknologjisë.

Të paktën 25% e organizatave të synuara janë të përfshira në zhvillimin ndërkombëtar, punën humanitare dhe të drejtat e njeriut, tha Tom Burt, nënkryetari i Microsoft për sigurinë dhe besimin e klientit. Organizatat në të paktën 24 vende ishin në shënjestër, tha Microsoft, me ShBA-të që morën pjesën më të madhe të sulmeve.

Kjo shkelje vjen një muaj pasi qeveria amerikane tha në mënyrë të qartë se hakimi SolarWinds u krye nga SVR e Rusisë, një pasardhës i operacioneve të huaja të spiunimit të KGB Sovjetike.

Kremlini tha të premten se nuk ka ndonjë informacion mbi sulmin kibernetik dhe se Microsoft duhet t’i përgjigjet pyetjeve duke përfshirë mënyrën se si ky sulm është i lidhur me Rusinë.

Microsoft tha se është në proces të njoftimit të klientëve të cilët janë shënjestruar.

Steve Forbes, një ekspert qeveritar i sigurisë kibernetike, përshkroi rreziqet e këtyre llojeve të hakimeve.

“Nëse ata synojnë 3 mijë llogari, duhet vetëm një punonjës të klikojë në lidhjen për të krijuar një ‘derë të pasme’ për hakerat në një organizatë qeveritare”, deklaroi ai.

Sulmi i SolarWinds, i zbuluar në dhjetor, u dha hakerave akses në mijëra kompani dhe zyra qeveritare që përdorën softuerin SolarWinds IT.

Presidenti i Microsoft, Brad Smith, e përshkroi atë sulm si “sulmin më të madh dhe më të sofistikuar që ka parë bota”.

Lajmet

Gjendet e vdekur një grua në Prishtinë

Published

3 minutes ago

July 21, 2026

UBTNews

Një grua është gjetur pa shenja jete mbrëmjen e së hënës në Prishtinë.

Sipas raportit 24-orësh të Policisë së Kosovës, ngjarja ka ndodhur rreth orës 23:15, me ç’rast njësitë policore dhe ekipi mjekësor kanë dalë menjëherë në vendin e ngjarjes, ku edhe është konstatuar vdekja e viktimës.

Me vendim të prokurorit, trupi i pajetë është dërguar në Institutin e Mjekësisë Ligjore për obduksion, ndërsa rasti vazhdon të hetohet. /E.A/

Lajmet

Arrestohet një grua në Lipjan, dyshohet për shantazh ndaj një burri

Published

6 minutes ago

July 21, 2026

UBTNews

Një grua është arrestuar në Lipjan nën dyshimin se ka shantazuar një burrë.

Sipas raportit 24-orësh të Policisë së Kosovës, e njëjta dyshohet se veprën penale “Shantazh” ndaj viktimës e ka ushtruar për disa muaj me radhë.

E dyshuara, pas intervistimit dhe me urdhër të prokurorit kujdestar, është liruar në procedurë të rregullt. /E. A/

Lajmet

Paradite mot i ngrohtë, pasdite priten reshje lokale e rrufe

Published

13 minutes ago

July 21, 2026

UBTNews

Të martën mbi vendin tonë do të mbajë mot i ngrohtë, ku temperaturat minimale në orët e mëngjesit do të lëvizin nga 14°C deri në 17°C.

Ndërkohë, ato maksimale gjatë ditës pritet të ngrihen duke arritur nga 28°C deri në 32°C.

Gjatë ditës do të fryjë erë kryesisht nga jugperëndimi dhe perëndimi me intensitet të lehtë deri mesatar, me shpejtësi prej 2 deri në 8 m/s.

Ndryshim i lehtë i motit parashihet gjatë orëve të pasdites dhe mbrëmjes, ku në vende-vende priten reshje lokale shiu të shoqëruara edhe me shkarkime rrufesh. /E.A/

Lajmet

Breshëri dëmton rreth 90% të të mbjellave në Istog

Published

19 minutes ago

July 21, 2026

UBTNews

Stuhia e fuqishme e breshërit që goditi komunën e Istogut ka shkaktuar dëme materiale në sektorin e bujqësisë.

Siç raporton RTK, vlerësimet fillestare të autoriteteve lokale tregojnë se rreth 90 për qind e sipërfaqeve të mbjella në këtë territor mund të jenë prekur nga moti i ligë.

Drejtori i Bujqësisë në Komunën e Istogut, Artan Gegaj, bëri me dije për RTKlive se, ndonëse ende nuk ka një bilanc përfundimtar, stuhia ka dëmtuar një pjesë të madhe të kulturave bujqësore.

Ai njoftoi se nga mëngjesi i së martës do të formohen komisionet përkatëse për të dalë në terren me qëllim evidentimin e saktë të dëmeve dhe identifikimin e fermerëve të prekur.

Sipas Gegës, Komuna e Istogut dhe kryetari Ilir Ferati do të angazhohen për t’u dalë në ndihmë fermerëve gjatë procesit të vlerësimit. Gjithashtu, ai i bëri thirrje Ministrisë së Bujqësisë për mbështetje emergjente, duke theksuar se “dëmet janë jashtëzakonisht të mëdha dhe kërkojnë ndërhyrje të menjëhershme”. /RTK/