Organizata e Kombeve të Bashkuara ka shprehur keqardhje të thellë për vendimin e presidentit të SHBA, Donald Trump, për të nënshkruar një urdhër ekzekutiv që autorizon sanksione ekonomike të ashpra kundër Gjykatës Ndërkombëtare Penale (GJPN).

“Na vjen shumë keq për sanksionet individuale të shpallura ndaj personelit të GJPN-së dhe bëjmë thirrje që kjo masë të anulohet,” deklaroi zëdhënësja e Zyrës për të Drejtat e Njeriut të OKB-së, Ravina Shamdasani, sipas raportimeve të Agence France-Presse (AFP).

“Gjykata dënon vendimin e Shteteve të Bashkuara për të vendosur sanksione ndaj zyrtarëve të saj, duke përpjekur të dëmtojë punën e saj të pavarur dhe të paanshme,” u shpreh Gjykata në një deklaratë.

“Gjykata mbështet plotësisht stafin e saj dhe është e përkushtuar të vazhdojë të ofrojë drejtësi dhe të rikthejë shpresën për miliona viktima të pafajshme të mizorive në mbarë botën, sa herë që është e nevojshme,” thuhet në deklaratën e GJPN-së.

Presidenti amerikan Donald Trump nënshkroi një urdhër ekzekutiv për të vendosur sanksione ndaj GJPN-së, të cilën ai e akuzon për “veprime të paligjshme dhe të pabaza kundër Shteteve të Bashkuara dhe aleatit tonë Izraelit”.

Si pjesë e sanksioneve, zyrtarëve të GJPN-së dhe punonjësve të tjerë u ndalohet hyrja në SHBA, gjithashtu ndalohen dhe anëtarët e familjeve të tyre të ngushta si dhe kushdo që mendohet se ka bashkëpunuar me hetimet e Gjykatës. Pasuritë e tyre në SHBA gjithashtu do të ngrihen.

Nga ana e tij, ministri i Jashtëm izraelit, Gideon Sha’ar, ka “përgëzuar” vendimin e Trump, duke shtuar se ata bëjnë thirrje që 125 shtetet anëtare të bashkohen në mbështetje të drejtësisë dhe të drejtat themelore të njeriut.

Ukraina ka thënë se beson se Gjykata Ndërkombëtare Penale do të vijojë punën në lidhje me krimet ruse të luftës, pavarësisht sanksioneve të vendosura ndaj kësaj gjykate nga Donald Trump.

Sipas mediave të huaja, Trump autorizoi sanksione ekonomike dhe të udhëtimit, që synojnë njerëzit që punojnë për hetimet e kësaj gjykate ndaj qytetarëve amerikanë ose aleatëve të SHBA-së si Izraeli.

Gjykata Ndërkombëtare Penale është një gjykatë e përhershme që mund të ndjekë penalisht individë për krime lufte, krime kundër njerëzimit, gjenocid dhe krim agresioni kundër territorit të shteteve anëtare ose nga shtetasit e tyre kundrejt një vendi tjetër.

Zëdhënësi i Ministrisë së Jashtme të Ukrainës, Heorhii Tykhyi, tha në një konferencë në Kiev: “Ne jemi të bindur se GJPN-ja do të vazhdojë të përmbushë funksione të rëndësishme në rastin e Ukrainës, në veçanti duke sjellë para përgjegjësisë kriminelët rusë të luftës”.

“Ne e dimë se marrëdhëniet midis SHBA dhe Gjykatës Ndërkombëtare Penale kanë një histori të gjatë“, tha ai më tej.

Forcat ruse kanë marrë kontrollin e qytetit Toretsk në Ukrainën lindore, ka thënë Ministria ruse e Mbrojtjes.

Sipas mediave të huaja, një luftë e madhe për qytetin filloi në qershor të vitit të kaluar, me luftime të ashpra për kontrollin e tij që atëherë.

Nuk ka qenë e mundur të verifikohet në mënyrë të pavarur raporti i fushëbetejës.

Rusia e quan qytetin me emrin Dzerzhynsk të epokës sovjetike dhe thotë se rajoni lindor i Ukrainës Donetsk tani është pjesë e Rusisë, një pohim që Kievi e kundërshton.

Forcat ruse gjithashtu vazhdojnë të shtyjnë drejt Pokrovsk, një qendër kryesore logjistike afërsisht 50 kilometër në jugperëndim të Toretsk dhe drejt Chasiv Yar në veri.

Teksa Moska po vijon sulmet në Ukrainë, Kievi nga ana tjetër vijon ofensivën në rajonin Kursk brenda Rusisë, ku ditën e sotme pretenduan se kishin avancuar me 3 kilometër më në thellësi.

Teksa ende nuk ka një marrëveshje për t’i dhënë fund luftimeve, kujtojmë se Presidenti i SHBA-ve, Donald Trump, arritjen e armëpushimit mes dy vendeve e kishte një nga ‘armët’ më të forta gjatë fushatës elektorale.

Stafi i Agjencisë Amerikane të Ndihmës së Huaj mund të zvogëlohet nga rreth 10,000 në më pak se 300 në nivel global, pasi administrata Trump po bën shkurtime të mëdha në shpenzimet qeveritare.

Sipas mediave të huaja, të gjithë, përveç një numri të vogël të stafit thelbësor, tashmë është vendosur që të vendosen në leje administrative në mesnatën e së Premtes, duke përfshirë mijëra punonjës që ndodhen jashtë vendit. Një njoftim në internet thotë se po përgatitet një plan për udhëtimin e kthimit dhe përfundimin e ‘misionit’ të kontraktorëve jo thelbësorë.

Një sindikatë që përfaqëson punonjësit, e cila është e përfshirë në një sfidë ligjore ndaj planit, i tha partnerit amerikan të BBC-së CBS News se vetëm 294 persona staf janë konsideruar thelbësorë.

Shkurtimet e Trump ndaj USAID-it, të mbështetura nga këshilltari i tij për uljen e kostove, Elon Musk, kanë ndryshuar sistemin global të ndihmës, me qindra programe tashmë të ngrira në vende anembanë botës.

Ekipi i tij akuzon USAID-in për shpërdorim të parave të taksapaguesve dhe dështimin për t’u përafruar me prioritetet e politikës “America First”.

Sondazhet kanë treguar skepticizëm mes shumë amerikanëve për ndihmën e huaj. Një sondazh i AP-NORC nga marsi 2023 sugjeroi se deri në nëntë në 10 republikanë mendonin se vendi po shpenzonte tepër.

SHBA është deri tani ofruesi më i madh i vetëm i ndihmës humanitare në mbarë botën. Ajo ka baza në më shumë se 60 vende dhe punon në dhjetëra të tjera, me pjesën më të madhe të punës së saj të kryer nga kontraktorët e saj.